ལུ༌ཀ༌ 22 - New Testament in Ladakhi Langageکاریودپا یودے نگولوگ چوس۔ 1 تا سکیور میدکھانّی تاگی توسچھین کابوا پیساگی توسچھین زیرّاد نیمو یودپین، 2 اِمام کُنی چھونمو گون تانگ شریعتی عالِم گونّی سانگوے تھوگنے حضرت عیسیٰ سی سادچیسّی تھابس سالس چیازیرنا میتشوگسّی تیبوا گیابگال چوانوگ سامتے کھونگون جیگسّادپین۔ 3 تینے لوبٹوگس چوگنییسّی نانگنے چیگ، کاریودپا زیرکھانّی یہُوداؔہ اِسکریوت پے نانّگا شیطان ژوگس، 4 یانگ کھو اِمام کُنی چھونمو گون تانگ بیت المقدِس ثونگکھانّی ماگمی اُسکیونگون یودسا سونگتے حضرت عیسیٰ نگولوگ چوستے کازوگی کھونگونی لاگا ستاداین زیرتے ٹابس چوس۔ 5 کھونگون ماثانٹے تھادتے کھوا پینے تانگچیسلا کھاچھامس۔ 6 کھوانگ تیبوا کھاچھامستے میتشوگس مید زانے حضرت عیسیٰ سی کھونگونی لاگا ستادچیسّی سکابس ژالچیس گوزوگ۔ ستینگجوگی دونتانگ نامس۔ 7 تینے سکیور میدکھانّی تاگی توسچھین لیب، تے جاگّا پیساگی لوگپو قُربانلا پھولّادپین، 8 حضرت عیسیٰ مسیح حضرت پطرؔس تانگ حضرت یُوؔحنّا ٰ لامچوگا زادِین مولس، ”سونگتے نگاتانگون زاچیسلا پیساگی دونتانگ ڈالڈیگ چوس۔“ 9 کھونگونی حضرت عیسیٰ سی ٹیس، ”نگاجے پیساگی دونتانگ کارُو ڈالڈیگ چولے۔“ 10 حضرت عیسیٰ سی کھونگونلا مولس، ”گیالسے نانّگا ژوگس زانے، تیرو چھوکار کھورکھانّی میجیگ کھیوجاگونلا تھوگچین، کھوے ستینگرانگنے سونگ۔ کھو جُوگستے چھاسی کھانگپے 11 کھانگداگپوا زیر لوبپونّی ٹیاراگ، ڈونپو جوگسے نانگبو کانے یود، تیرو نگے نگارانگی لوبٹوگسگون نیامپو پیساگی زان زا نیا نین؟ 12 کھوے کھیوجا ستانگتھوگّا ڈالڈیگ چوسکھانّی نانگ چھینموجیگ ستانچین، تیرو دونتانگی ڈال چوس۔“ 13 تینے کھونگون سونگ یانگ چیتشانگما حضرت عیسیٰ سی مولکھان نانگجین تھونگ۔ کھونگونی تیرو پیساگی دونتانگ ڈالڈیگ چوس۔ 14 توستشود لیبّاچیگ حضرت عیسیٰ سی کھونگرانگی رسُول گُون نیامپو چوگتسے لدُونلا نیاسّیکا ستینتے ژوگس 15 یانگ کھونگی رسُول گُونلا مولس، ”نگا ردوگنگال نیونگی سانگ سنگونلا ای پیساگی کھارجی کھیوجا نیامپو دُوگستے زاچیسّی دودپا چھینمو یودپین، 16 چیازیرنا نگے کھیوجاگونلا زیرّاد، نگے ایبو یانگسکیار مانے میزا نامتشوگپا یبوے تونتاگپو خُدے گیالثید نانّگا ڈانڈا میڈوب۔“ 17 تینے حضرت عیسیٰ سی دونسکیوگپو نامستے خُدا شُکر جْوس یانگ کھونگونلا مولس، ”یبو لینتے کھیوجارانگونّی نانّگا گوس۔ 18 نگے کھیوجا زیرّاد، ای رگونچھانگبو نگے یانگسکیار میتُھونگ نامتشوگپا خُدے گیالثید مِیلیب۔“ 19 تینے دونکییر نامستے خُدا شُکر جْوس یانگ چاگّا زادتے لوبٹوگس گونلا سالس یانگ مولس، ”یبو کھیوجاگونّی پھیا تانگسکھانّی نگے زوگسپو این۔ نگا ایدتو چوچیسلا ایبو چوس۔“ 20 تینّا تسوگسلا کھارجی ستینگنے یانگسکیار رگونچھانگی دونسکیوگپو نامس یانگ مولس، ”ای کوریبو خُدے تانگ کھونگی میگونّی پارلا نگے ٹھاق نیامپو چوسکھانّی وعدہ سوما این۔ 21 اِین نانگ ستوس، نگا ڈاو لاگا ستادکھانّی لاگپا ای چوگتسیکا نگا نیامپو دوگ۔ 22 تھاگچادّا زادکھان نانگجین اِبنِ آدم شیگوس، اِین نانگ کھو ڈاو لاگا ستادکھانّی میبوا تسامشیگی جیگسپا مییونگ۔“ 23 لوبٹوگسگونّی ٹونے، تیبو سوی چوین زیرتے کھورانگ چیگ تانگ چیگّا ٹیچیس گوزوگ۔ 24 تینے لوبٹوگسگونّی نانّگا کھورانگونّی ٹونے ٹاگشوگ سو این زیرین زیرزیر سونگ۔ 25 حضرت عیسیٰ سی کھونگونلا مولس، ”یہُودی مانکھان ّی گیالپوگونّی میگونّیکا سنینگرجے میدپا وانگثولّانوگ، یانگ میگونّیکا وانگچھا یودکھانگونّی کھورانگّونلا ’میگونلا پھانتھوگس تانگکھان‘ زیرّانوگ۔ 26 کھیوجے نانّگا تیتسوگس یونگ ماگوس۔ کھیوجے ٹونے ٹاگپو اینکھانبو چھونگشوگ گیورگوس یانگ وانگثولکھانبو جابستوگ جوکھان گیورگوس۔ 27 چوگتسیکا زانزالا دوگکھانبو چھیا اینّوگا یا جابشی ژوکھانبو؟ چوگتسیکا زانزالا دوگکھانبو میچھیا؟ اِین نانگ نگے جابشی ژوکھانّی تشولّا کھیوجاگونّی ٹوا میتشے پھودّاد۔“ 28 ”نگا کاگسپو تھونگی توسلا کھیوجا نگا نیامپو دُوگکھان گُون اینوگ۔ 29 کازوگ نگے یابّی نگا گیالثیدجیگ وانگثولّا سالس تینّا ژوگس نگیانگ کھیوجاگونلا گیالثیدجیگ وانگثولّا تانگین۔ 30 کھیوجا نگے گیالثیدّی نانّگا نگا نیامپو نگے چوگتسے کانے زین، تھونگین یانگ بنی اِسرائیلی میریگس چوگنییسّیکا وانگثولچیسلا ٹھیسّیکا دوگین۔“ حضرت عیسیٰ سی حضرت پطرؔس سی کھونگ میشیسزون تانگچیسپو لونگستان زادس۔ 31 حضرت عیسیٰ مسیح مولس، ” شمعُوؔن ، شمعُوؔن ، کھیوجاگون تشودلتے نانّگا ٹو سیگّا تسوگسلا سیگچوگچیسلا شیطانی خُدا جُووا پھولس۔ 32 اِین نانگ کھیرانگی ایمان میپھانگچیس یانگ گیودپا چوستے یانگسکیار نگیکا ایمان چواچیگ، کھیرانگی فونو گونلا سپوسپا تانگچیسلا دُعا جوسپین۔“ 33 حضرت پطرؔس سی لانتانگس، ”مسیح، نگا نیرانگ نیامپو تسونلا چھاچیس ماتشاد شیچیسلانگ ڈالڈیگ این۔“ 34 حضرت عیسیٰ سی حضرت پطرؔس لا مولس، ”نگے کھیورانّگا زیرّاد، دیرینگ چاپوے چاسکاد تانگی سانگ سنگونلا کھیرانگی نگا لان سوم میشیسزون تانگین۔“ 35 تینے حضرت عیسیٰ سی کھونگونلا مولس، ”نگے کھیوجا کھوماگس، جولا تانگ پابُو میدپا کال زانے کھیوجاگونلا گھوسدومگون ڈانڈا ماسونّگا؟“ کھونگونی زیرس، ”ڈانڈا سونگلے۔“ 36 ”اینّانگ کھوماگس یودکھانگونّی تیبو کھورگوس تینّا تسوگسلا جولانگ۔ رایَ میدکھانگونّی رانگی کوس تسونگستے رایَ نیوگوس۔ 37 نگے کھیوجا زیرّاد، ہلژخمہ شوقبُو بوے نانّگا ’کھو شریعت چاگکھانگونّی ٹوا سیاین‘ ڈیسکھانبو نگیکا ڈوبگوس۔ تانتان نگے سکورلا تے ڈیسکھانبو ڈوبین اینوگ۔“ 38 کھونگونی زیرس، ”مسیح لے، نگاجے لاگا رایَ نیس یود۔“ حضرت عیسیٰ سی مولس، ”رایَ سکورلا مانگپو زیرس، تا ڈوگ۔“ حضرت عیسیٰ سی ذیتونی ریکا دُعا جوا زادس۔ 39 حضرت عیسیٰ مسیح لوبس نانگجین گیالسانے پھیلوگا بینگستے ذیتونی ریکا سکیودس یانگ کھونگی لوبٹوگسگون کھونگی ستینگرانگنے سونگ۔ 40 تے ناسّیکا لیبّاچیگ کھونگی کھونگونلا مولس، ”کھیوجا دِیگپے نانّگا میگییلچیسّی پھیا دُعا چوس۔“ 41 تینے ردوا پھانگستے لیبتشاد زامشیگ کھونگّونّے تھاگرینّگا سکیودتے پِیکدونگ ژُوگستے دُعا چوس، 42 ”یابلے کالتیس نیرانگ تھوگستھادنا ای ردوگنگالّی کوریبو نگے کانے تھینّا زاد، اِین نانگ نگے دودپا نانگجین مانپا، نیرانگی تھوگّونگس نانگجین چوا زاد۔“ 43 تینے نامکھانے فرشتاجیگ سکیودتے کھونّگا ستوبس چوگّا زادس۔ 44 ردوگنگال ثانٹے نانّگا سنینگی تھیلنے دُعا جوا زادس، یانگ کھونگی ژالدونگنے بینگکھانّی مولچھو ٹھاق گی تھیگسپا تسوگسلا سیکا بُود۔ 45 دُعا ژو تشارّاچیگ، کھونگ جانگستے لوبٹوگسگون یودسا لوگستے سکیودس۔ کھونگون نیدلا سونگتے زِیگس، تشیرکھے جاستے کھونگون ثانتے نگالتے یودپین۔ 46 کھونگی کھونگونلا ٹیا زادس، ”کھیوجا چیا نییدلوگستے این۔ لونگشیگ، کھیوجا دِیگپے نانّگا میگییلچیسّی پھیا دُعا چوس۔“ حضرت عیسیٰ سی زومس۔ 47 حضرت عیسیٰ مسیح جالتا سالین یود زانے لوبٹوگس چوگنییسپوے نانگنے چیگ، یہُوداؔہ زیرکھانبوے میتشوگسلا گو چوستے حضرت عیسیٰ سی پوگ تانّگالا کھونگ یودسا یونگس۔ 48 اِین نانگ حضرت عیسیٰ سی کھوا مولس، ” یہُوداؔہ ، کھیرانگی پوگ تانگستے اِبنِ آدم نگولوگ چوادا؟“ 49 حضرت عیسیٰ سی جان لوبٹوگسگونّی چونگچیسچانبو تھونّگاچیگ کھونگونی زیرس، ”مسیح لے، نگاجے رایَ گیابّا؟“ 50 یانگ کھونگ چیگ چیگی اِمامِ اعظمی یوگپوا رایَ گیابستے کھوے نامچھوگ یاسپا چادتانگس۔ 51 اِین نانگ حضرت عیسیٰ سی مولس، ”تا ڈوگ، ایتسوگس ماچو“ یانگ تے می بوے نامچھوگپوا چھاگ سیستے پھانچوگا زادس۔ 52 تینے حضرت عیسیٰ سی اِمام کُنی چھونمو ، بیت المقدِس ثونگکھانّی ماگمی اُسکیونگ تانگ یہُودی پے اُسکیونگ کھونگ زومّا یونگکھانگونلا مولس، ”رایَ تانگ بیرگا کھورتے نگا زومّا یونگستے چی نگا ستانشیگ اینّوگا؟ 53 بیت المقدِس سی نانّگا جاگدانگ نگے لابجا تانگ زانے کھیوجے نگا چیا مازومسپین؟ اِین نانگ ایبو نی کھیوجاگونّی توستشود، مونڈیگی وانگثولّی توس اینوگ۔“ حضرت پطرؔس سی حضرت عیسیٰ سی میشیسزون تانگس۔ 54 تینے بیت المقدِس ثونگکھانگونّی کھونگ زومستے، اِمامِ اعظمی پھوڈانّگا کھیرس یانگ حضرت پطرؔس تھاگرینگجیگنے کھونگی گیابنے سونگ۔ 55 کھونگونی پھوڈانگی گیانگسکورّی ژونّگا میا تانگستے تیبوا کھورتے دُوگس، حضرت پطرؔس سانگ کھونگون نیامپو دُوگس۔ 56 تینے یوگموجیگی حضرت پطرؔس میا دُوگستے تھونگپا کھوا ژیبچا چوستے ستاس یانگ زیرس، ”ای میبوانگ حضرت عیسیٰ سی نیامپو دوگپین۔“ 57 اِین نانگ حضرت پطرؔس سی زون تانگستے زیرس، ”بومو، نگے کھو شیسّامید۔“ 58 ژاپیگ ستینگنے یانگ میجیگی کھو تھونگتے زیرس، ”کھیورانّگانگ کھونگونی ٹوپا چیگ اینوگ۔“ حضرت پطرؔس سی کھوا زیرس، ”دزاو، نگا مان۔“ 59 چھوتشود چیگ دزود چیگی ستینگنے جان میجیگی زیرس، ”تانتان ای میبوانگ کھوے ٹوپاگونّی نانگنے چیگ اینوگ چیازیرنا کھو گلِیل پا اینوگ۔“ 60 اِین نانگ حضرت پطرؔس سی لانتانگس، ” کھیرانگی چی زیرتے این نگا ہاگوا میراگ۔“ کھوے تیبو زیرکھان زانے، چاپوے چاسکاد تانگس۔ 61 مسیح گیابگیورتے حضرت پطرؔس لا زِیگس۔ تینے حضرت پطرؔس لا مسیح، ”چاپوے چاسکاد تانگی سانگ سنگونلا کھیرانگی نگا لان سوم میشیسزون تانگین“ مولکھانبو ایدتو یونگس، 62 یانگ کھو پھیلوگا سونگتے ماثانٹے نگوس۔ 63 حضرت عیسیٰ سی ثونگکھانگونّی کھونّگا تشیگ تانگین ردونگچیس گوزوگ۔ 64 کھونگونی کھونگی میگ لاگپھیس نیامپو کابستے لتاباین زیرس، ”لونگستان شودّانگ کھیورانّگا ردونگکھانبو سو اینوگ؟“ 65 یانگسپیرا سوگپو مانگپو نلوق زیرتے کھونّگا ٹھیلبا ستانس۔ حضرت عیسیٰ سی یہُودی پے ژوکسپے نانّگا کھیرس۔ 66 ناملانگسّاچیگ یہُودی پے اُسکیونگون، اِمام کُنی چھونمو گون تانگ شریعتی عالِم گونّی تشوگسدو تشوگستے حضرت عیسیٰ مسیح ٹھیمسکھونا کھیونگچوگستے ٹیس۔ 67 کھونگونی زیرس، ”نگاجا شودّانگ، کھیرانگ لدامّا زادکھانّی مسیحا اینّا؟“ کھونگی لانسالس، ”کالتیس نگے کھیوجا زیرنا کھیوجا دِین میشیس، 68 یانگ کالتیس نگے ٹیواجیگ ٹینا کھیوجے لان می تانگ۔ 69 اِین نانگ تانیپھارلا اِبنِ آدم کھیود چان خُدے چھاگ یاسپے ٹھیسّیکا دوگین۔“ 70 کھونگ تشانگمے زیرس، ” کھیرانگ خُدےبوژا اینّا؟“ کھونگی لانسالس ”کھیوجے زیرکھانبو نگا این۔“ 71 تینے کھونگونی زیرس، ”نگاتانّگا ای سانگ مانّگا گواہ چی گوسین؟ کھوے زیرکھانبو نگاتانگونّی تشور۔“ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation