ཡ༌ཀོབ༌ 4 - New Testament in Ladakhi Langage

خُدے نیموا یونگچیس۔

¹ کھیوجاگونّی ٹوا دزینگمو تانگ نولچیس گُون چیی جاستے یونگدوگ؟ چی تیگون کھیوجاگونّی دودپاگونّی کانے یونّگا مانوگا، کاگون کھیوجے گیابگالّا نولاین یود؟

² میدکھان گُون کھیورانّگا گوس پاسانگ، تیبو تھوبچیسّی پھیا سادّانوگ۔ جانماگونلا یودکھانبویکا کھیورانّگا دودپا ثانٹے یودتے تیبو ماتھوب پاسانگ، کھیرانگی کھونگون نیامپو دزینگمو تانگستے نولّانوگ۔ کھیرانگی دودپا یودکھانگون کھیورانّگا میدپا اینوگ، چیازیرنا کھیرانگی تیبویپھیا خُدا جُووا ماپھولّا اینوگ۔

³ یانگ کھیرانگی ژو زانے، کھیورانّگا تھوبّا مانوگ چیازیرنا کھیرانگی تون نگانپا نیامپو جْوس تے اینوگ، کا بو کھیرانگی رانّگا سکیدپو تھوبچیسّی نانّگا کولّانوگ۔

⁴ ایمان میدکھانّی میگون، دُنیائی اینکھانگونلا یاشا چوچیسپو خُدا ناپھراد چوستے اینکھانبو، کھیوجاگونلا گیوسمیدّا؟ یانگسکیار زیرّاد، دُنیا نیامپو دزاو چوچیس لدامکھانگون خُدے ڈاو گیورتے اینوگ۔

⁵ کھیوجے ہلژخمہ شوقبُو بوے نانّگا ”خُدے نگاتانگونّی نانّگا سیمسنیدپو سالّا زاد پاسانگ، کھونگی نگاتانگون کھونگ چیگپوے اینچیسپوا ماثانٹے تھوگسدود زادّانوگ“ مولکھانبوا تونتاگ میدکیاگ سامّا راگا؟

⁶ اِین نانگ تیتسوگسی دودپا نگانپے گیابگال چوتھوبچیسلا کھونگی نگاتانگونلا شزدے مانّگا سالتے اینوگ، کازوگی ہلژخمہ شوقبُو بوے نانّگا مولتے دوگ۔ ”خُدے پھوسو چوکھانگونلا گیابگال چوا زادّانوگ، اِین نانگ پاسمو یودکھانگونلا شزدے سالّا زادّانوگ۔“

⁷ خُدے سکوندونلا رانگ رانگ کھونگی وانگی یوگا بورشیگ، یانگ ردودگونّی گوبے گیابگالّا نولشیگ، تینے کھو کھیوجے کانے شورتے چھین۔

⁸ کالتیس کھیوجا خُدے نیموا یونگنا، تینے خُدا کھیوجاگونّی نیموا سکیودین۔ کھیوجا دِیگپاچانگون رانگی لاگپا غوتا تونگشیگ، یانگ دُنیا تانگ خُدے نیسکوے گیابنے ڈولکھانگون، کھیوجے سیمس ژانگما چوشیگ۔

⁹ سیمس سکیومو چوستے، ردوگپو چوین نگوشیگ۔ ہابگودّی تشابسلا ردوگپو یانگ سکیدپوے تشابسلا سکیومو چوشیگ۔

¹⁰ رانگ رانگ مسیح سکوندونلا پاسمو چوس، تینے کھونگی کھیورانّگا سیوا ٹاگپو سالّا زادِین۔

جانماگونلا ٹھیمسچاد تانگچیسّی گیابگالّا لدامجاگ۔

¹¹ لے فونو گون، چیگ تانگ چیگی گیابگالّا سپیرا نگانپا ماتانگشیگ۔ کالتیس کھیوجاگونّی چیگ تانگ چیگی گیابگالّا سپیرا یا، ٹھیمسچاد تانگنا، کھیوجاگونّی جانما چیسپا چوچیسّی شریعت دیکا گیابگالّا سپیرا تانگ ٹھیمسچاد تانگستے اینوگ۔ کھیوجاگونّی ٹھیمسچاد تانگنا، کھیوجاگون شریعت پوا کھا مانیانکھان، یانگ ٹھیمسپون گیورتے نگے پھیا تے شریعت پو مانوگ زیرّانوگ۔

¹² خُدے چیگپو نی، شریعت سالکھان تانگ ٹھیمسپون جُوگستے اینوگ۔ کھونگ چیگپوا سکیوبچیس یا میگون نیالوے نانّگا پھانّگا زادچیسّی وانگ یودتے اینوگ۔ تینے جانما ٹھیمسچاد تانگکھان کھیوجا سو این؟

پھوسوی گیابگالّا لدامجاگ۔

¹³ ”ما گیوگسپا، نگاجا گُون گیالسا سونگتے توسبانشیگ دُوگستے تشونگ چوستے پینے مانگپو چوین“ زیرکھانگونّی نیونشیگ۔

¹⁴ کھیوجے میتشیے نانّگا تھورے چی جُونگین، کھیوجا چی گیوسیود؟ نگے کھیوجاگونّی میتشیبو چی نیامپو لدور؟ ایبو نی نگاتوگی مامون ژوگس اینوگ کا بو توس نیونگونجیگ مانے لوسّا مانوگ۔

¹⁵ کھیوجاگونّی زیرگوس، ”کالتیس مسیح تھوگّونگس یودنا، نگاتانگونّی میتشیے نانّگا ایبو یا تیبو چوین۔“

¹⁶ تے مانّا، کھیوجاگونّی رانگدانگرانگی تھابسلدینگسگونّی نانّگا پھوسو چوستے اینوگ، یانگ تیتسوگسی پھوسوگون نگانپا اینوگ۔

¹⁷ کالتیس سوجیگّا کھورانگی چوگوشیسّی لاس زانگپوگون گیوسیودتیانگ ماچونا، کھوے دِیگپا چوستے اینوگ۔