ལུ༌ཀ༌ 8 - New Testament in Ladakhi Langageحضرت عیسیٰ سی ڈانگسکھانّی بوموگون۔ 1 ستینگما جاگّا حضرت عیسیٰ مسیح خُدے گیالثیدّی گاموےناتسُول شادچیسلا ڈونگکھیر تانگ گامیول چیگنے چیگّا سکیودس، یانگ کھونگ نیامپو لوبٹوگس چوگنییسپو یانگ 2 ردود جُوگسکھان تانگ ناد گونّے گیالچوگّا زادکھانّی بومو کھاچیگ یودپین۔ ردود ردون پھینّگا زادکھانّی حضرت مریم ماگدالّینما، 3 ہیرودِیس چھاگزوت کوزے ناما یُوانّہ، سوسانّا تانگ یانگ بومو مانگپو۔ کھونگونی رانگی نور گیُودتے حضرت عیسیٰ تانگ کھونگی لوبٹوگس چوگنییسپوے گھوسدومگون ریگّادپین۔ جینگبادپے ساون تابسکھانّی رومس۔ 4 ڈونگکھیر سوسونے میگون یونگتے حضرت عیسیٰ مسیح یودسا میچھوگس چھینمو دزوماین یود زانے کھونگی ای رومسپو شادّا زادس، 5 ”جینگبادپاجیگ ساون تابّالا سونگ۔ جینّگا ساون تاب زانے کھاچیگ لامیکا بُود، تیگون میی کانگپے نانس یانگ نامی چیپا یونگستے زوس۔ 6 ساون کھاچیگ ڈاگیکا بُود یانگ سکییاچیگ، سے نانّگا ہوس میدپا سکامستے شی۔ 7 ساون کھاچیگ تشیرمانگی ٹوا بُود یانگ ساون نیامپو تشیرمانگ سکیستے نانپا جینگبو لدان ماتھوب۔ 8 جان ساون گُون سا گیالّا یودسے ژینگیکا بودپا، سکیستے ستونتھوگ سمین، کا بو ساون تابسکھان نی 100 گیور یودپین۔“ تیبو مول تشارّاچیگ کھونگی شیدنانگ مولس، ”نامچھوگ یودکھانگونّی نگے زیرکھانلا نیونشیگ۔“ 9 تینے یشُوحی لوبٹوگسگونّی کھونگی شادّا زادکھانّی رومسّی تونبو کھونّگا ٹیس۔ 10 کھونگی کھونگونلا مولس، ”خُدے گیالثیدّی سانگواگون کھیوجا ہاگوچیسلا گونگسپا سالّا زادتے اینوگ، اِین نانگ ہلژخمہ شوقبُو بوے نانّگا ڈِیا زادکھانبو ڈانڈا ڈوبچیسلا نگے جانگونلا رومس گیُودتے شادّاد، تیبو نی، کھونگونی نگے چوکھانگون تھونگنانگ نگا سو اینکھانبو نگوشیسّا میدوگ، کھونگونی نگے شادکھانگون تشورنانگ ہاگو تھوبّا میدوگ۔“ 11 ”تے رومسّی تون نی ایبو این، ساونبو نی خُدے حُکم این۔ 12 لامیکا ساون بودکھانگون نی خُدے حُکم تشورکھانگون اینوگ، اِین نانگ ایمان چوستے تھارپا میتھوبچیسلا شیطان یونگستے کھونگونی سنینگی نانگنے تیبو کوگستے کھیرّانوگ۔ 13 ڈاگیکا ساون بودکھانبو نی خُدے حُکم تشورّاچیگ تھادپو نیامپو ایمان چوکھانگون اینوگ۔ تیبوا پاٹاگ تینگچان مید پاسانگ کھونگونی توس نیونگونجیگی پھیا ایمان چوروگ، یانگ تشودلتے توسلا ایمان پھانگین۔ 14 تشیرمانگسّی ٹوا بودکھانّی ساون گُون نی، خُدے حُکم تشورکھانگون اینوگ اِین نانگ میتشے تشیرکھا، گیونور تانگ سکیدپو گُونی نانتے کھونگونی ایمان لدانّا مانوگ۔ 15 اِین نانگ سا زانگپویکا ساون بودکھانبو نی سنینگ زانگپو تانگ ٹانگپو نیامپو خُدے حُکم نیانکھانگون اینوگ یانگ زودپا نیامپو تیبو ستانپو تھامستے دوگسپا ڈاسبو مانگپو سمینّانوگ۔“ اوت تانگ ود ستاگس ّی رومس۔ 16 ”میگونّی اوت توگستے گورموے یوگا واستے یا مالتسے یوگا مابورّا نانّگا یونگکھانگونّی تیبوے لدانگسّی نانّگا تھونگچیسلا ود ستاگس سیکا بورین۔ 17 واستے بورکھان تشانگما پھیلوگا پھینّگا زادِین، یانگ کابستے بورکھان تشانگما اودّی نانّگا کھیونگا زادتے تشانگما سنگون چوگّا زادِین۔ 18 تیبویپھیا کھیوجے نیانتشولبویکا سنانگستاگ تونگ۔ نگے لابجا نیانکھانگونلا مانّگا ہاگوچوگّا زادِین، اِین نانگ مانیانکھانگونّے ہاگوتے یود سامکھانبوانگ کھیرّا زادِین۔“ حضرت عیسیٰ سی لدینبے نانگمی 19 تینے حضرت عیسیٰ مسیح اما تانگ نوگون کھونگ تُھوگا یونگس، اِین نانگ میتشوگس چھینمو یودچیسپوے کھونگی لدُونلا لیب ماتھوب۔ 20 میجیگی کھونّگا زیرس، ”نیرانگی اما تانگ نوگون نیرانگ تُھوگا پھیلوگا ثونگتے دوگ۔“ 21 حضرت عیسیٰ سی لانسالس، ”خُدے حُکم نیانتے لاگلین چوکھانگون نگے اما تانگ نوگون این۔“ حضرت عیسیٰ سی لونگراگ میدکھان زادس۔ 22 جاگشیگ حضرت عیسیٰ مسیح کھونگرانگی لوبٹوگس گونلا مولس، ”نگاتانگ تشوے پھارکا چھین۔“ تینے کھونگون ٹُھوزینگجیگی نانّگا ژونتے سکیودس۔ 23 ٹُھوزینگی نانّگا چھا زانے حضرت عیسیٰ سی نالّا سکیودس۔ نامتشوبستے تشوے نانّگا لونگراگ ٹاگپو یونگستے ٹُھوزینگ چھوی گنگستے نوبچیسّی جیگسنانگ یودپین۔ 24 لوبٹوگسگون سونگتے حضرت عیسیٰ سی نیدتشادّا زادتے زیرس، ”سپونبولے، سپونبولے، نگاجا گُون چھوی نانّگا نوبتے شیچیس دوگ۔“ کھونگ جانگستے لونگراگ تانگ چھولباگ گُونلا کھاسکییا زادس، تینّامالّا تیگون میدکھان سونگتے جیدے چونگ۔ 25 کھونگی کھونگونلا مولس، ”کھیوجے ایمان کارُو سونگ۔“ لوبٹوگسگون جیگساین ہالاستے چیگ تانگ چیگّا زیرس، ”کھونگ سو اینوگ؟ کھونگی کا سالّاچیگ لونگسپو تانگ تشوینگ کھا نیاندوگ۔“ حضرت عیسیٰ سی میجیگنے ردودگون پھینّگا زادس۔ 26 تینے کھونگون ٹُھوزینگی نانّگا گلِیلی یولجونگسنے تشوے پھارکا یودکھانّی گراسا یولجونگسلا لیب۔ 27 حضرت عیسیٰ مسیح ٹُھوزینگنے بینّگا زادّاچیگ، تینّا ڈونگکھیرّی می، ردود جُوگسکھان جیگ کھونگ جالّالا یونگس۔ کھو لجیرنیالّا توس مانگپوجیگنے پھارلا کھانگپا مادوگا رومکھانگّونّی نانّگا دوگادپین۔ 28 کھوے حضرت عیسیٰ سی جالّاچیگ کُوچو ثانٹے تانگین حضرت عیسیٰ سی جابسّی لدُونلا گییلتے زیرس، ”حضرت عیسیٰ سی خُدے کھیود چانی بُوژا، نیرانگ نگے لاسّی نانّگا چیا ڈیسّاد؟ جوجو نگا ناگس ستانّا مازاد“ 29 چیازیرنا حضرت عیسیٰ سی ردود پوا، می بوے نانگنے بینگتے یونگ مولتے کا سالس۔ (می بوے کانگلاگ لچاگتھاگس نیامپو چینگستے ثونگکھان دوگستیانگ ردود پوے لان مانگپو کھویکا وانگثولتے لچاگتھاگس چاگستے کھو ریستونّگا کھیرّادپین)۔ 30 حضرت عیسیٰ سی کھوا ٹیا زادس، ” کھیرانگی مینگ چی این۔“ کھوے لانتانگس، ”ردودتشوگس“ چیازیرنا می بوے نانّگا ردود مانگپو جُوگستے یودپین۔ 31 یانگ تیگونّی لان مانگپو حضرت عیسیٰ سی کھونگون تھامانے میدکھانّی سادونگ تینگچانّی نانّگا پھانّگا میزادچیسلا جوجو جْوس ۔ 32 تیرو ریکا پھاگی کھیو چھینموجیگ سا زین یودپین۔ ردودگونّی حضرت عیسیٰ سی جوجو جْوس تے کھونگون تے پھاگّونّی نانّگا چھاچوگّا زادچیسلا زیرس، حضرت عیسیٰ سی تیگونلا گونگسپا سالّا زادس۔ 33 تینے ردودگون می بوے نانگنے بینگتے پھاگّونّی نانّگا ژوگس۔ یانگ پھاگی کھیو رینے تُھورلا بانگتانگستے تشوے نانّگا بُود یانگ چھوی نانّگا نوبتے شی۔ 34 پھاگتشوکھانگونّی جُونگکھانگون تھونّگاچیگ، ڈونگکھیر تانگ نییکھورّی ناسّاگونلا بانگتانگستے سونگ یانگ تیگون شادس۔ 35 تینے جُونگکھانگون ستالا میگون سونگ، حضرت عیسیٰ سی یودسا لیبّاچیگ، ردودگون پھینگکھانّی میبو حضرت عیسیٰ سی جابسّی لدُونلا کوسلاگ گونتے سنیو ماسنیوا دُوگستے تھونگپا کھونگون جیگس۔ 36 تے تشانگما تھونگکھانگونّی ردودگون ژوگسکھانّی میبو حضرت عیسیٰ سی کازوگی گیالچوگّا زادسکھانبو میگونلا جیبسال چوستے شادس۔ 37 گراسا یولجونگسّی میتشانگما ماثانٹے جیگسپا، کھونگونی حضرت عیسیٰ سی کھونگونی یولنے بینگتے سکیود زیرس۔ تینے حضرت عیسیٰ تانگ لوبٹوگسگون ٹُھوزینگا ژونتے لوگستے سکیودس۔ 38 ردودگون پھینگکھانّی می بوے حضرت عیسیٰ، کھو کھونگ نیامپو یونگ چوگّا زادچیسلا جوجو زیرین جُووا پھولس، اِین نانگ حضرت عیسیٰ سی کھو لوگستے لامچوگا زادتے مولس، 39 ”کھانگپا لوگستے سونگ، یانگ میتشانگمالا کھیرانگی پھیا خُدے زادکھان تشانگما شود۔“ تینے کھو سونگتے ڈونگکھیر گانگپوے نانّگا حضرت عیسیٰ سی کھوے پھیا زادکھان تشانگما شادس۔ بومو چھونگون شیکھان تانگ ناچھونگ زُومو یونگکھان۔ 40 تشوے چھوگسّی پھارکا لیبّاچیگ میتشوگس چھینموجیگی حضرت عیسیٰ سی گاسوس جْوس چیازیرنا کھونگون کھونگ سکیودچیسلا ثونگستے یودپین۔ 41 تینے یہُودی پے مجلِسی اُسکیونگ یائیر زیرکھانبو یونگستے حضرت عیسیٰ سی جابسّی لدُونلا گییلتے جوجو جوین کھوے کھانگپا سکیودچیسلا زیرس، 42 چیازیرنا ہالام لو چوگنییس چھاکھانّی کھوے بومو چیگچیگپو شیکییس یودپین۔ حضرت عیسیٰ سی کھو نیامپو سکیود زانے میتشوگس چھینموے کھونّگا نانتے کھیونگس، 43 بودکھانّی لو چوگنییسنے پھارلا توسگیون ٹھاق بینگچیسّی زُومو یونگسکھانّی بوموجیگ میتشوگسّی ٹوا یودپین۔ سوجیگّانگ کھو نادپونے پھانچوگ مانیان۔ 44 کھو حضرت عیسیٰ سی گیابنے یونگستے کھونگی نامزے ڈوجیگّا لاگپا توگّاچیگ، کھوے ٹھاق پو چھاد۔ 45 حضرت عیسیٰ سی مولس، ”نگا سوی لاگپا توگس۔“ می تشانگمے لاگپا ماتوگسپین زیرس، تینے حضرت پطرؔس سی زیرس، ”سپونبولے، میتشوگسّی نیرانگ ناناین پھولین کھیونگدوگ۔“ 46 اِین نانگ حضرت عیسیٰ سی مولس، ”سوجیگی نگا لاگپا توگس چیازیرنا نگے نانگنے پھانچوگکھانّی ستوبس بینگتے چھاکھانبو نگا تشور۔“ 47 تینے بوموبوے تیبو واستے بور مینیانّانوگ سامتے، دارین حضرت عیسیٰ سی لدُونلا یونگستے کھونگی ژابسّیکا گییلس۔ می تشانگمے لدُونلا کھوے حضرت عیسیٰ سی لاگپا چیا سیسپین یانگ لاگپا توگّاچیگ تینّامالّا کھوے زُومو پھانکھانبو شادس۔ 48 تینے حضرت عیسیٰ سی کھوا مولس، ”بومو کھیرانگی ایمانی کھیرانگ پھانچوگستے این۔ جیدے نیامپو سونگ۔“ 49 کھونگی جالتا سالین یود زانے، عبادت خانہے اُسکیونگ گییراسّی کھانگپانے میجیگ یونگستے کھوا زیرس، ”نیرانگی بوموبو شی۔ تا لوبپونلیا وبگیال ستانّا مازاد۔“ 50 تیبو تشورّاچیگ، حضرت عیسیٰ سی یائیر لا مولس، ”جیگس ماجیگس، ایمان رانگ چوس کھیرانگی بومو گیالین۔“ 51 حضرت عیسیٰ سی یائیری کھانگپا لیبّاچیگ، حضرت پطرؔس ، حضرت یعقُوبؔ ، حضرت یُوؔحنّا ٰ تانگ بوموے پھاما ماستوگس جانسوجیگّانگ کھونگ نیامپو یونگ چوگّا مازادس۔ 52 تینّا توسلا میتشانگما نگواین نیانگان چوادپین، حضرت عیسیٰ سی کھونگونلا مولس، ”مانگو، کھو ماشیا نییدلوگستے این۔“ 53 کھونگونی ٹھیلگود تانگس چیازیرنا کھونگونلا بومو شیتے اینکھان گیوسیودپین۔ 54 اِین نانگ حضرت عیسیٰ سی بوموے لاگپا تھامسّا زادتے کھوا مولس، ”نگے ٹھوگو، لونگس۔“ 55 تینّامالّا بوموے سیمسنید لوگستے یونگسپا کھو کواگ لانگس یانگ حضرت عیسیٰ سی کھونگونلا بوموبوا چیتونگشیگ زا تانگچیسلا مولس۔ 56 پھاماگون ماثانٹے ہالاس اِین نانگ حضرت عیسیٰ سی کھونگونلا چونگکھانبو سوانگ میشادچیسلا کا سالس۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation