ཨིབ༌རི༌པ༌ 10 - New Testament in Ladakhi Langageمسیح تشانگمے تونلا لانچیگ کھونگرانگ قُربانلا پھولّا زادس۔ 1 حضرت مُوسیٰؔ سی شریعت نی یونگچیسچانّی زانگپوے ٹیبکیاگپو اینوگ نگوسپوبو مانوگ۔ تینّابویپھیا شریعت دیکا، لوژونگ ژوگس قُربان گُون پھولچیس گیُودتے چولّا یونگکھانگون، چیساتھوگنے ژانگما چو مانے مانیانّا اینوگ۔ 2 کالتیس ژانگما چونیانپینّا، تینے قُربان پھولچیسپو تشارتے میدڈو۔ چیازیرنا قُربان لانچیگ پھولچیسپوے چولکھان گُون توسگیونّی پھیا ژانگما سونگتے یودڈو۔ یانگ کھونگونی نانّگا کھونگرانگونّی دِیگپے نونگسپو لوستے میدڈو۔ 3 اِین نانگ تے قُربانگونّی کھونگونلا لوژونگ کھورانگونّی دِیگپے ایدتو سکولّانوگ۔ 4 چیازیرنا لانگتو تانگ راما گُونی ٹھاق ّی، دِیگپا میدکھان مانے چونیانّا مانوگ۔ 5 تینّابویپھیا نام مسیحا دُنیائی نانّگا سکیودس، کھونگی خُدا مولس، ”نیرانّگا سیمسچانی قُربان یا دِیگپے چھودپا گُونی تھوگسدود میدتے اینوگ۔ اِین نانگ نیرانگی نگا، چھودپا پھولچیسلا زوگسپوجیگ سالس۔ 6 نیرانگ میے نانّگا ثاگکھانّی چھودپا یا، جان دِیگپے چھودپا گُونلا تھوگنییسّا مازادس۔“ 7 تینے نگے زیرپین ”زیگسّانگ، کیے خُدے، نگا نیرانگی تھوگّونگس چوالا یونگسپین، کازوگ نگے سکورلا ہلژخمہ شوقبُو نانّگا ڈِیستے دوگ۔“ 8 ٹانگپو مسیح مولس، ”نیرانّگا سیمسچانی قُربان یا، دِیگپے چھودپاگون یا، میے نانّگا ثاگکھانّی چھودپا یا، جان دِیگپے چھودپا گُونی تھوگسدود مید یا، تیگونلا تھوگنییسّا مازادس“ (جان تیگون حضرت مُوسیٰؔ سی شریعت نانگجین پھولگوسنانگ)۔ 9 تینے کھونگی مولس، ”زیگسّانگ، نگا نیرانگی تھوگّونگس چوالا یونگسپین۔“ کھونگی وعدہ نیسپابو لاگلینّی نانّگا کھیونگا زادچیسّی پھیا وعدہ دانگپوبو میدکھان زادس۔ 10 چیازیرنا خُدے تھوگّونگسپو نی، لانچیگ توسگیونّی پھیا حضرت عیسیٰ مسیح سکوزوگسپو قُربانلا پھولتے، نگاتانگون ژانگما چوا زادچیسپو اینوگ۔ 11 وعدہ سنیینگپے نانّگا، اِمام گُونی جاگدانگ قُربان تانگسا لدُونلا چھودپاگون پھولین جابستوگ جوانوگ، کابوے دِیگپا میدکھان مانے چونیانّا مانوگ۔ 12 اِین نانگ نگاتانگونّی اِمام چھینموے، کھونگرانگ لانچیگ چھودپا پھولتے توسگیونّی پھیا دِیگپاگون میدکھان چوا زادس۔ تینے کھونگ خُدے یاسپا چھوگسلا سیواچانّی ناسّیکا جوگسا زادس۔ 13 کھونگ تیرو تےتےتشوگپا جوگساین نامتشوگپا کھونگی ڈاو گون کھونگرانگی جابسّی یوگا بورّا میزاد۔ 14 کھونگرانگی سروک، چھودپا پھولچیسپوے، کھونگی ہلژخمہ چوا زادچیسچانگونلا توسگیونّی پھیا دزومسپو چوا زادس۔ 15 یانگ ہلژخمہ رُوحیانگ تیبوے سکورلا گواہ سالس، ٹانگپو نی، 16 ”تے جاگّا نگے نگارانگی میگون نیامپو وعدہ سوماجیگ چوین۔ نگا مسیح زیرّاد، نگے نگارانگی شریعت گون کھونگونی سیمسّی نانّگا بورین، یانگ تیگون کھونگونی سامبے نانّگا ڈیاین۔“ 17 تینے کھونگی مولس، نگے کھونگونی دِیگپاگون رجیدین، یانگ کھونگونی شریعت چاگکھانّی لاسگون ایدتوا میبور۔ 18 دِیگپاگونلا خُدانے مُعافی تھوبستے ستینگنے، یانگسکیار قُربان پھولگوشیسّی گھوسدوم میدپا اینوگ۔ سنینگروس چوشیگ۔ 19 تینّابویپھیا نگے لے فونو گون، حضرت عیسیٰ سی سکو ٹھاق گیُودتے، نگاتانگون نامکھے تشانگمیسانگ ہلژخمہ ناسّا بوے نانّگا ہامپا نیامپو ژوگسنیانّانوگ۔ 20 کھونگ ڈونگشیسپوے حضرت عیسیٰ سی میتشے سالکھانّی سوما لامشیگ پھیا زادسپا، نگاتانگون تے یولّا گالتے تشانگمیسانگ ناسّا ہلژخمہ بوے نانّگا چھانیانّانوگ۔ 21 خُدے بیت المقدِس لا نگاتانگونّیکا وانگثولّا زادکھانّی اِمام چھینمو ٹاگپوجیگ جُوگستے یودپا، 22 نگاتانگون ٹانگپو سنینگ تانگ ایمان گانگپو نیامپو خُدے سکوندونلا چھین۔ چیازیرنا نگاتانگونّی سیمسّی نانّگا یودکھانّی نونگسگون مسیح سکو ٹھاق نیامپو ژانگما یانگ نگاتانگی زوگسپوگون چھو ژانگما نیامپو ٹھوا زادتے اینوگ۔ 23 تینے گواہ تانگکھانّی نگاتانگی ریوابویکا تھےژومس میدپا ستانپو تھامستے دوگین۔ چیاجونا خُدے نی، وعدہ زادکھانبو ڈوبچوگّا زادچیسّی نانّگا ایمان چان جُوگستے اینوگ۔ 24 تینے یونگشیگ، یاشا تانگ لاس زانگپو چوچیسّی نانّگا چیگ تانگ چیگّا سپوسپا کازوگی تانگچیسلا نگاتانگونّی سامبا تانگین۔ 25 یانگ کازوگ کھاچیگّا دزومچیسّی لوبس میدکھان تسوگسلا نگاتانگون، نیامپو دزومچیسپو پھانگ ماپھانّگا، چیگ تانگ چیگّا سپوسپا تونگشیگ۔ میگسالّی نام کھونگ لوگستے سکیودچیسّی جاگپو نیموا لیباین یود۔ 26 چیسپے دزاوگون، کالتیس نگاتانگونلا لدینبے یونتان تھوبستے ستینگنے، مینگنانگ دِیگپاگون چوین دوگنا، تینے تیگونلا مُعافی تھوبچیسلا پھولچیسّی قُربانشیگ میدپا اینوگ۔ 27 تیتسوگسی میگونلا خُدے جیگسنانگچانّی ٹھیمسچاد تانگ ٹاگپو بارین یودکھانّی میے، کابوے کھونگی ڈاو گون میدکھان چوین، تینّا ریوابو چیگپو لوستے اینوگ۔ 28 حضرت مُوسیٰؔ سی شریعت کھا مانیانکھانّی میگون، گواہ نیس یا سومی ستینگنے، سنینگرجے مانے میدپا سادّادپین۔ 29 تینے سامبا سالّانگ؛ خُدےبوژا کانگپے یوگا نانتے ڈولکھان یانگ وعدہ زادکھانّی حضرت عیسیٰ سی سکو ٹھاقپوا، ہلژخمہ ماسیا، یانگ ہلژخمہ رُوح لا مابیبس چوکھانگونلا مانّگا جیگسنانگچانّی چھادپا پھوگّوشیسّی اوسپا مانوگا؟ 30 ای مولکھانبو نگاتانگونّی شیسّانوگ، ”نگے ڈا چوکھانگونلا لانتانگاین۔ نگے کھونگونلا اوسپے چھادپا تانگین۔“ کھونگی ایبوانگ مولس، ”مسیح خُدے کھونگرانگی میگونلا ٹھیمسچاد زادِین۔“ 31 سونپو خُدے ٹھیمسچادّی یوگا لیبچیسپو نی جیگسّنانگچانجیگ اینوگ۔ 32 خُدے اوت پو کھیوجیکا بابستے کھیوجاگونّی مسیحا ایمان چوکھانّی تے سنگونمے جاگّون ایدتو چوشیگ۔ ما کاگسپو تھونگستیانگ کھیوجاگون ایمانی نانّگا ستانپو دُوگستے اینپین۔ 33 لان مانگپو، کھیوجا، میگونّی ٹوا ناگھسباردو ستانتے مابیبس چوس، یانگ لان مانگپو کھیوجاگونّی تیتسوگس ناگھسباردو تھونگکھانگونلا روگس چوادپین۔ 34 تسونکھانگی نانّگا کاگسکھانگون نیامپو کھیوجاگونّی سنینگرجے ستانس، یانگ کھیوجے نور کوگستے کھیرکھانگونلا تھادپو نیامپو کھیرچوگس، چیازیرنا تیسانگ ٹاگا توسگیون لوسشیسچانّی گیونورگون کھیوجے پھیا نامکھے نانّگا یودکھانبو کھیوجاگونلا گیوس اینّوگ۔ 35 تینّابویپھیا حضرت عیسیٰ مسیح نانّگا یودکھانّی ایمان پو پھانگ ماپھانگشیگ۔ یبوے کھیوجاگونلا شزدے ٹاگپو کھیونگچیسپو ایدتو چوشیگ۔ 36 کھیوجاگونّی ایمانی نانّگا سنینگروس بورگوشیس اینوگ، چیازیرنا کھیوجے خُدے تھوگّونگس نانگجین چو تشارّاچیگ، کھیوجاگونلا کھونگی وعدہ زادکھانبو تھوبین۔ 37 ہلژخمہ شوقبُو بوے نانّگا مولتے اینوگ، ”ما توس نیونگونجیگی نانّگا، پھیبسشیسچانبو پھیبساین، یانگ گورچوگا میزاد۔“ 38 اِین نانگ نگے می ٹانگپوگونّی، ایمانی نانّگا میتشے پھودین۔ یانگ گیابگیورکھانگون نیامپو نگا مانے میتھاد۔ 39 نگاتانگون خُدا گیابگیورتے ٹھیسّتور چھوگسلا چھاکھانگون ژوگس مانوگ۔ نگاتانگون، سیمسنید سکیوبّا زادچیسچانّی ایمان چانگون اینوگ۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation