ཨིབ༌རི༌པ༌ 8 - New Testament in Ladakhi Langage

مسیحا نی نگاتانگونّی اِمام چھینمو جُوگستے اینوگ۔

¹ نگے زیرچیسّی تونبو نی، نگاتانگونلا اِمامِ اعظم جیگ یودتے اینوگ۔ کھونگ نی نامکھے نانّگا شان چانّی خُدے جُوگسٹھیسّی یاسپا چھوگسلا سیواچانّی ناسّیکا جُژوگسکھانبو این۔

² یانگ نامکھے کور، نگوسپوے چولسے ناسّے نانّگا اِمام گُونی تشولّا جابستوگ جوا زادّانوگ، کا بو میی ماچوا مسیح خُدے چوا زادتے اینوگ۔

³ اِمامِ اعظم تشانگما، سکییس تانگ قُربان گُون پھولچیسلا سکوا زاد پاسانگ، نگاتانگونّی نامکھے اِمام چھینموانگ پھولچیسلا چھودپاجیگ یونگّوس۔

⁴ کالتیس کھونگ، ای دُنیائیکا جُوگستے یودپینّا تینے کھونگ اِمام جیگ این کھورانگ مانڈو، چیازیرنا یرو شریعت نانگجین چھودپا پھولکھانّی اِمام گُون یودتے اینوگ۔

⁵ اِمام گُونی جابستوگ جوین چولسے ناسّابو نامکھے نانّگا یودکھانّی نگوسمابوے ٹیبکیاگ تسوگسشیگ اینوگ۔ تینّابویپھیا حضرت مُوسیٰؔ سی کور چوچیسپو گوزوگ چو زانے، خُدے کھوا سپانگپودّا زادتے مولس، ”نگے کھیورانّگا ریکا شادکھان نانگجین، تے کوربو چوچیسّی نانّگا تشیر تانگ کورّی رینگ تانگ ژانگ تشانگما تانتان چوگوس۔“

⁶ اِین نانگ تا خُدے نگاتانگی اِمام چھینمو حضرت عیسیٰ سی مسیح، سنگونمے اِمام گُونی سانگ مانّگا گیاسپا جابستوگ ژوچیسشیگ سالّا زادتے اینوگ۔ تینّا تسوگسلا کھونگی خُدے تانگ نگاتانگونّی پارلا وعدہ سوما زادکھانبو سنگونمے سانگ گیاسّا اینوگ۔ تیبوے نانّگا خُدے کانے نگاتانّگا تھوبچیسچانّی برکت گون، مانّگا گیالّا وعدہ جیگیکا ستینتے اینوگ۔

⁷ کالتیس گومے وعدہ بو سکیونمیدشیگ یودپینّا، تینے تیبوے تشابسلا وعدہ نیسپے گھوسدوم میدڈو۔

⁸ اِین نانگ خُدے میگونّی نانّگا سکیون زیگسپا مولس، ”جاگپو لیبپین اینوگ مسیح خُدے مولس، نگے بنی اِسرائیل تانگ یہُودیہ پا میگون نیامپو وعدہ سوماجیگ چوین۔

⁹ ای وعدہ بو نگے کھونگونی اتا اپو گون نیامپو چوکھانبو ژوگس مییونگ، کازانے نگے کھونگونلا لاگپا تھامستے مصر نے پھیلوگا ٹھیدتے کھیرپین۔ کھونگون نگے وعدہ بوے نانّگا ایمان چان مالوسپا، نگے کھونگونلا گیاب گیورپین، مسیح مولس۔

¹⁰ اِین نانگ تیستینگنے ایبو نی بنی اِسرائیل پاگون نیامپو چوچیسچانّی وعدہ سوماجیگ این، مسیح مولس۔ نگے نگارانگی شریعت گون کھونگونی سامبے نانّگا چوگاین یانگ نگے کھونگونی سنینگّونّی نانّگا ڈیاین۔ نگا کھونگونی خُدے، یانگ کھونگون نگے میگون گیورین۔

¹¹ یانگ کھونگونی کھورانگی کھییمتشیسپاگون ماتشاد نیینگونلانگ ’کھیوجے مسیح خُدے شیسگوس‘ زیرتے لابگوس مییونگ۔ چیازیرنا نیامشونگنے ٹاگپو تشوگپا، کھونگ تشانگمے نگا شیساین۔

¹² یانگ نگے کھونگونی نگانپاگونلا مُعافی تانگین یانگ نگے کھونگونی دِیگپاگون مانے ایدتو میبور۔“

¹³ خُدے وعدہ ”سومے“ جالتا سالّا زاد زانے، کھونگی سنگونمے وعدہ بوے گھوسدوم میدکھانبو ستانّانوگ۔ یانگ سنیینگپا تانگ پھانمیتھوگس گُون گیوگسپا میدکھان چھانوگ۔