گالاتییاپا 4 - New Testament in Ladakhi Langage

¹ نگے زیرچیسپو نی، نورسکال لینکھانبو ٹھوگو این زانے کھو نور گانگپوے داگپو اینتیانگ، کھو تشیوگ شیگی سانگ سوسو مانوگ۔

² یانگنا تے ٹھوگوبوا تےتےتشوگپا، کھورانگ تانگ کھوے نورلا ستاستوگ چوکھانگونّی کھا نیانگوسّانوگ نامتشوگپا، کھوے ابے لدامکھانّی توسپو لیب مِیلیب۔

³ مسیحا سکیودّی سانگ سنگونلا تینّا تسوگسپو نگاتانگون نیامپو یودپین۔ نگاتانگون تے ٹھوگو تسوگسلا، ای دُنیائی شریعتی لام لُوگثول گونّی ت شینا گ اینپین۔

⁴ اِین نانگ لدامّا زادکھانّی توسپو لیبّاچیگ، خُدے کھونگرانگی ثاسپو لامچوگا زادس۔ کھونگ بوموجیگنے لتامستے یہُودی پے شریعتی یوگا میتشے پھودّا زادس۔

⁵ شریعتی یوگپو اینکھانگونّی رانگوانگبو لوگستے نیوچیسلا، خُدے کھونگ لامچوگا زادس، چیازیرنا کھونگ نگاتانگون کھونگی سوسبوا لینکھانّی ٹھوگوگون گیورچیسلا تھادّا زادّانوگ۔

⁶ نگاتانگ خُدے ٹھوگوگون این پاسانگ، کھونگی کھونگرانگی بُوژے رُوح بو نگاتانگونّی سنینگی نانّگا لامچوگا زادس، یانگ تینّا رُوح بوے ”ابا، یابلے“ مولیین بودّا زادس۔

⁷ تیبویپھیا کھیوجاگون تشییوگا مالوسّا، خُدے کھونگرانگی ٹھوگوگون اینوگ۔ کھیوجاگون کھونگی ٹھوگو این پاسانگ، کھیوجا کھونگی نورسکال لینکھانگونّانگ اینوگ۔

گلَتیہ پاگونّی پھیا حضرت پولُسی تھوگستشیر۔

⁸ خُدے شیسّی سانگ سنگونلا، کھیوجا یہُودی مانکھان گُون نگوسما خُدے مانے مانکھان ریگی تشیوگ اینپین۔

⁹ اِین نانگ تا کھیوجاگونّی خُدے شیستے اینوگ، یا نگے زیرگوس خُدے کھیوجاگون کھیینّا زادّانوگ۔ تینے چیپھیا کھیوجاگون یانگسکیار شریعتی اُتھوکس تانگ پھانمیتھوگسّی لام لوگثولگونّی تشیوگ گیورّالا، لوگستے چھانیینراگ۔

¹⁰ سپیرنا، کھیوجاگونّی میگسالّی جاگ، لزاوا، ناملزا تانگ لو گُون تسیروگ۔

¹¹ نگا کھیوجاگونّی پھیا جیگسّاراگ، نگے کھیوجے پھیا سونڈوس چوستے لاس چوکھانگون گودلا سونگتے اینتیگ دوگ۔

¹² لے فونو گون، نگا رانگوانگی نانّگا دوگّا تسوگسلا، کھیوجاگونّانگ دوگچیسلا جُووا پھولّاد۔ چیازیرنا سنگونلا کھیوجا یہُودی مانکھان شریعتی کانے رانگوانگ یودکھانگون ژوگس، نگا گیورتے این۔ کھیوجاگونّی نگا نگانپا مانے ماچوس۔

¹³ کھیوجاگونلا گیوس اینّوگ، نگا زُومو یونگچیسپوے، کھیوجاگون یودسا گومارانگ یونگّوس پاسانگ، نگے گاموےناتسُول کھیوجا شادپین۔

¹⁴ زوگسپوے تھوگنے نگا ما سکیومو یود پاسانگ، کھیوجاگونّی نگا کھاملوگستے سیسمید چونیانچیس یودپین۔ اِین نانگ کھیوجے نگا رینمید ماچوس، یا لوگستے ماکالس۔ خُدے چھوگسنے فرشتا، یا حضرت عیسیٰ مسیح کھونگرانگ تسوگسلا، گاسوس جْوس تے نگا ستاستوگ چوس۔

¹⁵ کھیوجے نانّگا یودکھانّی تے تھادپو تشانگمالا چی سونگ؟ کالتیس نیانپینّا، کھیوجاگونّی رانگی میگون پھینگستے نگا تانگچیسلا تھادپو دوگپین، نگے تیبوا گواہ تانگ نیانچیسراگ۔

¹⁶ اِین نانگ تا نگے کھیوجاگونلا ٹانگپو شادچیسپوے نگا کھیوجاگونّی ڈاو گیورتے اینّا؟

¹⁷ تے زُ وسمے لوبپونگونّی، کھیوجے چھوگسّکیورگون تھوبچیسّی پھیا ماثانٹے دودپا چوانوگ، اِین نانگ لتاوا نگانپا نیامپو۔ کھیوجاگونّی کھونگ چیگپوا چھوگسّکیور چوچیسّی پھیا، کھونگونی کھیوجاگون تانگ نگیکا بار پھیستے، ڈیلبو شیگچیسلا دودپا چوانوگ۔

¹⁸ کالتیس سامبا زانگپو نیامپو اینّا، دودپا ماثانٹے چونانگ ڈیگتے اینوگ۔ اِین نانگ تیبو نگا کھیوجاگون نیامپو یود زانے چیگپو مانپا، توسگیون چوگوشیس اینوگ۔

¹⁹ نگے چیسپے ٹھوگوگون، کازوگی اماجیگّا ٹھوگو جور زانے زُومو یونّگاد، تینّا تسوگسّی زُومو کھیوجاگونّی پھیا یانگسکیار نگے سنینگی نانّگا راگ، نامتشوگپا کھیوجے نانّگا مسیح سچودلامگون گانگپو لدان میلدان۔

²⁰ نگا داگسا کھیوجاگون نیامپو یودچیسّی ماثانٹے دودپا چواد، تینے نگے کھیوجاگون نیامپو نگارانگی سپیرا تانگتشولبوے نانّگا گیورجا کھیونگنیانتے یودڈو۔ اِین نانگ تھاگرینّگا یودچیسپوے نگا ہاگوا میراگ، نگے کھیوجا کازوگی روگس چوین۔

حضرت اِبراہیمی ٹُھوگو نیس۔

²¹ شریعتی یوگا دوگنیین یودکھان کھیوجاگونّی نگا شودّانگ۔ چی شریعتی نانّگا زیرتے یودکھانبو، کھیوجاگونلا تانتان گیوس یودا؟

²² ہلژخمہ شوقبُو بوے نانّگا مولتے اینوگ، ”حضرت اِبراہیمی بُوژا نیس یودپین، چیگپو نی تشییوگ، یانگ چیگپو نی رانگوانگچانّی نامے اینپین۔“

²³ ت شینا گنے سکیسکھانّی بُوژا بُو، میی سونڈوسنے خُدے وعدہ ڈوبچوگچیسپو اینپین، اِین نانگ رانگوانگچانّی نامانے سکیسکھانّی بُوژا بُو، خُدے وعدہ زادکھانّی ڈاسبو اینپین۔

²⁴ خُدے زادکھانّی وعدہ نیسکو ای بومو نیسکو نیامپو لدورنیانچیس اینوگ۔ بومو ٹانگپو، حضرت ہاجرہ نی سینی ری تانگ سپیستے اینوگ، کارُو میگونلا کھونگون ت شینا گ گیورچوگکھانّی شریعت پو تھوبتے اینپین۔

²⁵ تا حضرت ہاجرہ عرب نانّگا یودکھانّی سینی ری ژوگس اینوگ، کا بو ایتوسّی یروشالیمّی گیالسا ژوگس این، یانگ تے گیالسے میگون شریعتی تشییوگا دوگچیسلا تھادّانوگ۔

²⁶ اِین نانگ نامکھے یروشالیم نی رانگوانگچانّی بومو حضرت سارہ ژوگس اینوگ، کھوے ٹھوگوگون تشیوگ مانوگ، یانگ کھو نگاتانگونّی اما این۔

²⁷ ہلژخمہ شوقبُو بوے نانّگا ڈِیازادتے اینوگ، ”او ٹھوگو میدکھانّی بومو، ٹھوگو مانے ماسکیسکھان سکیدپو چوس۔ ٹھوگو سکیچیسّی زُومو ماپھوگکھان، تھادپوے نانّگا کُوچو تونگ۔ چیازیرنا تا داگسا نانگتشانگس میدکھانّی بوموا ماگپا یودکھانّی بوموے سانگ مانّگا ٹھوگو مانگپو یودتے اینوگ۔“

²⁸ لے فونو گون، تا کھیوجا حضرت اِضحاقؔ تسوگسلا خُدے وعدہ زادکھانّی ٹھوگوگون اینوگ۔

²⁹ اِین نانگ می سونڈوسنے سکیکھانّی ٹھوگوی، رُوح بوے تھوگنے سکیکھانّی ٹھوگوبوا ناگس ستانکیاگ۔ تینّا ژوگس نی داگسانگ جُونگستے اینوگ۔

³⁰ اِین نانگ شوقبُو بوے تیبوے سکورلا چی مولتے دوگ، ” تشیوگ تانگ کھوے بُوژا نیسکو پھونگ، چیازیرنا رانگوانگچانّی بوموے بوتشے اینکھانّی نورسکالبوے نانّگا تشییوگی بوموے بُوژا، سکیالّا مانے میتھوب۔“

³¹ سونگپاسانگ لے فونو گون، نگاتانگون تشییوگی بوموے ٹھوگو مانپا، رانگوانگچانّی بوموے ٹھوگو اینوگ۔