ཨིབ༌རི༌པ༌ 2 - New Testament in Ladakhi Langage

سنانگستاگ تانگچیسلا سپانگ پودس۔

¹ تیبویپھیا نگاتانگونّی تشورکھانّی دینبابویکا سنانّگا ثانٹے تانگوس۔ کالتیس نیان مانیانّا، نگاتانگون تیبوے کانے کولے کولیا تھاگرینّگا چھاثیدچیس اینوگ۔

² نگے تیبو زیرّاد، چیازیرنا خُدے فرشتاگون گیُودتے شریعت سالّا زادکھان گُون ستانپو چوا زادتے اینوگ۔ یانگ ٹھیمسچاگکھان تانگ شریعت کھا مانیانکھان تشانگمالا اوسپے چھادپا پھوگستے اینوگ۔

³ کالتیس نگاتانگونّی تیتسوگسی ہالاسّی تھارپا سنانگستاگ ماتانگنا، تینے کازوگی نگاتانگون تے چھادپے کانے شورنیانچیسّی سامبا تانّگاد، کاتھارپابو گومارانگ حضرت عیسیٰ مسیح کھونگرانگی شادّا زادس، تینے تشورکھانگونّی تیبو نگاتانگونلا کھیونگستے اینپین۔

⁴ خُدے ستاس، معجزہ لاس، زادپا ریگس مانگپو تانگ، ہلژخمہ رُوح بوے کھیودگون، کھونگرانگی تھوگّونگس نانگجین سالّا زادتے لونبو ٹانگپو اینکھانّی گواہ سالّا زادّانوگ۔

تھارپا چھوگسلا ٹھیدّا زادکھان۔

⁵ خُدے یونگچیسچانّی سوما دُنیا بو فرشتاگونّی وانگی یوگا بورّا مازادّا اینوگ، کا دُنیا بوے سکورلا نگے ڈِیاد۔

⁶ ہلژخمہ شوقبُو بوے کھاگ شیگی نانّگا مولدوگ۔ ”نیرانگی سنانّگا سالّا زادکھانّی میگونلا، رین چی یودتے اینوگ؟ چی اِبنِ آدم تیتسوگسی سنانگستاگ تھوبچیسّی اوسپا اینّوگا؟

⁷ توستساپیگشیگی پھیا نیرانگی کھونگونلا کوسا فرشتاگونّی سانگ چھونگون سالّا زادس۔ تینیانگ نیرانگی میگونلا سپال تانگ سیواچانّی تاج پو سکونّا زادس۔

⁸ نیرانگی چیتشانگمیکا کھونگونلا وانگ سالّا زادس۔“ تا چیتشانگمیکا زیرّاچیگ، چیجیگّانگ کھونگونی وانگنے پھیلوگا لوستے میدپا اینوگ۔ داگسا تشوگپا نگاتانگونّی چیتشانگما کھونگونی وانگی یوگا بورّالا ماتھونّگا اینوگ۔

⁹ اِین نانگ نگاتانگونّی حضرت عیسیٰ سی تھونّگانوگ کابوا ”ژاپیگشیگی پھیا فرشتاگونّی سانگ چھونگون کوسا سالّا زادس۔“ کھونگی نگاتانگونّی پھیا شیچیسّی ردوگنگالبو کھورّا زادس، اونا خُدے شزدے جاستے حضرت عیسیٰ سی تشانگمے تونلا شیچیسپو نیونّگا زادس پاسانگ، کھونّگا سپال تانگ سیواچانّی تاج پو سکونّا زادتے اینوگ۔

¹⁰ خُدے، کھونگرانگی پھیا یانگ کھونگرانگ گیُودتے چیتشانگما چوا زادس۔ کھونگرانگی شان پو می مانگپو نیامپو گوا زادچیسلا تھابسلدینّگا زادس۔ کھونگون تھارپے نانّگا کھیونگا زادچیسّی پھیا حضرت عیسیٰ سی ردوگنگال گیُودتے، کھونگ دزومسپو اُسکیونگ چوا زادچیسپو، خُدے تھاگچاد ٹانگپوبو اینپین۔

¹¹ سونگپاسانگ تا حضرت عیسیٰ تانگ کھونگی ہلژخمہ چوا زادکھان میگونلا یاب چیگ چیگ یودتے اینوگ۔ تینّابویپھیا حضرت عیسیٰ سی تھوگٹھیلّا مازادّا، تیگونلا کھونگرانگی فونو گُون مولّا زادِین اینوگ۔

¹² کھونگی خُدا مولس۔ ”نگے نگارانگی فونو گُونلا نیرانگی تشانبو شادین۔ دزومستے یودکھانّی فونو گونّی ٹوا، نگے نیرانّگا ستودپا پھولین۔“

¹³ کھونگی ایبوانگ مولّا زادس، ”نگے خُدا ایمان چوین۔“ یانگسکیار کھونگی مولس، ”ایکا، نگاتانگ خُدے نگا سالّا زادکھانّی ٹھوگوگون یود۔“

¹⁴ خُدے ٹھوگوگون شا تانگ ٹھاقّا چوکھانّی میریگس این پاسانگ، ثاسّانگ شا تانگ ٹھاق ّی گیورّا زادس۔ می گیورچیس چیگپو گیُودتے کھونگ ڈونگس نیانّانوگ، یانگ ڈونگشیس چیگپو گیُودتے کھونگی ردودگونّی گوبے وانگ میدکھان چوا زاد نیانّانوگ، تے وانگبو نی شیچیسپو اینوگ۔

¹⁵ میتشے گانگپو شیچیسّی جیگسّی تشییوگا زومستے یودکھان تشانگما، کھونگ ٹونگسشیس چیگپو گیُودتے تھار چوگّا زادس۔

¹⁶ بُوژا فرشتاگونلا مانپا حضرت اِبراہیم اولاد گونلا روگس زادچیسلا سکیودّا زادکھانبو، نگاتانگونلا سالپو گیوس اینّوگ۔

¹⁷ تیبویپھیا خُدے جابستوگی نانّگا، سنینگرجیچان تانگ ایمان چانّی اِمامِ اعظم گیورچیسّی پھیا، کھونگ چیساتھوگنے کھونگی فونو گُون ژوگس، گیورّا زادچیسپو کھاگچان اینپین۔ تینے کھونگی میگونّی دِیگپا میدکھان چوا زادچیسلا قُربان پھولنیان۔

¹⁸ کھونّگا تشودلتے نانّگا ردوگنگال چونگ پاسانگ، نگاتانگونلا تشودلتا چونگ زانے کھونگی روگس زادتھوباین۔