མད༌ཐཱ༌ 19 - New Testament in Ladakhi Langageجیدماد چادچیس تانگ ناما چوچیسّی لابجا۔ 1 لابجا سال تشارتے ستینگنے، حضرت عیسیٰ مسیح گلِیل نے یوردان لژانگسپو ے پھارکا یہُودیہ یولجونگسلا سکیودس۔ 2 میتشوگس چھینمو کھونگی ستینگرانگنے یونگس یانگ کھونگی زُومو یودکھانگون پھانچوگا زادس۔ 3 تشودلتاچیسلا فریسی پا کھاچیگ کھونگ یودسا یونگستے ٹیس، ”گیونتشان چھونگون یودڈو یا چھینمو، بُوژا جیکّا شریعت نانگجین کھورانگی ناما چاد چھوگّانوگّا؟“ 4 حضرت عیسیٰ سی لانسالس، ”کھیوجے ہلژخمہ شوقبُو بوے نانگنے ماسیلپینّا؟ شرُوعی کا خُدے دُنیا زاد زانے بُوژا تانگ بومو زادتے، 5 مولس، ’تینّا گیونتشانبوے پھیا بُوژا کھورانگی ابا تانگ امانے بیتے کھورانگی ناما نیامپو دزومستے کھونگ نیسکو زوگسپو چیگ گیورّانوگ۔‘ 6 تا کھونگون نیس مانپا چیگ اینوگ۔ تیبویپھیا خُدے چیگ زادکھانبو سوجیکّانگ پھے ماچوگ۔“ 7 تینے فریسی پاگونّی کھونّگا ٹیس، ”تیبو اینّا، ناما چادنا، ناما چادکھانّی ایگے ڈیسکھانبو کھوا تونگ زیرتے چیپھیا حضرت مُوسیٰؔ سی حکم سالتے اینوگ؟“ 8 حضرت عیسیٰ سی لانسالس، ”کھیوجے اتا اپو گونّی سنینگ سکیونگپو یودچیسپوے حضرت مُوسیٰؔ سی کھیوجا ناما چادچیسلا گونگسپا تانگس، اِین نانگ شرُوعی کا تیزوگ میدپین۔ 9 نگے کھیوجاگونلا زیرّاد، رانگی جیدماد مانکھان نیامپو لوسڈیل چوچیسّی ناسلوگ ماستوگس، سوجیکّی کھورانگی ناما چادتے جان بوموجیک نیامپو ناما چونا کھوے لوگییم چوستے اینوگ۔“ 10 لوبٹوگسگونّی حضرت عیسیٰ سی زیرس، ”کالتیس ناما تانگ ماگپے نانّگا تیزوگ ناسلوگ چھانا ناما ماچونا گیالچیس راگ۔“ 11 حضرت عیسیٰ سی مولس، ”خُدے باگما ماچوا دوگچیسّی کھیود سالّا زادکھان گُون ماستوگس، تشانگمالا کھیوجے زیرکھانّی میتشے پھود نیانّا مانوگ۔ 12 سپیرنا بُوژا کھاچیگ، سکیسپانے پھارلا ابا گیورچیسّی کھیود میدکھان، یانگ کھاچیگّا میگونّی ابا گیورچیسّی کھیود پو میدکھان چوسپا، یانگ کھاچیگی نامکھے گیالثیدلا جابستوگ چوچیسّی پھیا ناما چوا مانوگ۔ سوجیکّا ایتسوگسّی میتشے پھود نیانّا پھودشیگ۔“ حضرت عیسیٰ تانگ ٹھوگو چھونگون گُون۔ 13 تینے پھاماگونّی ٹھوگو چھونگون گُون حضرت عیسیٰ مسیح چھاگ بورّا زادتے دُعا ژوچیسلا کھونگ یودسا کھیونگس۔ اِین نانگ کھونگی لوبٹوگسگونّی پھاماگونلا حضرت عیسیٰ سی وبگیال ستانچیسلا کھاسکییس۔ 14 حضرت عیسیٰ سی مولس، ”ٹھوگو چھونگون گُون گھاگ ماگھاگّا نگا یودسا یونگچوگ یتسوگسگونّی پھیا نامکھے گیالثیدپو این۔“ 15 کھونگّونّیکا چھاگ بورّا زادتے برکت سالّا زادس، تینے حضرت عیسیٰ سی تیکانے سکیودس۔ ژونّو چھوگپوجیک۔ 16 میجیک حضرت عیسیٰ مسیح یودسا یونگستے زیرس، ”لوبپونلے، تھامیدپے میتشے تھوبچیسّی پھیا نگے زانگپو لاس چی چوگوس؟“ 17 کھونگی کھوا مولس، ”زانگپو چی این زیرتے نگا چیا ٹیاد۔ خُدے چیگپو ماستوگ سوانگ زانگپو مان۔ کالتیس کھیورانّگا تھامیدپے میتشے گوسین یودنا، تینے خُدے حُکم گیاگون کھانیون۔“ 18 کھوے حضرت عیسیٰ سی ٹیس، ”کاگون؟“ حضرت عیسیٰ سی لانسالس، ”می ماساد، رانگی جیدماد مانپا جانما نیامپو لوسڈیل ماچو، کوماکو، گوا زون ماتانگ، 19 رانگی ابا تانگ اما سیوا چوس، یانگ رانّگا چوکھان ژوگس کھیرانگی کھییمتشیسپا چیسپا چوس۔“ 20 ژونّوی حضرت عیسیٰ سی زیرس، ”تے تشانگما نگے چوادلے، تیکا تھیبا نگے چی چوگوس؟“ 21 حضرت عیسیٰ سی مولس، ”کالتیس کھیرانگ دزومسپوجیک گیوردوت یودنا، سونگ یانگ کھیرانگی گیونورگون تسونگستے پینیبو نیالباچانگونلا تونگ، نامکھے نانّگا کھیورانّگا بانگدزود تھوبین۔ تینے یونگستے نگے گیابنے ڈونگس۔“ 22 تیبو تشورّاچیگ، کھوا تشیرکھا یونگستے سونگ چیازیرنا کھو ما چھوگپو یودپین۔ 23 تینے حضرت عیسیٰ سی لوبٹوگس گونلا مولس، ”نگے لدینبا زیرّاد، می چھوگپو نامکھے گیالثیدّی نانّگا لیبچیس ما کاگسپو اینوگ۔ 24 یانگسکیار نگے کھیوجا زیرّاد می چھوگپو خُدے گیالثیدّی نانّگا لیبچیسّی سانگ کھابّی میگنے رنگابونگ بینگچیسپو لامو چھین۔“ 25 تیبو تشورّاچیگ لوبٹوگسگون ماہالاستے ٹیس، ”تینے سُوا تھارپا تھوبین؟“ 26 حضرت عیسیٰ سی کھونگونلا زیگستے مولس، ”یبو میا چو مانے مینیان، اِین نانگ خُدا چیتشانگما زاد نیانّانوگ۔“ 27 حضرت پطرؔس سی حضرت عیسیٰ سی زیرس، ”نگاجے چیتشانگما پھانگستے، نیرانّگا ڈانگسپین۔ نگاجا شزدے چی تھوبین؟“ 28 حضرت عیسیٰ سی کھونگونلا مولس، ”نگے کھیوجا لدینبا زیرّاد، خُدے چیتشانگما یانگسکیار سوما چوا زادچیس یانگ اِبنِ آدم شان چانّی ٹھیسّیکا دوگ زانے نگے ستینگرانگنے ڈانگسکھان کھیوجاگونّانگ بنی اِسرائیلی میریگس چوگنییسّیکا وانگثولچیسلا ٹھیس چوگنییسّیکا دوگین۔ 29 نگے تونلا کھانگپا یا فونو نو یا سترِنگمو یا ابا یا اما یا ٹھوگو یا جینگ پھانگسکھان تشانگمالا تیگونّی گیالداب ماتشاد تھامیدپے میتشیانگ تھوبین۔ 30 اِین نانگ داگسا گویکا یودکھان مانگپو ستینگجوگا لوسین یانگ داگسا ستینگجوگیکا یودکھان مانگپو گویکا لیباین۔“ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation