مارکوس 10 - New Testament in Ladakhi Langageناما چادچیسّی سکورلا ڈولدور۔ 1 حضرت عیسیٰ مسیح کفرنحُوم نے بینگتے یہُودیہ یولجونگس تانگ یوردان لژانگسپو ے پھارکا سکیودس۔ یانگسکیار میتشوگس کھونگ یودسا دزومس، یانگ لوبس نانگجین کھونگی کھونگونلا لابّا زادس۔ 2 تشودلتاچیسلا فریسی پا کھاچیگ کھونگ یودسا یونگستے ٹیس، ”بُوژا جیگّا شریعت نانگجین کھورانگی ناما چاد چھوگّانوگّا؟“ 3 حضرت عیسیٰ سی لانسالّا زادس، ”ناما چادچاسّی سکورلا پیغمبر حضرت مُوسیٰؔ سی شریعتی نانّگا چی ڈِیستے دوگ؟“ 4 کھونگونی لانتانگس، ”حضرت مُوسیٰؔ سی ناما چادکھانّی ایگے ڈیسکھانبو تانگستے بُوژا جیگّا ناما چادچیسّی گونگسپا سالدوگ۔“ 5 اِین نانگ حضرت عیسیٰ سی لانسالس، ”حضرت مُوسیٰؔ سی ای شریعت پو کھیوجے اتا اپو گونّی سنینگ سکیونگپو یودچیسپوے ڈِیستے اینوگ۔ 6 اِین نانگ شرُوعی کا چیتشانگما زاد زانے، خُدے بُوژا تانگ بومو چوا زادس۔ 7 تینّا گیونتشانبوے پھیا بُوژا کھورانگی ابا تانگ امانے بیتے کھورانگی ناما نیامپو دزومستے 8 کھونگ نیسکو زوگسپو چیگ گیورّانوگ تا کھونگون نیس مانپا چیگ اینوگ۔ 9 تیبویپھیا خُدے چیگ زادکھانبو سوجیگّانگ پھے ماچوگ۔“ 10 حضرت عیسیٰ سی کھونگرانگی لوبٹوگسگون نیامپو کھانگپے نانّگا جُوگستے یودتوس، کھونگونی کھونّگا تیبوے سکورلا ٹیس۔ 11 کھونگی کھونگونلا مولس، ”کھورانگی ناما چادتے جان بوموجیگ نیامپو ناما چوکھانبوے کھورانگی نامے گیابگالّا لوگییم چوستے اینوگ 12 یانگ کالتیس بوموجیگی کھورانگی ماگپا چادتے ژانجیگ نیامپو باگما چونا، کھوے لوگییم چوستے اینوگ۔“ حضرت عیسیٰ سی ٹھوگوگونلا برکت سالّا زادس۔ 13 پھاماگونّی ٹھوگو چھونگون گُون حضرت عیسیٰ مسیح چھاگسیا زادتے برکت سالچیسلا کھیونگس۔ اِین نانگ کھونگی لوبٹوگسگونّی پھاماگونلا حضرت عیسیٰ سی وبگیال ستانچیسلا کھاسکییس۔ 14 تیبو زیگستے حضرت عیسیٰ سی تھوگسثو سکیودس یانگ کھونگونلا مولس، ”ٹھوگو چھونگون گُون گھاگ ماگھاگّا نگا یودسا یونگچوگ، یتسوگسگونّی پھیا خُدے گیالثیدپو این۔ 15 نگے کھیوجا لدینبا زیرّاد خُدے گیالثید، ٹھوگو چھونگون گُون تسوگسلا مالینکھانگون تینانّگا مانے ژوگس مینیان۔“ 16 تینے کھونگی ٹھوگوگون کھونگرانگی چھاگی نانّگا کھیونگا زادس، یانگ کھونگّونّیکا چھاگ بورّا زادتے برکت سالّا زادس۔ می چھوگپو۔ 17 حضرت عیسیٰ مسیح لامنے سکیود زانے، میجیگ بانگتانگاین یونگستے کھونگی لدُونلا پِیکدونگ ژُوگستے ٹیس، ”لوبپون زانگپولے، تھامیدپے میتشے نورسکالّا تھوبچیسّی پھیا نگے چی چوگوس؟“ 18 حضرت عیسیٰ سی ٹیا زادس، ”چیپھیا کھیرانگی نگا زانگپو زیرّاد؟ خُدے چیگپو ماستوگ سوانگ زانگپو مان۔“ 19 تینے حضرت عیسیٰ سی کھوے ٹیوا لانسالس، ”کھیورانّگا کاگیاگون شیسّانوگ ’می ماساد، رانگی جیدماد مانپا جانما نیامپو لوسڈیل ماچو، کوماکو، گواہ زون ماتانگ، گوبسکورتے پینے ماکھیر، ابا تانگ اما سیوا چوس۔‘“ 20 کھوے لانتانگس، ”لوبپونلے، تے تشانگما نگے چھونگتوسنے پھارلا ثونگستے این۔“ 21 حضرت عیسیٰ سی کھوا زیگستے کھویکا چامسپا سکییس یانگ مولس، ”تارُونگ کھیورانّگا چوگوشیس چیگ لوستے دوگ۔ سونگ یانگ کھیرانگی گیونور تشانگما تسونگستے پینیبو نیالباچانگونلا تونگ، نامکھے نانّگا کھیورانّگا بانگدزود تھوبین۔ تینے یونگستے نگے گیابنے ڈونگس۔“ 22 تیبو تشورّاچیگ کھوے گو گھوس یانگ تشیرکھا یونگستے سونگ، چیازیرنا کھو ما چھوگپو یودپین۔ 23 حضرت عیسیٰ سی کھونّگا سکورکھانّی میتشوگسلا زِیگس یانگ لوبٹوگس گونلا مولس، ”چھوگپوگون خُدے گیالثیدّی نانّگا لیبچیس تسامشیگی کاگسپو مانوگ۔“ 24 تیبو تشورتے لوبٹوگ گُون ما ہالاس۔ اِین نانگ حضرت عیسیٰ سی یانگسکیار مولس، ”چیسپے ٹھوگوگون خُدے گیالثیدّی نانّگا لیبچیس ما کاگسپو اینوگ۔ 25 می چھوگپو خُدے گیالثیدّی نانّگا لیبچیسّی سانگ کھابّی میگنے رنگابونگ بینگچیسپو، لامو چھین۔“ 26 لوبٹوگسگون مانّگا ہالاستے ٹیس، ”تینے سُوا تھارپا تھوبین۔“ 27 حضرت عیسیٰ سی کھونگونلا زیگستے مولس، ”یبو میا چو مانے مینیان، اِین نانگ خُدا چیتشانگما زاد نیانّانوگ۔“ 28 حضرت پطرؔس سی حضرت عیسیٰ سی زیرس، ”نگاجے چیتشانگما پھانگستے، نیرانّگا ڈانگستے این۔“ 29 حضرت عیسیٰ سی لانسالس، ”نگے لدینبا زیرّاد، نگا یا گاموےناتسُولّی تونلا کھانگپا یا فونو نو یا اچے سترِنگمو یا ابا یا اما یا ٹھوگو یا جینگ پھانگسکھان تشانگمالا 30 اینّا میتشے نانّگا، کھانگپا، فونو نو، اچے سترِنگمو، ابا، اما، ٹھوگو، جینگ گُونی گیالداب ماتشاد ناگھسباردو تھونگین ، یانگ خُدے گیالثیدّی توسلا تھامیدپے میتشے تھوبین۔ 31 اِین نانگ داگسا گویکا یودکھان مانگپو ستینگجوگا لوسین یانگ داگسا ستینگجوگیکا یودکھان مانگپو گویکا لیباین۔“ حضرت عیسیٰ سی یانگسکیار کھونگرانگ ڈونگشیسّی سکورلا شادّا زادس۔ 32 حضرت عیسیٰ مسیح گو زادتے کھونگون کیینلا یروشالیمّی گیالسا سکیودین یودپا لوبٹوگسگون ہالاس یانگ کھونگی گیابنے ڈانگستے یونگکھانگون جیگسّادپین۔ حضرت عیسیٰ، کھونگرانگی لوبٹوگس چوگنییسپو سوسو کھیرتے کھونگ نیامپو چونگچیسگون شادّا زادس، 33 ”نیونشیگ، نگاتانگون کیینلا یروشالیمّا چھاچیس اینوگ، اِبنِ آدم اِمام کُنی چھونمو گونتانگ شریعتی عالِم گونّی لاگا ستاداین یانگ کھونگونی کھوا شیچیسّی چھادپا چادتے یہُودی مانکھان گُونی لاگا ستاداین۔ 34 تینے کھونگونی کھوا ٹھیلبا ستانتے، چھیلماگ تانگ ستالچاگ گیابستے ساداین، یانگ جاگما سومی ستینگنے کھو یانگسکیار سونتیا لانگین۔“ حضرت یعقُوبؔ تانگ یوحنّانی جُووا۔ 35 تینے زبدی بُوژا حضرت یعقُوبؔ تانگ حضرت یُوؔحنّا ٰ حضرت عیسیٰ سی یودسا یونگستے زیرس، ”لوبپونلے، نیرانگی نگاجے جُووا ژوچیسپو چوا زادّانگ۔“ 36 کھونگی ٹیا زادس، ”کھیوجے پھیا نگے چی چو؟“ 37 کھونگونی لانتانگس، ”نیرانگ نیرانگی شان چانّی ژوگسٹھیسّیکا ژوگس زانے، نگاجا نیرانگی چھاگ یاسپا تانگ یومے سیواچان کوسیکا دوگ چوگّا زادلے۔“ 38 اِین نانگ حضرت عیسیٰ سی کھونگونلا مولس، ”کھیوجے جُووا پھولکھانبو کھیوجا ہاماگوا اینوگ، ردوگنگالّی کورے نگا تھونگچیسچانبو کھیوجے تھونگنیانچیس راگا یا ردوگنگالّی غوتا نگے لینچیسچانبو کھیوجے لین نیانچیس راگا؟“ 39 کھونگونی زیرس، ”نیانچیسراگلے۔“ تینے حضرت عیسیٰ سی کھونگونلا مولس، ”کھیوجاگونّی تانتانلا نگے ردوگنگالّی کورے نانگنے تھونگین یانگ ردوگنگالّی غوتا نگے لینچیسچانبو نیامپو کھیوجے غوتا لیناین۔ 40 اِین نانگ نگے یاسپا تانگ یومیکا دوگچوگچیسّی وانگچھا نگا مید۔ خُدے تے ناسّاگون لدامّا زادکھانگونّی پھیا ڈالڈیگ زادتے این۔“ 41 تیبو تشورّاچیگ، جان لوبٹوگس رچُوبوا حضرت یعقُوبؔ تانگ یوحنّانیکا ثو یونگس۔ 42 حضرت عیسیٰ سی کھونگ تشانگما بودّا زادتے مولس، ”کھیوجا گیوسمیدّا؟ یہُودی مانکھان وانگثولپاگونّی کھورانگی یولمیگونّیکا سنینگرجے میدپا وانگثولّانوگ، یانگ کھونگونی لونپوگونّیانگ میگونلا ثانٹے ناگس ستانین وانگثولّانوگ۔ 43 کھیوجے نانّگا تیتسوگس یونگ ماگوس۔ کھیوجے ٹونے ٹاگپو گیورنِین یودکھانبو جانماگونّی یوگپو گیورگوس، 44 یانگ کھیوجے ٹونے گویکا لیبنیین یودکھانبو جان تشانگمے تشیوگ گیورگوس۔ 45 کازوگ اِبنِ آدم جابستوگ ژوچوگچیسلا مانپا جابستوگ جوالا یونگسپین، یانگ می مانگپوے ثوگرین شالچیسلا کھوے رانگثوگ تانگین۔“ بارتیموس زیرکھانّی جارا پھانچوگا زادس۔ 46 کھونگون یریحُو ے ڈونگکھیرلا لیب۔ حضرت عیسیٰ سی مسیح، کھونگی لوبٹوگسگون تانگ میتشوگس چھینموجیگ یریحُو نے بینگستے سکیود زانے، تیماوسّی بُوژا بارتیموس جارا بو لامی تھاما لتسانّگالا دُوگستے یودپین۔ 47 بارتیموسّی ناصرة پا حضرت عیسیٰ سی سکیودین اینوگ زیرتے تشورّاچیگ، کھوے کُوچو تانگچیس گوزوگستے زیرس، ”حضرت عیسیٰ، گیالپو حضرت داؤد ّی اولاد نگیکا سنینگرجے زاد۔“ 48 می مانگپوے کھوا کھاسکییستے چوبچود زیرس، اِین نانگ کھوے مانّگا کُوچو تانگستے زیرس، ”گیالپو حضرت داؤد ّی اولاد، نگیکا سنینگرجے زادّانگ۔“ 49 حضرت عیسیٰ سی ڈولّا مازادّا جوگس یانگ مولس، ”کھوا ایکا بُود۔“ تینے کھونگونی جارا بوا بودتے زیرس، ”تھادپو چوس، لونگس، کھونگی کھیورانّگا بودّا زادّوگ۔“ 50 بارتیموسّی کھورانگی کوسپو تھاما پھانگس، چھومستے کھورانگی کانگپیکا لانگس یانگ حضرت عیسیٰ سی یودسا یونگس۔ 51 حضرت عیسیٰ سی کھوا ٹیا زادس، ”نگے کھیرانگی پھیا چی چو؟“ جارا بوے زیرس، ”لوبپونلے، نگا یانگسکیار تھونگ چوگّا زاد۔“ 52 حضرت عیسیٰ سی کھوا مولس، ”سونگ کھیرانگی ایمانی کھیرانگ پھانچوگستے این۔“ تینّامالّا کھوا تھونگتھوب، یانگ کھو تینّا لامنے حضرت عیسیٰ سی ڈانگستے سونگ۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation