ལུ༌ཀ༌ 23 - New Testament in Ladakhi Langageحضرت عیسیٰ سی کالون پیلاطُسی کا کھیرس۔ 1 تینے یہُودی پے ژوکسپے تھوسمی گانگپو لانگستے حضرت عیسیٰ مسیح رومپے کالون پیلاطُسی کا کھیرس۔ 2 کھونگونی حضرت عیسیٰ سی سکیون کالین زیرس، ”ای می بوے میگونلا رومی گیالپوا نگولوگ چوچوگستے ٹھال ماشال یانگ کھورانگ خُدے لدامّا زادکھانّی مسیحا، گیالپو این زیردوگ۔“ 3 تینے کالون پیلاطُسی حضرت عیسیٰ سی ٹیس، ” کھیرانگ یہُودی پے گیالپو اینّا؟“ کھونگی لانسالس، ”این، نیرانگی زیرکھانبو این۔“ 4 اِین نانگ پیلاطُسی اِمام کُنی چھونمو گون تانگ میتشوگسگونلا زیرس، ”نگا ای می بوے نانّگا سکیون چانگ تھوبّا میدوگ۔“ 5 کھونگونی وتسوگ تانگستے زیرس، ”ای می بوے کھورانگی لابجا گیُودتے یہُودیہ یولجونگس گانگپوے میگون ٹھوگس شوگس، گلِیلی یولنے گوزوگستے ای تشوگپا لیب۔“ 6 تیبو تشارتے پیلاطُسی، کھو گلِیل پا اینّوگا زیرتے ٹیس۔ 7 کھونگ ہیرودِیس وانگی یوگا اینکھانبو کھوا گیُوس چھاچیگ کھوے حضرت عیسیٰ سی ہیرودِیس یودسا کالس، تیتوسلا ہیرودِیس یروشالیمّی نانّگا یودپین۔ ہیرودِیس لدُونلا حضرت عیسیٰ سی کھیونگس۔ 8 ہیرودِیس لا حضرت عیسیٰ مسیح تھوگچیسّی سکابس تھوبپا ماثانٹے تھاد چیازیرنا کھوا کھونگی سکورلا تشورتے توس مانگپوجیگنے پھارلا حضرت عیسیٰ سی جالتے کھونگنی ستاگس شیگ ستاچیسّی دودپا چھینمو یودپین۔ 9 کھوے حضرت عیسیٰ سی ٹیوا مانگپو ٹیس اِین نانگ کھونگی لان چیگّانگ ماسالس۔ 10 تیکا یودکھانّی اِمام کُنی چھونمو گون تانگ شریعتی عالِم گونّی ثوے نانّگا کُوچو تانگستے کھونّگا نیادگال کالین دُوگس۔ 11 ہیرودِیس تانگ کھوے ماگمیگونّی حضرت عیسیٰ سی ٹھیلبا ستانتے ہابگود تانگس، تینے کھونّگا نامزا ٹاگپو سکونتے پیلاطُس یودسا لوگستے کالس۔ 12 تے جاگّا پیلاطُس تانگ ہیرودِیس دزاو گیور، سنگونلا کھونگون ڈاو اینپین۔ میساد پھودس یانگ حضرت عیسیٰ سی شیچیسّی چھادپا پھوگ۔ 13 تینے پیلاطُسی اِمام کُنی چھونمو گون، یہُودی پے اُسکیونگون تانگ میگون بودتے، 14 کھونگونلا زیرس، ”کھیوجاگونّی ای می بوے میگونلا رومی گیالپوا نگولوگ چوچوگکھانّی نیادگال کالتے نگے لدُونلا کھیونگس۔ نگے کھیوجے لدُونلا کھوا سارچود تانگستیانگ، کھوے نانّگا کھیوجاگونّی کالکھانّی سکیون چانگ ماتھوب۔ 15 ہیرودِیس لانگ چانگ سکیون ماتھوبّا، نگیکا لوگستے کالکھانبو کھیوجے تھونگین اینوگ، کھو سادگوشیسّی سکیونجیگ چانگ تھوبّا میدوگ۔ 16 تینّابویپھیا کھوا ستالچاگ گیابچوگستے پھودین۔“ 18 کھونگ تشانگما چیگ سونگتے کُوچو تانگین زیرس، ”ای میبو سادّا کھیر یانگ برابّانگاجے پھیا پھودّا زاد۔“ 19 (یروشالیمّی گیالسے نانّگا رومی وانگثولپے نگولوگ چوستے می سادچیسپوے برابّا تسونلا کاگستے یودپین)۔ 20 پیلاطُس لا حضرت عیسیٰ سی پھودچیسّی دودپا یودپا یانگسکیار میتشوگسلا ٹیس، 21 اِین نانگ کھونگونی مانّگا کُوچو تانگین زیرس، ”کھو کیانگشینگا کیونگ، کیانگشینگا کیونگ۔“ 22 پیلاطُسی لان سومپا کھونگونلا زیرس، ”چیپھیا، کھوے شریعتی گیابگال چی چوستوگ۔ سادگوشیسّی سکیونجیگ کھوے نانّگا نگا چانگ ماتھوب۔ تیبویپھیا نگے کھوا ستالچاگ گیابچوگستے پھودین۔“ 23 کھونگ تشانگمے چھادماچوگّا سکاد چھینموے نانّگا کھو کیانگشینگا کیونگ زیرتے کُوچو تانگس، یانگ کھونگونی کُوچو تانگکھانبو ٹھانگسپو لوس۔ 24 پیلاطُسی کھونگونی زیرکھان نانگجین چوس۔ 25 نگولوگ چوستے می سادچیسپوے تسونلا کاگسکھانّی می کھونگونی پھود زیرکھانبو پھودس یانگ کھونگونی دودپا نانگجین حضرت عیسیٰ سی کیانگشینگا کیانگچیسلا ستادس۔ حضرت عیسیٰ سی کیانگشینگیکا کیانگس۔ 26 حضرت عیسیٰ مسیح ٹھیدتے کھیر زانے ماگمیگونّی گامیولنے یونگکھانّی کیرین پا شمعُوؔن زومس یانگ کیانگشینگبو کالتے حضرت عیسیٰ سی ستینگرانگنے ڈولچوگس۔ 27 میتشوگس چھینموجیگ حضرت عیسیٰ سی گیابنے یونگس، کھونگونی ٹوا حضرت عیسیٰ سی پھیا ردوگپو چوستے نگواین یودکھانّی بوموگونّانگ اینوگ۔ 28 حضرت عیسیٰ سی گیابّا زیگستے کھونگونلا مولس، ”یروشالیمّی بوموگون نگے پھیا مانگو، کھیوجارانگ تانگ کھیوجے ٹھوگوگونّی پھیا نگوس۔ 29 توسپو لیباین، نام کھیوجاگونّی زیرین، ’ٹھوگو ماجورکھان، چانگکھوگّا ٹھوگو ماکھورکھان تانگ اوما ماستیرکھانّی آوما، برکت چان این۔‘ 30 تیتوسلا میگونّی ریگونلا زیرین، ’نگاجیکا لدِیپ‘ یانگ ڈاگّونلا نگاجا ’کوبشیگّانگ۔‘ 31 کالتیس لچانگما لونپا یود زانے میگونّی ایزوگ چونا، تینے لچانگما سکامستے ستینگنے کھونگونی چی میچو؟“ 32 شریعت چاگکھانّی جانمی نییسّانگ سادچیسلا حضرت عیسیٰ سی نیامپو ٹھیدتے کھیرس۔ 33 گوی روسپا زیرکھانّی ناسّیکا لیبّاچیگ، ماگمیگونّی حضرت عیسیٰ سی کیانگشینگیکا کیانگس، کھونگ نیامپو شریعت چاگکھانّی می نییسکوانگ کیانگشینگیکا کیانگس، چیگپو کھونگی یاسپا یانگ چیگپو یوما۔ 34 حضرت عیسیٰ سی مولس، ”یابلے، کھونگونلا مُعافی سال چیازیرنا کھونگونی چوین یودکھانبو کھونگونلا ہاماگوا اینوگ۔“ ماگمیگونّی کھونگی نامزا گوچیسلا گیان گیابس۔ 35 میگونّی جونگکھان تشانگما ستیندوگس اِین نانگ اُسکیونگونی تشیگس تانگین زیرس، ”کھوے جانماگون سکیوبس، کالتیس کھو خُدے مسیحا لدامّا زادکھانبو اینّا کھورانگ سکیوبچوگّانگ۔“ 36 یانگ ماگمیگونّیانگ تشیگس تانگین کھونگی لدُونلا یونگستے کھونّگا رگونچھانگ سکیورمو تانگس 37 یانگ زیرس، ”کالتیس کھیرانگ یہُودی پے گیالپو اینّا، رانگ سکیوبّانگ۔“ 38 کھونگی اوی ستاگّا ای میبو یہُودی پے گیالپو این ڈِیستے یودپین۔ 39 کیانگشینگیکا کیانگسکھانّی ٹھیمسچاگکھان چیگپوے کھونّگا تشیگس تانگستے زیرس، ” کھیرانگ لدامّا زادکھانّی مسیحا مانّا؟ کھیرانگ تانگ نگاجا سکیوبّانگ۔“ 40 جان چیگپوے کھوا کھاسکییستے زیرس، ”کھونگ ژوگس کھیورانّگا شیچیسّی چھادپا پھوگتیانگ خُدے ٹھیمسچادلا جیگسّا میراگّا؟ 41 نگاتانگ نییسکوا نگاتانگی لاس نگانپا چوکھانّی اوسپے چھادپا پھوگتے اینوگ، اِین نانگ ای می بوے نگانپا لاس چانگ چوا مازادس۔“ 42 تینے کھوے حضرت عیسیٰ سی زیرس، ”مسیح لے، نیرانگ نیرانگی گیالثیدّی نانّگا سکیودّاچیگ، نگا ایدتو بورّا زاد۔“ 43 حضرت عیسیٰ سی لانسالس، ”نگے کھیورانّگا لدینبا زیرّاد، دیرینگ کھیرانگ نگا نیامپو نامکھے نانّگا لیباین۔“ حضرت عیسیٰ مسیح ڈونگس۔ 44 نیینگّونگ زامشیگنے چھوتشود سومپا تشوگپا یول گانگپو مونڈیگ سونگ۔ 45 نییمے اوت میدکھان سونگ یانگ بیت المقدِس سی یولّا گونّے جوگ تشوگپا کھاگنییسّی نانّگا چھاد۔ 46 تینے حضرت عیسیٰ سی سکاد چھینموے نانّگا مولس، ”کیے یاب، نگے سیمسنید نیرانگی چھاگّا ستادّاد“ تیزوگ مول تشارّاچیگ کھونگ ڈونگس۔ 47 ماگیے سپونبوے جُونگکھانگون تھونگتے خُدا ستودپا پھولین زیرس، ”ای میبو ٹانگپو میجیگ اینکھانبو تانتان اینوگ۔“ 48 تیرو کیانگشینگا کیانگچیس ستالا یونگکھانّی می تشانگمے جونگکھان تشانگما تھونّگاچیگ ڈانگ ردونگتانگاین لوگستے سونگ 49 اِین نانگ گلِیلی یولنے حضرت عیسیٰ سی ستینگرانگنے یونگسکھانّی بوموگون تھیستے کھونگ شیسکھان تشانگمے تھاگرینّگا دُوگستے جُونگکھانگون ستاس۔ حضرت عیسیٰ سی جنازہ قبرستانی نانّگا بورّا زادس۔ 50 تا یہُودی پے ژوکسپے تھوسمی حضرت یُوسفؔ زیرکھانّی ٹانگپو تانگ زانگپو میجیگ یودپین، 51 کھونگونی تھابسلدینگس تانگ لاسگونلا کھوے کھاماچھامس۔ کھو یہُودی ڈونگکھیر ارمتیہ پا، خُدے گیالثید لیبچیسلا ثونگستے یودپین۔ 52 کھو پیلاطُسی کا سونگتے حضرت عیسیٰ مسیح جنازہ کھوا سال زیرتے جُووا پھولس۔ 53 جنازہ کیانگشینگی کانے بابستے راس کوسپوے نانّگا تومس یانگ ڈاگیکا سکوسکھانّی قبرستان جنازہ مانے مابورکھانجیگی نانّگا کھونگی جنازہ بو بورس۔ 54 تے جاگپو شابّادّی پھیا ڈالچوچیس یانگ شابّادّی جاگپو گوزوگ چھاکییس یودپین۔ 55 گلِیلی یولجونگسنے حضرت عیسیٰ سی نیامپو یونگسکھانّی بوموگون حضرت یُوسفؔ بی گیابگیابنے سونگ یانگ حضرت عیسیٰ سی جنازہ بورّا زادکھانّی قبرستان بو تھونگ۔ 56 تینے کھونگون کھانگپا لوگستے یونگس یانگ جنازہ سکوچیسّی پھیا ٹیجیم چانّی مار تانگ مارناگ ڈالڈیگ چوس۔ شریعت نانگجین کھونگون شابّادّی آرام چوچیسی جاگّا آرام چوستے دُوگس۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation