پھیلیمون 1 - New Testament in Ladakhi Langageحضرت پولُسی چھوگسنے سلام۔ 1 ای ایگیبو حضرت عیسیٰ مسیح تونلا تسونپا حضرت پولُس تانگ نگاتانگی فونو تِیمُتھیُس چھوگسنے این۔ نگے نگاجا نیامپو لاس چوکھان ٹوپا چیسپا پھیلیمونلا ڈِیاد۔ 2 یانگ نگاجے سپونمو اپھیا، مسیح پھیا ماگمی ٹوپا فونو ارخِپُس تانگ کھیرانگی کھانگپے نانّگا دزوماین یودکھانّی عبادت خانہ لانگ ڈِیاد۔ 3 نگاجے دُعا پھولّاد، خُدے نگاتانگونّی یاب تانگ حضرت عیسیٰ مسیح ا گُونی کھیوجاگونلا شزدے تانگ جیدے سالشیگ۔ حضرت پولُسی دُعا تانگ شُکر جْوس ۔ 4 پھیلیمون کھیرانگی پھیا دُعا چوزانے، نگے توسگیون خُدا شُکر جُواد، 5 چیازیرنا کھیرانگی حضرت عیسیٰ مسیح نانّگا ایمان تانگ، خُدے می ہلژخمہ تشانگمے پھیا چیسپا یودکھانبوے سکورلا تشور۔ 6 مسیح نگاتانگونلا سالّا زادکھان برکت تشانگما کھیورانّگا سنینگی تھیلنے ہاگوتے، جانماگون نیامپو کھیرانگی ایمان بو گونیانچیسلا نگے دُعا پھولّاد۔ 7 کھیرانگی چیسپے، نگا سپوسپا تانگ گامو ثانٹے تانگس، چیازیرنا نگے فونو ، کھیرانگی خُدے ہلژخمہ میگونّی سنیینّگا سپوسپا تانگستے اینوگ۔ حضرت پولُسی اُنیسِمُسی پھیا جْوس ۔ 8 تیبویپھیا ژانتا مسیح نانّگا نگے کھیورانّگا اوسپابو چوس زیرتے کا تانگچیسّی وانگ یودنانگ، 9 نگاتانگی چیسپے جاستے نگے کھیورانّگا ای جووابو این۔ نگا حضرت پولُس میرگانجیگ تانگ حضرت عیسیٰ مسیح جابستوگ جوچیسپوے، داگسا تسونگپاجیگ اینپا، 10 کھیورانّگا، نگے بُوژا ژوگس اُنیسِمُسی تونلا جُووا جُواد۔ ایرو تسونکھانگی نانّگا یود زانے، ایمانی نانّگا نگا کھوے ابا گیور۔ 11 سنگونلا اُنیسِمُس کھیرانگی پھیا پھانمیتھوگسشیگ یودپین، اِین نانگ تا داگسا نگاتانگ نیسکوے تونلا، کھو ثانٹے پھانتھوگسچانجیگ گیورتے اینوگ۔ 12 جان کھو نگے سنینگبو اِین نانگ ، نگے کھو کھیرانگ یودسا لوگستے لامچوگاد۔ 13 گاموےناتسُول شادچیسّی جاستے نگا ایرو تسونکھانگی نانّگا یود زانے، کھوے نگا کھیرانگی تشابس چوستے یاتو چوچیسّی پھیا، کھو ایرو نگارانگ نیامپو بورچیسّی دودپا راگ۔ 14 اِین نانگ کھیرانگی کانے گونگسپا میدپا، نگے چیجیگّانگ چونین میراگ۔ کھیورانّگا وانگ تانگستے مانپا، تھادپو نیامپو نگا یاتو چوچیسّی دودپا چواد۔ 15 چیگیوس، کھو کھیرانگ نیامپو توسبانشیگ بیستے دوگچیسّی گیونتشانبو، کھیورانّگا توسگیونّی پھیا کھو لوگستے تھوبچیسپو مانّاہے؟ 16 تانیپھارلا کھو کھیرانگی تشیوگ ژوگس مانپا، تشییوگی سانگ کھاگچان، چیسپے فونو جیگ اینوگ۔ کھو میگسالّی نگے پھیا رینچانجیگ این، اِین نانگ کھو میجیگ یانگ مسیح نانّگا ٹوپا فونو جیگ اینچیسپوے، کھو کھیرانگی پھیانگ مانّگا رینچانجیگ اینوگ۔ 17 تینے کالتیس نگا کھیرانگ نیامپو خُدے چھاگلاسّی نانّگا ٹوپاجیگ تھیادنا، کھوا گاسوس جْوس ، کازوگ کھیرانگی نگا گاسوس جْوس تے یودڈو۔ 18 کالتیس کھوے کھیورانّگا نورٹھولجیگ چوستے یودنا، یا کھیرانگی کانے چی تونگ کھیرتے یودنا، تیگون نگا بولونلا کالنانگ ڈیگ۔ 19 تا داگسا نگا حضرت پولُسی نگارانگی لاگپانے ایبو ڈِیاد، نگے تے بولونبو شالاین۔ کھیورانّگا تھامیدپے میتشے تھوبکھانّی نگے بولون یودکھانبو، ایدتو میسکول۔ 20 اونا نگے سپونلے، جوجو مسیح نانّگا نگے پھانتھوگسّی پھیا ایبو چوس۔ مسیح نانّگا نگا ای سپوسپابو تونگ۔ 21 کھیورانّگا نگے چوچیسلا زیرتے یودکھان تشانگما ڈوبچوگچیس ماتشاد، تیسانگ مانّگا چوسی لوکھیل نیامپو، نگے ای ایگیبو ڈِیاد۔ 22 یانگ سپیراجیگ، جوجو نگے پھیا ڈونکھانگجیگ ڈالڈیگ چوس، چیازیرنا خُدے کھیرانگی دُعا لانسالتے نگا گیوگسپا کھیرانگ یودسا لوگستے یونگ چوگّا زادچیسّی ریوا راگ۔ حضرت پولُسی ستینگجوگی سلام۔ 23 حضرت عیسیٰ مسیح جابستوگ جْوس کھانّی اِپفراس، نگے ٹوپا تسونپے، کھیورانّگا سلام جُوروگ۔ 24 یانگ تینّا زوگی نگے لاس چوکھان ٹوپا مرقُس، ارِسترخُس، دیماس تانگ، لوکا گونّیانگ سلام جُوروگ۔ 25 نگے دُعا جُواد، حضرت عیسیٰ مسیح کھیورانّگا شزدے سالشیگ ۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation