མད༌ཐཱ༌ 16 - New Testament in Ladakhi Langageمعجزہ ستاگس ستانچیسلا زیرس۔ 1 فریسی پاگون تانگ صدُوقی پاگون یونگستے حضرت عیسیٰ مسیح تشودلتاستے کھونّگا خُدے وانگچھا سالکھانبو تانتان چوچیسلا نامکھے ستاگس شیگ ستون زیرس۔ 2 کھونگی لانسالس، ”پھیتوگ نام مارپو یودا تھونگتے کھیوجے تھورے ناملا گیالّا یونّگانوگ زیردوگ، 3 یانگ نگاتوگ ثینّاگ گنگستے نامتشوبستے تھونگنا، دیرینگ لونگراگ تانگ چھارپا تانّگانوگ زیردوگ۔ کھیوجاگونّی نامکھے نانّگا چونگکھانّی ناملے ستاگس گُون شادنیاندوگ، اِین نانگ کھیوجاگونّی ایتوسّی ستاگس گُون چیا شادنیانّا میراگ۔ 4 میرابس نگانپا تانگ خُدا ایمان میدکھانگونّی نامکھے ستاگس ستون زیرّانوگ۔ اِین نانگ پیغمبر حضرت یُونسی ستاگس پو مانے یانگ ستاگس شیگ میستان۔“ تینے کھونگ کھونگرانگی لوبٹوگسگون نیامپو تیکانے سکیودس۔ زوسمے لابجاگونّی کانے شانگ سکولس۔ 5 تشوے پھارکا لیبّاچیگ لوبٹوگس گونلا تاگی کھورّالا رجیدکھانبو ایدتو یونگس۔ 6 حضرت عیسیٰ مسیح کھونگونلا مولس، ”فریسی پا تانگ صدُوقی پے سکیورنے شانگ چوس۔“ 7 کھونگونی چیگ تانگ چیگّا زیرس، ”نگاتانگی تاگی کھورتے میدپا کھونگی تیبو مولتے اینّوگا؟“ 8 حضرت عیسیٰ سی تیبو کھیینتے ٹیا زادس، ”کھیوجا ایمان چھونگون گُون، تاگی میدکھانّی سکورلا کھیوجاگونّی چیا سپیرا تانّگاد؟ 9 تارُوانگ کھیوجاگونلا ہاماگوا؟ ایدتو میراگّا تاگی ثنا نے می ستونگ ثنا ڈانگسچوگستے کھیوجے لوسکھانّی تاگی لدوسپا پاگتسے تسام گانگ، 10 یا تاگی ردونّے می ستونگژی ڈانگسچوگستے کھیوجے لوسکھانّی تاگی لدوسپا پاگتسے تسام گانگ؟ 11 نگے تاگی سکورلا سپیرا تانگستے مانکھانبو کھیوجے چیا ہاگوا میراگ؟ اِین نانگ فریسی پا تانگ صدُوقی پے سکیورّی کانے شانگ چوس۔“ 12 تینے کھونگونلا تاگی چوچیسلا کولکھانّی سکیورّی سکور مانپا، فریسی پا تانگ صدُوقی پے لابجاگونّے شانگ چوچیسلا ژوکھانبو ہاگو۔ حضرت پطرؔس سی حضرت عیسیٰ سی سو اینکھانبو شادس۔ 13 حضرت عیسیٰ مسیح قَیصرؔیہ فِلپّی یولجونگسلا لیبّاچیگ، کھونگی کھونگرانگی لوبٹوگس گونلا ٹیا زادس، ”میگونّی اِبنِ آدم سو اینوگ زیردوگ؟“ 14 کھونگونی لانتانگس، ”کھاچیگی غوتا سالکھان حضرت یُوؔحنّا ٰ، کھاچیگی پیغمبر حضرت اِلیاس یانگ جانماگونّی پیغمبر حضرت یرمیاہ پیغمبر گونّی ٹونے چیگ چیگ جُوگستے اینوگ زیردوگ۔“ 15 ”اینّانگ کھیوجے چی سامّاراگ؟“ حضرت عیسیٰ سی ٹیا زادس، ”نگا سو اینوگ؟“ 16 شمعُوؔن حضرت پطرؔس سی لانتانگس، ”نیرانگ خُدے لدامّا زادکھانّی مسیحا، سونپو خُدےبوژا اینوگ۔“ 17 حضرت عیسیٰ سی مولس، حضرت یُونسی بُوژا شمعُوؔن کھیرانگ برکت چان اینوگ۔ شاہ تانگ ٹھاق نے مانپا تیبو کھیورانّگا نامکھے یابّی خُدالتانتے این۔ 18 نگے کھیورانّگا زیرّاد، کھیرانگ حضرت پطرؔس اینوگ، یانگ ای ڈاگیکا نگے نگارانگی عبادت خانہ سیگاین۔ جہنّمی کھیود پو دے عبادت خانہ لا پھام کال مانے مینان۔ 19 نامکھے گیالثیدّی کولیگّون نگے کھیورانّگا تانگین۔ دُنیائیکا کھیرانگی گونگسپا ماتانگکھانبوا نامکھے خُدےانگ گونگسپا سالّا میزاد، یانگ دُنیائیکا کھیرانگی گونگسپا تانگکھانبوا نامکھے خُدےانگ گونگسپا سالّا زادِین۔ 20 تینے کھونگرانگی لوبٹوگس گونلا کھونگ مسیحا اینکھانبو سوانگ ماشاد مولتے کا سالس۔ حضرت عیسیٰ سی کھونگرانگ شیچیسّی سکورلا لونگستان زادس۔ 21 تینیپھارلا حضرت عیسیٰ مسیح کھونگرانگی لوبٹوگس گونلا ، کھونگ یروشالیمّا سونگتے یہُودی پے لابکھان گون ، اِمام کُنی چھونمو گونتانگ شریعتی عالِم گونّی ردوگنگال مانگپو ستانتے سادچیس یانگ جاگ سومپے جاگّا سونپو لانگسشیسّی سکورگون ہاگوچوگچیس گوزوگ زادس۔ 22 حضرت پطرؔس سی کھونگ سوسوا کھیرتے کھاسکییس یانگ زیرس، ”مسیح لے، تیزوگ خُدے چھاچوگّا میزاد۔ نیرانّگا ایتسوگس مانے چھا ماگوس۔“ 23 حضرت عیسیٰ سی حضرت پطرؔس چھوگسلا زیگستے مولس، ”شیطان، نگانے تھاگرینّگا سونگ۔ کھیرانگی نگا گھاگیاب چوگّانوگ۔ کھیرانگی سامتشول خُدے چھوگسنے مانپا، میی چھوگسنے اینوگ۔“ 24 تینے حضرت عیسیٰ سی کھونگرانگی لوبٹوگس گونلا مولس، ”نگے ستینگرانگنے یونّگا تھادکھانگون، رانگدود پھانگستے رانگی ردوگنگالّی کیانگشینگ کھورتے نگا ڈانگسگوس۔ 25 رانگثوگ سکیوبنیین یودکھانگونّی لدینبے میتشے سکیالاین، اِین نانگ نگے پھیا کھورانگی سروک سکیالکھانگونلا لدینبے میتشیبو تھوبین۔ 26 میجیکّا دُنیا گانگپو تھوبتیانگ رانگی سروک سکیالنا چی پھانتھوگس، یا تیبوے تشابسلا میجیکّی چی تانگنیانین؟ 27 اِبنِ آدم نامکھے یابّی شان ّی نانّگا کھونگی فرشتا نیامپو یونگستے، می ریریا رانگرانگی لاس نانگجین سولرس تانگین۔ 28 نگے کھیوجا لدینبا زیرّاد، ایکا یودکھان کھاچیگی اِبنِ آدم کھورانگی گیالثیدّی نانّگا سکیودچیسپو تھونگتے مانے میشی۔“ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation