مارکوس 16 - New Testament in Ladakhi Langageحضرت عیسیٰ سونتیا جانگس۔ 1 زاسپینبے پھیتوگ شابّادّی جاگپو تشارّاچیگ، ماگدالّینما مریم، حضرت مریم حضرت یعقُوبؔ ی اما تانگ سالومی گُون حضرت عیسیٰ سی جنازہ سکوچیسّی پھیا ٹیجیم چانّی مار تانگ مارناگ نیوا سونگ۔ 2 زانییمے جاگّا نگاتوگ نگامو نییما شارّاچیگ، کھونگون حضرت عیسیٰ سی قبرستان سونگ۔ 3 چھین یود زانے کھونگونی چیگ تانگ چیگّا ٹیس، ”قبرستانی کھا کابستے یودکھانّی ردوا لیب لیب پو نگاتانگی پھیا سوی ریلاین؟“ 4 تیکا لیبّاچیگ کھونگونی کیینلا ستاسپا، ردوابو ریلتشارتے تھونگ۔ 5 قبرستانی نانّگا جوگساچیگ، کھونگونی یاسپیکا کوسلاگ کارپو گونکھانّی کھیوگتونگجیگ دُوگستے تھونگپا، ماثانٹے جیگس۔ 6 اِین نانگ کھونگی مولس، ”جیگس ماجیگس، کھیوجے کیانگشینگیکا کیانگسکھان ناصرة پا حضرت عیسیٰ سی ژالّانوگ۔ کھونگ سونتیا جانگستے این۔ کھونگی کا مید۔ کھونگی جنازہ بورسے ناسّا ستوس۔ 7 تا سونگتے کھونگی لوبٹوگسگون تانگ حضرت پطرؔس لا شود، حضرت عیسیٰ سی کھیوجاگونّی سانگ سنگونلا گلِیلی یولجونگسّی نانّگا سکیودین ۔ تیرو کھیوجاگونلا کھونگ جالین، کازوگ کھونگی سنگونلا مولّا زادس۔“ 8 بوموگون جیگستے دارین تھےژومس نیامپو قبرستان نے گیُوگستے سونگ۔ تھونگکھان تشانگما سوجیگّانگ ماشادس، چیازیرنا کھونگون ثانٹے جیگستے یودپین۔ مارکُوسّی ڈیسکھانّی ستینگجوگ رینگمو 9 حضرت عیسیٰ مسیح شیکھانگونّی ٹونے سونتیا لانّگا زادتے زانییمے جاگّا نگاتوگ نگامونے، کھونگرانگ گوما سنگون چوگّا زادکھانبو کھونگی ردود ردون پھینّگا زادکھانّی بومو حضرت مریم ماگدالّینما اینپین۔ 10 کھو سونگتے کھوا تھونگکھان تشانگما ردوگپو چوین نگواین یودکھانّی لوبٹوگس گونلا شادس۔ 11 اِین نانگ حضرت عیسیٰ سونتیا لانّگا زادتے دوگ، یانگ کھوے تھونگ زیرکھانبوا کھونگونی ایمان ماچوس۔ 12 تیبوے ستینگنے حضرت عیسیٰ سی زو سوسوجیگی نانّگا کھونگرانگ، یروشالیم گیالسے پھیلوگنے ڈولتے چھین یودکھانّی لوبٹوگس نیسلا سنگون چوگّا زادس۔ 13 کھونگ نیسکو جانیانگ لوبٹوگس گونلا شادّالا لوگستے سونگ؛ اِین نانگ کھونگونی کھونگی شادکھانبوا دِین ماشیس۔ 14 تے ستینگنے لوبٹوگس چوگشیگپو زانزین یود زانے، حضرت عیسیٰ سی کھونگرانگ کھونگونلا سنگون چوگّا زادس، یانگ کھونگونی ایمان میچوچیس تانگ سنینگ سکیونگپو چوستے حضرت عیسیٰ سونتیا لانّگا زادتے تھونگکھانّی میگونّیکا ایمان میچوچیسّی پھیا کھونگونلا کھاسکییا زادس۔ 15 حضرت عیسیٰ سی کھونگونلا مولس، ”دُنیا گانگپوے نانّگا سونگتے میتشانگمالا گاموےناتسُولبو شود۔ 16 ایمان چوستے غوتا لینکھانگون سکیوبین۔ اِین نانگ ایمان ماچوکھانگونلا نیالوے چھادپا پھوگین۔ 17 ایمان چوکھانگونّی کھیود گون ستانین۔ کھونگونی نگے وانگی نانّگا ردودگون پھینگین، ماشیسکھانّی سکادگونّی نانّگا سپیرا تانگین، 18 رُولگون لاگپے نانّگا لیناین، توگ تھونگنانگ کھونگونلا چانگ نودپا مییونگ، کھونگونی لاگپا بورکھانّی نادپاگون پھانین۔“ 19 حضرت عیسیٰ مسیح کھونگونلا جالتا سال تشارتے ستینگنے کھونگ نامکھا کھیرّا زادس، یانگ خُدے چھاگ یاسپے ٹھیسّیکا جوگسا زادس۔ 20 لوبٹوگسگون کارونگسا سونگتے گاموےناتسُول شادس، یانگ مسیح کھونگون گیُودتے ستاگس گُون ستانّا زادتے کھونگونی شادکھانبو لدینبا اینکھان تانتان زادس ۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation