پھیلیپیپا 4 - New Testament in Ladakhi Langage1 تینّابویپھیا فونو گون، نگے چامسپا چوکھان تانگ تھوگچیسلا نگا رینگسین یود، کھیوجا نگے سکیدپو تانگ تھورشوگ این۔ نگے چیسپے دزاوگون حضرت عیسیٰ مسیح نانّگا ستانپو دوگشیگ۔ سپوسپے سپیراگون۔ 2 نگے سپونمو یُوؤدیہ تانگ سْونتْیکے ، کھیوجا نیسکوے نانّگا میڈیگچیس یودکھانگون میدکھان چوستے جوجو تھونشیگ، چیازیرنا کھیوجاگون مسیح اینوگ۔ 3 یانگ نگے ایمان چان ٹوپا کھیرانگی، تے بومو نییسکا تھونچوگچیسّی نانّگا روگس چوس۔ کھونگونی نگا نیامپو حضرت عیسیٰ مسیح گاموےناتسُول شادچیسّی نانّگا ثانٹے سونڈوس چوس، یانگ کلیمینت تانگ نگے جان ٹوپاگون نیامپوانگ لاس چوستے اینپین، کاگونّی مینگ میتشیے شوقبُوئ نانّگا خُدے ڈِیازادتے اینوگ۔ 4 حضرت عیسیٰ مسیح نانّگا توسگیون تھادپو دوگشیگ۔ نگے یانگسکیار زیرّاد تھادپو دوگشیگ۔ 5 کھیوجا پاسمو اینکھانبو کھیوجے سچودپا گیُودتے تشانگمالا تھونگچوگشیگ۔ رجید مارجید، مسیح گیوگسپا لوگستے پھیبسّا زادِین۔ 6 چیجیگی پھیانگ تشیر ماتشیرشیگ، اِین نانگ ناسلوگ تشانگمے نانّگا خُدا دُعا پھولین کھیوجاگونّی گھوسدومگون سالچیسلا جُووا پھول زانے شُکر ژوشیگ۔ 7 تینے نگاتانگونلا خُدے جیدے تھوبین، کا بو نگاتانگونّی ہاگونے تھالتے یود، یانگ حضرت عیسیٰ مسیح نانّگا کھونگی جیدیے، کھیوجے سنینگ تانگ سیمس گُون سکیوبستے بورّا زادِین۔ 8 ستینگجوگا، فونو گون، لدینبا اینکھان، سیوے اوسپا، ٹانگپو چوکھان، ژانگما، چیسپاچان، ستودپے اوسپاچان یا تیگونّی سانگ مانّگا ٹاگپو تانگ ستودپے اوسپا تھوبچیسچان گونّیکا کھیوجے سامبابو ستانپو بورشیگ۔ 9 کھیوجاگونّی نگے کانے لوبسکھان، یا تھوبکھان، یا تشورکھان، یا نگے چوالا تھونگکھان گُون لاگلینّی نانّگا کھیونگشیگ، تینے جیدے خُدے کھیوجاگون نیامپو جوگساین۔ حضرت پولُسی کھونگونی سکییسپوا شُکر جْوس ۔ 10 تا ستینگجوگا کھیوجاگونّی نگے پھیا یانگسکیار سنانّگا تانگس پاسانگ، نگے مسیح ا ستودپا پھولّاد۔ تانتانلا کھیوجاگونّی توسگیون نگے پھیا تشیرکھا چوادپین، اِین نانگ نگا روگس چوچیسّی سکابس کھیوجاگونلا ماتھوبّا اینوگ۔ 11 نگے تیبو نگا گھوسدوم یود پاسانگ زیرّامید۔ نگا ناسلوگ تشانگمے نانّگا تشیمستے سکیدپو دوگچیسپو ہاگوتے این۔ 12 گھوسدومی نانّگا یا مانگستیانگ یودچیسپو، کازوگشیگ یونگچین نگا گیوسیود، یانگ ناسلوگ تشانگمے نانّگا سکیدپو نیامپو دوگچیسّی سانگوابو نگا ہاگوتے یود، یانگنا نگا زاگیو مانگپو یودڈو یا ستوگریا، نگا مامانگپو یودڈو یا گھوسدومی نانّگا۔ 13 مسیح نگا شید سالچیسپوے نگا ناسلوگ کازوگشیگ اِین نانگ کھور تھوبّاد۔ 14 تینیانگ نگے ردوگنگالگونّی نانّگا تھوستے نگا روگس چوچیسپو کھیوجے نگا شزدے زادتے اینوگ۔ 15 فِلپّی عبادت خانہ کھیوجا گیوس اینّوگ، نگے گومارانگ کھیوجا گاموےناتسُول کھیونگستے، مکدنیہ یولنے نگا چھا زانے، کھیوجا مانپا یانگ سو عبادت خانہ شیگّانگ نگے گھوسدومی نانّگا روگس ماچوس۔ 16 یانگ نگا تھسلُنیکے گیالسے نانّگا گھوسدوم یود زان یانگ، کھیوجاگونّی نگا لان مانگپو سکییس کالس۔ 17 نگے تیبو کھیوجاگونّی نگا سکییس کالتے لیبچیسّی پھیا زیرتے مان اِین نانگ خُدے کھیوجا سالچیسّی شزدے پویکا نانتے سالّا زادچیسلا زیرّاد۔ 18 فونو اِپفردِتُس نیامپو کھیوجے نگا کالکھانّی سکییسگون نگے گھوسدومی سانگ مانّگا دوگپین، تا نگا یانگ چانگ گھوسدوم مید۔ تیگون نی ٹیجیم چانّی چھودپا، خُدے تھوگستھادکھان تانگ اوسپا اینوگ۔ 19 یانگ نگے خُدے حضرت عیسیٰ مسیح گیُودتے کھونگرانگی شان ّی پانگزودنے کھیوجاگونلا گھوسدوم یودکھان تشانگما سالّا زادِین۔ 20 نگاتانگی خُدے تانگ یابّا تُوسگیُونّے گیُون سپال تھوبشیگ، امین۔ ستینگجوگی سلام۔ 21 حضرت عیسیٰ مسیح نانّگا ایمان یودکھانّی می ہلژخمہ گونلا سلام جُوس، یانگ نگا نیامپو یودکھانّی فونو گونّیانگ کھیوجاگونلا سلام جُوروگ۔ 22 یرو یودکھانّی جانیانگ می ہلژخمہ، میگسالّی رومی گیالپوے کھارّی نانّگا لاس چوکھانگونّیانگ، کھیوجاگونلا سلام جُوروگ۔ 23 حضرت عیسیٰ مسیح شزدے کھیوجاگونّی سیمس نیامپو جُوگسشیگ، امین۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation