ཨིབ༌རི༌པ༌ 5 - New Testament in Ladakhi Langage

¹ میگونّی ٹونے خُدے لدامّا زادکھانّی یہُودی پے اِمامِ اعظم تشانگمے، میگونّی ڈیل خُدے نیامپو لوسشوگچیسلا، کھونگونی تشابس چوستے لاس چوانوگ۔ اِمام چھینموے کھاگ نی، میگونّی دِیگپے پھیا سیمسچانی قُربانی تانگ سکیسگون خُدے سکوندونلا پھولچیسپو اینوگ۔

² اِمام چھینمو کھورانگّونّانگ سیمسّی نانّگا اُتھوکس یود پاسانگ، ماشیسّا دِیگپا چوکھانگون نیامپو بولمو تانگ جامپو نیامپو لاس چو نیانّانوگ۔

³ تینّابویپھیا کھوا کھورانگی دِیگپا ماتشاد، میگونّی دِیگپے پھیانگ قُربان پھولگوسّانوگ۔

⁴ اِمام چھینموے سیواچانّی کوسا سوجیگیانگ لینّیانّا مانوگ۔ ای ژورے پھیا کھوا خُدے لدامّا زادگوسّانوگ، کازوگ حضرت ہارُونؔ زیرکھانبو اینپین۔

⁵ تینّابویپھیا مسیح کھونگرانگی کھونگرانّگا سیوا تھوبچیسلا، اِمامِ اعظم چوا مازادس۔ اِین نانگ کھونّگا ” کھیرانگ نگے بُوژا این۔ دیرینگ نگا کھیرانگی ابا گیورتے این۔“ مولکھانّی خُدے لدامّا زادتے اینوگ۔

⁶ جانیانگ ناسّاجیگی نانّگا خُدے کھونّگا مولّا زادس۔ ”مَلِک صادق تسوگسلا کھیرانگ نی توسگیونّی پھیا اِمام بُو این۔“

⁷ حضرت عیسیٰ سی دُنیائیکا جُوگستے یود زانے، کھونگی کھونگ شیچیسّی کانے سکیوبّا زادنیانکھانّی خُدا میگچھو نیامپو کُوچو تانگین، جُووا تانگ دُعا چوا زداس۔ کھونگی سنینگی تھیلنے خُدا کُوسپا زادتے، کھونگرانگ خُدے وانگی یوگا بورّا زادپا، خُدے کھونگی دُعا گُون سانّا زادس۔

⁸ جان حضرت عیسیٰ سی خُدےبوژا اِین نانگ ، ردوگنگال چونّگا زادچیسپوے کانے، کھونّگا خُدےکھانیانچیسپو لوبس۔

⁹ اینّاگونّی جاستے خُدے کھونّگا دزومسپو اِمام چھینمو چوا زادس۔ یانگ حضرت عیسیٰ سی نی، کھونگرانگی کھانیانکھانگونلا، تھامیدپے تھارپا سالّا زادکھانبو اینوگ۔

¹⁰ اینّابوے جاستے مَلِک صادق تسوگسلا خُدے کھونّگا اِمامِ اعظمی کوسیکا سکوا زادس۔

ایمانی نانّگا لدانچیسلا بودس۔

¹¹ مسیحا اِمام چھینموے سکورلا شادگیو مانگپو یودتیانگ، کھیوجاگونلا ہاگوچوگچیس ما کاگسپو چھاروگ، چیازیرنا رُوحانی تھوگنے ہاگوچیسلا کھیوجاگون اُتھوکس دوگ۔

¹² کھیوجاگون توس مانگپوجیگنے پھارلا ایمان چان این پاسانگ، کھیوجاگونّی جانماگونلا لابجا تانگّوشیس اینوگ۔ اِین نانگ کھیوجاگونلا تارُوانگ خُدے حُکم ٹانگپوے ماگلدانبو، یانگّومانے لابکھانجیگی گھوسدوم یودتے اینوگ۔ کھیوجاگونلا زان مانپا، اومے گھوسدوم یودتے اینوگ۔

¹³ اوما چیگپو تھونگکھان گُون تارُوانگ ٹھوگو چھونگون ژوگس اینوگ، کھونگونلا میتشے ٹانگپو پھودچیسّی لابجاگون شیسّا مانوگ۔

¹⁴ کھارجی نی لدانکھانگونّی پھیا اینوگ، کاگونّی سونڈوس چوچیسپوے، ٹانگپو تانگ نگانپے کھیادپو ہاگوتھوبتے اینوگ۔