یوہانان 20 - New Testament in Ladakhi Langageقبرستان ستونگپا۔ 1 زانییمے جاگّا نگامو زانگزینگنے نام مالانگسّا یود زانے حضرت مریم ماگدالّینما قبرستان سونگ، یانگ کھوا قبرستانی کھے کانے ردوا لیب لیب پو تھینتے تھونگ۔ 2 کھو بانگتانگاین شمعُوؔن حضرت پطرؔس تانگ جان لوبٹوگس حضرت عیسیٰ مسیح چیسپا زادکھانبویکا یونگستے زیرس، ”کھونگونی مسیح قبرستان نے پھینگستے کھیرتے میدوگ یانگ کارُو کھیرس نگاجا چانگ گیوسمید۔“ 3 تینے حضرت پطرؔس تانگ جان لوبٹوگسپو قبرستان چھاچیس گوزوگ، 4 کھونگون بانگتانگاین چھادپین، اِین نانگ جان لوبٹوگسپو حضرت پطرؔس سی سانگ گیاگسپا بانگتانگستے سنگونلا قبرستان لیب۔ 5 کھوے گھوستے ستاس، جنازہ ثیلکھانّی راسگون تیکا بورتے تھونگ اِین نانگ نانگکوگا ماسونگ۔ 6 تینے شمعُوؔن حضرت پطرؔس کھوے گیابنے تیکا لیبتے کھاڈانّگا قبرستانی نانگکوگا جُوگستے سونگ۔ کھوانگ تیرو جنازہ ثیلکھانّی راسگون بورتے تھونگ، 7 حضرت عیسیٰ سی اوا سکونتے یودکھانّی راسپو لتابستے جان ثیلکھانّی راسّی سانگ سوسوا بورتے تھونگ۔ 8 تینے، سنگونلا قبرستان لیبکھانّی جان لوبٹوگسپوانگ نانگکوگا سونگ، تیگون تھونگتے کھوے ایمان چوس۔ 9 (کھونگونلا تارُوانگ ہلژخمہ شوقبُو بوے نانّگا حضرت عیسیٰ سی شیکھانگونّی ٹونے سونتیا جانگس گوشیس کھاگچان این ڈیسکھانبو ہاماگوا اینپین) 10 تینے لوبٹوگسگون کھورانگونّی کھانگپا لوگستے سونگ۔ حضرت مریم ماگدالّینما حضرت عیسیٰ سی جال۔ 11 اِین نانگ حضرت مریم قبرستانی پھیلوگا نگواین یودپین۔ کھوے نگواین گھوستے قبرستانی نانگکوگا ستاس۔ 12 کھوا تیرو نامزا کارپو گونکھانّی فرشتا نیس حضرت عیسیٰ مسیح جنازہ بورسیکا چیگپو اوی چھوگسلا یانگ چیگپو جابسّی چھوگسلا دُوگستے تھونگ۔ 13 فرشتاگونّی حضرت مریم مولس، ”بومو کھیرانگ چیا نگواد؟“ حضرت مریم می لانتانگس، ”کھونگونی نگے مسیح کھیرتے میدوگ یانگ کارُو کھیرس نگا چانگ گیوسمید۔“ 14 تیبو زیر تشارّاچیگ، کھو گیورپا تیرو حضرت عیسیٰ سی جانگستے جال، اِین نانگ کھوا حضرت عیسیٰ سی اینکھانبو نُگو ماشیس۔ 15 حضرت عیسیٰ سی مولس، ”بومو کھیرانگ چیا نگواد؟ کھیرانگی سو ژالّاد؟“ حضرت مریم می کھو تشاسکھان اینڈو سامتے کھونّگا زیرس، ” فونو لے، کالتیس نیرانگی کھونگی جنازہ بو کھیرتے اینّا نگا شودّانگ کارُو بورتے یود، نگے کھونگی جنازہ بو کھیرین۔“ 16 حضرت عیسیٰ سی مولس، ”حضرت مریم۔“ تیبو تشورّاچیگ، کھو گیورتے، حضرت عیسیٰ سی چھوگسلا ستاستے عِبرانی سکادّی نانّگا زیرس، ”رابونّی“ (یانگنا لوبپونلے)۔ 17 حضرت عیسیٰ سی کھوا مولس، ”نگا ماتھامس چیازیرنا نگا تارُونگ نگارانگی یابّیکا لوگستے ماچھا این۔ تیسانگ سونگتے نگے فونو گُونلا زیر، ’نگا نی نگے یاب تانگ کھیوجے یاب، نگے خُدے تانگ کھیوجے خُدے یودسا لوگستے چھاد‘۔“ 18 حضرت مریم ماگدالّینما سونگتے لوبٹوگس گونلا زیرس، ”نگا مسیح جال“ یانگ کھوے کھونگونلا حضرت عیسیٰ سی لون کالا زادکھانبو شادس۔ لوبٹوگس گونلا حضرت عیسیٰ سی جال۔ 19 زانییمے جاگی پھیتوگ، لوبٹوگسگون دزومستے یہُودی پے اُسکیونگونلا جیگسپا گھو ثانٹے چوگستے دُوگستے یود زانے، ہونمیدلا حضرت عیسیٰ مسیح کھونگونی سکییلّا سنگونس یانگ مولس، ”خُدے جیدے کھیوجا نیامپو لوسشیگ۔“ 20 تیبو مولتے کھونگی کھونگرانگی چھاگ تانگ سیبمے سماکھاگون کھونگونلا ستانّا زادس۔ مسیح جال پاسانگ لوبٹوگسگون ماثانٹے تھاد۔ 21 حضرت عیسیٰ سی یانگسکیار کھونگونلا مولس، ”خُدے جیدے کھیوجا نیامپو لوسشیگ، یابّی نگا کالا زادکھان تسوگسلا نگیانگ کھیوجاگون کالّاد۔“ 22 تیزوگ مولتے کھونگّونّیکا پھو سالّا زادتے مولس، ”ہلژخمہ رُوح لینشیگ۔ 23 کالتیس سوجیگی دِیگپا کھیوجے مُعافی تانگنا خُدے کھونگونی دِیگپا مُعافی سالین، یانگ کالتیس سوجیگی دِیگپا کھیوجے مُعافی ماتانگنا خُدے کھونگونی دِیگپا مُعافی میسال۔“ حضرت عیسیٰ سی حضرت توما جال۔ 24 لوبٹوگس چوگنییسّی ٹونے چیگ حضرت توما ( کا بو تشاگٹوگ زیرّادپین) حضرت عیسیٰ مسیح سکیودّی توسلا جان لوبٹوگسگونّی ٹوا میدپین۔ 25 جان لوبٹوگسگونّی کھوا زیرس، ”نگاجے مسیح جال۔“ اِین نانگ حضرت توماسی کھونگونلا زیرس، ”نامتشوگپا نگے کھونگی چھاگیکا زیروی مالگون میتُھونگ یانگ تیگونّی نانّگا نگاری دزیگو می تانگ، یانگ نگاری لاگپا کھونگی سیبمے نانّگا تانگستے مانے نگا لدینشیشیس میراگ۔“ 26 ردونجاگچیگی ستینگنے حضرت عیسیٰ سی لوبٹوگسگون یانگسکیار تینّا کھانگپے نانّگا دزومستے حضرت توماسانگ کھونگون نیامپو یودپین۔ گھو ثانٹے چوگستے یودنانگ حضرت عیسیٰ سی سکیودتے کھونگونی ٹوا جانگستے مولس، ”خُدے جیدے کھیوجا نیامپو لوسشیگ۔“ 27 تینے کھونگی حضرت توما مولس، ” کھیرانگی دزیگو نگے لاگپے نانّگا ژُوگتے ستوس، یانگ لاگپا کیانگستے نگے سیبمے سماکھے نانّگا چوگ۔ تھےژومس پھونگستے ایمان چوس۔“ 28 حضرت توماسی حضرت عیسیٰ سی زیرس، ”نگے مسیح یانگ نگے خُدالے۔“ 29 حضرت عیسیٰ سی کھوا مولس، ” کھیرانگی نگا تھونگس پاسانگ ایمان چوس۔ اِین نانگ نگا ماتھونّگا ایمان چوکھانگونلا خُدے برکت تھوبین۔“ 30 حضرت عیسیٰ سی لوبٹوگسگون نیامپو یود زانے جان معجزہ مانگپو زادس، کاگون ای شوقبُوئ نانّگا ڈِیستے مید۔ 31 اِین نانگ کھیوجاگونّی حضرت عیسیٰ سی کھونگرانگ خُدے لدامّا زادکھانّی مسیحا یانگ خُدےبوژا اینکھانبویکا ایمان چوچیسّی پھیا نگے ای لدیبّو ڈِیستے این، یانگ تیبوا ایمان چوچیسپوے کھیوجاگونلا کھونگی وانگ گیُودتے تھامیدپے میتشے تھوبین۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation