پھیلیپیپا 1 - New Testament in Ladakhi Langageحضرت پولُسی سلام ژو۔ 1 ای ایگیبو حضرت عیسیٰ مسیح جابستوگپا حضرت پولُس تانگ تِیمُتھیُس چھوگسنے این۔ نگے فِلپّی ڈونگکھیرّی نانّگا حضرت عیسیٰ مسیح اینکھانّی می ہلژخمہ گون، اُسکیون گون تانگ جابستوگ جوکھانگونلا ڈِیاد۔ 2 نگاتانگی خُدے یاب تانگ حضرت عیسیٰ مسیح کھیوجاگونلا شزدے تانگ جیدے سالّا زادچیسلا نگاجے دُعا جُواد۔ حضرت پولُسی فِلپّی عبادت خانہ لا دُعا جْوس ۔ 3 کھیوجاگون ایدتو چو زانے، نگے نگارانگی خُدا شُکر جُواد۔ 4 یانگ توسگیون نگے کھیوجاگونّی پھیا تھادپو نیامپو دُعا پھولّاد۔ 5 چیازیرنا کھیوجاگونّی ایمان چوسپانے پھارلا داگسا تسوگسپا، گاموےناتسُول پھیلچیسّی چھاگلاسّی نانّگا نگا روگس چوینجیگ این۔ 6 یانگ کھیوجاگونّی سیمسّی نانّگا ای چھاگلاس زانگپوبو گوزوگ زادکھانّی خُدے، حضرت عیسیٰ مسیحالوگستے پھیبچیسّی جاگّا، تے چھاگلاسپو ڈانڈا ڈوبچوگّا زادچیسپو نگا لوکھیل راگ۔ 7 کھیوجا نگے سنینگی نانّگا لوس پاسانگ، نگے کھیوجا تشانگمے سکورلا تیزوگ سامچیسپو رانگژین اینوگ۔ نگا تسونّی نانّگا یا ٹھیمسکھونّگا گاموےناتسُول سکیوبین، یانگ تیبو لدینبا اینکھانبو ستانین یودڈو، خُدے شزدے گیُودتے کھیوجاگونّانگ نگا نیامپو کھونگی جابستوگی نانّگا ڈِیستے اینوگ۔ 8 نگیانگ کھیوجا، حضرت عیسیٰ مسیح تسوگسلا چامسپا چوچیسپوے، نگا کھیوجا تشانگما یانگسکیار تھوگچیسلا رینگسین یودکھانبوے، گواہ خُدے این۔ 9 نگے دُعا جُواد، خُدے کھیوجا چیگ تانگ چیگّا چامسپا چوچیسّی نانّگا شیسرابس تانگ ہاگو مانّگا سالّا زادشیگ۔ 10 مسیحا لوگستے پھیبچیسّی توس تشوگپا، سیمس لاگمو تانگ نونگسمید لوسشیسّی پھیا، تشانگمیسانگ کھاگچان چی اینکھانبو کھیوجا گیُوس چھاچیسلا، نگے دودپا چواد۔ 11 حضرت عیسیٰ مسیحاگیُودتے، ٹانگپو ڈاسبو یونگکھان نیامپو کھیوجے رانگی میتشیے سکونگشیگ، تیبوے خُدا سپال تانگ ستودپا کھیونّگانوگ۔ گاموےناتسُولّی یارگیاس۔ 12 فونو گُون، نگے سامّاراگ کھیوجاگونلا ایبو گیُوس چھاگوس۔ نگا جونگکھان تشانگمے گاموےناتسُولّی یارگیاسّی نانّگا روگس چوستے این۔ 13 گیالپوے کھارّی نانّگا یودکھانّی ماگمی تانگ جانمی تشانگما، مسیح جابستوگ ژوچیسپوے، نگا تسونلا کاگسکھانبو ہاگوتے اینوگ۔ 14 یانگ نگا تسونلا کاگچیسپوے، حضرت عیسیٰ مسیح یکا ایمان بورکھان فونو مانگپوجیگّانگ سیمسّتوبس سکیستے، ہامپا نیامپو جیگشیس میدپا، خُدے حُکم جانماگونلا شادین اینوگ۔ 15 کھاچیگی نگیکا تشیگچیس یونگستے مینگچان گیورچیسّی دودپا بورتے مسیح سکورلا شادچیسپو لدینبا اینوگ۔ اِین نانگ جان کھاچیگی مسیح سکورلا سیمس زانگپوے تھوگنے شادین اینوگ۔ 16 یاشے نانّگا مسیح سکورلا شادکھانگونلا، خُدے گاموےناتسُول سکیوبچیسلا نگا یرو بورّا زادکھانبو ہاگوتے اینوگ۔ 17 اِین نانگ نگیکا تشیگچیس یانگ مینگچان گیوردوت یودتے مسیح سکورلا شادکھانگونّی سیمس زانگپوے تھوگنے ماشادّا، نگا تسونّی نانّگا یودتوس ناگس مانّگا تھونگچوگچیسّی پھیا شادین اینوگ۔ مسیح پھیا حضرت پولُسی میتشے۔ 18 گیونتشانبو زانگپو اینڈو یا نگانپا، تیبو کھاگچانجیگ مانوگ، کھاگچانبو نی مسیح سکورلا گاموےناتسُول شادین یودکھانبو اینوگ، تینّابویپھیا نگا تھادپو این۔ اونا نگے تارُوانگ تھادپو چوین۔ 19 کھیوجاگونّی دُعا تانگ حضرت عیسیٰ مسیح رُوح بوے روگس گیُودتے، نگا تے ردوگنگالگونّے تھارپا تھوبچیسپو نگا گیوسیود۔ 20 نگے سیمسّی دودپا تانگ ریوا چھینموبو مسیح سکورلا شادچیسلا ٹھیل ماٹھیلّا سیمسّتوبس نیامپو شادچیسپو این، کازوگ نگے چوین یونگستے این۔ تا نگا شینا یا نگا سونّانگ، نگارانگی میتشیے نانّگا مسیحا سیوا کھیونگچیسپو نگے دودپا این۔ 21 نگا سونتیا دوگچیسپو نی مسیحا سیوا کھیونگچیسّی پھیا این، یانگ شیچیسپو نی نگے پھیا تیسانگ مانّگا پھانتھوگسچانجیگ این، چیازیرنا نگا کھونگ نیامپو لوسین۔ 22 نگا ای زوگسپوے نانّگا دوگنا، نگے مسیح پھیا ڈاسبو سمین چوگاین، اِین نانگ نگا چانگ گیوسمیدتے نیسکوے نانگنے کا بو گیالّا این۔ 23 نگے سیمسّی نانّگا تھےژومس راگ، تے نیسکوے نانگنے کا بو نگے لداماین۔ نگا ای دُنیا بو پھانگستے مسیحا نیامپو نامکھے نانّگا لوسشیسّی دودپا راگ، کا بو نگے پھیا مانّگا گیالّاجیگ این۔ 24 اِین نانگ نگا تارُوانگ کھیوجاگون نیامپو لوسشیسپو، کھیوجاگونّی پھیا مانّگا پھانتھوگس چھیا اینوگ۔ 25 کھیوجاگون ایمانی نانّگا لدانچیس تانگ تھادپو چوچیسّی پھیا، نگا کھیوجاگون نیامپو دوگچیس یانگ ای زوگسپوے نانّگا تارُوانگ لوسشیسپو، نگا تھےژومس میدپا گیوسیود۔ 26 نگا یونّگاچیگ، کھیوجاگونّی حضرت عیسیٰ مسیح مانّگا ستودپا پھولین، چیازیرنا کھونگی نگا کھیوجاگونّیکا لوگستے کھیونگا زادس۔ نامکھے یولمی تسوگسلا دُوگوس۔ 27 تشانگمیسانگ کھاگچانبو، کھیوجاگونّی مسیح گاموےناتسُولّی پھیا اوسپاچانّی میتشے جیگ پھودگوشیس اینوگ۔ نگا کھیوجاگون یودسا یونگستے تھونگین یا نگا کھیوجاگونّی سکورلا تشورین، گاموےناتسُولّی لونبوے پھیا، کھیوجاگون سیمسّی نانّگا چیگڈیل سونگتے ماگمی چیگی تشولّا نولاین دوگچیسپو نگا گیوسچھین۔ 28 چیتشانگمے نانّگا گیابگال چوکھانگونّی کانے جیگس ماجیگس۔ کھونگونلا میجیگسشیسپو نی کھونگون میدکھان چوا زادچیس، یانگ کھیوجاگون سکیوبّا زادچیسّی ستاگس شیگ اینوگ، خُدے تے تشانگما جونگ چوگّا زادِین۔ 29 خُدے کھیوجاگونلا مسیحا ایمان چوچیس چیگپو مانپا، کھونگی پھیا ناگھسباردو تھونگچیسّی سیوابو سالّا زادتے این۔ 30 کھیوجاگونّانگ نگا جونگسکھانّی ناگس ژوگس تھونگین اینوگ، نگا ناگس تھونگکھانبو کھیوجاگونّی تھونگتے اینوگ، یانگ نگا تارُوانگ تھونگین یودکھانبو کھیوجے تشورین اینوگ۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation