ཡ༌ཀོབ༌ 2 - New Testament in Ladakhi Langage

چھوگسریسّی گیابگالّا لدامجاگ۔

¹ نگے فونو گُون، کالتیس کھیوجاگونّی چھوگریس چوادنا، کھیوجے نگاتانگونّی شان چانّی حضرت عیسیٰ مسیح نانّگا ایمان یود زیرتے کازوگی زیر تھوبین۔

² سپیرنا میجیگ سیرّی سی سود تاگستے رینچان کوسلاگ گونتے، یانگ می نیالباچانجیگ سنیینگپا کوسلاگ چھادکھان گونتے کھیوجاگونّی عبادت خانہے نانّگا یونگنا،

³ کھیوجاگونّی می چھوگپوبوا میگسالّی سنانّگا تانگستے کھوا، ”جوجو ای سیواچانّی ناسّیکا جوگسا زاد“، اِین نانگ می نیالباچانبوا، ” کھیرانگ اکا لانگستے دوگ“ یا ”نگے کانگپے لدُونلا سیکا دوگ“ زیرنا،

⁴ تینے چی ای چھوگسریسپوے، کھیوجا کھیوجارانگی دودپا نگانپاگونّی ٹھیدتے مانوگا؟

⁵ نگے لے فونو گون نیونشیگ، چی خُدے ای دُنیائی نانّگا نیالباچانگون ایمانی نانّگا چھوگپو گیورچیسّی پھیا لدامّا زادتے مانوگا؟ یانگ کھونگونلا خُدے گیالثیدپو میتھوبّا، کا بو خُدے کھونّگا چیسپا چوکھانگونلا سالچیسلا وعدہ زادتے این؟

⁶ اِین نانگ کھیوجاگونّی نیالباچانگونلا سیوا ماچوا اینوگ۔ چی کھیوجاگونلا گوبنون تانگستے ٹھیمسکھونّگا کھیرکھانگون، تے چھوگپوگون مانّا؟

⁷ چی نگاتانگی حضرت عیسیٰ مسیح تشان زانگپوا نگانپا زیرکھان تینّاگون مانّا؟

⁸ کالتیس کھیوجاگونّی ہلژخمہ شوقبُو بوے نانّگا یودکھانّی گیالٹھیمس ”جانماگونلا رانّگا چوکھان تسوگسّی چیسپا چوشیگ“ مولکھانبوا لدینبا کھانیانّا، تینے کھیوجاگونّی ٹانگپو چوستے اینوگ۔

⁹ اِین نانگ کالتیس کھیوجاگونّی چھوگس چونا دِیگپا چوستے، کھیوجا خُدے شریعت پو چاگچیسلا نونگسچان اینوگ۔

¹⁰ میجیگی شریعت چیگ چیگ چاگستے ژانتشانگما کھا نیانّانگ کھوے خُدے شریعت تشانگما چاگکھان دانگتسوگس اینوگ۔

¹¹ سپیرنا خُدے مولتے اینوگ ”جانمے ژیدمادجیگ نیامپو لوسڈیل ماچو“ یانگ ”می ماساد“ کالتیس کھیرانگی جانمے جیدماد نیامپو لوسڈیل چوا میدڈو، اِین نانگ میجیگ سادنا، تینے خُدے شریعت چاگستے کھیرانگ نونگسچان گیورتے اینوگ۔

¹² تینے زیرکھان یا چوکھانگونلا رانگوانگ سالکھانّی شریعت دیکا کھیوجا ٹھیمسچاد تانگچیسپو ایدتو چوشیگ۔

¹³ سنینگرجے ماستانکھانّی میگونلا سنینگرجے میتھوب۔ اِین نانگ کالتیس کھیوجاگونّی جانماگونلا سنینگرجے ستانتے یودنا، خُدے کھیوجاگونلانگ، ٹھیمسچادّی جاگّا سنینگرجے ستانّا زادِین۔

لاگلین میدکھانّی ایمان بو تونمید اینوگ۔

¹⁴ نگے فونو گُون، کالتیس کھیوجے زیرنا نگے ایمان چواد اِین نانگ تیبو لاگلینّی نانّگا کھیونگا میدنا، چی پھانتھوگس؟ چی تیتسوگسی ایمانی کھیوجاگون سکیوباینّا؟ میسکیوب۔

¹⁵ سپیرنا کھیوجاگونّی زاگیو یا گونگیو میدکھانّی فونو یا سپونموجیگ تھونگستے،

¹⁶ کھیوجا چیگی کھوا زیرین، ”جوہے ڈونمو چوستے ڈانگس ڈانگس زوستے کھامزانگ جیدے نیامپو ژوگس“، اِین نانگ کھوا زاگیو یا گونگیو ماتانگنا، کھیرانگی کھوے پھیا چی زانگپو چوستے این؟

¹⁷ تینّا تسوگسلا لاگلین میدکھانّی ایمان چیگپو شیتے اینوگ۔

¹⁸ تا کھاچیگی ای لابجے گیابگال چوستے زیرثیدچیس اینوگ، ”می کھاچیگّا ایمان یانگ کھاچیگّا لاس زانگپو چوچیسپو یودکیاگ۔“ اِین نانگ نگے زیرین، ”کالتیس کھیرانگی لاگلین ماچونا، کازوگی کھیورانّگا ایمان یودکھانبو نگا ستان تھوبین؟ نگارانگی لاگلین گیُودتے نگے ایمان بو کھیورانّگا ستانین۔“

¹⁹ کھیرانگی زیرین، کھیورانّگا ایمان یود، چیازیرنا خُدے چیگ جُوگستے اینکھانبو کھیرانگی ایمان چوانوگ۔ گیالّا راگ ردودگونّیانگ، تیبوا ایمان چوانوگ یانگ کھونّگا جیگستے دارّانوگ۔

²⁰ کھیرانگ تسامشیگی سامبا میدکھانجیگ این۔ چی لاگلین ماچوکھانّی ایمان پھانمیتھوگس اینکھانبو کھیورانّگا تھونّگا میدوگّا؟

²¹ نگاتانگونّی اتا اپو حضرت اِبراہیمی، خُدے کھورانگی ایمان لاگلینّی نانّگا کھیونگچیسپوے می ٹانگپوجیگ تھیا مازادسّا، نام کھوے کھورانگی بُوژا حضرت اِضحاقؔ قُربان تانگسایکا چھودپا پھولکییس یودپین؟

²² چی ایمان تانگ لاگلین گُونی نیامپو لاس چوچیسپو حضرت اِبراہیم گیُودتے، کھیوجے ماتھونّگا؟ کھوے لاگلینبوے، کھوے ایمان بو ڈانڈا ڈوبچوگستے اینوگ۔

²³ ہلژخمہ شوقبُو بوے نانّگا ”حضرت اِبراہیم خُدایکا ایمان چوسپا، کھونگی کھوا می ٹانگپوجیگ تھیا زادس“ مولکھان نانگجینلا جُونگستے اینوگ، ماتشاد کھوا خُدے دزاوانگ چوادپین ۔

²⁴ کھیوجے نگاتانگون خُدے سکوندونلا ایمان چیگپو مانپا، ایمان تانگ لاگلین نیسکو گیُودتے ٹانگپو تھیا زادچیسپو ماتھونّگا؟

²⁵ تینّا تسوگسلا زوگستسونگما راحب زیرکھانبوانگ، کھورانگی لاگلینگون گیُودتے، خُدے سکوندونلا ٹانگپو تھیا مازادسّا، نام کھوے بنی اِسرائیلی لونکھیرکھان نیسکو کھونگی ڈاو گونّی کانے باستے جانیانگ لام سوسوجیگنے کھامزانگ لامچوگس۔

²⁶ اوگس میدکھانّی زوگسپو شیتے اینکھان تسوگسلا لاگلین میدکھانّی ایمان بوانگ، شیکھان ژوگس اینوگ۔