ལུ༌ཀ༌ 17 - New Testament in Ladakhi Langageدِیگپا، ایمان تانگ کھاگ کھورچیس۔ 1 حضرت عیسیٰ مسیح کھونگرانگی لوبٹوگس گونلا مولس، ”دِیگپے نانّگا گییلچوگکھان تانتان جونگین، اِین نانگ تیبو جونگ چوگکھانبوا تسامشیگی جیگسپا مییونگ۔ 2 ای چھونگونگونّی نانگنے چیگّا دِیگپا چوچوگی سانگ کھورانگی سکییا رانتھاگی ردوا تاگستے گیاتشوے نانّگا پھانگنا گیال۔ 3 تینے کھیوجے جاستے سوجیگّانگ دِیگپے نانّگا میگییلچیسلا تانتان چوس۔“ ”کالتیس کھیوجے فونو جیگی دِیگپا چونا، کھوا کھاسکییستے اُسکیونگ، یانگ کالتیس کھوے گیودپا چونا مُعافی تونگ۔ 4 کالتیس کھوے نییما چیگی نانّگا لان ردون کھیوجے گیابگالّا دِیگپا چوستے لان ردون کھیوجیکا یونگستے گیودپا چونا، کھیوجے کھوا مُعافی تونگ۔“ 5 رسُول گُونی مسیحا زیرس، ”نگاجا ایمانی نانّگا لدان چوگّا زاد۔“ 6 مسیح لانسالس، ”کالتیس کھیورانّگا نیونگسکارّی ساون چھونگون زامشیگی ایمان یودنا کھیرانگی وسے لچانگما زیر، ’پاٹاگنے پھودتے تشوے نانّگا سونگ‘ یانگ تیبوے کھیرانگی کھا نیانین۔“ 7 ” کھیرانگی یوگپوجیگ ژینگسنگوا یا لُوگ تشوا سونگتے کھانگپا لوگتے یونّگاچیگ، کھیرانگی کھوا زیرینّا، یونگ، ایکا دُوگستے کھارجی زو؟ 8 کھیرانگی کھوا میزیرّا، ’گونگزان ڈالڈیگ چوس، یانگ نگا زا تانگ تھونگ تشارتشار تشوگپا سکییراگس چینگستے جابستوگ چوس، تے ستینگنے کھیرانگ زاتھونگنانگ ڈیگ؟ 9 زیرکھان نانگجین یوگپوبوے چوسپا، کھیرانگی کھوا شُکر زیرینّا؟ تانتانلا میزیر۔ 10 تینّا تسوگسلا مولکھان نانگجین کھیوجے، چیتشانگما چوتشارتے، کھیوجے زیرگوس، نگاجا سیوے اوسپا مانکھان یوگپو این، کھاگ کالکھانّی لاسپو نگاجے چوسپین‘۔“ دزیناد یونگکھان رچُو گیالچوگّا زادس۔ 11 حضرت عیسیٰ مسیح یروشالیمّی گیالسا چھوگسلا سکیود زانے سامریہ تانگ گلِیلی یولجونگسّی پارتشامسنے سکیودس۔ 12 کھونگ گامیُولجیگی نانّگا سکیود زانے دزیناد یونگکھان رچوی حضرت عیسیٰ سی تھونگ یانگ تھاگرینّگا دُوگستے 13 کُوچو تانگین کھونگونی زیرس، ”حضرت عیسیٰ سی سپونبولے، نگاجیکا سنینگرجے زادّانگ۔“ 14 کھونگون زیگسّاچیگ کھونگی مولس، ”سونگ، کھیوجارانگی زوگسپو اِمام گُونلا ستون۔“ کھونگون چھا زانے کھونگون دزینادنے پھان۔ 15 کھونگونی ٹونے چیگی ناد گیالکھانبو تھونگتے سکاد چھینموے نانّگا خُدا ستودپا پھولین لوگستے یونگس۔ 16 یانگ حضرت عیسیٰ سی جابسّی لدُونلا گییلتے کھونّگا شُکر جْوس ۔ کھو سامریہ پاجیگ اینپین۔ 17 حضرت عیسیٰ سی مولس، ”کھیوجا رچُو نادنے پھان ماپھانسا؟ جان گوبو کارے؟ 18 یہُودی مانکھان کھیرانگ چیگپو مانے، جان تشانگما خُدا شُکر جوالا لوگستے مایونگسّا؟“ 19 تینے کھونگی کھوا مولس، ”لونگس یانگ سونگ، کھیرانگی ایمانی کھیرانگ گیالچوگستے این۔“ خُدے گیالثید نیمو لیب۔ 20 جاگشیگ فریسی پاگونّی خُدے گیالثید نام لیباین زیرتے ٹیکھانبوا حضرت عیسیٰ مسیح لانسالس، ”زیبسال چوستے ستین دوگنانگ خُدے گیالثیدپو لیبّا میتُھونگ، 21 یا میگونّی ’ایکانے یا اکانے دوگ‘ میزیر چیازیرنا خُدے گیالثید نی کھیوجاگونّی ٹوا یودتے اینوگ۔“ 22 تینے کھونگی کھونگرانگی لوبٹوگس گونلا مولس، ”توسپو لیبین نام کھیوجاگونّی اِبنِ آدم لوگستے یونگچیسّی جاگپو تھونگچیسّی دودپا بورین اِین نانگ تھونگ میتھوب۔ 23 میگونّی کھیوجا زیرین، ’ستوس، اکانے یا اکانے دوگ‘ کھونگونی ستینگرانگنے بانگتانگستے ماچھا۔ 24 سکاملاگی اوت نامکھے چھوگس چیگنے ژانچھوگس چیگّا کھییبسّا ژوگس اِبنِ آدم لوگستے یونگ زان یانگ چھین۔ 25 اِین نانگ تیتوسّی سانگ سنگونلا کھوا ردوگنگال مانگپو تھونگستے ای میرابسپوے کھو سُو اینکھانبویکا ایمان ماچوا پھانگین۔“ 26 ”می ٹانگپو حضرت نُوح توسلا جونگکھان ژوگس اِبنِ آدم یونگی توسلانگ جونگین 27 حضرت نُوح ٹُھوزینگی نانّگا ژوگسّی جاگ تشوگپا میگون زین، تھونگین ، ناما چوین تانگ باگما تانگین دُوگس۔ تینے دُنیائیکا چھولوگ یونگستے میتشانگما چھوی نانّگا نوبتے شی۔“ 28 ”تینّا تسوگسلا حضرت لُوط زیرکھانّی توسلانگ سونگپین، میگون زین، تھونگین ، نیواین، تشونگتانگاین، جینگ تابین تانگ کھانگپا سیگاین یودپین، 29 اِین نانگ حضرت لُوط سدُوؔم ی گیالسانے بینّگاچیگ، نامکھانے میے تانگ توگچانّی ردوا ژیناین یودکھانگون بابستے تشانگما میدکھان سونگ۔ 30 تینّا ژوگس اِبنِ آدم سنگونّی توسلا جونگین۔ 31 تے جاگّا کھانگپے کھاتھوگّا یودکھانگون یوگا بابستے کھانگپے نانّگا نورگون لینّالا ماچھا۔ تینّا تسوگسلا ژینگیکا لاس چوین یودکھانگون لوگستے کھانگپا چی تونگ لینّالا ماچھا۔ 32 حضرت لُوط ناما چونگکھانبو ایدتو چوس۔ 33 رانگثوگ تھامستے دوگکھانگونّی لدینبے میتشے سکیالاین، اِین نانگ نگے پھیا کھورانگی سروک سکیالکھانگونّی لدینبے میتشیبو سکیوبین۔ 34 نگے کھیوجاگونلا زیرّاد، تے ژانلا می نیس مالتسا چیگیکا نیید تانگستے یودکھانگونّی نانگنے چیگپو نامکھا کھیرّا زادِین یانگ چیگپو بورین۔ 35 رانگتھاگیکا ٹو سکوراین یودکھان بومو نییسّی نانگنے چیگپو نامکھا کھیرّا زادِین یانگ چیگپو بورین۔“ 36 ”می نیس جینّگا یودتوس چیگپو لیناین، یانگ چیگپو بورین“ 37 کھونگونی ٹیس، ”مسیح، ای تشانگما کارُو جونگین۔“ کھونگی لانسالس، ”سپھور یودسا شا زاکھانّی چاگون کھورّانوگ۔“ (کھیوجے تے ستاگس گُون چونّگا تھونّگاچیگ تھامے توس لیبچیسپو کھیوجا ہاگوگوس)۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation