ཨིབ༌རི༌པ༌ 6 - New Testament in Ladakhi Langage

¹ سونگپاسانگ نگاتانگون گوزُوگی مسیح سکورلا لابجا تھوبکھانگونّیکا یانگسکیار لوگستے ماچھا، اِین نانگ لدانتے سامباچان ریگ گیورین۔ لدینبا نگاتانّگا نگانپے لاسگونّی کانے گیودپا سکییچیس یانگ خُدے نانّگا ایمان چوچیسّی گومے لابجاگونّے یانگسکیار گوزوگس چوگوس میدتے اینوگ۔

² کھیوجاگونلا غوتا لینچیس، رُوح بوے کھیودگون تھوبچیسلا گویکا لاگپا بورچیس، شیکھانگون سونتیا لانگچیس تانگ تھامیدپے ٹھیمسچاد گُونی سکورلا تارُونگ مانّگا لابجا لینگوس میدپا اینوگ۔

³ یانگ خُدے تھوگسدود یودنا نگاتانگون لدانکھانّی لابجے نانّگا کیینلا چھین۔

⁴ گیودپا چوچیسّی پھیا ای میگون لوگستے مانے کھیونگنیانّا مانوگ، کاگونلا مسیح سکورلا لونبوے ہاگو گانگپو یود، نامکھے برکت گونّی ڈود نیونگس، یانگ ہلژخمہ رُوح بوے نانّگا ڈیس،

⁵ خُدے حُکم زانگپوے یانگ خُدے گیالثید یونگچیسچانّی کھیودگونّی تھونّگومس یود۔

⁶ یانگ ستینگنے کھونگون خُدانے گیورتے تھاگرینّگا سونگ۔ یتسوگسّی میگون گیودسیمسّی نانّگا لوگستے کھیونگچیسپو نیانّا مانوگ۔ خُدےبوژا پھانگچیسپوے، کھونگونی مسیحا یانگسکیار کیانگشینگیکا کیانگچیس یانگ میگونّی لدُونلا ٹھیلبا ستانچیس دانگتسوگس چوستے اینوگ۔

⁷ ساکیادّی نانّگا چھارپا تھیمستے جینگبادپاگونلا ستونتھوگس گیالّا سمینچیسپویکا خُدے برکت یودتے اینوگ۔

⁸ اِین نانگ تشیرمانگ تانگ لجانگتسیر سکیکھانّی جینگ، پھانمیتھوگسشیگ اینوگ۔ تے جینگبوا نگان پھوگتے میاتوگّا زادّانوگ۔

⁹ چیسپے دزاوگون جان نگاجے تیتسوگسی سپیرا تانگنانگ، کھیوجاگونّی میتشے پھودتشولبو تھارپا تھوبچیسچانگون ژوگس، یودچیسلا نگاجا لوکھیل راگ۔

¹⁰ خُدے نی میوسپْا زادکھانجیگ جُوگستے مانوگ۔ کھیوجاگونّی کھونگی تونلا تسامشیگی سونڈوس تانگ جانیانگ ایمان چانگونلا روگس چوس، یانگ تارُوانگ چوچیسپوے خُدا چیسپا ستانکھانبو، کھونگی مانے رجیدّا میزاد۔

¹¹ کھیوجا سونتیا یود زانے، جانماگونلا چیسپا چوچیسپو نگاجے دودپا چھینمو این۔ تیزوگ چوچیسپوے کھیوجاگونّی ریوا چوکھانبو ڈانڈا ڈوب تھوبین۔

¹² کھیوجاگون لاسمیلام گیور ماگوس۔ اِین نانگ ایمان تانگ سنینگروس گُونی جاستے، خُدے وعدہ زادکھان نورسکالّا، تھوبکھانگونّی سپییکا ڈولچیسپو نگاجے دودپا این۔

خُدے وعدہ ایمان چان۔

¹³ خُدے حضرت اِبراہیمی وعدہ زاد زانے، نا کھورچیسلا جانسوجیگّانگ کھونگی سانگ ٹاگاجیگ مید پاسانگ، خُدے کھونگرانگی مِنتخسی نانّگا نا کھورّا زادتے مولس،

¹⁴ ”نگے تانتانلا کھیورانّگا برکت تانگستے کھیرانگی اولاد گون مامانگپو پھیلچوگین۔“

¹⁵ یانگ حضرت اِبراہیم زودپا نیامپو ثونگسپا، کھوا خُدے وعدہ زادکھانبو تھوب۔

¹⁶ نا کھور زانے، میگونّی کھورانگونّی سانگ ٹاگّاجیگی نا کھورّانوگ، یانگنا کھورچیسپوے کھونگونی زیرکھانبو ستانپو چوستے زیرگیوگون میدکھان چوانوگ۔

¹⁷ تینّا تسوگسلا، وعدہ تھوبکھانگونلا، خُدے کھونگرانگی تھوگسّامّی نانّگا مانے می گیورچیس اینکھانبو، تانتان سالپو چوچیسّی پھیا کھونگی نا کھورّا زادس۔

¹⁸ سونگپاسانگ خُدے وعدہ تانگنا نیسکو سالّا زادس۔ ای نیسکو مانے میگیور، چیازیرنا خُدا زون سال مانے نیانّا مانوگ۔ تیبویپھیا نگاتانگونّی تھوبچیسچانّی تھارپے ریوابوا تھامستے، خُدے چھاگی یوگا سکیوبّا زادچیسلا کھونگی لدُونلا بانگتانگکھان نگاتانگونلا لوکھیل چھینمو بورتھوبّانوگ۔

¹⁹ ای ریوابوے نگاتانگونّی رُوح بو ستانپو، مانے سکولمینیانچیسّی ڈاگ دانگتسوگس چوانوگ، یانگ نگاتانگون یولّے گیابّا، خُدے تشانگمیسانگ ہلژخمہ ناسّابوے نانّگا ٹھیدتے کھیرین۔

²⁰ حضرت عیسیٰ تیرو نگاتانگونّی تونلا سنگونلا سکیود تشارتے، مَلِک صادق تسوگسلا کھونگ توسگیونّی پھیا نگاتانگونّی اِمامِ اعظم گیورّا زادتے اینوگ۔