ཨིབ༌རི༌པ༌ 3 - New Testament in Ladakhi Langageحضرت عیسیٰ سی نی حضرت مُوسیٰؔ سی سانگ کھاگچان اینوگ۔ 1 تیبویپھیا ہلژخمہ فونو ، خُدے گیالثیدّی نانّگا بودّا زادکھانّی ٹوپاگون، ثانٹے سنانّگا تانگستے حضرت عیسیٰ سی سکورلا سامبا تونگشیگ۔ کھونگ خُدے لونکھیونّگا زادکھان تانگ اِمامِ اعظم اینکھان ایمانی گواہ نگاجے تانگستے این۔ 2 یانگ کھونگ نی، کھونگ لدامّا زادکھانّی خُدا ایمان چان اینوگ، کازوگی خُدے میگونلا جابستوگ چوچیسّی نانّگا پیغمبر حضرت مُوسیٰؔ ایمان چانجیگ یودپین۔ 3 حضرت عیسیٰ سی حضرت مُوسیٰؔ سی سانگ مانّگا سپال تھوبگوشیسّی اوسپا اینوگ، کازوگی کھانگپا سیگکھانّی میبوا، کھانگپے سانگ مانّگا سیوے اوسپا یود۔ 4 کھانگپا تشانگما، سوجیگی سیگستے اینوگ، اِین نانگ چیتشانگما سیگّا زادکھانبو نی خُدے جُوگستے اینوگ۔ 5 تا حضرت مُوسیٰؔ نی، خُدے میگونلا جابستوگپا ایمان چانجیگ اینپین۔ کھونگی جابستوگپو نی، یونگچیسچانّی توسّی نانّگا خُدے مولّا زادچیسچانّی سپیبو، ناگشے چھولّا اینپین۔ 6 اِین نانگ مسیحا خُدےبوژا این پاسانگ، کھونگ خُدے کھانگپا گانگپوے کھاگکھوربو جُوگستے اینوگ۔ یانگ کالتیس نگاتانگونّی سپوسپا تانگ مسیح نانّگا ریوا گُون ستانپو بورنا، تینے نگاتانگون خُدے کھانگپابو اینوگ۔ ایمان میپھانگچیسلا سپانگ پودس۔ 7 تینّابویپھیا ہلژخمہ رُوح بوے مولس، دیرینگ کھیوجاگونلا کھونگی سونگسکادپو تشور زانے، 8 کھیوجاگونّی سنینگ سکیونگپو گیور ماچوگشیگ، کازوگی بنی اِسرائیل پاگونّی ریستونگی نانّگا نگے زودپا تشود ستاستے نگا نگولوگ چو زانے چوس، 9 جان لو ژیبچو، کھیوجے اتا اپو گونّی نگے ستاگس گُون تھونگستیانگ کھونگونی نگے زودپے تشود ستاس۔ 10 تینّابویپھیا نگا تیگونّیکا ثو یونگس یانگ نگے زیرپین کھونگونی سنینگ توسگیون نگے کانے گیورتے تھاگرینّگا چھاروگ۔ نگے چوچیسلا زیرکھانگون کھونگونی چوا میروگ۔ 11 نگا ثو یونگستے نا کھورتے زیرپین ”نگے آرام چوسے ناسّے نانّگا کھونگون مانے یونگ مینیان۔“ 12 لے فونو گون، کھیوجارانگی سنینگّون نگانپا تانگ ایمان میدکھان می گیورچیسلا شانگ چوشیگ، کابوے جاستے کھیوجاگون سونپو خُدانے تھاگرینّگا کھیرّانوگ۔ 13 اِین نانگ کھیوجا چیگّانگ دِیگپے گوبسکورّی نانّگا سونگتے خُدے گیابگالّا سنینگّون سکیونگپو می گیورچیسلا، کھیوجے جاگدانگ، چیگ تانگ چیگّا سپوسپا تانگوس، تھورے پھیا ثونگستے مادوگ دیرینگرانگ چوس۔ 14 نگے تیبو زیرّاد، چیازیرنا کازوگ گوما نگاتانگی ایمان بو خُدے نانّگا ستانپو یودا تسوگسلا، کالتیس نگاتانگ تھامے توس تشوگپا ایمان چان لوسنا، تینے نگاتانگونّانگ مسیح نورسکالبو گوستے تھوبین۔ 15 ہلژخمہ شوقبُو بوے نانّگا مولتے اینوگ، ”دیرینگ، کھیوجاگونلا کھونگی سونگسکادپو تشور زانے، کھیوجاگونّی سنینگ سکیونگپو گیور ماچوگشیگ، کازوگی بنی اِسرائیل پاگونّی نگولوگ چو زانے چوس۔“ 16 تا خُدے سونگسکادپو تشورتیانگ کھونّگا نگولوگ چوکھانگون سو اینوگ؟ چی؛ تیگون حضرت مُوسیٰؔ سی مصری یولنے پھینگستے کھیونگکھان تشانگما مانوگا؟ 17 یانگ لو ژیبچو خُدا تھوگسثو جانگسشوگکھانگون سو اینوگ؟ چی؛ تے میگون دِیگپا چوکھانگون یانگ تیگونّی سپھور ریستونگی نانّگا لوسکھانگون مانوگا؟ 18 یانگ خُدے تیگون کھونگی آرام چوسے ناسّے نانّگا مانے ژوگس مینیان مولتے نا کھورّا زاد زانے، سو نیامپو جالتا سالّا زادتے اینوگ؟ چی تے میگون کھونگی کھا مانیانکھانگون مانوگا؟ 19 سونگپاسانگ نگاتانگونّی تھونّگانوگ، کھونگونی ایمان میچوچیسپوے جاستے، کھونگون خُدے آرام چوسے ناسّے نانّگا ژوگس مانیانّا اینپین۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation