گالاتییاپا 6 - New Testament in Ladakhi Langage

چیگ تانگ چیگی ناگسگون گوستے کھورچیس۔

¹ لے فونو گون، کالتیس ایمان چانجیگ دِیگپے نانّگا گییلنا، کھیوجا ہلژخمہ رُوح بوے نانّگا لدانکھانگونّی، تے میبوا بولمو نیامپو ٹانگپوے لامیکا لوگستے کھیونگّوسچیس اینوگ۔ اِین نانگ تینّا ژوگس دِیگپے نانّگا کھیوجاگونّانگ میگیلچیسلا شانگ چوشیگ۔

² چیگ تانگ چیگی کھوروگون گوستے کھورشیگ۔ تیتسوگس چوچیسنے کھیوجاگونّی مسیح شریعت پو، ڈوبچوگستے اینوگ۔

³ کالتیس کھیوجارانگ ما ٹاگپو تشورتے جانماگونلا روگس چوا میدنا، کھیوجارانگی رانّگا گوبسکورتے اینوگ۔ کھیوجاگون تیزام کھاگچانجیگ مانوگ۔

⁴ کھیوجارانگی لاسلا گیالّا چوستے ستاگچاد چوشیگ۔ تینے کھیوجاگونلا جانما نیامپو لدورکھانّی سکیدپو مانپا، کھیوجارانگی لاس گیالّا چوکھانّی سکییدپوبو یونگین۔

⁵ یانگ ایدتو چوشیگ، می ریریا رانگرانگی کھوروگون کھورگوسّانوگ۔

⁶ کھیوجاگونلا خُدے کا لابّا زادکھان گُون نیامپو، کھیوجا یودکھان پھانتھوگسچان تشانگما گوسشیگ۔

⁷ کھیوجاگونّی رانگدانگرانّگا گوبسکورتے خُدے ٹھیمسچادّا زادچیسپوا سنانگمید ماچوشیگ۔ کھیوجارانگی تابسکھانّی ستونتھوگی ڈاسبو کھیوجاگونّی رنگین۔

⁸ دِیگپے دودپاگون ڈانڈا ڈوبچیسلا میتشے پھودکھانگونّی، تے دِیگپے دودپاگونّی کانے، رولچیس تانگ شیچیس گُون رنگین۔ اِین نانگ خُدے رُوح تھوگستھاد چوگکھانّی میتشے پھودکھانگونّی، رُوح نے تھامیدپے میتشے جیگ رنگین۔

⁹ سونگپاسانگ نگاتانگ زانگپو چوچیسلا سنانّگا تشیر گوشیس مانوگ، چیازیرنا کالتیس زانگپو چوچیسپو پھانگ ماپھانگنا، خُدے لدامّا زادکھانّی توسپویکا نگاتانگونّی برکت چانّی ستونتھوگپو رنگین۔

¹⁰ تیبویپھیا نام سکابس تھوبنانگ، نگاتانگونّی تشانگمالا زانگپو چوگوشیس اینوگ، میگسالّی ایمان چان فونو گُونلا۔

حضرت پولُسی ستینگجوگی کھادا۔

¹¹ تا نگے نگارانگی لاگپا نیامپو ڈیاچیگ، ستوسّانگ، نگے ڈیکھانگون تسامشیگی چھینمو ریگ مادوگ۔

¹² لقپہ ہلژخمہ چوگوسّانوگ زیرتے کھیوجاگونلا وانگ تانگکھانگونّی، تیبو کھورانگّون زانگپو تھونگچیس ماتشاد، مسیحا کیانگشینگیکا ٹونگسشیس گیُودتے تھارپا تھوبچیس چیگپو لابستے، کھورانگّونلا ناگھسباردو میتھونگچیسّی پھیانگ چوانوگ۔

¹³ لقپہ ہلژخمہ چوستے یودکھانگونّیانگ شریعت تشانگما کھانیانّا مانوگ۔ اِین نانگ کھیوجے لقپہ ہلژخمہ چوکھانبویکا کھونگونلا پھوسو چونیانچیسّی دودپے جاستے کھونگونی کھیوجا تیبو چوچُوگّانوگ۔

¹⁴ نگے ایما نی نگاتانگونّی حضرت عیسیٰ مسیح کیانگشینگ چیگپویکا ماستوگس یانگ چی جیگیکانگ پھوسو مانے میچو۔ مسیح تینّا کیانگشینگی جاستے نگے دُنیائی دودپا تشانگما کیانگستے مید۔ یانگ نگے پھیا رینچان اینکھانگون ای دُنیائی می گونّی رینچان سامّا میدوگ۔

¹⁵ لقپہ ہلژخمہ چوستے یودڈو یا میدڈو تیبوے چانگ پھانتھوگس میدپا اینوگ۔ کھاگچانبو نی، گیورجا کھیونگستے میتشے سوماجیگ پھودچیسپو اینوگ۔

¹⁶ میتشیے سومے لامیکا ڈولکھانگونلا، خُدے جیدے تانگ سنینگرجے گُون بنی اِسرائیل پا تھوبین۔ تیگون خُدے لدینبے میگون اینوگ۔

¹⁷ دورلدوسنا تانیپھارلا تیگونّی سکورلا، سوجیگیانگ نگا ناگس ماستانشیگ، چیازیرنا نگے زُوگسپویکا حضرت عیسیٰ سی گیابنے ڈولکھانّی ردوگنگالّی ستاگس گُون پھوگتے یود۔

¹⁸ لے فونو گون، نگاتانگونّی حضرت عیسیٰ مسیح شزدے بو، کھیوجاگونّی رُوح نیامپو جُوگسشیگ، امین۔