ཨིབ༌རི༌པ༌ 7 - New Testament in Ladakhi Langage

مَلِک صادق نی حضرت اِبراہیم سانگ ٹاگا این۔

¹ مَلِک صادق نی شالیمّی گیالسے گیالپو تانگ تشانگمیسانگ ٹاگپو خُدے اِمام ینپین۔ حضرت اِبراہیم گیالپوگونّی گیابگالّا ماگ تانگستے گیالکھا تھوبتے لوگستے یونگس زانے، مَلِک صادق گا کھو تھوگ، یانگ کھونگی حضرت اِبراہیمی برکت سالس۔

² تینے حضرت اِبراہیم ماگی نانّگا تھوبکھان نور تشانگمے نانگنے رچُوکھاگ چیگ، مَلِک صادق گا پھولس۔ مَلِک صادق مینگبوے تون تاگپو نی، ”گیالپو ٹانگپو“ یانگ شالیمّی گیالپوے تونبو نی، ”جیدے گیالپو“ اینوگ۔

³ کھونگی ابا، اما یا اتا اپو ماتشاد، کھونگ سکییچیس یا شیچیسّی سکورلا چانگ شادگیو میدتے اینوگ۔ خُدےبوژا تسوگسلا کھونگ توسگیون اِمام جیگ لُوس۔

⁴ سامبا تونگشیگّانگ، مَلِک صادق تسامشیگی ٹاگپو جُوگستے مانوگ۔ بنی اِسرائیلی اتا اپو مینگچان حضرت اِبراہیم یانگ ماگی نانّگا تھوبکھان تشانگمے نانگنے رچوکھاگچیگ کھونّگا پھولس۔

⁵ تا حضرت مُوسیٰؔ سی شریعت نانگجینلا، یہُوداؔہ اولاد نے اینکھانّی اِمام گُونی بنی اِسرائیل پاگونّی کانے رچوکھاگ چیگ لدوچُھوگادپین، کاگونّانگ حضرت اِبراہیم اولاد اینوگ۔

⁶ اِین نانگ یہُوداؔہ پے اولاد نے مانکھانّی مَلِک صادق گانگ حضرت اِبراہیمی کانے رچُوکھاگ چیگ لینتے خُدے وعدہ تھوبکھانّی حضرت اِبراہیمی برکت تانگس۔

⁷ یانگ تھےژومس مانے میدپا، برکت تانگکھانبو برکت لینکھانبوے سانگ چھیا اینوگ۔

⁸ رچُوکھاگ چیگ لینکھانّی اِمام گُون، شیانوگ، اِین نانگ مَلِک صادق اِمام گُونی سانگ ٹاگا اینوگ، چیازیرنا شوقبُو بوے نانّگا کھونگ شیکھانّی سکورلا ڈِیستے مید پاسانگ، کھونگ توسگیون سونتیا لوسکھان تھیانوگ۔

⁹ ایبوانگ زیرنیانچیس اینوگ، رچوکھاگچیگ لینکھانّی لاوی پاگونّی مَلِک صادق گا رچوکھاگچیگ تانگستے اینوگ، نام کھونگونی اتا اپو حضرت اِبراہیم مَلِک صادق گا رچوکھاگچیگ پھولس۔

¹⁰ چیازیرنا مَلِک صادق حضرت اِبراہیمی تھوگ زانے، یہُوداؔہ پاگون ماسکییا اینپین، اِین نانگ کھونگونی اتا اپو ، حضرت اِبراہیم ٹھاق ّی نانّگا کھونگون یودتے اینپین۔

¹¹ کالتیس شریعتی ماگلدان اینکھانّی لاوی پے اولاد اِمام گُونی لاسگون گیُودتے، خُدے لدُونلا ٹھانگسپو گیورتھوبّادپینّا، تینے چی پھیا خُدا یانگ سوسو اِمام گُونی ریگشیگ تسوگّا زادگوس، کا اِمام بُو حضرت ہارُونؔ نی گیودنے مانپا مَلِک صادق ژوگس اینپین۔

¹² تا نام اِمام گُونی گیودبو گیورنا تینے شریعتی نانّگانگ گیورجا یونگّوس۔

¹³ نگے سپیرا تانگکھانّی اِمام بُو یہُوداؔہ اولاد نے مانپا، جانیانگ پھورگیودشیگنے اینوگ، کاگونّی قُربان تانگسایکا مانے جابستوگ ماژوا اینپین۔

¹⁴ نگے زیرچیسّی تونبو نی، نگاتانگونّی حضرت عیسیٰ مسیح یہُودیہ اولاد نے سکیودّا زادتے اینوگ۔ یانگ حضرت مُوسیٰؔ سی، تے اولاد نے اِمام سکیودکھانّی سکورلا مانے مولّا زادتے میدوگ۔

حضرت عیسیٰ سی نی مَلِک صادق ژوگس اینوگ۔

¹⁵ مَلِک صادق تسوگسلا اِمام سوسوجیگ چونگچیسپوے، ای گیورجابو ما سالپو سونگتے اینوگ۔

¹⁶ شریعت نانگجین یہُوداؔہ ای اولاد نے یینچیسپوے، حضرت عیسیٰ مسیح اِمام گیورّا مازادس، اِین نانگ مانے شیگ مینیانچیسّی کھیود چان میتشیے جاستے، کھونگ اِمام گیورّا زادس۔

¹⁷ ہلژخمہ شوقبُو بوے نانّگا کھونگی سکورلا، ”مَلِک صادق تسوگسلا نیرانگ توسگیونّی پھیا اِمام این“ مولتے یودتے اینوگ۔

¹⁸ اونا، اِمام گیورچیسلا، سنگونمے گھوسدومگون تھینتے میدتے اینوگ، چیازیرنا تیبو اُتھوکس تانگ پھانمیتھوگس یودپین۔

¹⁹ شریعتی چیجیگّانگ دزومسپو ماچوس۔ اِین نانگ تا داگسا نگاتانگونلا سنگونّی سانگ ریوا مانّگا ٹاگپوجیگ یودتے اینوگ، کابوے نگاتانگون خُدے تانگ نیموا کھیرّانوگ۔

²⁰ خُدے نا کھورّا زادتے ایبو ستانپو زادس۔ حضرت ہارُونؔ نی اولاد تیتسوگسی ناماکھورا اِمام گیورتے اینوگ۔

²¹ اِین نانگ حضرت عیسیٰ سی نا نیامپو اِمام گیورّا زادس، نام کھونّگا خُدے مولس، ”مسیح خُدے نا کھورّا زادس، یانگ کھونگی تیبو چاگّا میزاد، ’ کھیرانگ توسگیونّی پھیا اِمام این‘۔“

²² تے نابوے جاستے خُدے نگاتانگونلا وعدہ ما گیالّاجیگ زادکھانبو، حضرت عیسیٰ سی تانتان چوا زادس۔

²³ سنگونمے تشیرکے نانّگا، اِمام مانگپوجیگ یودتے اینوگ، چیازیرنا شیچیسپوے کھونگونلا اِمام گُونی لاسپو توسگیونّی پھیا چو مانیان۔

²⁴ اِین نانگ حضرت عیسیٰ سی توسگیون سونتیا لوس پاسانگ، کھونگی اِمام گُونی چھاگلاسپو توسگیون لوسّا زادِین۔

²⁵ تیبویپھیا کھونگ گیُودتے، خُدایکا یونگکھانگون کھونگی توسگیونّی پھیا سکیوب تھوبین۔ تے میگونّی پھیا خُدا جُووا پھولچیسلا، کھونگ توسگیون جوگسا زادّانوگ۔

²⁶ تیتسوگسی اِمامِ اعظمی نگاتانگی گھوسدومگون ڈوب چوگّانوگ۔ کھونگ نی، ہلژخمہ، سکیونمید، ژانگما، دِیگپاچانگونّے سوسو پھیا زادکھان تانگ نامکھے نانّگا سیوا چھیشوگچانّی کوسا تھوبّا زادکھانبو جُوگستے اینوگ۔

²⁷ جان اِمامِ اعظم گون تسوگسلا کھونّگا گوما کھورانگی دِیگپا، یانگ تینے ژانمیگونّی دِیگپے پھیا، جاگدانگ قُربان پھولگوس میدپا اینوگ۔ چیازیرنا حضرت عیسیٰ سی کھونگرانگ لانچیگ می تشانگمے پھیا قُربانلا پھولّا زادس۔

²⁸ شریعتی وتھوگسچانّی اِمامِ اعظم گون سکوانوگ۔ اِین نانگ شریعتی ستینگنے خُدے نا نیامپو کھونگرانگی بُوژا لدامّا زادس، یانگ کھونگی ثاسپو دزومسپو اِمام چھینمو توسگیونّی پھیا چوا زادس۔