مارکوس 9 - New Testament in Ladakhi Langage1 حضرت عیسیٰ سی کھونگونلا مولس، ”نگے کھیوجا لدینبا زیرّاد، ایکا یودکھان کھاچیگی خُدے گیالثید وانگی نانّگا سکیودچیسپو تھونگتے مانے میشی۔“ حضرت عیسیٰ سی زیرّجید سنگونس۔ 2 جاگ ڈوگی ستینگنے حضرت عیسیٰ مسیح حضرت پطرؔس ، حضرت یعقُوبؔ تانگ حضرت یُوؔحنّا ٰ گُون ٹھیدتے سوانگ میدسا ری تھونپوجیگیکا سکیودس۔ تیرو کھونگونی لدُونلا حضرت عیسیٰ سی سکوزوگس گانگپو گیورتے 3 کھونگی نامزا ستامینیانچیس ودچان کارپو گیور، دُنیائی کارپو چوچیسّی زاس چیگیانگ تیتسوگس کارپو چو مینیان۔ 4 تینے کھونگونی پیغمبر حضرت مُوسیٰؔ تانگ حضرت اِلیاس حضرت عیسیٰ سی نیامپو جالتا سالین جال۔ 5 حضرت پطرؔس سی حضرت عیسیٰ سی زیرس، ”رابّی نگاجا ایکا یودچیسپو ما گیالّا سونگ۔ نگاجے جوگسا سوم سیگاین، نیرانگی پھیا چیگ، حضرت مُوسیٰؔ سی پھیا چیگ، یانگ حضرت اِلیاس پھیا چیگ۔“ 6 کھوا چی زیرگوشیسپو ہاماگوپا، کھوے تیبو زیرس، کھونگون ماثانٹے جیگستے یودپین۔ 7 تینے کھونگون ثینّی کابس، یانگ ثینّی نانگنے سونگسکادچیگی مولس، ”یبو نگے چیسپے بُوژا این، کھوے زیرکھانگونلا نیون۔“ 8 ہونمیدلا، کھونگونی تھاتھوتھاما ستاچیگ حضرت عیسیٰ سی چیگپو مانے حضرت مُوسیٰؔ تانگ حضرت اِلیاس کھونگون نیامپو میدکھانبو تھونگ۔ 9 رینے بابستے سکیودین یود زانے حضرت عیسیٰ سی کھونگونلا اِبنِ آدم شیکھانگونّی ٹونے سونتیا لانّگا زادتے مانے کھونگونی تھونگکھانبو سوانگ میشادچیسلا کا سالس۔ 10 تیبویپھیا کھونگونی تیگون سوجیگّانگ ماشادّا سانگوے نانّگا بورس اِین نانگ کھونگرانگ چیگ تانگ چیگّا ٹیس، ”’شیکھانگونّی ٹونے لانگسشیسپو‘ چی مولتے این ہے؟“ 11 تینے کھونگونی حضرت عیسیٰ سی ٹیس، ” شریعتی عالِم گونّی مسیحا سکیودّی سانگ سنگونلا پیغمبر حضرت اِلیاس سکیودگوس چیا زیرتے اینوگ؟“ 12 حضرت عیسیٰ سی لانسالس، ”تانتانلا، چیتشانگما ڈالڈیگ چوچیسلا حضرت اِلیاس سنگونلا یونگّوس۔ تینے چیپھیا ہلژخمہ شوقبُو بوے نانّگا مولّانوگ، اِبنِ آدم ردوگنگال تھونگتے رینمید چوستے پھانگوس؟ 13 اِین نانگ نگے کھیوجا زیرّاد، حضرت اِلیاس یونگ تشارتے این، کھونگونی کھو نیامپو چوین سامکھان تشانگما چوس، کازوگ ہلژخمہ شوقبُو بوے نانّگا کھوے سکورلا ڈِیازادتے یود“ حضرت عیسیٰ سی ردود ژوگسکھانّی بُوژا جیگ پھانچوگا زادس۔ 14 کھونگون رینے بابستے سکیودّاچیگ، میتشوگس چھینموجیگی جان لوبٹوگس گونلا سکورتے یانگ شریعتی عالِم کھاچیگی کھونگون نیامپو زیرزیر تانگین زِیگس۔ 15 میتشوگس گانگپوے حضرت عیسیٰ سی جالّاچیگ، کھونگون ثانٹے تھادتے ہانڈانگ سونگ یانگ بانگتانگاین کھونّگا تھوگّالا سونگ۔ 16 حضرت عیسیٰ سی لوبٹوگس گونلا ٹیا زادس، ”کھیوجے کھونگون نیامپو چی سکورلا زیرزیر تانّگادپین۔“ 17 میتشوگسّی ٹونے میجیگی لانتانگس، ”لوبپونلے نگے نگارانگی بُوژا ردود جُوگستے سپیرا تانگمانیانکھانبو نیرانگیکا کھیونگسپین۔ 