ایپھیسوسپا 4 - New Testament in Ladakhi Langageعبادت خانہے تھونڈیل۔ 1 تینّابویپھیا مسیحا جابستوگ ژوچیسپوے نگا تسونّی نانّگا یودکھانّی، جوجو خُدے بودّا زادکھانّی اوسپے میتشے جیگ پھودچیسلا کھیوجا جُووا پھولّاد۔ 2 کھیوجا توسگیون نیامشونگ تانگ، پاسمو، زودپاچان یانگ چامسپے نانّگا چیگ تانگ چیگی اُسکیونگونلا مُعافی تانگستے روگس چوشیگ۔ 3 جیدے نیامپو لدامستے رُوح بوے نانّگا کھیوجاگون چیگڈیل دوگچیسلا سونڈوس چوشیگ۔ 4 نگاتانگونلا زوگسپو چیگ تانگ ہلژخمہ رُوح تانگ چیگ چیگ یودتے اینوگ، کازوگ یونگچیسچانّی توسّی نانّگا کھیوجاگون ریوا چیگی پھیا بودّا زادتے این۔ 5 نگاتانگونلا مسیح چیگ چیگ، ایمان چیگ چیگ، غوتا لینچیس چیگ چیگ، 6 تشانگمے خُدے تانگ یاب چیگ چیگ جُوگستے این، کھونگی نگاتانگ تشانگمیکا وانگثولچیس، نگاتانگ تشانگما گیُودتے چھاگلاس زادچیس تانگ کھونگ نگاتانگ تشانگمے نانّگا جوگسانوگ۔ 7 مسیح نگاتانگ ریریا کھیود سوسو ریگ سالتے اینوگ، اِین نانگ تے کھیود پو کازوگشیگ سالین کھونگی تھاگچادّا زادّانوگ۔ 8 تینّابویپھیا ہلژخمہ شوقبُو بوے نانّگا مولتے دوگ۔ ”کھونگ تھونپوا سکیود زانے، کھونگی زومّا زادکھان مانگپو کھونگرانگ نیامپو کھیرّا زادس۔ یانگ کھونگرانگی میگونلا سکییسگون سالّا زادس۔“ 9 (شوقبُو بوے نانّگا ”کھونگ تھونپوا سکیودس“ مولچیسپوے نگاتانّگا ہاگوانوگ، مسیحا نامکھانے تُھورلا بابستے ماموا سکیودس یانگنا ای دُنیائیکا۔ 10 یانگ تینّا تُھورلا بابسّا زادکھانبوے کھونگرانگی وانگ دزامبولینگ گانگپوے نانّگا ثولّا زادچیسلا نامکھے تشانگمیسانگ ناسّا تھونپوا سکیودّا زادس)۔ 11 مسیح کھاچیگ رسُول، کھاچیگ پیغمبر، کھاچیگ گاموےناتسُول شادکھان، کھاچیگ عبادت خانہ لا ستاستوگ چوکھان تانگ کھاچیگّا لوبپون چوچیسّی سکییسگون عبادت خانہ لا سالّا زادس۔ 12 کھونگونی کھاگپو نی، مسیح سکوزوگس شیدچان گیورچیسّی پھیا خُدے میگون کھونّگا جابستوگ ژوچیسلا، ڈالڈیگ چوچیسپو اینوگ۔ 13 مسیح تیبو زادِین جوگساین، نامتشوگپا، نگاتانگ تشانگما ایمان تانگ خُدےبوژا شیشیسّی نانّگا چیگڈیل میچھا۔ تینے نگاتانگون ایمانی نانّگا لدانتے دزومسپو اینکھانّی مسیحا ژوگس گیور تھوبین۔ 14 یانگ نگاتانگ ٹھوگو چھونگون گُون ژوگس میلوس، کاگون لابجا سومے لونگسراگّونّی ینگونے انگوا ٹھیدچیس، یانگ می سکیونجانگونّی زوسمے تھابسگون گیُودتے گوبسکور نیانّانوگ۔ 15 اِین نانگ نگاتانگونّی خُدے ٹانگپوبو چامسپا نیامپو شادینّانگ، نگاتانگون چیساتھوگنے مسیح نانّگا لداناین، کا بو عبادت خانہے گو جُوگستے این۔ 16 مسیح کھونگرانگی میتشانگما لدامستے بورّا زادستے اینوگ، کازوگی گیوسپے زوگسپوے یانلاگ تشانگما تھودتے بورّاد۔ کالتیس زوگسپوے یانلاگ تشانگمے چوگوسچیسچانّی لاسگون چونا تینے زوگسپو گانگپو چامسپے نانّگا لدانتے شیدچان گیورین۔ مسیح نانّگا میتشے سوماجیگ۔ 17 تینّابویپھیا مسیح وانگی نانّگا نگے کھیوجاگونلا زیرّاد، یانگ سپانگپودّاد، تا ایمان میدکھان گُون ژوگس میتشے پھودچیس پھونگشیگ، چیازیرنا کھونگون ریوا میدکھانّی نانّگا گوکھورتے اینوگ۔ 18 کھونگونی سامبا، مونڈیگی گنگستے کھونگون خُدے سالکھانّی میتشینے ما تھاگرینّگا سونگتے اینوگ، چیازیرنا کھونگونی مینگنانگ خُدے سکورلا سامبا تانگچیس گاگستے سنینگّون سکیونگپو چوستے اینوگ۔ 19 کھونگون مانگستیانگ ٹھیلمید، لوسڈیل نگانپے ستینگرانگنے بانگتانگکھان، یانگ تشیتو لاس تشانگما چوچیسلا رینگسّانوگ۔ 20 اِین نانگ کھیوجے مسیح نانّگا میتشے پھودچیس لوبسکھانبو کھونگونی پھودکھان ژوگس میتشے مانوگ۔ 21 کھیوجاگونّی حضرت عیسیٰ سی سکورلا تشورتے یانگ کھونگی نانگنے یونگکھانّی ٹانگپوے سکورلا لوبستے این پاسانگ 22 سنیینگپا تانگ سنگونّی دِیگپاچان میتشے پھودتشول گُون پھونگشیگ کا بو گوبسکورّی دودپے گنگستے نگاتانگ ٹانگپوے لامنے تھاگرینّگا کھیرّاد۔ 23 اِین نانگ ہلژخمہ رُوح لا کھیوجاگونّی سامتشولّی نانّگا گیورجا کھیونگچوگستے، 24 خُدے کھونگرانگ ژوگس زادکھانّی میتشے سومابو کوسلاگ تسوگسلا رانّگا سکونشیگ، کا بو لدینبے ٹانگپو تانگ ہلژخمہ این۔ 25 تینّابویپھیا زون تانگچیس پھانگستے ایمان چانگونلا ٹانگپو زیرگوس، چیازیرنا نگاتانگون زوگسپو چیگی یانلاگ سوسو اینوگ۔ 26 ثو یونگ زانے، تیبوا کھیوجاگون دِیگپے چھوگسلا ٹھید ماچوگشیگ، یانگ تے ثوبو تینّا جاگنے تھالتے چھاچوگ ماگوس۔ 27 تیبوے کانے شیطان لا پھانتھوگس لینچیسّی سکابس ماتانگشیگ۔ 28 کونماگونّی کوچیس پھونگشیگ۔ اِین نانگ کھیوجارانگی لاگپا بادتے ٹانگپو لاس چوگوس، تینے گھوسدوم یودکھانگونلا کھیوجے روگس چوتھوباین۔ 29 کھیوجے کھانے سپیرا نگانپا مانے بینگ ماچوگّا زانگپو تانگ پھانتھوگسچانّی سپیرا تونگشیگ، تینے کھیوجے سپیرا نیانین یودکھانگونلا کھیوجے سپوسپا سکییچوگ تھوبین۔ 30 خُدے ہلژخمہ رُوح لا تھوگستشیر سکیود ماچوگ، کا بو تھامے جاگّا کھیوجا رین شالتے تھارچوگچیسّی تھیتسیبو این۔ 31 کھونبورچیس، ثو یونگچیس، نولچیس، چیگ تانگ چیگی سچودپے سکورلا نگانپا زیرچیس تانگ سچودلام نگانپے ریگس تشانگما پھانگستے میدکھان چوشیگ۔ 32 چیگ تانگ چیگّا سنینگرجے، چامسّیمس تانگ مُعافی تونگشیگ، کازوگی مسیحا گیُودتے خُدے کھیوجا مُعافی سالتے این۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation