ཨིབ༌རི༌པ༌ 9 - New Testament in Ladakhi Langage

دُنیائی چولسے ناسّا۔

¹ خُدے بنی اِسرائیل پاگون نیامپو زادکھانّی وعدہ دانگپوبوا، چولچیسّی شریعت تانگ، چولسے ناسّا یودتے اینوگ۔

² تے چولچیسّی کوربوے نانّگا نانگمیگ نیس یودپین۔ چیگپوے نانّگا ود ستاگس، چوگتسے تانگ، چوگتسیکا ہلژخمہ تاگی گُون یودپین، یانگ ای نانگبوا ہلژخمہ ناسّا زیرّادپین۔

³ تیرو یولّاجیگ یودپین۔یانگ یولّے گیابلوگپوا نیسپا نانگمیگپو یودپین، کابوا تشانگمیسانگ ناسّا ہلژخمہ بو زیرّادپین۔

⁴ تینانّگا سپوس توگسے سیرّی قُربان تانگسا تانگ وعدہ ّی گھام زیرکھانّی شینگی گھام، چھوگس تشانگمانے سیرّی تومسکھانبو یودپین۔ تے گھامّی نانگکوگا مانّا زیرکھانّی تاگی گیانگسکھانّی سیرّی نود، حضرت ہارُونؔ نی چھاگبیر لوما سکییسکھان، یانگ وعدہ ڈیکھانّی ردوا لیب لیب گُون یودپین۔

⁵ گھامّی کھیتھوگپویکا شوگپا یودکھانّی شان چان ثوگیودکھان نییسّی زو چوستے یودپین، کاگونّی شوگپے خُدے سنینگرجے تھوبسے ناسّابو کابستے یودپین۔ داگسا تیگونّی سکورلا جیبسال چوستے شادگوس میدپا اینوگ۔

⁶ ای تشانگما رانگرانگی ناسّیکا بورچیسّی لاسپو تشارتے ستینگنے، اِمام گُون کھورانگونّی شریعتی کھاگّون چوچیسلا تے ٹانگپو نانگبوے نانّگا جاگدانگ چھادپین۔

⁷ اِین نانگ تشانگمیسانگ ناسّا ہلژخمہ بوے نانّگا اِمامِ اعظم مانے، سوجیگّانگ چھاچھوگسّا میدپین، تیبوانگ لو چیگی نانّگا لانپھوگ چیگ۔ یانگ کھوے کھورانگ تانگ میگونّی گیُوس میدپا چوکھانّی دِیگپاگونّی پھیا، ٹھاق ّی چھودپا پھولّادپین۔

⁸ ای شریعت گون چوچیسپوے، تے تشانگمیسانگ ہلژخمہ ناسّا، تشانگمے پھیا ماپھیا اینکھانبو ہلژخمہ رُوح بوے سنگون چوگّا زادس، نامتشوگپا تے چولسے کوربو لوس۔

⁹ تے چولچیسّی تشیرکا، یانگنا اِمام گُونی چھودپا پھولکھانّی سکییس تانگ قُربان گُونی، چولکھانگونّی سیمس گُون ژانگما چو ماتھوبکھانبو نی ایتوسّی سپیجیگ اینوگ۔

¹⁰ تے سنیینگپا تشیرکابو زاچیس، تھونگچیس تانگ ژانگما چوچیسّی لوگثولگون نیامپو ڈیلتے اینوگ، یتسوگسّی زوگسپے تھوگسّی تشیرکاگون تے سوما وعدہ گوزوگ چھاچھا تشوگپا لوسپین۔

مسیحا نی دزومسپو قُربانبو این۔

¹¹ اِین نانگ تھوبکھانّی برکت تشانگمے، اِمامِ اعظم گیورتے ستینگنے مسیحا، نامکھے دزومسپوے کورّی نانگکوگا سکیودّا زادس، کا بو می لاگپانے ماچوکھان یا دزامبولینگی کھاگشیگ مانوگ۔

¹² راما تانگ بیتوےٹھاقّ گُون مانپا، مسیحا کھونگرانگی سکو ٹھاق گیُودتے، توسگیونّی پھیا لانچیگ تشانگمیسانگ ناسّا ہلژخمہ بوے نانّگا سکیودّا زادس۔ تیبوے جاستے کھونگی نگاتانگونّی دِیگپے رینبو توسگیونّی پھیا شالّا زادس۔

¹³ راما تانگ لانگتو گُونی ٹھاق یانگ بیتسے ثاگسکھانّی گوگتھال لوگثول نانگجین تشیتو گیورکھانگونّیکا یوگچیسپوے، کھونگون زوگسپے تھوگنے ژانگما گیورّانوگ۔

¹⁴ تینے سامبا سالّانگ، سونتے خُدا چولچیسلا مسیح سکو ٹھاق پوے، نگاتانگی رُوح بو تے نگانپے لاسگونّے تسامشیگ ژانگما میزاد؟ تھامیدپے رُوح بوے ستوبس گیُودتے، نگاتانگی دِیگپے پھیا مسیح کھونگرانگ دزومسپو قُربانّی تشولّا خُدا پھولّا زادس۔

¹⁵ تینّابویپھیا مسیحا، خُدے تانگ میگونّی پارلا وعدہ سومے بارمیبو اینوگ۔ تیبو گیُودتے خُدے لدامّا زادکھان میگونلا، کھونگی وعدہ زادکھانّی تھامیدپے نورسکالگون تھوبتھوباین۔ خُدے لدامّا زادکھانّی می، کاگونّی وعدہ تانگپوے یوگا دِیگپا چوس، تیگونلا چھادپے کانے تھارپا سالچیسلا مسیحا ڈونگسّا زادس۔

¹⁶ نورسکالّی تھو ڈیسکھانّی شوگوا ستاچیسّی پھیا، تے ڈیکھانّی می شیتے اینکھانبو تانتان چوگوس۔

¹⁷ میبو شیتے ستینگنے مانے، تے ڈیسکھانبو لاگلینّی نانّگا یونّگا مانوگ۔ نورسکال ڈیسکھانّی میبو سونتیا یودی توسلا تے ڈیکھانبو کولنیانّا مانوگ۔

¹⁸ تینّابویپھیا ٹانگپو وعدہ بو سیمسچانی ٹھاق گیُودتے لاگلینّی نانّگا کھیونگس۔

¹⁹ حضرت مُوسیٰؔ سی، میتشانگمالا خُدے حُکم تشانگما سیلتے ستینگنے، کھونگی بیتو تانگ راما گُونی ٹھاق یانگ چھو، مارپو بال تانگ ہیسوب زیرکھانّی لچانگمے یالگاگون نیامپو، شریعتی شوقبُو تانگ میتشانگمیکا یوگا زادس۔

²⁰ کھونگی مولس، ”ای ٹھاق پوے خُدے کھیوجاگونلا کھانیون مولکھانّی وعدہ بو ستانپو چوانوگ۔“

²¹ تینّا تسوگسلا کھونگی ٹھاق پو، کور تانگ چولچیسلا کولکھانّی نود تشانگمیکا یوگا زادس۔

²² اونا، حضرت مُوسیٰؔ سی شریعت نانگجین ہالام چیتشانگما ٹھاق گیُودتے ژانگما زادّادکیاگ، یانگ ٹھاق بینگستے مانے دِیگپا مُعافی تھوبّا مانوگ۔

²³ تینّابویپھیا کور تانگ تینانّگا یودکھان تشانگما، کاگون نامکھے نانّگا یودکھانّی سپیگون این، تیگون سیمسچانی ٹھاق گیُودتے ژانگما چوگوسّادپین۔ اِین نانگ نامکھے نانّگا یودکھانّی نگوسماگون ژانگما چوچیسلا سیمسچانی ٹھاق ّی سانگ مانّگا ٹاگپو قُربانّی گھوسدوم یودتے اینوگ۔

²⁴ مسیحا میگونّی لاگپانے چوکھانّی ہلژخمہ ناسّا ہلژخمہ بوے نانّگا ماسکیودس، کا بو نامکھے نانّگا یودکھانّی نگوسمابوے ٹیبکیاگشیگ این۔ خُدے سکوندونلا نگاتانگونّی تشابس چوا زادچیسّی پھیا، کھونگ نامکھے نانّگا سکیودّا زادس۔

²⁵ کھونگ نامکھے نانّگا یانگنے یانگ کھونگرانگ چھودپا پھولچیسلا ماسکیودس، کازوگ دُنیائی اِمامِ اعظمی کھورانگی ٹھاق مانپا، سیمسچانی ٹھاق کھورتے لوژونگ تشانگمیسانگ ناسّا ہلژخمہ بوے نانّگا چھانوگ۔

²⁶ کالتیس تیبو چوگوسپینّا تینے دُنیا چھاگسپانے پھارلا مسیحا لان مانگپو ڈونگّوسّا زادتے یودڈو۔ اِین نانگ تا، ای ستینگجوگی توسّی نانّگا کھونگ جالتے توسگیونّی پھیا لانچیگ، دِیگپا تشانگما میدکھان زادچیسلا کھونگرانگی ثوگپو چھودپا پھولّا زادس۔

²⁷ کازوگی میتشانگما لانچیگ کانیمید شیگوسّانوگ، یانگ تیبوے ستینگنے خُدے ٹھیمسچادبو نیونگّوس۔

²⁸ تینّا تسوگسلا مسیحا لانچیگ می مانگپوے دِیگپاگونّی چھادپابو نامستے ڈونگسّا زادس۔ نگاتانگونّی دِیگپے چھادپا نامسشیسلا مانپا، کھونّگا ثونگستے یودکھانگون سکیوبچیسلا کھونگ یانگسکیار سکیودّا زادِین۔