گالاتییاپا 2 - New Testament in Ladakhi Langage

رسُول تشانگمے حضرت پولُسی لابجاگونلا گیابسکیور زادس۔

¹ تینے لو چوبژی ستینگنے، نگا یانگسکیار لوگستے یروشالیمّا برنباس نیامپو سونگپین۔ نگے طِطُسانگ نگاجا نیامپو ٹھیدتے کھیرپین۔

² خُدے نگا سنگون چوگّا زادکھانبوے جاستے، نگا تیرو سونگپین، یانگ یروشالیمّی شریعتی اُسکیونگ اینکھانگون چیگپو یود زانے، نگے یہُودی مانکھان گُونلا گاموےناتسُول شادکھانبوے سکورلا کھونگونلا شادپین، چیازیرنا نگا نگے چوین یودکھان یا چوکھانّی تے سونڈوسگون گودلا سونگتے مانّاہے، سامتے جیگسّادپین۔

³ کھونگونی نگا چھوگسّکیور چوس، یانگ نگے ٹوپا یہُودی مانکھان طِطُسلانگ لقپہ ہلژخمہ چوگوشیسپو کھاگچان ماسام۔

⁴ ای ٹیوابو جونگ، چیازیرنا حضرت عیسیٰ مسیح نانّگا نگاجا گُونلا رانگوانگ یودکھانبو ستاچیسلا، زوسمے فونو ریگ نگاجا گُونی عبادت خانہے ٹوا سانگوے تھوگنے ڈِیستے اینوگ۔ یانگ رانگوانگبو کوگستے کھیرتے، یہُودی پے ٹھیمسگونّی تشیوگ گیورچوگچیسلا تھادّوگ۔

⁵ اِین نانگ نگاجے کھونگونی زیرکھانگونلا ثیبچیگی پھیانگ، کھا ماچھامسپین، چیازیرنا نگاجے گاموےناتسُولّی ٹانگپوبو کھیوجاگونّی پھیا سکیوبستے بورّالا تھادّادپین۔

⁶ یانگ یروشالیمّی شریعتی اُسکیونگ اینکھانگونّی نگے لابین یودکھانبویکا چانگ نانتے زیرچیس میدوگپین ( تیتسوگسی کوسیکا یودچیسپوے نگے پھیا، چانگ کھیاد مید، چیازیرنا خُدے سوجیگّانگ چھوگریس چوا زادّا مانوگ)۔

⁷ تیبو ماتشاد خُدے حضرت پطرؔس لا لقپہ ہلژخمہ چھوکن گونلاچھوسشادچیسّی کھاگ کالا زادکھان تسوگسلا، لا لقپہ ہلژخمہ ماچھوکن گُونلا گاموےناتسُول شادچیسّی کھاگ نگا سالّا زادے اینوگ۔

⁸ حضرت عیسیٰ سی رسُول حضرت پطرؔس گیُودتے، لا لقپہ ہلژخمہ چھوکن پاگونّی نانّگا چھاگلاس زادکھانّی تینّا خُدابوے، نگا حضرت عیسیٰ سی سی رسُول گیُودتے لا لقپہ ہلژخمہ ماچھوکن مانکھان گُونی نانّگانگ، چھاگلاس زادتے اینوگ۔

⁹ شریعتی اُسکیونگ تشانگمیسانگ کھاگچان تھیا زادکھان یعقُوبؔ ، کیفا تانگ، حضرت یُوؔحنّا ٰ گُونی نگے لاسگونّی سکور تشورتے، خُدے نگا شزدے سالّا زادتے اینکھانبو ہاگو۔ یانگ برنباس تانگ نگا کھونگونی ٹوپا لاسچیدپا تھیازادتے، نگاجا یہُودی مانکھان گُونی ٹوا چھوسشادچیس، یانگ کھونگونی لا لقپہ ہلژخمہ چھوکن پاگونّی ٹوا لاس چوچیسلا کھاچھامسّا زادس۔

¹⁰ نیالباچانگونلا روگس چوچیسّی جُووا چیگپوبو، کھونگونی نگاجا تانگس۔ تینّا لاسپو چوالا نگا رینگسّادپین۔

حضرت پولُسی حضرت پطرؔس لا سکیون رجود چوا زادس۔

¹¹ اِین نانگ پیٹا (کیفا) ر انطاؔکِیہ ی گیالسے نانّگا یود زانے، کھونگی چوسکھانبو نورٹھول تانتان این پاسانگ، نگا کھونّگا لدونگیکا گیابگال چوگوس۔

¹² سنگونلا کھونگی یہُودی مانکھان ّی مسیحا پا گُون نیامپو کھارجی زادپین۔ اِین نانگ یعقُوبؔ ی دزاو کھاچیگ تیرو لیبّاچیگ، حضرت پطرؔس سی تے فونو یہُودی مانکھان گُون نیامپو ڈیل مابورس یانگ زانّانگ مازوس، چیازیرنا کھو لقپہ ہلژخمہ چوگوشیس کھاگچان سامکھانّی یعقُوبؔ ی دزاوگونّی سکیون رجود چوچیسلا جیگسّادپین۔

¹³ تیبوے ڈاسبو، جانیانگ یہُودی پا مسیحا پا گُون حضرت پطرؔس سی کھاچھوس نانّگا ڈیس، ماتشاد برنباسانگ کھونگونی کھا چھوس نانّگا سونگ۔

¹⁴ کھونگون گاموےناتسُولّی نگوسپوے لونبوے گیابنے ماڈولکھانبو، نگے تھونّگاچیگ، نگے تشانگمے لدُونلا حضرت پطرؔس لا (کیفا لا) زیرپین، ” کھیرانگ یہُودی پاجیگّا سکیستیانگ، یہُودی پے شریعت گون پھانگستے، یہُودی مانکھان گُون تسوگسلا میتشے پھودّوگ۔ تا کھیرانگی ای یہُودی مانکھان ّی فونو گونلا، چیپھیا یہُودی پے لوگثولّی نانگجین ڈولچیسلا، وانگ تانّگاد۔

¹⁵ نگاتانگ نیسکو نی، سکیسپانے پھارلا یہُودی پا اینوگ۔ جانماگونّی دِیگپاچان اینوگ زیرکھان یہُودی مانکھان گُون ژوگس مانوگ۔

¹⁶ اِین نانگ نگاتانگونلا گیوس اینّوگ، میجیگ شریعت گون کھانیانچیسپو مانپا، حضرت عیسیٰ مسیح نانّگا ایمان یودچیسپوے، خُدے سکوندونلا، ٹانگپو تھیا زادّانوگ۔ شریعت گون کھانیانچیسپو مانپا، حضرت عیسیٰ مسیح نانّگا ایمان چوچیس گیُودتے، خُدے سکوندونلا ٹانگپو تھیا زادچیسّی پھیا، نگاتانگونّی حضرت عیسیٰ مسیح نانّگا ایمان چوستے اینوگ۔ چیازیرنا سوجیگّانگ شریعت کھانیانچیسپوے، خُدے سکوندونلا ٹانگپو تھیا زادّا مانوگ۔“

¹⁷ کالتیس نگاتانگونّی مسیح نانّگا ایمان یودچیسپو گیُودتے، خُدے سکوندونلا ٹانگپو تھیچیس ژالّادنا، اِین نانگ شریعت پھانگچیسپوے نگاتانگونّی نانّگا سکیون تھونّگادنا، چی تیبوے تونبو، مسیح نگاتانگون دِیگپے نانّگا ٹھیدتے کھیرّا زادتے اینّوگا؟ مانے مانوگ۔

¹⁸ اِین نانگ کالتیس نگے سنگونلا شیگسکھانّی شریعت پو، یانگسکیار سیگنا، تیبوے نگا دِیگپاچان جیک اینکھانبو ستانّانوگ۔

¹⁹ نگے شریعت تشانگما ثونگ مانیان پاسانگ، تیبوے نگا شیگوشیس ٹھیمسچادس۔ سونگپاسانگ شریعتی پھیا نگا شیتے این یانگنا خُدے تونلا میتشے پھودچیسّی پھیا، نگے شریعت تشانگما ثونگچیس پھانگستے مید۔

²⁰ مسیحا کیانگشینگیکا کیانّگا زاد زانے، نگے سنگونّی میتشیبوانگ کیانگستے مید۔ تانیپھارلا ای میتشیے نگے مانپا، مسیحا ای نانّگا جوگسّاد ۔ تا نگے خُدےبوژاےکا، ایمان چوستے ای دُنیائی زوگسپوے نانّگا دوگّاد۔ کھونگی نگا چیسپا زادتے کھونگرانگی سروک، نگے پھیا سالّا زادس۔

²¹ نگے خُدے شزدے بو سنانگمید چونیانچیس مانوگ۔ کالتیس شریعت گون ثونگچیسپوے، نگاتانگون خُدے سکوندونلا ٹانگپو تھیادنا، تینے مسیحا ڈونگس گوشیسّی گھوسدوم میدپا اینوگ۔