18 ردود پو کھوے نانّگا ژوگسّاچیگ کھوے، کھو سیکا گیابدوگ یانگ کھانے ووا بینگین سو ثیگستے زوگسپو ثانٹے گیوردوگ۔ نگے نیرانگی لوبٹوگس گونلا ردود پو پھینگچیسلا جُووا پھولپین، اِین نانگ کھونگونلا تیبو پھینگ مانیان۔“ 19 حضرت عیسیٰ سی مولس، ”ایمان میدکھانّی میرابس، نامتشوگپا نگا کھیوجاگون نیامپو دوگ؟ نامتشوگپا نگے کھیرانگّون نیامپو زودپا بورگوس؟ بُوژا بُو نگا یودسا کھیونگ۔“ 20 تینے کھونگونی بُوژا بُو کھیونگس۔ حضرت عیسیٰ سی تھونّگاچیگ، ردود پوے ٹھوگوی زوگسپو ماثانٹے ثوگس، یانگ کھو سیکا گیل۔ زوگسپو ینگو انگوا ریلاین کھوے کھے نانگنے ووا بینگ۔ 21 حضرت عیسیٰ سی ٹھوگوی ابا ٹیا زادس، ”کھوا ای زوموبو نامنے پھارلا یودپین؟“ کھوے لانتانگس، ”کھو ٹھوگو چھونگون یود زانے پھارلا۔ 22 ردودّی کھو لان مانگپو سادچیسّی پھیا میے تانگ چھوی نانّگا پھانگس، اِین نانگ کالتیس نیرانّگا چیتونگشیگ زادنیانچیس یودنا سنینگرجے زادتے نگاجا روگس چوا زاد۔“ 23 حضرت عیسیٰ سی کھوا مولس، ”چیا زیرّاد ’کالتیس نیرانّگا نیانّا؟‘ نگیکا ایمان چوکھانگونّی پھیا نگا چیتشانگما چوتھوبچیس یود۔“ 24 تینّامالّا ٹھوگوی ابے کُوچو تانگستے زیرس، ”نگے ایمان چواد، نگے ایمان بو لدان چوگّا زادتے ستانپو گیورچیسّی نانّگا روگس زادّانگ۔“ 25 حضرت عیسیٰ سی میتشوگس بانگتانگاین کھونگ یودسا یونّگا زیگسّاچیگ، ردود پوا کھاسکییا زادتے مولس، ”تشور میچوگکھان تانگ سپیرا تانگ میچوگکھانّی ردود، نگے کھیورانّگا ای ٹھوگوی نانگنے بینگستے یانگسکیار کھوے نانّگا مانے میچھاچیسلا کاتانّگاد۔“ 26 تینے ردود پوے کُوچو تانگین، بوتشے زوگسپو ماثانٹے ثوگاین، سیکا گیابستے کھوے نانگنے بینگستے یونگس۔ بُوژا بُو شیکھان ژوگس تھونگ یانگ می مانگچھیے، ”کھو شیتے اینوگ“ زیرس۔ 27 اِین نانگ حضرت عیسیٰ سی چھاگ کیانّگا زادتے بُوژا بُوا لانگچیسلا روگس زادس، یانگ کھو کواگ لانگس۔ 28 ستینگنے حضرت عیسیٰ تانگ کھونگی لوبٹوگسگون کھانگپے نانّگا چیگپو یود زانے، کھونگونی حضرت عیسیٰ سی ٹیس، ”نگاجا گُونلا ردود پو چیا پھینگ مانیانّا اینوگ؟“ 29 کھونگی کھونگونلا مولس، ”ای ریگسّی ردود، دُعا چیگپو گیُودتے پھینگ نیانّانوگ۔“ حضرت عیسیٰ سی یانگسکیار کھونگرانگ ڈونگشیسّی سکورلا لونگستان زادس۔ 30 حضرت عیسیٰ مسیح تانگ کھونگی لوبٹوگسگون، تے ناسّانے بینگستے گلِیلی یولجونگس گیُودتے سکیودس۔ حضرت عیسیٰ سی کھونگ یودسے ناسّا سوانگ گیُوس چھاچوگنیین میدپین، 31 چیاجونا کھونگی کھونگرانگی لوبٹوگس گونلا لابجا سالچیس اینپین۔ کھونگی کھونگونلا مولس، ”اِبنِ آدم نگولوگ چوستے ڈاو گونّی لاگا ستاداین۔ کھونگونی کھو ساداین، یانگ جاگما سومی ستینگنے سونتیا لانگسشوگّا زادِین۔“ 32 کھونگونلا کھونگی مولکھانبو ہاماگو، اِین نانگ کھونگونلا تیبوے تونبو ٹیچیسّی ہامپا مایونگس۔ خُدے گیالثیدّی نانّگا ٹاگشوگ۔ 