ཨིབ༌རི༌པ༌ 11 - New Testament in Ladakhi Langage

ٹاگپو ایمان چانگونّی سپے۔

¹ ایمان نی، ریوا چوکھانبو ڈانڈا ڈوبچیسّی لوکھیل یودچیسپو اینوگ۔ یانگ تیبوے نگاتانّگا ماتھونگکھانگون لدینبا اینکھانبو تانتان چوانوگ۔

² تینّا ایمان بو گیُودتے، نگاتانگی اتا اپو گونلا خُدے چھوگسّکیور تھوب۔

³ دزامبولینگ گانگپو خُدے حُکم نانگجینلا چھاگس، داگسا نگاتانگونلا تھونگین یودکھانّی دزامبولینگبو، سنگونلا یودکھان ریگی کانے مازادکھانبو، نگاتانگونّی ایمان چوچیسپو گیُودتے ہاگوانوگ۔

⁴ ایمان یودچیسپوے، حضرت ہابِیل لی خُدا کھورانگی فونو قابِیل لی سانگ چھودپا مانّگا گیالّا پھولس۔ تینّابوے جاستے حضرت ہابِیل لی چھودپاگونلا چھوگسّکیور زادتے خُدے کھوا می ٹانگپو تھیا زادس۔ حضرت ہابِیلی ما توس مانگپوے سنگونلا شیتے میدنانگ، کھوے ایمان بو نگاتانگونّی پھیا تارُوانگ سپیجیگ اینوگ۔

⁵ ایمان یودچیسپوے، حضرت حنوک زیرکھانّی بُوژا بُو شی ماشیا، نامکھا کھیرّا زادس، ”کھو دُنیائی نانّگا ماتھوب چیازیرنا خُدے کھو کھیرّا زادس“، نامکھا کھیرّی سانگ سنگونلا کھوا خُدے تھوگستھادچوگّا زادکھانّی میجیگ تھیادپین۔

⁶ یانگ ایمان میدپا خُدے تھوگستھاد چوگنیانّا مانوگ۔ کھونگ یودسا یونگنیین یودکھانگونّی، خُدے جُوگستے یودکھان تانگ سنینگنے تسالکھانگونلا شزدے سالچیسپوا ایمان چوگوس۔

⁷ ایمان یودچیسپوے، حضرت نُوح کھورانگی نانگتشانگس گُون چھولوگنے سکیوبچیسّی پھیا ٹُھوزینگ چھینموجیگ سیگس۔ کھوے یونگچیسچانّی جیگسپاگونّی سکورلا سپانگپودّا زادکھانّی خُدے کھانیانس۔ ایمانی جاستے حضرت نُوح ٹُھوزینگی نانّگا ماژونکھانّی دُنیائی می گونّیکا خُدے ٹھیمسچاد کھیونگس۔ یانگ ایمان گیُودتے، خُدے حضرت نُوح می ٹانگپوجیگ تھیا زادس۔

⁸ ایمان یودچیسپوے، حضرت اِبراہیم خُدے کھانیانس، نام خُدے کھوا رانگی پھایول پھانگستے، کھونگی کھوا نورسکالّا سالّا زادچیسّی تے ناسّابوا سونگ مولس۔ یانگ کارُو چھاچیسپو گیوسمیدتیانگ کھو سونگ۔

⁹ ایمان یودچیسپوے حضرت اِبراہیم، وعدہ زادکھانّی ناسّابوا لیبّاچیگ، ژانیولّی می تسوگسلا کھو کورّی نانّگا دُوگس۔ تینّا ژوگس حضرت اِضحاقؔ تانگ حضرت یعقُوبؔ یانگ چوس، کاگونلا تینّا وعدہ بو نورسکالّا تھوبتے اینوگ۔

¹⁰ حضرت اِبراہیم لوکھیل نیامپو توسگیون لوسشیسچانّی ماگلدان یودکھانّی گیالسا، خُدے کھونگرانگی تھابس نانگجین سیگّا زادکھانبو تھوبچیسلا ستادپین۔

¹¹ ایمان یودچیسپوے، حضرت اِبراہیم، مارگادپو سونگتے یانگ حضرت سارہ مانے ٹھوگو ماجورّا اینتیانگ، خُدے کھیودی حضرت اِبراہیم ابا گیورچوگّا زادس، چیازیرنا کھوے وعدہ زادکھانّی خُدے ایمان چان جُوگستے اینکھانبو تھیس۔

¹² سونگپاسانگ حضرت اِبراہیم رگادپو شیچیسّی نیموا لیبستیانگ، کھوے اولاد گون نامی سکارما تسوگسلا مانگپو تانگ گیاتشوے تھامے پیما ژوگس سی مینیانچیس پھیل۔

¹³ شیچیسّی جاگ تشاگپانگ، تے می تشانگمے خُدے وعدہ زادکھانبوے نانّگا ایمان چوادپین۔ کھونگونلا تے وعدہ زادکھانبو ماتھوبّا اِین نانگ کھونگونی تیبو تھاگرینگجیگنے تھونگتے گاسوس جْوس ۔ یانگ کھونگرانگّونلا ای دُنیائیکا جانمے یولّی می تانگ ریبوپا گُون زیرّادپین۔

¹⁴ تیزوگ زیرکھانگونّی، کھورانگونّی این زیرنیانچیسچانّی یولجیگ ژالّانوگ۔

¹⁵ کالتیس کھونگونی پھانگستے یونگسکھانّی پھایولبو سامّادپینّا، تینے کھونگونلا لوگستے چھاچیسّی سکابس تھوبتے یودڈو۔

¹⁶ اِین نانگ کھونگونی مانّگا گیالّا یولجیگی پھیا دودپا چوادپین، نامکھے نانّگا یودکھانبوا۔ تینّابویپھیا خُدے، کھونگونی خُدے ژوچیسلا، ٹھیلّا مازاد، ماتشاد کھونگی کھونگونی پھیا گیالساجیگّانگ سیگّا زادس۔

¹⁷ ایمان یودچیسپوے، خُدے حضرت اِبراہیمی تشودلتا زاد زانے، کھوے حضرت اِضحاقؔ گنگ قُربانلا پھولس۔ خُدے وعدہ تھوبکھانّی حضرت اِبراہیم، کھورانگی بُوژا چیگچیگپوانگ قُربانلا پھولچیسلا ڈالڈیگ یودپین۔

¹⁸ جان خُدے کھوا مولّا زادنانگ، ”حضرت اِضحاقؔ گیُودتے کھیرانگی اولاد گون پھیلاین۔“

¹⁹ حضرت اِبراہیم سام، حضرت اِضحاقؔ شینانگ خُدے کھو یانگسکیار سونتیا لانّگا زاد نیا نین۔ یانگ ستاستے کھیرنا تیبو جونگ ، حضرت اِبراہیمی کھورانگی بُوژا شیتے ستینگنے لوگستے تھوبکھان ژوگس اینوگ۔

²⁰ ایمان یودچیسپوے، حضرت اِضحاقؔ گی کھورانگی بُوژا حضرت یعقُوبؔ تانگ عیسو نییسکوا کھونگونی یونگچیسچانّی توسّی پھیا برکت سالس۔

²¹ ایمان یودچیسپوے، حضرت یعقُوبؔ شی زانے، کھوے حضرت یُوسفؔ بی ٹھوگو نییسکوا برکت سالس، یانگ کھو رگادپو چھانانگ کھورانگی ڈولچیسّی بیرگا ستینتے خُدا چولس۔

²² ایمان یودچیسپوے، حضرت یُوسفؔ شِین یودی توسلا، کھوے بنی اِسرائیل پاگون مصری یولنے بینگستے چھاچیسّی سکورلا زیرس۔ یانگ کھونگون چھا زانے کھوے روسپاگون نیامپو کھیرچیسّی لابجا تانگس۔

²³ ایمان یودچیسپوے، حضرت مُوسیٰؔ سی پھاماگونّی کھو سکیستے ستینگنے لزاوا سوم تشوگپا واستے بورس، چیازیرنا کھوے پھاماگونّی کھو جان ٹھوگوگونّی سانگ کھیادپارچانجیگ تھونگ۔ یانگ مصری گیالپوے کھا مینیانچیسلا کھونگون ماجیگس۔

²⁴ ایمان یودچیسپوے، حضرت مُوسیٰؔ لدانتے ستینگنے کھوے کھورانّگا گیالپو فرِعونؔ نی تشاو زیر ماچوگس۔

²⁵ توس نیونگونجیگ، دِیگپے سکیدپوگونّی نانّگا تھادپو چوے سانگ خُدےمی گون نیامپو ناگھسباردو کھورچیسپو حضرت مُوسیٰؔ سی لدامس۔

²⁶ حضرت مُوسیٰؔ سی مصری گیورنورگونّی سانگ مسیح تونلا ردوگنگال نیونگچیسپو مانّگا رینچان اینکھانبو ہاگو، چیازیرنا کھوے تھوبچیسچانّی تے ٹاگپو شزدے پوا ستادپین۔

²⁷ ایمان یودچیسپوے، گیالپوے ثوا ماجیگسّا، کھو مصری یول پھانگستے سونگ۔ کھوے سنینگروس نیامپو تیگون چوستے اینپین، چیازیرنا کھوے کھورانگی میگپو ماتھونگکھان خُدے چھوگسلا بورس۔

²⁸ ایمان یودچیسپوے، گوما سکیکھانّی بُوژا گُون سادّالا یونگکھانّی فرشتے کانے سکیوبچیسّی پھیا، حضرت مُوسیٰؔ سی بنی اِسرائیل پاگونلا پیساگی توس سیچیس تانگ لوگوی ٹھاقّون گھویستاگیکا سکوچیسلا کا تانگس۔

²⁹ ایمان یودچیسپوے، بنی اِسرائیل پاگون تشو مارپوے ژونگنے ساکیاد سکامپو گیُودتے ڈولس۔ اِین نانگ مصر پاگونّی کھونگونی گیابنے یونگچیسّی سونڈوس چواچیگ، کھونگون چھوی نانّگا نوبتے شی۔

³⁰ ایمان یودچیسپوے، بنی اِسرائیل پاگون خُدے کھانیانتے، یریحُو ے ڈونگکھیرلا جاگپو ردون سکورّا تانگسپا، ڈونگکھیرلا سکورتے یودکھانّی سیگپابو جیگ۔

³¹ ایمان یودچیسپوے، زوگستسونگما راحب، کھا مانیانکھان کھوے ڈونگکھیرپاگون نیامپو شی ماشی، چیازیرنا کھوے کھورانگی کھانگپے نانّگا ایبستے یونگکھانّی بنی اِسرائیل پا نییسکوا گاسوس جْوس ۔

³² تارُونگ تسامشیگ مانگپو نگا زیرگوس؟ گیدیون، باراگ، سامسون، ییپھتھا، داؤد، حضرت سمُوئیل تانگ، پیغمبر گونّی سکورلا شادچیسّی توس نگا مید۔

³³ کاگونّی ایمان یودچیسپوے، گیالکھابگون نگایوگا کھیونگس، ٹانگپوے تھاگچادگون تانگس، وعدہ زادکھان گُون تھوب، خُدے سینگیے کھاگّون کاگّا زادس،

³⁴ میے ٹاگپو بارکھانّی نانگنے تھار، رایَ نیامپو شیچیسنے تھار، اُتھوکس یودکھانگون شیدچان گیور یانگ ماگی نانّگا شیدچان گیورتے ڈاو ماگمیگون شورچوگس،

³⁵ بوموگونلا کھونگرانگونّی چیسپا شیکھانگون سونتیا لانگستے تھوب، جانگونلا ناگس ثانٹے تھونگ، تیکانے تھارچیسلا کھونگونی خُدے ماپھانگس۔ کھونگونی شیتے سونتیا لانگستے ستینگنے، میتشے گیالّاجیگ تھوبچیسپوے نانّگا ریوا بورّادپین۔

³⁶ جانگونلا ٹھیلبا چوستے ستالچاگ مانگپو پھوگ، یانگ جانگونلا لچاگتھاگ تاگستے تسونکھانگی نانّگا کاگس۔

³⁷ کھاچیگّا ردوا گیابستے سادس، کھاچیگی زوگسپو کھاگنییسّی نانّگا شاگس، جانگون رایَ نیامپو سادس، کھاچیگّا گونگیو چانگ میدپا، لُوگ تانگ رامے پاگسپاگون گونتے ڈولس۔ کھونگونلا یودکھانّی رانگوانگبو کوگستے میوسپْا چوادپین۔

³⁸ دُنیائی می گونلا تے ایمان چانگون نیامپو میتشے پھودچیسّی اوسپا میدپا اینوگ۔ تے ایمان چانگونّی نانگنے کھاچیگ تھانگستونگ تانگ ری گُونلا کھورین دُوگس، کھاچیگ ڈاگپھوگس تانگ سادونگ گُونی نانّگا ایباینجیگ دُوگس۔

³⁹ جان کھونگ تشانگمالا ایمان یودچیسپوے خُدے ستودپا تھوبنانگ، تیگونّی ٹونے چیگّانگ وعدہ زادکھان تشانگما ماتھوب۔

⁴⁰ خُدے تھوگسّامّی نانّگا، نگاتانگ تشانگمے پھیا مانّگا گیالّا سامباجیگ یود پاسانگ، تے ایمان چانگونلانگ نگاتانگ نیامپو مانے دزومسپو چوا میزاد۔