ཡ༌ཀོབ༌ 1 - New Testament in Ladakhi Langageحضرت یعقُوبؔ ی چھوگسنے سلام۔ 1 نگا یعقُوبؔ ، خُدے تانگ حضرت عیسیٰ مسیح ژابستوگپاجیگ این۔ نگے ای ایگیبو، دُنیا گانگپوے نانّگا کھیابستے یودکھان خُدے میریگس چوگنییسگونلا ڈِیاد۔ کھیوجاگونلا نگے سلام جُواد۔ ایمان تانگ شیسرابس۔ 2 نگے فونو گُون، کھیوجا ناگھسباردو تھونّگاچیگ، ایبو ما سکیدپو یونگچیسّی سکابسشیگ اینوگ سامگوس۔ 3 چیازیرنا کھیوجاگونّی ایمان تشودلتا جونگ زانے، کھیوجاگونّی سنیینگروسگونلا لدانچیسّی سکابس تھوبچیسپو گیوس اینّوگ۔ 4 تینے ایبو لدانچوگشیگ چیازیرنا نام کھیوجاگونّی سنیینگروسگون گانگپو لدانّا کھیوجاگون ایمانی نانّگا چھاتشانگ لدانتے، چانگ گھوسدوم میدکھان ریگ گیورین۔ 5 کالتیس کھیوجا سوجیگّا شیسرابس گوسنا، سنینگ پھیستے سالکھانّی نگاتانگونّی خُدا جْوس ۔ کھونگی تیبو کھیورانّگا سالّا زادِین۔ کھونگی کھیورانّگا جُووا پھولچیسّی پھیا کھاسکییا میزاد۔ 6 اِین نانگ کھیرانگی جُووا پھول زانے، تھےژومس ماچوا تھوبّانوگ سامستے ایمان چوگوس، چیازیرنا تھےژومس چوکھانّی میبو تشوے چھولباگ تسوگسشیگ اینوگ، کا بو لونگستشوبسّی ینگوا ٹھیدتے کھیرّانوگ۔ 7 تھےژومسچانّی می بوے مسیح کانے چانگ تھوبچیسّی ریوا بور ماگوس۔ 8 چیازیرنا کھوے رُوح بو خُدے تانگ دُنیا نیسکوے چھوگسلا یودتے اینوگ، یانگ لاس تشانگمے نانّگا ستانپو میدتے اینوگ۔ 9 ایمان یودکھان نیامشونگ نیالباچانگونّی، تھادپو چوگوشیس اینوگ چیازیرنا خُدے کھونگونلا سیوا چوا زادتے اینوگ۔ 10 اِین نانگ چھوگپوگونّیانگ، خُدے کھونگون پاسمو چوا زادچیسپویکا تھادپو چوگوشیس اینوگ، کھونگون جینگی مینتوگ یولتے چھا تسوگسلا، میدکھان چھین۔ 11 نییما تشانتے شارتے ساگُون میا ژیگ، مینتوگ چھونگونبو بودتے، یانگ تیبوے دزیسپوبو میدکھان چھانوگ۔ تینّا تسوگسلا نورّی گیابنے بانگتانگاین یودی توسلا، چھوگپوگونّانگ میدکھان چھین۔ 12 سنینگروس نیامپو ردوگنگال کھورکھانگونلا، برکت سالین۔ چیازیرنا تشودلتے نانّگا تھارکھییل چھاکھانگونلا، خُدے تھامیدپے میتشیے تاج پو سالّا زادِین، کا بو خُدے کھونّگا چیسپا چوکھانگونلا سالچیسّی وعدہ زادتے این۔ 13 نامجیگ کھیورانّگا دِیگپا چوچیسّی دودپا سکیینا خُدے نگا دِیگپے نانّگا گییلچُوگچیسّی سونڈوس زادتے اینوگ مازیرشیگ۔ خُدے تھوگسدودّی نانّگا نگانپا چوچیسپو مانے میدکیاگ، ماتشاد کھونگی سوجیگّانگ دِیگپا چوچیسّی دودپے نانّگا گیل چوگّا مانے زادّا مانوگ۔ 14 دِیگپا چوچیسّی دودپاگون نگاتانگرانگی سیمس نگانپے نانگنے یونّگانوگ، کابوے نگاتانگونلا گوبسکورتے خُدانے تھاگرینّگا ٹھیدتے کھیرّانوگ۔ 15 ای دودپاگونّی دِیگپے لاسگون سکیے چوگّانوگ، یانگ دِیگپابو لدانچوگنا، تیبوے شیچیسپو سکیے چوگّانوگ۔ 16 نگے لے فونو گون، گوبسکور ماچوگشیگ۔ 17 زانگپو تانگ دزومسپو سکییسگون، نامکھے اوت تشانگما چوا زادکھانّی، نگاتانگونّی یاب خُدانے یونّگانوگ۔ کھونگ، تیگون یا تیگونّی ٹیبکیاگ تسوگسلا گیورّا مانے زادّا مانوگ۔ 18 کھونگرانگی لدینبے کا گیُودتے، کھونگی نگاتانگونلا میتشے سوماجیگ سالچیسلا لدامّا زادتے، نگاتانگون کھونگی معجزہ ّی ٹونے تشانگمیسانگ رینچان تھیا زادس۔ نیانچیس یانگ لاگلین چوچیس۔ 19 نگے لے فونو گون، کھیوجاگونّی جانماگونلا گیالّا چوستے نیونشیگ، سامبا تانگستے سپیرا تونگشیگ، یانگ ثو یونگچھوگچھوگشیگ یونگ ماگوس۔ 20 چیازیرنا ثوے میجیگی نانّگا خُدے تھوگستھادکھانّی ٹانگپو لاسگون سمینچوگّا مانوگ۔ 21 تیبویپھیا کھیوجاگونّی میتشیے نانّگا یودکھانّی سوگپو تانگ نگانپا تشانگما پھونگشیگ۔ یانگ پاسمو چوستے خُدے کھیوجاگونّی سیمسّی نانّگا بورّا زادکھانّی کاگونلا کھانیونشیگ، کابوا کھیوجاگون تھارچوگچیسّی کھیود یودتے اینوگ۔ 22 اِین نانگ خُدے حُکم گونلا نیانچیس چیگپو مانپا، تیگونّیکا لاگلین چوگوس۔ تے مانّا، کھیوجاگونّی رانگدانگرانّگا گوبسکورتے اینوگ۔ 23 کالتیس کھیوجے خُدے حُکم گون نیانتے لاگلینّی نانّگا ماکھیونگنا، تے میبو ژوگس اینوگ، کابوے میلونگی نانّگا کھورانگی لدونّگا ستاد، 24 یانگ تھونگتے ستینگنے تیکانے سونگتے تینّامالّا کھورانگ کازوگشیگ تھونگکھانبو رجیدّانوگ۔ 25 اِین نانگ کالتیس کھیوجاگونّی دزومسپو شریعت پو سالپو چوستے ہاگوچیسّی سونڈوس چونا، کابوے رانگوانگ تانّگاد۔ یانگ کالتیس زیرتے یودکھانگون چوستے تشورکھانگون رجید مارجیدنا، خُدے کھیوجاگونلا تیزوگ چوچیسّی پھیا برکت سالّا زادِین۔ 26 کالتیس کھیوجاگون چھوسپاجیگ این زیرّادنا اِین نانگ رانگی لچیبویکا نیارا گیابستے بورّا میدنا، کھیوجاگونّی رانگدانگرانّگا گوبسکورتے، کھیوجاگونّی چھوسپو رینمیدجیگ گیورتے اینوگ۔ 27 خُدے یابّی سکوندونلا ژانگما تانگ نگوسپوے شریعتی تونتاگپو نی، پھاما میدکھانّی ٹھوگوگون تانگ انے مارانگمو گُونلا، ناگسباردوے توسلا ستاستوگ چوچیس، یانگ دُنیائی لاس نگانپاگونّی نانّگا ماڈیسّا رانگ رانگ سکیوبستے بورچیسپو اینوگ۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation