یوہانان 10 - New Testament in Ladakhi Langageکھوم چُوک کھن حضرت عیسیٰ سی نی لُوگ زی زانگپو۔ 1 حضرت عیسیٰ مسیح مولس، ”نگے کھیوجا لدینبا لدینبا زیرّاد، لوگرے نانّگا گھونے مایونّگا سیگپے کانے دزاگستے یونگکھانگون کونما تانگ چاگپا اینوگ۔ 2 گھونے یونگکھانبو لُوگ گُونّی لُوگ زی اینوگ۔ 3 گھوثونگپے لُوگ زی ا گھو پھیانوگ یانگ لُوگ گُونّی لُوگ زی سکادبو نگوشیسّانوگ۔ لُوگ زی کھورانگی لُوگ ریریا مینگ بودین پھیلوگا ٹھیدتے کھیرّانوگ۔ 4 کھوے رانگی لُوگ ژانگما پھیلوگا پھینگ تشارّاچیگ، کھو لُوگ گُونّی سانگ سنگونلا ڈولین یانگ لوگّون کھوے ستینگرانگنے یونگین چیازیرنا تیگونّی کھوے سکاد نگوشیسّانوگ۔ 5 لوگّون جانما میی گیابنے ماچھا تے میبونے تھاگرینّگا شورتے چھین، چیازیرنا تیگونّی جانما می بوے سکاد نگوشیسّا مانوگ۔“ 6 حضرت عیسیٰ سی یہُودی پے اُسکیونگونلا تے سپیبو سالّا زادس، اِین نانگ کھونگی کھونگونلا مولکھانبو ہاماگو۔ 7 تینّابویپھیا حضرت عیسیٰ سی یانگسکیار مولس، ”نگے کھیوجا لدینبا لدینبا زیرّاد، نگا نی لوگرے گھوبو این۔ 8 نگے سانگ سنگونلا یونگسکھان ژانگما نی کونما تانگ چاگپا اینپین، اِین نانگ نگے لُوگ گُونّی کھونگونی زیرکھانگون مانیانس۔ 9 نگا نی گھوبو این، نگا گیُودتے لوگرے نانگکوگا جوگسکھانگونلا تھارپا تھوبین۔ گھاگجا میدپا کھونگون نانگکوگا یونگچیس تانگ پھیلوگا چھین یانگ ساکھا گیالّا تھوبین۔ 10 سکونما نی نگے لُوگ گُون سکوچیس، سادچیس تانگ میدکھان چوچیس چیگپوے پھیا یونّگانوگ۔ اِین نانگ نگا نی تیگونلا میتشے تشیمسپوجیگ تانگچیسلا یونگستے این۔“ 11 ”نگا نی لوگدزی زانگپوبو این۔ لوگدزی زانگپوے لُوگ گُونّی پھیا کھورانگی سروک تانّگانوگ۔ 12 لاپا لُوگ گُونّی داگپو یانگ لُوگ زی زانگپو مان پاسانگ، شانگکو یونّگا تھونّگاچیگ کھو لوگّون پھانگستے شورّانوگ۔ تینے شانگکوی لُوگُو گُونلا حملہ چوستے تھایان چوگین۔ 13 کھو شورتے چھانوگ چیازیرنا کھو لاپاجیگ اینوگ یانگ لُوگُو گُونلا چیچھانانگ تشیرکھا میدکیاگ۔“ 14 ”نگا لُوگ زی زانگپوبو این۔ نگے نگارانگی لوگّون شیسّاد یانگ نگے لُوگ گُونّی نگا شیسّانوگ، 15 کازوگ یابّی نگا شیسّاد، نگیانگ یاب شیسّاد۔ یانگ لُوگ گُونّی پھیا نگے نگارانگی سروک تانگین۔ 16 نگا ای لوگکھیوی ٹوا میدکھانّی یانگ لُوگ ریگّانگ یود۔ نگے تیگونّانگ کھیونگّوس، تیگونّیانگ نگے سکادلا نیانین، تینے لوگکھیوی چیگ تانگ لُوگ زی چیگ یونگین۔“ 17 ”نگے یابّی نگا چامسپا زادچیسّی گیونتشان نی نگے نگارانگی ثوگپو چھودپا تانگچیسپو این، یانگسکیار لوگستے تھوبچیسّی پھیا نگے تیبو چواد۔ 18 سوجیگّانگ نگے سروک نگے کانے لین مینیان، نگا نگارانگ تھادتے نگاری ثوگپو تانّگاد۔ نگا ایبو تانگچیس یانگ لوگستے لینچیسّی وانگ یود چیازیرنا یاب خُدے نگا کا سالّا زادتے یود۔“ 19 تیزوگ مولکھانبوے جاستے یہُودی پے اُسکیونگونی نانّگا کھاگ بُود۔ 20 کھونگ مانگپوے زیرس، ”کھوا ردود جُوگستے سنیوستے اینوگ، کھوا چیا نیانّاد؟“ 21 اِین نانگ جان کھاچیگی زیرس، ”ای سپیراگون ردود ژوگسکھانجیگی مانوگ۔ ردودّی جارا میگنے تھونگچوگ نیانّانوگّا؟ مانے نیانّا مانوگ۔“ یہُودی پاگونّی حضرت عیسیٰ مسیح یکا ایمان ماکھیونگس۔ 22 گونتوسلا بیت المقدِس یانگسکیار سیگسکھان ایدتو چوین توسچھین سیی توسلا حضرت عیسیٰ مسیح یروشالیمّی نانّگا یودپین۔ 23 حضرت عیسیٰ سی بیت المقدِس سی نانّگا حضرت سُلیمانی یابس زیرکھانّیکا جابڈول زادّادپین۔ 24 یہُودی پاگون کھونّگا سکورتے دُوگس یانگ زیرس، ”نامتشوگپا نگاجا گُون تھےژومسّی نانّگا بورّاد۔ نگاجا سالپو شودّانگ، کھیرانگ لدامّا زادکھانّی مسیحابو اینّا؟“ 25 حضرت عیسیٰ سی لانسالس، ”نگے کھیوجاگونلا شادپین، اِین نانگ کھیوجے لدینشیسّا میدوگ۔ نگے نگارانگی یابّی وانگی نانّگا چوکھانّی معجزہ لاسگونّی نگے پھیا گواہ تانّگانوگ۔ 26 اِین نانگ کھیوجاگونّی لدینشیسّا میدوگ چیازیرنا کھیوجا نگے لُوگ مانوگ۔ 27 نگے لُوگ گُونّی نگے سکاد نیانّانوگ یانگ نگے کھونگون شیسّاد۔ کھونگون نگے گیابنے یونّگانوگ۔ 28 نگے کھونگونلا تھامیدپے میتشے تانگین یانگ کھونگون نیالوے نانّگا مانے میپھانگ۔ سوجیگیانگ کھونگون نگے لاگنے کوگستے کھیر مینیان۔ 29 ای لوگّون نگے لاگا ستادا زادکھانّی نگے یاب تشانگمیسانگ وانگچان جُوگستے این۔ سوجیگیانگ نگے یابّی لاگنے کھونگون کوگستے کھیر مینیان۔ 30 نگاتانگ یاب نیسکو چیگ این۔“ 31 یانگسکیار یہُودی پاگونّی کھونّگا ردوا گیابستے سادچیسّی پھیا ردوا کھورس۔ 32 اِین نانگ حضرت عیسیٰ سی کھونگونلا مولس، ”نگے نگارانگی یابّی چھوگسنے معجزہ مانگپو ستانپین، تیگونّی نانگنے کابوے پھیا نگا ردوا گیابستے سادچیس چواد؟“ 33 یہُودی پاگونّی کھونّگا زیرس، ”نگاجے کھیرانگی ہالاسّیسّی معجزہ ّی پھیا مانپا، کھیرانگ می این اِین نانگ رانگدانگرانّگا خُدے این زیرین خُدا تتلوکچوسکھانبوے پھیا ردوا گیابستے ساداین۔“ 34 حضرت عیسیٰ سی لانسالس، ”کھیوجاگونّی شریعتی شوقبُوئ نانّگا خُدے ایزوگ مولّا زادتے میدوگّا؟ نگے زیرپین، ’کھیوجا خُداون این۔‘ 35 کالتیس خُدے لون تھوبکھانّی میگونلا خُداون مولّادنا، (یانگ ہلژخمہ شوقبُو مانے گیور مینیانچیسپو کھیوجا گیوس اینّوگ) 36 یابّی کھونگی چھاگلاس چوچیسلا سکوا زادتے ای دُنیائی نانّگا کالا زادکھانبوے سکورلا چی مولین؟ نگے ’نگا خُدے بُوژا این‘ زیرکھانبوا، خُدے تتلوکچوستے اینوگ چیا زیرّاد؟ 37 کالتیس نگے نگارانگی یابّی لاسپو ماچونا تینے نگیکا اید ماشیسشیگ۔ 38 کالتیس نگے تیگون چوستے کھیوجے نگیکا اید ماشیسنانگ معجزہ گونّیکاتا ایمان چوسّانگ، کابوے یاب نگیکا یانگ نگا یابّی نانّگا اینکھانبو کھیوجا گیوسّونگتے ہاگو تھوبین۔“ 39 کھونگونی کھونگ یانگسکیار زُومچیس چوس، اِین نانگ کھونگ کھونگونی لاگنے شورنیان۔ 40 تینے حضرت عیسیٰ سی یانگسکیار یوردانّی لژانگسپو ے پھارکا سنگونلا یوحنّانی غوتا تانگسکھانّی ناسّیکا لوگستے سکیودس یانگ تیرو ژوگس۔ 41 می مانگپو کھونگ یودسا یونگستے زیرات پین، ”یوحنّانی ہالاسّی معجزہ مانے ماستانّانگ کھونگی ای می بوے سکورلا مولکھان ژانگما ٹانگپو اینوگ۔“ 42 یانگ تیرو یودکھان می مانگپوے کھونگی کا ایمان کھیونگس۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation