پھیلیپیپا 2 - New Testament in Ladakhi Langageحضرت عیسیٰ سی ڈولّا زادکھانّی پاسموے لامیکا ڈول۔ 1 مسیح اینچیسپوے کھیوجاگونلا سپوسپا ماکھیونگسّا؟ چی مسیح چامسپے نانّگا سیمسدے میراگّا؟ چی کھیوجاگون خُدے رُوح نیامپو ڈیلتے میدّا؟ چی کھیوجاگونلا مسیح یاشا تانگ سنینگرجے ماتھوبّا؟ 2 کالتیس کھیوجے نانّگا تے تشانگما یودنا، سنینگ چیگ گیورتے، چیگ تانگ چیگّا چامسپا چوستے، سیمس تانگ دودپے نانّگا چیگ گیورتے نگے تھادپوگون ڈانڈا ڈوبچوگشیگ۔ 3 چیجیگّانگ رانگدود یا جانمے سیوا تھوبچیسّی ریوے نانّگا ماچوا، سیمس پاسمو نیامپو جانما رانگی سانگ مانّگا رینچان سامستے چوسشیگ۔ 4 کھیوجا ریرے رانگدون چیگپو ماچوا، جانمے پھانتھوگسّی پھیانگ سامبا تونگشیگ۔ 5 کھیوجاگونّی سامتشول حضرت عیسیٰ مسیح ژوگس یونگّوشیس اینوگ۔ 6 جان کھونگ کھونگرانگ خُدے اینتیانگ، کھونگی خُدے ڈانڈا اینکھانّی کوسابو تھامستے بورین مانے سامّا مازادس۔ 7 اِین نانگ کھونگی نامکھے نانّگا یودکھان تشانگما پھانّگا زادتے، یوگپو ژوگس گیورّا زادتے، میی تشولّا سکییا زادس۔ 8 کھونگرانگ پاسمو چوا زادتے، شیچیس تشوگپانگ خُدے کھانیانّا زادس، یانگنا ماثانٹے ردوگنگالچانّی کیانگشینگیکا ڈونگشیسپوانگ۔ 9 تینّابویپھیا خُدے کھونّگا تشانگمیسانگ سیواچانّی ناسّیکا ستاگّا زادس۔ یانگ تشانگمیسانگ سیستانگچانّی تشانبو سالّا زادس۔ 10-11 تینّا گیونتشانبوے پھیا حضرت عیسیٰ سی تشان سنگون زانے، نامکھے نانّگا، دُنیائیکا یانگ سے یوگا، سروک یودکھان تشانگمے پِیکدونگ ژُوگستے حضرت عیسیٰ مسیحانی مسیح اینوگ زیرین، تیبوے خُدے یابّا سپال کھیونگا زادِین۔ دُنیائی نانّگا اوت ژوگس گیور۔ 12 نگے چیسپے دزاوگون، نگا کھیوجاگون نیامپو یود زانے، کھیوجے توسگیون نگے لابجاگون کھانیانتے ڈولّا تسوگسلا، نگا کھیوجا نیامپو مید زانے تیسانگ مانّگا کھانیونشیگ۔ یانگ خُدا سیوا تانگ کھونگی جیگسّی نانّگا ستانّا زادکھانّی لامیکا ڈولین تھارپے پھیا سونڈوس چوشیگ۔ 13 چیازیرنا خُدے کھونگرانگی کھیوجاگونّی نانّگا چھاگلاس زادتے کھونگ تھوگستھادکھانّی لاس چوچیسلا دودپا تانگ کھیود سالّا زادّانوگ۔ 14-15 سوجیگیانگ کھیوجاگونلا سکیون کال مینیانچیسّی پھیا، چیجیگ چونانگ زیرگیو ماتانّگا یا زیرلین میدپا چوسشیگ۔ یانگ خُدے ٹھوگو تسوگسلا، کھیوجے میتشیبو نونگسمید تانگ، ژانگماجیگ پھودشیگ۔ تینے گوبسکورکھان تانگ دِیگپاچان گنگستے یودکھانّی دُنیائی نانّگا کھیوجاگون سکارما لدانگشان تسوگسلا تھونگین ۔ 16 تھامیدپے میتشے کھیونگکھانّی کا بو ستانپو تھامستے دوگشیگ، تینے حضرت عیسیٰ مسیحالوگستے پھیبسچیسّی جاگّا، کھیوجاگونّی ٹوا نگے سونڈوس تشانگما تونمیدلا ماچھا، نگا کھیوجاگونّیکا پھوسو تشورین۔ 17 نگے میتشیبو کھیوجاگونّی ایمان چانّی جابستوگی چھودپا پھولکھانّیکا چھوپھود تسوگسلا پھونانگ نگا تھادپو راگ، یانگ نگے کھیوجاگون نیامپو سکیدپو چوین۔ 18 اونا، کھیوجاگونّیانگ نگا نیامپو تھادپو تانگ سکیدپو چوگوشیس اینوگ۔ تِیمُتھیُس تانگ اِپفردِتُسی سکورلا۔ 19 کالتیس حضرت عیسیٰ مسیح گونگسپا سالنا، نگے تِیمُتھیُس کھیوجیکا گیوگسپا لامچوگچیسّی ریوا بورّاد۔ تینے کھوے کھیوجاگونّی سکورلا ناتشول شادتے نگا تھادپو چھاچوگاین۔ 20 ایکا کھیوجاگون ایمانی نانّگا لدانّادا لدانّا مید سامستے لدینبے تشیرکھا چوکھان کھو مانے یانگسوجیگّانگ مید۔ 21 چیازیرنا جانما تشانگمے رانگدود مانے حضرت عیسیٰ مسیح تھوگسدودّی پھیا تشیرکھا چوا میدوگ۔ 22 اِین نانگ کھیوجاگونلا تِیمُتھیُس کھورانگ ایمان چان ستانکھانبو گیوس اینّوگ، چیازیرنا کھوے بُوژا جیگی رانگی ابا جابستوگ جوا تسوگسلا، گاموےناتسُول شادچیسّی نانّگا نگا نیامپو جابستوگ جْوس تے این۔ 23 ایکا نگا نیامپو جونگچیسپو ہاگواچیگ، نگے کھو کھیوجیکا لامچوگچیسّی ریوا این۔ 24 نگا لوکھیل راگ، مسیح نگانگ کھیوجاگون یودسا گیوگسپا یونگ چوگّا زادِین۔ 25 اِین نانگ نگے فونو ، ٹوپا تانگ ٹوپا ماگمی اینکھانّی اِپفردِتُس کھیوجیکا لوگستے لامچوگچیسپو کھاگچان سام۔ کھو کھیوجے تشابس چوستے نگے گھوسدوم گونلا ستاستوگ چوچیسّی پھیا کھیوجاگونّی لامچوگستے این۔ 26 کھو کھیوجا تشانگما ثانٹے تھوگنیین دوگ، یانگ کھیوجاگونلا کھوا زُومو دوگ زیرتے تشیرچیسپو تشور پاسانگ، کھوے کھیوجاگونّی پھیا تشیرکھا چوروگ۔ 27 تانتانلا کھوا زُومو ثانٹے یونگس، یانگ شیچیس یودپین۔ اِین نانگ خُدے کھویکا شزدے زادس، کھو چیگپویکا مانپا، نگا تشیرکھیکا تشیرکھا می جونگچیسّی پھیا نگیکانگ شزدے زادس۔ 28 کھیوجاگونّی کھو تھونگستے تھادپو چھاچیس تانگ نگے سیمسّی نانّگانگ کھیوجے پھیا تشیرکھابو نیونگون چھاچیسلا کھو کھیوجیکا لامچوگچیسّی نگا دودپا چھینمو راگ۔ 29 ماثانٹے تھادپو نیامپو کھیوجاگونّی مسیح نانّگا کھوا رانگی فونو تسوگسلا گاسوس جْوس ، یانگ کھو تسوگسّی میگونلانگ سیوا چوس۔ 30 چیازیرنا مسیح جابستوگی نانّگا کھوے کھورانّگا سنانّگا ماتانّگا، کھیوجے تشابسلا نگا روگس چوین کھو شیچیسلا تھوگ۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation