گالاتییاپا 5 - New Testament in Ladakhi Langage

مسیح نانّگا رانگوانگ

¹ رانگوانگی نانّگا دوگچیسّی پھیا مسیح نگاتانگون تھار چوگّا زادس۔ تا ستانپو دوگشیگ۔ یانگسکیار لچینتے شریعتی نیاشینگ بو کھورتے تیبوے ت شینا گ گیُور ماچوگشیگ۔

² نیونشیگ، نگا حضرت پولُسی کھیوجاگونلا ایبو شادّاد، کالتیس کھیوجاگونّی کھیوجارانّگا لقپہ ہلژخمہ چوچوگّادنا، تینے مسیح کانے یونگکھانّی پھانتھوگسپو کھیوجاگونلا میتھوب۔

³ نگے یانگسکیار سپانگپُودّاد، کالتیس کھیوجاگونّی لقپہ ہلژخمہ چوچوگستے خُدے چھوگسّکیور ژالچیس چوادنا، تینے کھیوجاگونّی حضرت مُوسیٰؔ سی شریعت تشانگما ثونگّوس۔

⁴ شریعت پو ثونگستے خُدے سکوندونلا ٹانگپو گیورنیانّانوگ سامکھان کھیوجاگونّی، ڈیلبو مسیحا نیامپو چھادتے اینوگ۔ کھیوجاگون خُدے تُھوگرجینے تھاگرینّگا سونگتے اینوگ۔

⁵ اِین نانگ تا نگاتانگ رُوح بوے نانگجین میتشے پھودکھانگونّی، خُدے وعدہ زادکھانّی ٹانگپوبو، ایمان گیُودتے تھوبچیسلا رینگساینجیگ اینوگ۔

⁶ نگاتانگونّی ڈیل حضرت عیسیٰ مسیح نیامپو یود پاسانگ، لقپہ ہلژخمہ چوکھان یا ماچوکھانّی نانّگا چانگ کھیاد میدپا اینوگ۔ کھاگچان نی، ایمان بو چیسپے نانّگا ستانچیسپو اینوگ۔

⁷ کھیوجاگونّی میتشیے بانگیوگسپو ما گیالّا چوستے تانّگادپین۔ تا سوی کھیوجاگونلا لدینبے گیابنے ڈولچیسّی نانّگا گھاگژا تانگس۔

⁸ تے کھالچے تانگچیسپو نی تانتانلا کھیوجاگون رانگوانگی نانّگا دوگچیسلا بودّا زادکھان خُدے چھوگسنے مانوگ۔

⁹ ای زوسمے لابجابو نی، پاگپے گانگپوے نانّگا سکیور یونگچوگکھانّی تے سکیور چھونگون ژوگس اینوگ۔

¹⁰ نگے مسیح نانّگا ایمان چواد، کھونگی کھیوجاگونلا، نگاجے لابکھان مانپا، جان سوسو لابجا ایمان چوچیسنے تھاگرینّگا بورّا زادِین۔ کھیوجا گوبسکورکھانبو سوجیگ اِین نانگ ، خُدے ٹھیمسچاد سالّا زادِین۔

¹¹ لے فونو گون، کالتیس نگے لقپہ ہلژخمہ چوگوس زیرتے تارُوانگ لابّادنا، (کازوگ کھاچیگی نگے چوروگ زیرّانوگ)، تینے چیپھیا تارُوانگ نگا ناگھسباردو تھونگین اینوگ؟ کالتیس نگے مسیح کیانگشینگ گیُودتے تھارپابو مالابسپینّا، تینے سوجیگّانگ نگیکا ثو یونگستے میدڈو۔

¹² کھیوجا ناگس ستانکھانگونّی، کھورانگّونلا لقپہ ہلژخمہ چو زانے کھورانگ بُوژا اینکھانّی ستاگس پو گانگپو چادشیگ؛

¹³ نگے لے فونو گون، کھیوجاگون رانگوانگچانّی میتشیے پھودّالا بودّا زادتے اینوگ۔ اِین نانگ تے رانگوانگبو کھیوجاگونّی دِیگپے دودپاگون ڈانڈا ڈوبچیسّی سکابسشیگی تشولّا ماکولشیگ۔ تے سانگتا، تے رانگوانگبو کھیوجاگونّی چیگ تانگ چیگّا چیسپے نانّگا جابستوگ چوچیسّی پھیا کولشیگ۔

¹⁴ نگے تیبو زیرّاد، چیازیرنا شریعت گانگپو ایکا چیگپوے نانّگا لدوستے اینوگ، ”رانگی کھییمتشیسپاگونلا رانگ تسوگسلا چیسپا چوشیگ۔“

¹⁵ اِین نانگ کالتیس کھیوجاگونّی شانگکو تسوگسلا چیگ تانگ چیگّا ماسکیون چوچیس تانگ نودپا سکیالنا، شانگ چوشیگ، تے مانے کھیوجاگونّی چیگ تانگ چیگ ٹھیسّتور چوین۔

رُوح بوے وانگی نانّگا میتشے پھودچیس۔

¹⁶ نگے زیرچیسپو نی، ہلژخمہ رُوح بوے ستانکھانّی میتشیے لامبویکا ڈولشیگ۔ تینے کھیوجاگونّی دِیگپے دودپے چوچوگکھانّی لاسگون ڈانڈا ڈوب میچوگ۔

¹⁷ دِیگپے دودپے نگانپا چوین سامّانوگ، کا بو ہلژخمہ رُوح بوے دودپے گولوگپو اینوگ۔ یانگ ہلژخمہ رُوح بوے نگاتانگونلا دِیگپے دودپا اینکھانّی گولوگ دودپابو سالّا زادّانوگ۔ ای نیسکوے، چیگ تانگ چیگّا گیابگال چوچیسپوے کھیوجاگونلا رانگ تھادکھانبو چونیانّا مانوگ۔

¹⁸ اِین نانگ کھیوجاگون رُوح بوے ٹھید زانے، کھیوجاگون حضرت مُوسیٰؔ سی شریعتی یوگا دُوگوس میدپا اینوگ۔

¹⁹ دِیگپے دودپے لاسگون ما سالپو تھونّگانوگ۔ تیگون لوسڈیل نگانپا چوچیس، سچودپا نگانپے لاسگون چوچیس، تھامیدپے لوسڈیلّی دودپا،

²⁰ سکونڈا چولچیس، چھوسنگان یانگنا جادُو چوچیس، ناپھراد چوچیس، دزینگمو تانگچیس، تشیگچیس، مانگستیانگ ثو یونگچیس، ستودپا یا سیوے دودپا بورچیس، کھونبورچیس، پوبودچیس،

²¹ جانما یودکھانگونّی دودپا چوچیس، مونلا چھانگ تھونگچیس، ڈونتانگاین راروسشیسّی زاسگون لینتے ٹانبا ستورچیس تانگ، جانیانگ یتسوگسّی دِیگپاگون۔ نگے کھیوجاگونلا یانگسکیار سپانگپودّاد، تیتسوگسی میتشے پھودکھانگونلا خُدے گیالثیدپو نورسکالّا مانے میتھوب۔

²² اِین نانگ ہلژخمہ رُوح نے سمینکھانّی ڈاسبو نی، چیسپا، سکیدپو، جیدے، زودپا، کاٹین، زانگپو، ایمان چان،

²³ بولمو تانگ رانگسیمس چونچیس گُون اینوگ۔ تیتسوگسی سچودپاگونّی گیابگالّا شریعت چانگ میدپا اینوگ۔

²⁴ حضرت عیسیٰ مسیح اینکھانگونّی، دِیگپے دودپا تانگ دودچھاگس نگانپاگون کیانگشینگیکا کیانگستے میدکھان چوستے اینوگ۔

²⁵ ہلژخمہ رُوح بوے نگاتانگونلا میتشے پھودچوگّا زاد پاسانگ، رُوح بوے گیابنے ڈولین جیگ، میتشے کھاگ تشانگما کھونّگا ٹھیدچوگشیگ۔

²⁶ نگاتانگون پھوسو تشور ماگوس، یانگ چیگ تانگ چیگی نانّگا ثو یا تشیگچیس گُون یونگچوگ ماگوس۔