33 کفرنحُوم مّی ڈونگکھیرلا لیبستے کھانگپاجیگی نانّگا دُوگستے یودتوس، حضرت عیسیٰ سی کھونگرانگی لوبٹوگس گونلا ٹیا زادس، ”نگاتانگون ڈولتے یونگ زانے، کھیوجاگونّی چی سکورلا زیرزیر تانّگادپین؟“ 34 اِین نانگ کھونگونی لان ماتانگس، چیازیرنا کھونگونی کھورانگونّی ٹونے ٹاگشوگ سو اینکھانبوے سکورلا زیرزیر تانّگادپین۔ 35 کھونگ سیکا جُوگستے لوبٹوگس چوگنییسپوا کھونگرانگ یودسا بودّا زادس یانگ مولس، ”تشانگمیسانگ گوشوگپو گیورنِین یودکھانگون تشانگمیسانگ ستینگجوگپو یانگ تشانگمے یوگپو گیورگوس۔“ 36 ٹھوگو چھونگونجیگ کھیونگستے کھونگونی سکییلّا لانگچوگّا زادس۔ ٹھوگوبو کھونگرانگی چھاگی نانّگا کھیونگا زادستے کھونگی کھونگونلا مولس، 37 ”نگے لوبٹوگس اینچیسپوے سوجیگی ای ٹھوگو چھونگونجیگّا گاسوس چونا نگا گاسوس چوستے این، یانگ سوجیگی نگا گاسوس چونا، کھوے نگا چیگپوا مانپا، نگا کالا زادکھانّی یابّانگ گاسوس جْوس تے این۔“ نگاتانگی گیابگال ماچوکھانگون نگاتانگی چھوگسپا اینوگ۔ 38 یوحنّانی زیرس، ”لوبپونلے میجیگی نیرانگی تشان کھورتے ردود پھینّگا نگاجے تھونگ، یانگ نگاجے کھوا تیبو ماچو زیرپین چیازیرنا کھو نگاتانگی ٹوپا مانپین۔“ 39 حضرت عیسیٰ سی مولس، ”کھو گھاگ ماگھاگ، نگے مینگ کھیودچان کولتے معجزہ ستانتے ستینگنے کھوا نگے سکورلا سپیرا نگانپا زیر مینیان۔ 40 نگاتانگی گیابگال ماچوکھانگون نگاتانگونّی چھوگسپا اینوگ۔ 41 نگے کھیوجا لدینبا زیرّاد، کھیوجا مسیح اینچیسپوے چھو کورے گانگ تانگکھانگونلا تانتانلا شزدے سالّا زادِین۔“ دِیگپے نانّگا گییلچوگچیس۔ 42 ”اینّانگ نگا ایمان چوکھان ای چھونگونگونّی نانگنے چیگّا دِیگپا چوچوگی سانگ کھورانگی سکییا رانتھاگی ردوا چھینمو تاگستے گیاتشوے نانّگا پھانگنا گیال۔ 43 کالتیس کھیرانگی لاگپے کھیورانّگا دِیگپا چوچوگّادنا، چادتے پھانگستونگ۔ لاگپا نیس یودتے نیالوے میے، مانے ماشیکھانّی نانّگا پھانگچوگی سانگ، لاگپا چیگ نیامپو تھامیدپے میتشیے نانّگا چھانا گیال۔ 45 کالتیس کھیرانگی کانگپے، کھیورانّگا دِیگپا چوچوگّادنا تیبو چادتونگ۔ کانگپا نیس یودتے نیالوے نانّگا پھانگچوگی سانگ کانگپا چیگ نیامپو تھامیدپے میتشیے نانّگا چھانا گیال۔ 47 یانگ کالتیس کھیرانگی میگی دِیگپا چوچوگنا، تیبو ڈوستونگ۔ میگ نیس یودتے نیالوے نانّگا پھانگچوگی سانگ، میگ چیگ نیامپو خُدے گیالثیدّی نانّگا چھانا گیال۔ 48 تیرو شا زاکھانّی بوتسیگّون مانے میشی، یانگ میبو توسگیون بارین دوگّانوگ۔“ 49 ”چھودپا تشا نیامپو لاگمو چوا تسوگسلا، نگیکا ایمان چوکھان تشانگما، میے گیُودتے لاگمو چوین۔ 50 تشا پھانتھوگسچان اینوگ، اِین نانگ کالتیس تشی ٹوت پو یولنا تیبو کھیوجے کازوگی لوگستے کھیونگین؟ کھیوجے میتشیبو تشا تسوگسلا ڈودچان یونگّوس، یانگ چیگ تانگ چیگی نانّگا جیدے نیامپو دوگ۔“ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation