گالاتییاپا 3 - New Testament in Ladakhi Langage

شریعت کھانیانچیس یا ایمان چوچیس۔

¹ وا سامبا میدکھان، گلَتیہ پاگون، سُوی جادُو چوستے کھیوجاگون بونگبو ژوگس سامّید گیورچُوگس؟ نگے کھیوجاگونلا حضرت عیسیٰ مسیحاکیانگشینگیکا ڈونگسکھانبو، کھیوجارانگی میگنے تھونگکھان ژوگس سالپو چوستے شادپین۔

² نگے کھیوجاگونلا اینّا ٹیوا چیگپو ٹیاد، کھیوجاگونلا ہلژخمہ رُوح، حضرت مُوسیٰؔ سی شریعت گون ثونگچیسپوے تھوبسّا یا مسیح سکورلا لونبو تشورتے ایمان چوچیسپوے تھوب؟

³ کھیوجاگون ایزوگ سامّید ریگ کازوگی گیور؟ کھیوجاگونّی مسیح نانّگا میتسے بو ہلژخمہ رُوح گیُودتے گوزوگ چوستے، ستینگنے چی پھیا کھیوجاگونّی میی کھیودی نانّگا تیبو ڈوبچوگچیسّی سونڈوس چواد؟

⁴ کھیوجاگونّی ردوگنگال تشانگما لینچیسپو پھانتھوگس میدپا مانڈو؟ تانتانلا تیگون تونمیدلا سونگتے مانڈو، اینّا؟

⁵ نگے کھیوجاگونلا یانگسکیار ٹیاد، کھیوجاگونّی شریعت گون ثونگچیسپوے، خُدے کھیوجاگونلا ہلژخمہ رُوح سالچیس یانگ، کھیوجے ٹوا معجزہ گُون چوا زادسّا، یا مسیح سکورلا تشورکھانّی لونبوے نانّگا ایمان چوچیسپوے زادس؟

⁶ تینّا تسوگسلا حضرت اِبراہیم خُدے کا ایمان کھیونگ چیسپوے، خُدے کھونّگا ٹانگپو تھیا زادس۔

⁷ سونگپاسانگ خُدے کاایمان کھیونگ کھانگون حضرت اِبراہیم نگوسپوے اولاد اینکھانگون ہاگوا میراگّا؟

⁸ مایونگسپوے توسّی نانّگا، خُدے یہُودی مانکھان گُونلا ایمان چوچیس گیُودتے، ٹانگپو تھیا زادچیسپو، شوقبُو بوے سنگونچوگس۔ یانگ ”گیالکھاگ تشانگما کھیرانگ گیُودتے برکت تھوبین“ مولتے گاموےناتسُولبو، توس مانگپوے سنگونلا حضرت اِبراہیمی شادّا زادس۔

⁹ تیبویپھیا مسیح نانّگا ایمان چوکھان تشانگمالا، حضرت اِبراہیم ایمان چان می نیامپو برکت پو تھوبین۔

¹⁰ اِین نانگ خُدے لدُونلا ٹانگپو تھیچیسّی پھیا، شریعت کھا نیانچیسّیکا راگلاستے دوگکھانگونلا، کھونگی نگان پھوگین۔ چیازیرنا شوقبُو بوے نانّگا مولتے اینوگ، ”شریعتی شوقبُوئ نانّگا ڈِیازادتے یودکھان تشانگما ماثونگکھانگونلا، نگان پھوگین۔“

¹¹ تینے شریعت ثونگچیسّی سونڈوس چوستے سوجیگّانگ خُدے سکوندونلا ٹانگپو میتھیچیسپو، سالپو سونگتے اینوگ۔ چیازیرنا ہلژخمہ شوقبُو بوے نانّگا مولتے اینوگ، ”ایمان چیگپو گیُودتے می ڈانگپوجیگّا میتشے تھوبّانوگ۔“

¹² ای ایمانی لامبو نی، شریعتی لام کابوے ”شریعت نانگجین ڈولکھانگونلا تے شریعت تشانگما کھانیانتے میتشے پھودگوسّانوگ“ زیرکھانبوے ژانگما سوسوجیگ یودتے اینوگ۔

¹³ اِین نانگ نگاتانگ تشانگما شریعتی نگان پھوگکھانّی کانے مسیح رین شالّا زادتے تھار چوگس، نام نگاتانگی چوکھانّی لاس نگانپاگونّی نگانبو، کھونگی کھونگرانگیکا کھورّا زادتے کھونگ کیانگشینگیکا کیانگس۔ چیازیرنا ہلژخمہ شوقبُو بوے نانّگا ڈِیازادتے دوگ، ”لچانگمیکا کیانگسکھان تشانگمالا نگان پھوگستے اینوگ۔“

¹⁴ حضرت عیسیٰ مسیح گیُودتے، خُدے یہُودی مانکھان گُونلا، حضرت اِبراہیمی وعدہ زادکھانّی تینّا برکت پو سالّا زادس۔ کھونگی، نگاتانگونلا ایمان گیُودتے، وعدہ زادکھانّی ہلژخمہ رُوح بو، تھوبچیسّی گیونتشانبوے پھیا، تیبو زادس۔

شریعت گون یا خُدے وعدہ۔

¹⁵ لے فونو گون، تا نگا جاگدانگی میتشے تانگ ڈیلکھانّی سپیجیگ تانگچوگ۔ می نییسّی پارلا وعدہ ڈِیستے ستینگنے سوجیگیانگ، تیبوا سنانگمید چو مینیان، یا تیبوا نانتے تھیبا زیر مینیان۔

¹⁶ خُدے وعدہ گون حضرت اِبراہیم تانگ کھونگی اولاد لا، چوا زادتے اینوگ۔ شوقبُو بوے نانّگا ”اولاد گون“ مولتے میدوگ، کابوے تونبو می مانگپوجیگ، اِین نانگ ”اولاد لا“ مولتے دوگ، کابوے تونبو، می چیگ چیگ یانگنا مسیحا۔

¹⁷ نگے زیرچیسّی تونبو نی، حضرت مُوسیٰؔ سالکھانّی شریعتی سانگ لو جیبگیا سومچوے سنگونلا، خُدے حضرت اِبراہیم نیامپو وعدہ زادس۔ حضرت مُوسیٰؔ سی شریعت دیکا، خُدے حضرت اِبراہیم نیامپو وعدہ زادکھانبو، چاگستے میدکھان چو مینیان۔

¹⁸ کالتیس شریعت گون ثونگچیسپوے، نگاتانگونلا خُدے تھارپے نورسکالبو تھوبّادنا، تینے تھارپابو وعدہ زادکھانبویکا راگلاستے میدتے اینوگ۔ اِین نانگ خُدے شزدے نانّگا حضرت اِبراہیمی کھونگرانگی وعدہ گیُودتے، تھارپے نورسکالبو سالّا زادس۔

¹⁹ تینے چیپھیا شریعت پو تانگستے اینوگ؟ ایبو میگونلا کھونگونی دِیگپاگون ستانچیسّی پھیا وعدے ستینگنے، تیکا نانما سالّا زادس۔ اِین نانگ تے شریعت پو تےتےتشوگپا لوسشیسلا چوا زادس، نامتشوگپا تے اولاد بو لیب مِیلیب، کا بو خُدے وعدہ زادتے اینپین۔ خُدے تے شریعت پو فرشتاگون گیُودتے، حضرت مُوسیٰؔ سالّا زادس، کھو نی خُدے تانگ میگونّی پارلا بارمیجیگ اینپین۔

²⁰ تا سدے چیگی سانگ مانگی نانّگا وعدہ چو زانے، بارمی گھوسدوم چھانوگ۔ اِین نانگ خُدے چیگ جُوگستے این پاسانگ، کھونگی حضرت اِبراہیمی کھونگرانگی وعدہ بو سال زانے، بارمی کولّا مازادس۔

²¹ تینے چی، شریعت دیکا خُدے وعدہ لا گیابگال چوانوگّا؟ مانے چوا مانوگ۔ کالتیس شریعتی نگاتانگونلا میتشے سوماجیگ تانگتھوبّادپینّا، تینے تیبو کھا نیانچیسنے نگاتانگون خُدے سکوندونلا ٹانگپو چوستے یودڈو۔

²² اِین نانگ ہلژخمہ شوقبُو بوے، نگاتانگ تشانگما دِیگپے تسونپا اینکھانبوے گواہ سالّا زادّوگ۔ تیبویپھیا حضرت عیسیٰ مسیح نانّگا ایمان چوچیس چیگپو گیُودتے، خُدے تھارپے وعدہ بو تھوبّانوگ۔

ایمان چوچیسپوے خُدے ٹھوگوگون۔

²³ ای ایمان بو یونگی سانگ سنگونلا، شریعت دیکا نگاتانگون تسونکھانگی نانّگا کاگستے کولیگ چوگستے بورتے اینوگ، نامتشوگپا ایمان بو سنگون ماسنگون۔

²⁴ تے شریعت پو، مسیحا سنگونسنگون تشوگپا نگاتانگون ٹھیدکھانّی کھاگکھورپابو چوا زادس۔ تینے مسیح نانّگا ایمان چوچیس گیُودتے نگاتانگون ٹانگپو تھیا زادِین۔

²⁵ اِین نانگ تا، تے ایمانی لامبو سکیود پاسانگ، نگاتانگونلا شریعتی ستاستوگی یوگا دُوگوس میدپا اینوگ۔

²⁶ حضرت عیسیٰ مسیح نانّگا ایمان یودچیسپوے، کھیوجا تشانگما خُدے ٹھوگوگون اینوگ۔

²⁷ غوتا لینّاچیگ، کھیوجا تشانگما مسیحا نیامپو چیگڈیل سونگتے مسیح سچودلامگون کوسلاگ سوما تسوگسلا گونتے اینوگ۔

²⁸ تا یہُودی پا تانگ یہُودی مانکھان، تشیوگ تانگ رانگوانگچان، بُوژا تانگ بومو گُونی پارلا چانگ کھیاد میدپا اینوگ، چیازیرنا کھیوجا تشانگما حضرت عیسیٰ مسیح نانّگا چیگ اینوگ۔

²⁹ کھیوجا مسیح این پاسانگ، کھیوجاگون حضرت اِبراہیم لدینبے ٹھوگوگون اینوگ۔ یانگ خُدے وعدہ نانگجین، کھیوجاگون حضرت اِبراہیم نورسکالّی داگپو گیورین۔