گالاتییاپا 1 - New Testament in Ladakhi Langageحضرت پولُسی چھوگسنے سلام۔ 1 ای ایگیبو حضرت عیسیٰے رسُول حضرت پولُسی چھوگسنے این۔ نگا میگونّی سدےجیگ یا میی وانگی مالدامّا، حضرت عیسیٰ مسیحاتانگ کھونگ شیکھانگونّی ٹونے سونتیا لانّگا زادکھانّی یاب خُدے لدامّا زادتے این۔ 2 گلَتیہ پے نانّگا یودکھانّی عبادت خانہ گونلا، ای ایگیبو کالچیسّی نانّگا نگا نیامپو یودکھانّی فونو تشانگما تھوستے این۔ 3 نگاتانگونّی یاب خُدے تانگ حضرت عیسیٰ مسیح گُونی، کھیوجاگونلا شزدے تانگ جیدے سالّا زادشیگ۔ 4 خُدے نگاتانگونّی یابّی تھوگّونگس نانگجین حضرت عیسیٰ، نگاتانگون دُوگستے یودکھانّی نگانپا دُنیائی نانگنے تھار چوگّا زادچیس تانگ نگاتانگونّی دِیگپے پھیا، کھونگرانگی میتشے چھودپے تشولّا سالّا زادس۔ 5 تیبوے جاستے، خُدا تُوسگیُونّے گیُون سپال تھوبشیگ، امین۔ گاموےناتسُول چیگ چیگ مانے مید۔ 6 کھیوجا ایزام گیوگسپا خُدے پھانگین تھاگرینّگا چھاچیسپوا نگا ہالاس۔ خُدے مسیح شزدے گیُودتے، کھیوجاگون کھونگ نیامپو ڈیل چوچیسلا بودّا زادتے اینپین۔ اِین نانگ کھیوجاگون جانیانگ سوسو گاموےناتسُول جیگی ستینگرانگنے ڈولدوگ، 7 کا بو نگوسپوا گاموےناتسُولجیگ این کھورانگ مانوگ۔ اِین نانگ مسیح گاموےناتسُولّی تونتاگی نانّگا مینگنانگ گیورجا کھیونگکھانگونّی، کھیوجے سنینگی نانّگا تھےژومس سکیچُوگین یودکھانبو نگا ہاگواراگ۔ 8 کالتیس نگاجا چیگی یا نامکھے فرشتاجیگی، نگاجے کھیوجا لابکھان مانپا یانگ سوسو گاموےناتسُول جیگ شادیتنا، خُدے تیگونلا تھامیدپے چھادپا سالّا زادشیگ۔ 9 نگے سنگونلا زیرکھانبو یانگسکیار زیرّاد، سوجیگیانگ کھیوجاگونّی سنگونلا ایمان چوکھانگونّی سانگ جانیانگ سوسو گاموےناتسُول جیگ لابّادنا، خُدے تیگونلا تھامیدپے چھادپا سالّا زادشیگ۔ 10 ستوسشیگّانگ، نگے خُدانے ستودپا تھوبچیسّی سونڈوس چوروگّا یا میگونّے؟ کالتیس نگے میگون تھادچوگنیین یودپینّا، نگا مسیح ژابستوگپاجیگ مانڈو۔ حضرت پولُسی لون مسیح چھوگسنے یونّگانوگ۔ 11 لے فونو گون، نگے کھیوجاگونلا ایبو ہاگوگوس سامّاراگ۔ نگے شاد کھانی گاموےناتسُولبو، میی چوکھانجیگ مان۔ 12 تیبو نگا میجیگی کانے ماتھوب، یا سوجیگی نگا مالابس، اِین نانگ نگا ایبو حضرت عیسیٰ مسیح کانے کھاڈانّگا سنگونتے این۔ 13 یہُودی پے شریعتی نانّگا یود زانے، نگا کازوگشیگ یودکھانبو کھیوجاگونلا گیُوس یودڈو۔ نگے خُدے عبادت خانہ گونلا ناگس ثانٹے ستانتے تیگون ٹھیسّتور چوچیسّی نانّگا سونڈوس گیالّا چوسپین۔ 14 یہُودی پے شریعتی نانّگا، نگاتانگ لوچیگپا جانیانگ یہُودی پاگونّی سانگ نگے مانّگا کھاسپا تانگ یارگیاس چوادپین۔ یانگ نگے نگارانگی اتا اپو گونّی لوگثولگون ثونگچیسلا سنینگنے سونڈوس تیگونّی سانگ مانّگا چوسپین۔ 15-16 اِین نانگ خُدے کھونگرانگی معجزہ شزدے نانّگا، نگا سکیے سانگ سنگونلا لدامّا زادتے بودّا زادس۔ حضرت عیسیٰ سی سکورلا گاموےناتسُولبو یہُودی مانکھان گُونلا شادچیسّی پھیا، کھونگرانگی ثاسپو نگا سنگون چوگّا زادچیسلا، خُدے تھوگستھادّا زادس۔ یبوے سکورلا نگے سومیجیگی کانیانگ کھادا ماتسالپین، 17 یا نگے سانگ سنگونلا رسُول اینکھانگون نیامپو تے سکورلا ٹابس چوالا، نگا یروشالیمّا ماسونگپین۔ اِین نانگ تینّامالّا نگا عرب سونگپین، یانگ تیستینگنے نگا دمِشق گی گیالسا لوگستے یونگسپین۔ 18 تینے لو سومی ستینگنے، نگا یروشالیمّا کیفا لا تھوگچیسّی پھیا، سونگتے جاگما 15 کھونگ نیامپو دوگسپین۔ 19 تیتوسلا مسیح نو یعقُوبؔ چیگپو مانپا، جانیانگ رسُول سوجیگّانگ نگا ماتھوگ۔ 20 نگے کھیوجا ڈیاین یودکھانگون زونمانکھانّی گواہ، خُدے این۔ 21 تیبوے ستینگنے، نگا سیرییا تانگ کِلِکیہ پے یولّا سونگپین۔ 22 یانگ تیتوُس تشوگپا، یہُودیہ عبادت خانہ گونّی مسیحا پا گُون نگا نیامپو ماتھوگّا اینپین۔ 23 اِین نانگ کھونگونلا میگونّی کانے اینّابو تشورتے اینوگ، ”سنگونلا نگاتانگونلا ناگھسباردو ستانکھانّی می بوے، تا داگسا تینّا ایمانی سکورلا گاموےناتسُول شادنا، کا بو کھوے توسشیگّا ٹھیسّتور چوچیسّی سونڈوس چوادپین۔“ 24 یانگ نگا جونگکھانبوے جاستے، کھونگونی خُدا ستودپا پھولتے اینپین۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation