ایپھیسوسپا 5 - New Testament in Ladakhi Langageخُدے اودّی نانّگا میتشے پھود۔ 1 کھیوجا خُدے چیسپے ٹھوگوگون این پاسانگ، کھونگ ڈولّا زادکھانّی لامیکا کھیوجاگونّانگ ڈولشیگ۔ 2 کھیوجاگونّی میتشیے چامسپے نانّگا پھودشیگ، کازوگ مسیح نگاتانگونلا چامسپا زادتے نگاتانگونّی پھیا ڈونگسّا زادس، کھونگ نی خُدا ٹیجیم ّی چھودپا تانگ قُربان اینوگ۔ 3 اِین نانگ کھیوجاگونّی نانّگا لوسڈیل نگانپا، یا لاسنگان تشیتو یا نابسیمس چھونگونجیگّانگ یونگ ماگوس، چیازیرنا خُدے می ہلژخمہ گونّی نانّگا تے ژوگس دِیگپے پھیا ناسّا میدپا اینوگ۔ 4 کھیوجاگونّی ٹھیلمیدّی رومس، تونمیدّی سپیرا، تانگ کھاملوگ ہابابس تانگ ماگوس۔ تیتسوگس اوسپا مانکھانّی سپیرا تانگی سانگ خُدا شُکر ژوگوشیس اینوگ۔ 5 ایبو تان تان اینوگ، سچودلام نگانپا، تشیتوی لاس، یا نانسیمس (نانسیمسچانگونّی دُنیائی نورلا چھاگشیسپو سکونڈا چولکھان ژوگس اینوگ) تیتسوگسی میگونلا مسیحا تانگ خُدے گیالثیدّی نانّگا چانگ نورسکال میتھوب۔ 6 کھونگونی کھورانگونّی دِیگپے لاسگون کابچیسّی سامّید سپیراگونّیکا دِین ماشیسشیگ، چیازیرنا تیتسوگسی دِیگپا چوکھان کھامینیانگونّیکا خُدے تھوگسثو بابسّانوگ۔ 7 تیبویپھیا تیتسوگسی میگون نیامپو ڈیس ماڈیس۔ 8 سکابسشیگّا کھیوجاگون مونڈیگی گنگستے یودپین، اِین نانگ داگسا مسیح نانّگا اینچیسپوے کھیوجا اودّی گنگستے اینوگ۔ تینّابویپھیا اودّی میگون تسوگسلا میتشے پھودشیگ۔ 9 تے اودّی زانگپو، ٹانگپو تانگ لدینبا ڈاسبوگون چیگپو سمینّانوگ۔ 10 مسیح تھوگستھادّا زادکھان گُون تسالچیسّی سونڈوس چوشیگ۔ 11 مونّاگی لاس ڈاسبو ماچھاگسکھانگونّی نانّگا ماڈیسشیگ، اِین نانگ گیودپا چوچیسّی پھیا کھونگونی اُسکیونگون ستونشیگ۔ 12 کھونگونی سانگستے دِیگپے لاس چوکھانگونّی سکورلا سپیرا تانگچیسپو کھورانگ، ٹھیلباجیگ اینوگ۔ 13 اِین نانگ اودّی نانّگا واستے بورکھان تشانگما سالپو چوستے تھونّگانوگ۔ 14 اوت پھوگکھان تشانگمے لدانگس تانّگانوگ۔ تینّابویپھیا ہلژخمہ شوقبُو بوے نانّگا مولدوگ۔ ”نییدلوگکھانگون نییدنے لونگشیگ۔ شیکھانگونّی ٹونے سونتیا لونگشیگ۔ یانگ مسیح لدانگسپو کھیوجیکا پھوگین“ 15 تینّابویپھیا کھیوجاگونّی میتشے پھودچیسّی نانّگا شانگ چوشیگ۔ سامبا میدکھان گُون تسوگسلا ماپھودّا، شیسراب چن کُن تسوگسلا میتشے پھودشیگ۔ 16 سکابس تھوبکھان تشانگما لاس زانگپو چوچیسّی نانّگا کولشیگ، چیازیرنا ای توسگون نگانپا اینوگ۔ 17 سامبا میدکھان ماگیورّا مسیح تھوگّونگس اینکھانبو ہاگوچیسّی سونڈوس چوشیگ۔ 18 راروستے مادوگشیگ، تیبوے سچودپا نگانپے لاسگونّی نانّگا ٹھیدّانوگ، اِین نانگ کھیوجاگونّی میتشیبو ہلژخمہ رُوح بوے سکونگشیگ۔ 19 کھیوجاگونّی ٹوا ستودکھہ ، زبُور تانگ چھوسلو گُون تانگین، مسیح پھیا، کھیوجاگونّی سنینگی نانّگا ستودپے لو سکونگشیگ۔ 20 نگاتانگی حضرت عیسیٰ مسیح نگاتانگی پھیا زادکھان تشانگما، توسگیون نگاتانگی یاب خُدا شُکر ژوشیگ۔ ناما تانگ ماگپاگون۔ 21 کھیوجاگونّی مسیحا سیوا چوچیسپوے، چیگ تانگ چیگی وانگی یوگا بورشیگ۔ 22 ناما کھیوجاگون رانگی ماگپے وانگی یوگا دوگشیگ، کازوگ کھیوجے کھیوجارانگ مسیح وانگی یوگا بورّاد۔ 23 چیازیرنا ماگپا نی نامے گو ژوگس اینوگ، کازوگ مسیحا عبادت خانہے او این، یانگ کھونگ کھونگی سکوزوگس عبادت خانہے کھوم چُوک کھن اینوگ۔ 24 مسیح، عبادت خانہ کھونگرانگی وانگی یوگا بورّا تسوگسلا ناماگونّیانگ، کھورانگّون چیساتھوگنے کھورانگی ماگپے وانگی یوگا بورگوس۔ 25-26 ماگپاگون، رانگی ناما چیسپا چوشیگ، کازوگ مسیح رانگی عبادت خانہ لا چیسپا زادتے، کھونگرانگی عبادت خانہ ہلژخمہ چوا زادچیسلا ڈونگسّا زادس، یانگ خُدے حُکم نیامپو لاگمو زادتے چھو نیامپو ٹھوا زادس۔ 27 تیگون چوا زادس چیاجونا کھونگی داگ یا سول یا میڈیگچیس میدکھان، اِین نانگ لدانگشان، ہلژخمہ تانگ سکیونمیدکھانّی عبادت خانہ جیگ، کھونگرانّگا ستادچیس اینوگ۔ 28 تینّا تسوگسلا، ماگپاگونّی رانگی زوگسپوا چیسپا چوا تسوگسلا، رانگی ناما چیسپا چوگوشیس اینوگ۔ رانگی ناما چیسپا چوکھانگونّی کھورانّگا چیسپا چوستے اینوگ۔ 29 نگاتانگ سوجیگیانگ رانگی زوگسپوا ناپھراد ماچوا، تیبوا کھارجی ستیرتے، ستاستوگ چوانوگ، کازوگ مسیح عبادت خانہ لا ستاستوگ زادّاد۔ 30 چیازیرنا نگاتانگون مسیح سکوزوگسّی یانلاگ اینوگ۔ 31 ہلژخمہ شوقبُو بوے نانّگا مولدوگ، ”تینّابویپھیا بُوژا کھورانگی ابا تانگ اما پھانگستے رانگی ناما نیامپو دزومّانوگ یانگ کھونگ نیسکو زوگسپو چیگ گیورین“ 32 تے سپیراگون ہاگوچیسلا ما کاگسپو یودتے اینوگ، اِین نانگ لدینبا، نگے مسیحا تانگ عبادت خانہے تھونڈیلّی سکورلا شادتے این۔ 33 دورلدوسنا کھیوجا ریرے رانگی ناما نیامپو چیسپا چوگوس، کازوگ کھیوجے کھیوجارانگّونلا چیسپا چواد، یانگ ناماگونّی رانگی ماگپا سیوا چوگوس۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation