ཨིབ༌རི༌པ༌ 13 - New Testament in Ladakhi Langageستینگجوگی سپوسپا۔ 1 چیگ تانگ چیگّا مینگثینگ تسوگسلا چیسپا چوچیسپو مانے ماپھانگشیگ۔ 2 ماشیسکھانگونلا رانگی کھانگپا گاسوس ژوچیسلا سنانگمید ماچوشیگ۔ گاسوس ژوچیسپوے، کھاچیگی ماشیسّا فرشتاگونلا گاسوس جْوس تے اینپین۔ 3 کھیوجارانگون تسونکھانّگا یودکھان تسوگسلا، تینانّگا یودکھان ایمان چانگون ایدتو چوشیگ، ماتشاد کھیوجارانگّونلا جونگکھان تسوگسلا، ردوگنگال چونگکھانّی ایمان چانگونّانگ ایدتو چوشیگ۔ 4 باگستونلا تشانگمے سیوا چوگوس، یانگ ماگپا تانگ ناما نیسکو، چیگ تانگ چیگ نیامپو ایمان چان یونگّوس۔ چیازیرنا خُدے نگانپا لوسڈیل یانگ جیدماد مانکھان نیامپو لوسڈیل بورکھان گُونلا ٹھیمسچاد سالّا زادِین۔ 5 پینیا چیسپا ماچوشیگ۔ رانّگا یودکھانبویکا تشیمستے دوگشیگ۔ چیاجونا خُدے مولّا زادس، ”نگے کھیوجاگون مانے میپھانگ یانگ کھیوجاگون گھوسدومی نانّگا مانے میبور۔“ 6 تیبویپھیا نگاتانگونّی لوکھیل نیامپو زیر تھوبین، مسیح نی نگے روگس زادکھانبو اینپا، نگا جیگسگوس مانے مید، یانگ میگونّی نگا چی چونیانین؟ 7 کھیوجاگونلا، خُدے حُکم لابّا زادکھانّی اُسکیونگون ایدتو چوشیگ۔ کھونگونی میتشے پھودتشولّی ڈاسبو زانگپوگونّی سکورلا سامبا تونگشیگ، یانگ کھونگونی ایمانی سپییکا ڈولشیگ۔ 8 حضرت عیسیٰ مسیحانی سنگونلا، داگسا یانگ توسگیون گیورجا میدپا ژوگس جُوگستے اینوگ۔ 9 مینڈا مینڈا لابجاگونّی ستینگرانگنے ماچھاشیگ۔ کھارجی زاچیسّی شریعت ثونگکھانگونلا چانگ پھانتھوگس تھوبّا مانوگ۔ تیبویپھیا تے شریعت گون مانپا خُدے شزدے گیُودتے، کھیوجے سیمس گُون شیدچان چوشیگ۔ 10 نگاتانگونلا قُربان تانگساجیگ یودتے اینوگ، کابوے کانے کورّی نانّگا چھودپا پھولکھانّی اِمام گُونلا زاچیسّی تھوبتانگ میدپا اینوگ۔ 11 تشیر سنیینگپے نانّگا اِمامِ اعظمی سیمسچانگونّی ٹھاق پو، ہلژخمہ ناسّا بوے نانّگا دِیگپے پھیا قُربانّی تشولّا کھیونّگادپین۔ یانگ سیمسچانی زوگسپوگون بنی اِسرائیل پاگون دُوگسے پھیلوگا میا ثاگّادپین۔ 12 تیبویپھیا حضرت عیسیٰ سی سانگ کھونگرانگی سکو ٹھاق گیُودتے میگون ہلژخمہ چوچیسلا، یروشالیمّی گیالسے گیاسگھوے پھیلوگا ردوگنگال نامس۔ 13 تینّا تسوگسلا نگاتانگونّانگ پھیلوگا حضرت عیسیٰ سی جوگسا چھین، یانگ کھونگی ٹھیلبے نانّگا ڈیساین۔ 14 ای دُنیائیکا نگاتانّگا توسگیون دُوگسے گیالساجیگ میدپا اینوگ۔ اِین نانگ نگاتانگون تے یونگچیسچانّی گیالسابوا ثونگستے اینوگ۔ 15 تیبویپھیا نگاتانگونّی توسگیون حضرت عیسیٰ سی گیُودتے خُدا ستودپے چھودپا پھولین، تشانگمے لدُونلا حضرت عیسیٰ سی گیابنے ڈانگسکھانبو شادین۔ 16 لاس زانگپو چوچیس تانگ گھوسدوم یودکھانگونلا گوستے تانگچیس گُون رجید مارجیدشیگ، چیازیرنا یتسوگسّی چھودپاگونلا خُدے تھوگنییسّا زادّانوگ۔ 17 شریعتی لابکھان گون ی کھانیانتے کھونگونی وانگی یوگا دوگشیگ۔ کھیوجاگونّی ایمانی میتشے ستاستوگ چوچیسپو نی کھونگونی کھاگ این پاسانگ، کھونگونلا خُدا سیروگ تانگ گوسّانوگ۔ کھونگونلا یگون ردوگپو نیامپو چو ماچوگّا، سکیدپو نیامپو چوچوگچیسلا کھونگونی کھانیونشیگ، تیبو کھیوجاگونّی پھانتھوگسّی پھیا اینوگ۔ 18 نگاجا گُونی پھیا دُعا ژوشیگ۔ نگاجا گُونی سیمس نونگسمید اینچیسپو نگاجا تانتان راگ۔ یانگ نگاجے دودپا نی، چیساتھوگنے سیواچانّی میتشے جیگ پھودچیسپو این۔ 19 میگسالّی نگا کھیوجاگون یودسا گیوگسپا لوگستے یونگ نیانچیسلا دُعا ژوشیگ۔ 20 تا جیدے خُدے، لُوگ گُونّی لُوگ زی ٹاگپو، حضرت عیسیٰ مسیح ا شیکھانگونّی ٹونے سونتیا لانّگا زادکھان، کابوے سکو ٹھاق پوے تھامیدپے وعدہ بوا تھیتسے گیابّا زادس۔ 21 خُدے تھوگّونگسگون چوچیسلا، گھوسدوم تشانگما کھیوجاگونلا سالّا زادشیگ۔ حضرت عیسیٰ مسیحاگیُودتے خُدے تھوگستھادکھانگون چوچیسلا، کھونگی نگاتانگی نانّگا چھاگلاس زادشیگ۔ تُوسگیُونّے گیُون مسیحا سپال تھوبشیگ۔ امین۔ 22 نگے دزاوگون جوجو، نگے سپوسپا تانگین، ای ایگے چھونگونبوے نانّگا ڈیکھانگونلا زودپا نیامپو نیانچیسلا جُووا پھولّاد۔ 23 نگاتانگونّی فونو تِیمُتھیُس، تسونکھانگی نانگنے پھودکھانبو، کھیوجاگونلا گیُوس چھاگوس سامّاراگ۔ کالتیس کھو یرو گیوگسپا لیبنا نگا کھو نیامپو کھیوجا تھوگّالا یونگین۔ 24 کھیوجاگونّی لابکھان گون تانگ خُدے میتشانگمالا نگے سلام جُوروگ مول۔ اٹلی پا ایمان چانگونّی کھیوجاگونلا سلام کالدوگ۔ 25 خُدے شزدے بو کھیوجا تشانگما نیامپو لوسشیگ۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation