ཡ༌ཀོབ༌ 3 - New Testament in Ladakhi Langage

لچے چونتے بورچیس۔

¹ نگے فونو گون، کھیوجا مانگپوے عبادت خانہے نانّگا گیرگان گیورین سامتے ریوا چو ماگوس، چیازیرنا خُدے نگاتانگ لابکھانگونلا جانماگونّی سانگ مانّگا ٹھیمسچاد چوا زادچیسپو، کھیوجا گیوس اینّوگ۔

² اونا، نگاتانگ تشانگمے سکیون مانگپوجیگ چوانوگ۔ کالتیس میجیگی زیرکھان تشانگما سکیونمید یودپینّا، کھو دزومسپوجیگ یودڈو، یانگ کھوے ناسلوگ تشانگمے نانّگا رانگسیمس چونتے بورتھوبّادڈو۔

³ ستے کھے نانّگا یودکھانّی ثابسپو گیُودتے نگاتانگون کارُو چھین سامنانگ، تیرو ستابو ٹھیدتے کھیر نیانّانوگ۔

⁴ تینّا تسوگسلا شیدچان لونگسپوے ریلاین یودکھان تے ٹُھوزینگ چھینموبوانگ ٹُھوزینگی جوگا یودکھانّی شینگ چھونگونبو نیامپو، ٹُھوزینگ ثولکھانبوے کارُو ثولتے کھیرین سامنانگ، کھیر نیانّانوگ۔

⁵ تینّا تسوگسلا لچیبو نگاتانگی زوگسپوے کھاگ چھونگونجیگ اِین نانگ ، یبوے پھوسوچانّی سپیرے می مانگپوجیگّا نودسکیال نیانّانوگ، کازوگ میتساگ چھونگونجیگی ناگستشوگس چھینموجیگ میا سپار نیا نین۔

⁶ لچیبو نی میے ژوگس اینوگ۔ زوگسپوے یانلاگّونّی ٹونے لچیبو نی، نگانپا گانگسکھانّی ناسّا جیگ اینوگ۔ یبوے زوگسپو گانگپو تشیتو گیور چوگستے، کھوے میتشے گانگپوا میے بار چوگّانوگ، چیازیرنا لچیا میے سپارکھانبو نیالوے میے اینوگ۔

⁷ میا سیمسچان، چا، رگالچیگی ریگس تانگ، تشوے نانّگا نیا چھینمو سناتشوگس گُون، کھورانگونّی وانگی یوگا کھیونگ نیانّانوگ۔

⁸ اِین نانگ سوجیگّانگ لچیبو، کھورانگی وانگی یوگا کھیونگ مانیانّا اینوگ۔ ایبو نی دوگ مانے مانیانکھانّی نگانپا، شیچوگکھانّی توگی گنگستے یودتے اینوگ۔

⁹ نگاتانگونّی اینّا لچے نیامپو نگاتانگی مسیح، یاب خُدا ستودپا پھولّانوگ۔ اِین نانگ تینّا لچے نیامپو خُدے کھونگرانگ ژوگس چوا زادکھانّی میگونلا رنگان تابّانوگ۔

¹⁰ یانگ ستودپا تانگ رنگان تابچیس نیسکو، تینّا کھا نانگنے بینّگانوگ۔ لدینبا نگے فونو گُون، تیزُوک چھا ماگوس۔

¹¹ چی چھومیگشیگی نانگنے چھو لاگمو تانگ تشاکو نیسکو بینگاینّا؟

¹² نگے فونو گُون، چی پھیگی کھازاسّی لچانگمے کانے اولیو یا رگونّی کھازاسّی لچانگمے کانے پھیگ سمیناینّا؟ مانے میسمین۔ تینّا تسوگسلا کھیوجاگونّی چھومیگی چھو تشاکوی نانگنے چھو لاگمو پھینگ مینیان۔

لدینبے شیسرابس خُدانے چونّگانوگ۔

¹³ کھیوجاگونّی ٹونے شیسرابسچان تانگ ہاگوچانبو سو این؟ تیتسوگس اینکھانّی می بوے، شیسرابسنے یونگکھانّی پاسمو نیامپو لاس چوستے میتشے زانگپوجیگ پھودتے ستونشیگ۔

¹⁴ اِین نانگ کالتیس کھیوجے سیمسّی نانّگا ثانٹے تشیگسچیس تانگ رانگدود یودنا، شیسرابسچان ستانین رانگستود تانگستے خُدے لدینبے لابجے گیابگال ماچو۔

¹⁵ تیتسوگسی شیسرابس خُدے چھوگسنے مایونّگا، دُنیائی می ایمان میدکھانگونّی سامتشول تانگ ردود گونّے یونّگانوگ۔

¹⁶ کارُو تشیگچیس تانگ رانگدود یود، تیرو ہیلینگس تانگ تشیرکا میدکھان یانگ نگانپے ریگس تشانگما یودتے اینوگ۔

¹⁷ اِین نانگ خُدانے یونگکھانّی شیسرابسپو نی، تانگپورانگ سیمس لاگمو، تینے ژیدیا تھادکھان، سیمس بولمو یودکھان، وانگی یوگا دوگّالا تھادکھان، سنینگرجے گانگسکھان، لاس زانگپو چوکھان، چھوگریس ماچوکھان تانگ کھاچھوس ماچوکھانگون اینوگ۔

¹⁸ می پارلا جیدے کھیونگکھانگونّی جانماگونّی سیمسّی نانّگا جیدیے ساون تابّانوگ، یانگ ٹانگپوے ستونتھوگ رنگانوگ۔