یوہانان 17 - New Testament in Ladakhi Langageحضرت عیسیٰ سی کھونگرانگی پھیا دُعا جْوس ۔ 1 تیگون مول تشارّاچیگ، حضرت عیسیٰ مسیح نامکھا زیگستے دُعا چوس، ”کیے یابلے، تا توس لیب تشار، نیرانگی بُوژے نیرانّگا سپال تانگچیسّی پھیا نیرانگی ثاسلا سپال سالّا زاد۔ 2 نگا سالّا زادکھان ژانگما تھامیدپے میتشے تانگچیسلا نیرانگی نگا میتشانگمیکا وانگچھا سالتے این۔ 3 تھامیدپے میتشے نی، نیرانگ لدینبے خُدے چیگپو تانگ نیرانگی کالا زادکھانّی حضرت عیسیٰ مسیحا شیشیسپو اینوگ۔ 4 نیرانگی نگا ستادا زادکھانّی لاسگون ڈوبچوگستے، دُنیائیکا نگے نیرانّگا سپال کھیونگستے این۔ 5 تا کیے یابلے، نگا نیرانگی سکوندونلا سپال سالّا زاد، کاسپالبو نگا دُنیا چھاگسّی سانگ سنگونلا نیرانگ نیامپو یودپین۔“ حضرت عیسیٰ سی کھونگرانگی لوبٹوگسگونّی پھیا دُعا جْوس ۔ 6 حضرت عیسیٰ مسیح تارُوانگ دُعا جوین، ”دُنیائی می گونّی ٹونے نیرانگی لدامّا زادتے نگا سالکھانگونلا نگے نیرانگ سنگونچوگسپین۔ کھونگون نیییرانگی اینپین؛ نیرانگی کھونگون نگا سالتے این، یانگ کھونگونی نیییرانگی کا کھانیانتے اینوگ۔ 7 تا نیرانگی نگا سالکھان ژانگما نیرانگی چھوگسنے اینکھانبو کھونگونلا ہاگوتے اینوگ۔ 8 چیازیرنا نیرانگی نگا سالکھانّی کاگون نگے کھونگونلا تانگسپین۔ کھونگونی تھادپو نیامپو لینتے نگا نیییرانگی چھوگسنے یونگستے اینکھانبو کھونگونلا تانتان ہاگو، یانگ کھونگونی نگا نیرانگی کالا زادکھانبوا ایمان ۔“ 9 ”نگے کھونگونی پھیا دُعا جُواد، نگے دُنیائی می گون مانپا نیرانگی نگا سالّا زادکھانگونّی پھیا دُعا جُواد، چیازیرنا کھونگون نیرانگی اینوگ۔ 10 نگے اینکھان ژانگما نیرانگی این یانگ نیرانگی اینکھانگون نگے این۔ نگا کھونگون گیُودتے سپال تھوبستے این۔ 11 نگا ای دُنیائی نانّگا مانگپوجیگ میلوس، کھونگون تارُونگ دُنیائی نانّگا لوسین، نگا نیرانگیکا یونّگاد۔ کیے یاب ہلژخمہ لے، کازوگ نگاتانگ نیسکو چیگ این تینّا تسوگسلا کھونگونانگ چیگڈیل لوسشیسّی پھیا نیرانگی نگا سالّا زادکھانّی وانگچھے نانّگا کھونگون سکیوبستے بورّا زاد۔ 12 نگا کھونگون نیامپو یود زانے، نگے کھونگون نیرانگی سالّا زادکھانّی وانگچھا گیُودتے سکیوبستے بورپین۔ ہلژخمہ شوقبُو بوے نانّگا ڈِیا زادکھانبو ڈوبچیسلا، کھونگونی ٹونے نیالوے نانّگا لیبچیس سکالتے یودکھان چیگ چیگ ماستوگس، سوجیگّانگ ماستور۔“ 13 ”نگا نیرانگیکا یونّگاد، اِین نانگ نگا ای دُنیائی نانّگا یود زانے کھونگونلا نگے تھادپو گانگپو تھوبچیسّی پھیا، نگے یگون زیرپین۔ 14 نگے کھونگونلا نیرانگیکا تانگسپین، یانگ دُنیائی می گونّی کھونگونلا ناپھراد چوس، چیازیرنا نگا دُنیانے مانکھان تسوگسلا نگے لوبٹوگسگونّانگ دُنیانے مان۔ 15 نگے دُعا چوچیس پو نی، نیرانّگا کھونگون ای دُنیانے کھیرچیسّی پھیا مانپا، کھونگون شیتانّے سکیوبستے بورّا زادچیسّی پھیا این۔ 16 نگا دُنیانے مانکھان تسوگسلا نگے لوبٹوگسگونّانگ دُنیانے مان۔ 17 نیرانگی لدینبا گیُودتے کھونگونلا ژانگما چوا زادس؛ نیرانگیکا لدینبا اینوگ۔ 18 نیرانگی نگا ای دُنیائی نانّگا کالا زادکھان تسوگسلا نگیانگ کھونگون دُنیائی نانّگا کالّاد۔ 19 نیرانگی لدینبا گیُودتے کھونگون ہلژخمہ چوچیسّی پھیا نگے نگارانگ کھونگونی لدُونلا ہلژخمہ چھودپے تشولّا پھولّاد۔“ ایمانی نانّگا یونگچیسچانگونّی پھیا حضرت عیسیٰ سی دُعا جْوس ۔ 20 ”نگے دُعا کھونگون چیگپو مانپا، کھونگونی لون گیُودتے نگیکا ایمان یونگچیسچانگونّی پھیانگ این۔ 21 نگے کھونگ ژانگما چیگ گیورچیسّی پھیا دُعا پھولّاد۔ کیے یاب، کازوگ نگا نیرانگی نانّگا یانگ نیرانگ نگیکا جُوگستے این، نیرانگی نگا کالا زادکھانبویکا دُنیائی می گونّی ایمان کھیونگچیسّی پھیا، کھونگونانگ نگاتانگ نیسکوے نانّگا دوگ چوگّا زاد۔“ 22 ”نگاتانگ نیسکو چیگ اینّا تسوگسلا کھونگون چیگ گیورچیسّی پھیا نگے نیرانگی نگا سالکھانّی سپالبو کھونگونلا تانگسپین۔ 23 نگا کھونگونی نانّگا یانگ نیرانگ نگیکا یود۔ نیرانگی نگا کالا زادکھان تانگ نیرانگی نگا چامسپا زادکھان ژوگس ایمان چانگونلانگ چامسپا زادچیس، دُنیائی می گونلا ہاگوچیسّی پھیا کھونگون چیساتھوگنے چیگڈیل گیورچوگّا زاد۔ 24 کیے یابلے، نیرانگی نگا سالکھانگون نگا چھاسے ناسّا نگا نیامپو یونگ چوگّا زادچیسلا نگے دودپا چواد۔ تینے کھونگونی نیرانگی نگا سالّا زادکھانّی سپالبو تھونگ تھوبین، چیاجونا نیرانگی دُنیا چھاگسّی سانگ سنگونلا نگا چامسپا زادّادپین۔ 25 ٹانگپو یابلے، دُنیائی می گونّی نیرانگ ماشیسنانگ، نگے نیرانگ شیسّاد، یانگ نگے لوبٹوگسگونّی نیرانگی نگا کالا زادکھانبو شیسّانوگ۔ 26 نگے کھونگونلا نیرانگ ای سکورلا شادپین، تارُوانگ شادین۔ تینے نیرانگی نگے پھیا چامسپا یودکھانبو کھونگونی نانّگا یانگ نگانگ کھونگونی نانّگا لوسین۔“ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation