ཨིབ༌རི༌པ༌ 4 - New Testament in Ladakhi Langage

خُدے وعدہ زادکھانّی آرام۔

¹ خُدے آرام چوسے ناسّے نانّگا چھانیانچیسّی وعدہ بو تارُوانگ لوستے یود پاسانگ، نگاتانگونّی ٹونے سوجیگّانگ تے آرام چوسے ناسّے نانّگا ژوگ ماجوگسّا، میلوسشیسّی پھیا، شانگ چوشیگ۔

² چیازیرنا خُدے آرام چوسے ناس ڈالڈیگ چوا زادکھانّی گاموےناتسُولبو، نگاتانگی اتا اپو گونلا شادکھان تسوگسلا نگاتانگونّی پھیانگ شادتے اینوگ۔ اِین نانگ ایبو کھونگونلا پھانتھوگسچانجیگ ماگیور، چیازیرنا کھونگون خُدے کھانیانتے ایمان چوکھانگون ژوگس مانپین۔

³ نگاتانگ ایمان چوکھانگون چیگپو کھونگی آرام چوسے ناسّے نانّگا چھانیانّانوگ، کازوگ خُدے مولتے اینوگ، ”نگے ثوے نانّگا نا کھورپین۔ نگے آرام چوچیسی ناسّے نانّگا کھونگون مانے یونگ مینیان۔“ جان خُدے دُنیا زادّی توسنے پھارلا، ای آرام چوسے ناسّابو ڈالڈیگ زادتے اینپین۔

⁴ نگاتانّگا ای آرام چوسے ناسّا ڈالڈیگ یودکھانبو گیوس اینّوگ، چیازیرنا ہلژخمہ شوقبُو بوے ناسّاجیگیکا، جاگ ردونپے جاگی سکورلا ڈِیازادتے دوگ، ”چھاگلاس تشانگما زادتے ستینگنے جاگ ردونپے جاگّا خُدے آرام زادس۔“

⁵ اِین نانگ سنگونما نگے ڈیسکھان تسوگسلا خُدے مولّا زادس، ”کھونگون نگے آرام چوسے ناسّے نانّگا مانے یونگ مینیان۔“

⁶ خُدے آرام چوسابو تارُوانگ میگون یونگچیسلا پھیستے اینوگ، اِین نانگ کھا مینیانچیسپوے جاستے، گاموےناتسُول گومارانگ تشورکھانگون تینانّگا چھا مانیان۔

⁷ خُدے آرام چوسے ناسّے نانّگا چھاچیسلا یانگ توسشیگ لدامّا زادس، تیتوسپو نی دیرینگ اینوگ۔ توس مانگپوے ستینگنے خُدے گیالپو داؤد گیُودتے ایبو شادّا زادس، کازوگی نگے سنگونلا ڈِیستے یود۔ ”دیرینگ کھیوجاگونلا کھونگی سونگسکادپو تشور زانے، کھیوجاگونّی سنینگ سکیونگپو گیور ماچوگشیگ۔“

⁸ کالتیس حضرت یوشع بنی اِسرائیل پاگونلا تے آرام بو تانگچیسّی نانّگا ٹھانگسپو لوسپینّا، تینے خُدے جانیانگ جاگشیگی سکورلا ستینگنے جالتا ماسالا یودڈو۔

⁹ تیبویپھیا آرام چوچیسی توسپو تارُوانگ خُدے میگونّی پھیا لوستے اینوگ۔

¹⁰ خُدے دُنیا زادتے ستینگنے آرام زادّا تسوگسلا، کھونگی آرام چوسے ناسّے نانّگا لیبکھان تشانگما، کھونگرانگی لاسگونّی کانے آرام تھوبین۔

¹¹ سونگپاسانگ آرام چوسے ناسّے نانّگا لیبچیسّی پھیا، نگاتانگونّی سونڈوس گیالّا چوین۔ اِین نانگ کالتیس نگاتانگونّی خُدے کھا مانیانّا، تینے نگاتانگونّانگ بنی اِسرائیل پاگون تسوگسلا ٹھانگسپو میلوس۔

¹² تانتانلا خُدے حُکم گون سونپو تانگ شیدچان اینوگ۔ ایبو نی تشانگمیسانگ کھا نونپوچانّی زورنییس یودکھانّی رایَ سانگ نونپو یودتے اینوگ، تیبوے سیمس تانگ سیمسنید یانگ روسپے تھود تانگ روسپے سکانگ گُون چادتے سوسو زاد نیانّانوگ۔ تیبوے نگاتانگونّی نانگکوگی سامتشول تانگ دودپاگون پھیلوگا پھینّگانوگ۔

¹³ دزامبولینگی نانّگا چیجیگّانگ خُدانے واستے بور مینیان۔ کھونگی میگی لدُونلا چیتشانگما کاب ماکابّا پھیستے یودتے اینوگ، یانگ کھونگی لدُونلا نگاتانگونّی لاس تشانگمے سیروگ تانگوساین۔

مسیحا نی نگاتانگونّی اِمام چھینمو جُوگستے اینوگ۔

¹⁴ تینے نگاتانگونلا نامکھے نانّگا جُوگسکھان خُدےبوژا حضرت عیسیٰ، اِمامِ اعظم ٹاگپوجیگ یود پاسانگ، نگاتانگی ایمانی گواہ تانگکھانبویکا ستانپو تھامستے دوگشیگ۔

¹⁵ نگاتانگونّی ای اِمامِ اعظمی، نگاتانگون سیمسّی نانّگا اُتھوکس اینکھانبو کھیینّا زادّانوگ۔ چیازیرنا نگاتانگ تسوگسلا کھونگ یانگ تینّا تسوگسّی تشودلتاگون نیونگس، اِین نانگ کھونگی دِیگپا چوا مازادس۔

¹⁶ تینّابویپھیا نگاتانگون سنینگرجیچانّی خُدے، ٹھیسّیکا جُوگستے یودکھان یودسا ہامپا نیامپو یونگشیگ۔ تیرو کھونّگا سنینگرجے سکیستے نگاتانگونلا گھوسدوم یودی توسلا کھونگی شزدے روگسگون تھوبین۔