یوہانان 19 - New Testament in Ladakhi Langageحضرت عیسیٰ سی شیچیسّی چھادپا پھوگ۔ 1 تینے کالون پیلاطُسی حضرت عیسیٰ مسیح ستالچاگ گیابچیسّی کا تانگس۔ 2 ماگمیگونّی تشیرمانگی تھورشوگ لاستے کھونگی اوا سکونس یانگ گیالپوے نامزا مارپو ژوگس کھونّگا سکونس۔ 3 کھونگون لان مانگپو کھونگی لدُونلا یونگین، ”یہُودی پے گیالپوا سیوا“ زیرین رسیگپا ثاگستی، کھونّگا ڈاملچاگس تانگس۔ 4 پیلاطُس یانگ لانچیگ پھیلوگا یونگستے یہُودی پاگونلا زیرس، ”ستوسشیگ نگا کھوے نانّگا سکیون کالچیسّی گیونتشانجیگ ماتھوبکھانبو کھیوجاگونلا ہاگوچوگچیسّی پھیا نگے کھو پھیلوگا کھیوجے لدُونلا کھیونّگاد۔“ 5 تینے حضرت عیسیٰ سی تشیرمانگی تاج تانگ نامزا مارپو نامستے پھیلوگا سکیودّاچیگ، پیلاطُسی یہُودی پاگونلا زیرس، ”ستوسشیگ ینے تے میبو۔“ 6 اِمام کُنی چھونمو گون تانگ کھونگ ثونگکھانگونّی حضرت عیسیٰ سی تھونّگاچیگ کُوچو تانگین زیرس، ”کھو کیانگشینگا کیونگ، کیانگشینگا کیونگ“ تیبو تشورّاچیگ پیلاطُسی کھونگونلا زیرس، ”نگا کھو کیانگشینگا کیانگچیسّی چانگ گیونتشانجیگ ماتھوب کھیوجارانگی کھیرتے کھو کیانگشینگا کیونگشیگ۔“ 7 یہُودی پے اُسکیونگونی وتسوگ تانگین زیرس، ”نگاجا شریعت جیک یود، تے نانگجینلا کھو شیگوس، چیازیرنا کھوے کھورانگ خُدےبوژا این زیردوگ۔“ 8 تیبو تشورّاچیگ پیلاطُس سنگونّی سانگ مانّگا جیگس۔ 9 لوگستے کھارّی نانّگا سونگ یانگ کھوے حضرت عیسیٰ سی زیرس، ” کھیرانگ کانے این؟“ اِین نانگ حضرت عیسیٰ سی کھوا چانگ لان ماسالس۔ 10 ”پیلاطُسی زیرس، چی کھیرانگی نگا لانتانّگا میدّا؟ نگا کھیرانگ پھودتانگچیس یا کیانگشینگا کیانگچیسّی وانگ یودکھانبو کھیورانّگا گیوسمیدّا؟“ 11 حضرت عیسیٰ سی کھوا لانسالس، ”خُدے ماسالپینّا کھیورانّگا نگیکا ای وانگبو مانے میدڈو، اِین نانگ نگا کھیرانگی لاگا ستادکھانبوا کھیرانگی سانگ چھیا دِیگپے سکیون پھوگتے اینوگ۔“ 12 تے ستینگنے پیلاطُسی حضرت عیسیٰ سی پھودچیسّی سونڈوس چوس، اِین نانگ یہُودی پے اُسکیونگونی کُوچو تانگین زیرس، ”کالتیس نیرانگی ای میبو پھودنا، نیرانگ رومی گیالپوے دزاو مانوگ۔ کھورانگ گیالپو این زیرکھانگون رومی گیالپوے ڈاو اینوگ“ 13 تیبو تشورّاچیگ پیلاطُسی ماگمیگونلا کا تانگستے، حضرت عیسیٰ سی پھیلوگا کھیونگس یانگ کالون کھورانگ شخ چوکانی ٹھیسّیکا دُوگس۔ تے ناسّابوا ردویلام زیرّادپین ( عِبرانی سکادّی نانّگا گاباتھا زیرّانوگ)۔ 14 تیتوسپو پیساگی ڈالڈیگ چوچیسّی جاگی نیینگّونگ اینپین، پیلاطُسی یہُودی پاگونلا زیرس، ”ستوسشیگ، کھیوجے گیالپو۔“ 15 اِین نانگ کھونگونی کُوچو تانگین زیرس، ”کھو کھیر، کھیرتے کھو کیانگشینگا کیونگ۔“ پیلاطُسی کھونگونلا زیرس، ”کھیوجارانگی گیالپوبو کیانگشینگا کیانّگا؟“ اِمام کُنی چھونمو گونی زیرس، ”نگاجا رومی گیالپو مانپا جان گیالپو سوانگ مید۔“ 16 تینے پیلاطُسی کھونگونی دودپا نانگجین حضرت عیسیٰ سی کیانگشینگیکا کیانگچیسلا ماگمیگونلا ستادس۔ ماگمیگونّی کھونگ ٹھیدتے کیانگشینگا کیانگچیسلا کھیرس۔ حضرت عیسیٰ سی کیانگشینگا کیانگس۔ 17 حضرت عیسیٰ مسیح کھونگرانگی کیانگشینگ نامستے یروشالیم نے پھیلوگا گوی روسپا زیرکھانّی ناسّیکا سکیودس، کابوا عِبرانی سکادّی نانّگا گُلگُتا زیرّانوگ۔ 18 تیرو کھونگونی حضرت عیسیٰ سی کیانگشینگا کیانگس یانگ کھونگ نیامپو جان نییسّانگ، لدالدو نییسکوا ریرے یانگ حضرت عیسیٰ سی ژونّگا۔ 19 پیلاطُسی ماگمیگونلا ”حضرت عیسیٰ سی ناصرة پا یہُودی پے گیالپو“ ڈیسکھانّی لاگشینگجیگ حضرت عیسیٰ سی ستاگّا کیانگشینگیکا تاگچیسلا کا تانگس۔ 20 حضرت عیسیٰ سی کیانگشینگا کیانگسکھانّی ناسّابو گیالسانے نیموا یودپا یہُودی پا مانگپوے تے ڈیسکھانبو سیلس، تیبو عِبرانی پا، رومپا تانگ یُونانی سکاد سومکوے نانّگا ڈِیستے یودپین۔ 21 تینے یہُودی پے اِمام کُنی چھونمو گونی پیلاطُسی ڈیسکھانبوا گیابگال چوستے، ”یہُودی پے گیالپو ماڈیا ’کھورانگی نگا یہُودی پے گیالپو این زیرّادپین‘ ڈِیا زاد“ زیرتے جُووا پھولس۔ 22 پیلاطُسی لانتانگس، ”نگے چیجیگ ڈِیستے یودنانگ ڈِیتشار، گیورّا مید۔“ 23 ماگمیگونّی حضرت عیسیٰ سی کیانگشینگا کیانگ تشارّاچیگ، ژانگمالا تھوبچیسّی پھیا، کھونگی نامزابوا پوجی پھودس۔ اِین نانگ کھونگی نانگکوگی نامزا تشیمپو مانے میدکھان گونّے جوگ تشوگپا لاستے یود پاسانگ 24 کھونگرانگ چیگ تانگ چیگّا زیرس ”ایبوا پومیپُھود، گیان گیابستے سُوا تھوبدوگ ستین۔“ تیبو ہلژخمہ شوقبُو بوے نانّگا مولکھان نانگجین ڈانڈا ڈوبچیسّی پھیا سونگ، ”کھونگونی نگے کوسلاگّون گوستے نگے کوسپوا گیان گیابس۔“ 25 حضرت عیسیٰ سی کیانگشینگی لدُونلا کھونگی اما، امے سترِنگمو، کلوپھاسّی ناما حضرت مریم تانگ حضرت مریم ماگدالّینما گُون لانگستے یودپین۔ 26 حضرت عیسیٰ سی کھونگی اما تانگ کھونگی چیسپا چوا زادکھانّی لوبٹوگسپو لدُونلا لانگستے زیگسپا، کھونگی اما مولس، ”چیسپے بومو، تانیپھارلا کھو کھیرانگی بُوژا این، “ 27 یانگ لوبٹوگسپوا مولس، ”تانیپھارلا کھو کھیرانگی اما این۔“ تینّا جاگنے پھارلا لوبٹوگسپوے حضرت عیسیٰ سی اما کھورانگی کھانگپا کھیرس۔ حضرت عیسیٰ سی ڈونگس۔ 28 حضرت عیسیٰ مسیح کھونگی لاس چوچیس ژانگما ڈوبتے اینکھانبو کھیینتے ہلژخمہ شوقبُو بوے نانّگا مولکھانبو ڈوبچیسلا کھونگی مولس، ”نگا سکومساراگ۔“ 29 تیرو نودجیگی نانّگا رگونچھانگ سکیورمو یودپا، کھونگونی راسبالجیگ تینانّگا چوگستے ہیسوبّی یالگاجیگی گوا سکونتے حضرت عیسیٰ سی ژالّیکا پھولس۔ 30 حضرت عیسیٰ سی تیبو نیانگ تشارّاچیگ، ”تا ڈوب“ مولس یانگ او گھوا زادتے کھونگرانگی سیمسنیدپو خُدا ستادا زادس۔ 31 تے جاگپو شابّادّی جاگی پھیا ڈالڈیگ چوچیس یانگ تھوریزوگپو شابّادّی جاگ میگسالبو اینپین۔ یہُودی پے اُسکیونگونی شابّادّی جاگّا زوگسپو کیانگشینگیکا بورچیسپو ماتھادپا، کھونگون پیلاطُسی کا سونگتے گیوگسپا شیچیسّی پھیا تے میگونّی کانگپا چاگچیس تانگ زوگسپوگون پھابستے کھیرچیسلا کا سال زیرتے جُووا پھولس۔ 32 تینّابویپھیا ماگمیگون یونگستے حضرت عیسیٰ سی نیامپو کیانگشینگا کیانگستے یودکھان نیسکوے کانگپا چاگس۔ 33 اِین نانگ حضرت عیسیٰ سی لدُونلا لیبّاچیگ، کھونگ ڈونگس تشارتے تھونگپا، کھونگی کانگما ماچاگس۔ 34 تے ماگمی ٹونے چیگی کھورانگی دونگبو حضرت عیسیٰ سی سیبمے پارلا زُوگّاچیگ، ٹھاق تانگ چھو بینگ۔ 35 میگنے نگوسما یگون تھونگکھانّی می بوے گواہ تانّگاد یانگ کھوے گواہ بو لدینبا این۔ کھوے ٹانگپو زیرکھانبو کھوے شیسّانوگ، یانگ کھیوجاگونّیانگ ایمان چوچیسّی پھیا کھوے گواہ تانگین این۔ 36 ہلژخمہ شوقبُو بوے نانّگا ”کھونگی روسپا چیگّانگ میچاگ“ ڈِیستے یودکھان ژانگما ڈانڈا ڈوبچیسّی پھیا ای ژانگما چونگتے اینوگ۔ 37 ہلژخمہ شوقبُو بوے یانگ ناسّاجیگی نانّگا مولتے دوگ، ”کھونگونی کھورانگونّی دونگ ژُوگکھانّی میبوا ستین۔“ حضرت عیسیٰ سی جنازہ قبرستانی نانّگا بورّا زادس۔ 38 ستینگنے ارمتیہ پا، حضرت یُوسفؔ پیلاطُسی کا سونگتے حضرت عیسیٰ سی جنازہ کھیرچیسلا گونگسپا سال زیرس۔ یہُودی پے اُسکیونگونلا جیگس پاسانگ، سنگون ماچوگّا حضرت یُوسفؔ حضرت عیسیٰ مسیح لوبٹوگس چیگ اینپین۔ کھوے پیلاطُسی کانے گونگسپا لینتے حضرت عیسیٰ سی جنازہ بو پھابستے کھیرس۔ 39 سنگونما تشانجیگّا حضرت عیسیٰ سی جالّا یونگسکھانّی نِیکُدیمُسانگ کھو نیامپو یونگس۔ کھوے میر تانگ یلوا نے چوکھانّی ٹیجیم چانّی مار رینچان ہالام کییلو 35 جیگ کھیونگس۔ 40 یہُودی پے جنازہ سوبچیسّی لوگثول نانگجین، کھونگ نیسکوے حضرت عیسیٰ سی جنازہ بو کھیرتے، ٹیجیم گون سکوستے راس کوسپوے نانّگا تومس۔ 41 حضرت عیسیٰ سی کیانگشینگیکا کیانگسکھانّی ناسّے لدُونلا تشاشیگ یودپین، تے تشاسپوے نانّگا سنگونلا سپھور مانے مابورکھانّی قبرستان سوماجیگ یودپین۔ 42 قبرستان بو نیموا یودچیس یانگ تے جاگپو یہُودی پے میگسال شابّادّی ڈالڈیگی جاگ این پاسانگ، کھونگونی حضرت عیسیٰ سی جنازہ تینّا قبرستانی نانّگا بورس۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation