یوہانان 14 - New Testament in Ladakhi Langageحضرت عیسیٰ سی کھونگرانگی لوبٹوگس گونلا سیمسّو سالس۔ 1 حضرت عیسیٰ مسیح کھونگرانگی لوبٹوگس گونلا مولس، ”کھیوجاگونّی سیمسلا ناگس ماستان۔ خُدے حُکم ایمان چوس یانگ نگیکانگ ایمان چوس۔ 2 نگے یابّی کھانگپے نانّگا ناسّا مانگپو یود۔ کالتیس میدپینّا نگے چیا زیرین نگا کھیوجاگونّی پھیا تیرو ناسّا ڈالڈیگ چوا چھاد۔ 3 کالتیس نگا سونگتے ناسّا ڈالڈیگ چونا، نگا لوگستے یونگستے کھیوجاگون نگارانگ نیامپو ٹھیدتے کھیرین، تینے نگا یودسا کھیوجاگونّانگ دوگین۔ 4 کھیوجاگونلا نگا چھاچیسّی ناسّے لامبو گیوسیود۔“ یابّیکا چھاچیسّی لامبو حضرت عیسیٰ سی این۔ 5 حضرت توماسی حضرت عیسیٰ مسیح زیرس، ”مسیح، نگاجا نیرانگ کارُو سکیودّا زادچیسپو گیوسمید، تینے نگاجا کازوگی تے لامبو شیساین۔“ 6 حضرت عیسیٰ سی مولس، ”نگا نی لامبو، لدینبابو تانگ ثوگپو این، نگا چیگپو گیُودتے مانے سوجیگّانگ یابّی سکوندونلا مِیلیب۔ 7 کالتیس کھیوجاگونّی نگا سو اینکھانبو تانتان شیستے اینپینّا، کھیوجاگونّی نگے یابّانگ شیستے یودڈو۔ تانیپھارلا کھیوجے کھونگ شیساین یانگ کھیوجاگونّی کھونگ جالتے این۔“ 8 فِلپُسی زیرس، ”مسیح نگاجا یاب خُدے جالچوگّا زادّانگ، یانگ تیبو نگاجے پھیا تشام تھادتھاد این۔“ 9 حضرت عیسیٰ سی فِلپُسب لا مولس، ”نگا کھیوجا نیامپو ایزام توس مانگپو دوگستیانگ کھیورانّگا تارُوانگ نگا ماشیسّا؟ نگا تھونگکھانگونّی یابّانگ جالتے این۔ تینے کھیرانگی کازوگّا زیرّاد ’نگاجا یاب جالچوگ‘ زیرتے؟ 10 کھیورانّگا نگا یابّی نانّگا یانگ یاب نگیکا یودکھانبو لدینشیسّا میراگّا؟ نگے چی سپیراجیگ کھیوجاگونلا زیرّاد تیگون نگے چھوگسنے مانپا نگے یابّی چھوگسنے این، کھونگ نگیکا جُوگستے کھونگرانگی چھاگلاس زادّاد۔ 11 نگے نگا یابّی نانّگا یانگ یاب نگیکا این زیرکھانبوا لدینشیسشیگ۔ ایبوا دِین ماشیسنانگ نگے سکورلا گواہ تانگکھانّی معجزہ تھونگتے لدینشیسشیگ۔ 12 نگے کھیوجا لدینبا لدینبا زیرّاد، نگیکا ایمان چوکھانگونّی نگے چوکھانّی لاسگون ژوگس چوین، ماتشاد تیسانگ ٹاگا لاسگون چوین، چیازیرنا نگا نی یابّیکا چھاد۔ 13 بُوژے یابّا سپال کھیونگچیسّی پھیا کھیوجاگونّی چیجیگ نگے مینگی نانّگا جُووا پھولنانگ نگے کھیوجا تانگین۔ 14 کھیوجے چیجیگی پھیا نگے مینگی نانّگا نگا جُووا پھولنانگ، نگے تیبو چوین۔“ حضرت عیسیٰ سی ہلژخمہ رُوح سالچیسّی وعدہ۔ 15 حضرت عیسیٰ مسیح مولس، ”کالتیس کھیوجے نگا چامسپا چوادنا کھیوجے نگے کا تانگکھانگون ثونگاین، 16 نگے یابّا دُعا چھوس یانگ کھونگی کھیوجاگونلا جان روگس زادکھانجیگ سالّا زادِین، کھونگ توسگیون کھیوجا نیامپو جوگساین۔ 17 کھونگ نی میگون ٹانگپوے چھوگسلا ٹھیدکھان ہلژخمہ رُوح بو این۔ دُنیائی می گونّی کھونگی نانّگا ایمان میچو چیازیرنا کھونگونی کھونگ تھونّگا مانوگ یانگ شیسّانگ مانوگ۔ اِین نانگ کھیوجے کھونگ شیسّانوگ چیازیرنا کھونگ کھیوجے نانّگا ناستے کھیوجا نیامپو جوگسانوگ۔ 18 نگے کھیوجا، توتسے تسوگسلا میپھانگ، نگا کھیوجاگون یودسا یونگین۔ 19 ژاپیگشیگنے دُنیائی می گونّی نگا میتُھونگ، اِین نانگ کھیوجے نگا تھونگین ۔ نگا سونتیا اینچیسپوے کھیوجاگونّانگ سونتیا لوسین۔ 20 نگا سونتیا لانگی جاگّا، نگا یابّی نانّگا یانگ کھیوجاگون نگیکا یانگ نگا کھیوجے نانّگا اینکھانبو کھیوجے ہاگواین۔ 21 نگے کلام گون نیانتے ثونگکھانگون نی نگا چامسپا چوکھانگون اینوگ۔ نگا چیسپا چوکھانگونلا نگے یابّیانگ چیسپا چوا زادِین، یانگ نگیانگ کھونگونلا چامسپا چوستے، نگارانگ کھونگونلا سنگونچوگاین۔“ 22 تینےحضرت یعقُوبؔ ی بوژا حضرت یہُودہ (اِسکریوت پا مانکھانی) زیرس، ”کیے مسیح، نیرانگ نگاجا گُونلا سنگونچوگچیس یانگ دُنیا پاگونلا سنگون میچوگچیس پو چیپھیا این؟“ 23 حضرت عیسیٰ سی لانسالس، ”نگا چامسپا چوکھانگونّی کھوے نگے لابجاگونّیکا لاگلین چوین۔ نگے یابّی کھونگونلا چامسپا زادِین یانگ نگاجا نیسکو کھونگّونّیکا یونگستے کھونگون نیامپو دوگین۔ 24 نگا چامسپا ماچوکھانگونّی نگے لابجاگون ثونّگا مانوگ۔ کھیوجے تشورکھانّی ای لونبو نگارانگی مان، نگا کالا زادکھانّی نگے یابّی چھوگسنے این۔ 25 نگا کھیوجاگون نیامپو یود زانے نگے ای ژانگما زیرتے این۔ 26 اِین نانگ یابّی نگے تشابسلا روگس زادکھان، ہلژخمہ رُوح کھیوجا کالا زادِین۔ کھونگی کھیوجاگونلا چیژانگما لابّا زادتے نگے شادکھان ژانگما کھیوجاگونلا ایدتو سکولاین۔ 27 جیدے، نگے کھیوجا نیامپو بورّاد، نگے جیدیبو کھیوجا تانّگاد، نگے جیدیبو دُنیائی می جیدے ژوگس مان۔ کھیوجاگونّی سیمسلا ناگس ماستان یانگ جیگس ماجیگس۔ 28 نگے نگا چھاد، یانگ کھیوجیکا لوگستے یونگین زیرکھانبو کھیوجے تشورتے اینوگ۔ کالتیس کھیوجے نگا چامسپا چوادنا نگا یابّیکا چھاچیسلا کھیوجا تھادپو یودڈو، چیازیرنا یاب نگے سانگ ٹاگا این۔ 29 تیگون جونّگاچیگ کھیوجے نگیکا ایمان کھیونگچیسّی پھیا ای ژانگما چونگی سانگ سنگونلا نگے کھیوجاگونلا شادتے این۔ 30 نگا کھیوجاگونلا سپیرا تانگچیسّی توس مانگپوجیگ مید، چیازیرنا ای دُنیائی وانگثولپابو یونگدوگ، کھوا نگیکا چانگ وانگ مید۔ 31 اِین نانگ نگے یابّا چامسپا تانگ کھونگی نگا کا سالّا زادکھان گُون ڈانڈا چوچیسپو دُنیائی می گونلا گیُوس یونگّوس۔ تا لونگس نگاتانگون یکانے چھین۔“ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation