یونگچیسچانّی دوس 10 - New Testament in Ladakhi Langage

فرشتا تانگ ثیلچیسچانّی شوقبُو چھونگون۔

¹ تینے نگے یانگ فرشتا ماجیگسپوجیگ نامکھانے بابسین تھونگ۔ کھونگی ثینّی کوسلاگ گونتے کھونگی گوبو زاچھوتھونگی سکورتے دوگ۔ کھونگی ژالدونگ نی، نییما تسوگسلا لدانگشان یانگ ژابسگون میے بارکھانّی کاوا ژوگس دوگ۔

² کھونگی چھاگّا پھیسکھانّی ثیلچیسچانّی شوقبُو چھونگونجیگ نامستے دوگ۔ کھونگی کانگما یاسپابو گیاتشویکا یانگ یومابو سا سکامپویکا بورّا زادتے دوگ۔

³ تے فرشتابوے سینگّے تسوگسلا کُوچو ثانٹے سالس، یانگ کھونگی کُوچو سالّاچیگ، ڈوگلدیرکھان ردونکوے لانسالس۔

⁴ ڈوگلدیر ردونّی مولکھانگون نگے ڈِیچیس یودپین، اِین نانگ نگے نامکھانے سکادچیگی، ”تے ڈوگلدیر ردونّی مولکھان تشانگما سانگوے نانّگا بور، تیگون ڈی ماڈی“ مولین تشور۔

⁵ تینے گیاتشو تانگسا سکامپویکا جانگستے یودکھانّی فرشتے، رانگی چھاگ یاسپابو نامکھا چھوگسلا تھونپوا کیانگس۔

⁶ یانگ کھوے تُوسگیُونّے گیُون ژوگسکھانّی خُدے نا کھورس، کھونگی نامکھا تانگ تینانّگا یودکھان تشانگما، دُنیا تانگ تینانّگا یودکھان تشانگما، یانگ تشو تانگ تینانّگا یودکھان تشانگما چوا زادتے این۔ تے فرشتے مولس، ”تا کھونگ ثونگستے دوگّا میزاد۔

⁷ اِین نانگ فرشتا ردونپابوے کھورانگی تونگ پھواچیگ، خُدے سانگوے تھابسپو ڈانڈا ڈوبین، کازوگ کھونگی کھونگرانگی یوگپو پیغمبر گونلا گاموےناتسُول شادتےاینپین۔“

⁸ تینے نامکھانے تشورکھانّی سکادپوے، نگا یانگ مولّاراگ، ”لدُونلا سونگتے گیاتشو تانگ سا سکامپویکا لانگستے یودکھانّی فرشتابوے لاگنے تے ثیلچیسچانّی شوقبُو پھیستے یودکھانبو لین۔“

⁹ تینے نگا تے فرشتابوے لدُونلا سونگتے کھونّگا، تے ثیلچیسچانّی شوقبُو چھونگون پھیسکھانبو سال زیرتے جُووا پھولپین۔ کھونگی مولّاراگ، ”یبو لین یانگ زوستونگ، تیبو کھیرانگی کھے نانّگا رانگسی ژوگس نگارمو، اِین نانگ ٹودپے نانّگا کھانتے گیورین۔“

¹⁰ نگے تے فرشتابوے چھاگنے ثیلچیسچانّی شوقبُو بو لینتے زوسپا، نگے کھے نانّگا تیبو نگارمو راگپین، اِین نانگ سمیدّاچیگ، کھانتے گیورتے نگے ٹودپا ناگس ستانس۔

¹¹ تینے نگا مولّاراگ، میگون، میرگیودگون، سکادریگسگون تانگ، گیالپوگونّی سکورلا کھیرانگی یانگسکیار لونگستان تانگوس۔