ایپھیسوسپا 1 - New Testament in Ladakhi Langage

حضرت پولُسی سلام و دُعا۔

¹ نگا حضرت پولُس خُدے تھوگّونگس نانگجینلا، مسیح رسُول این۔ نگے ای ایگیبو اِفسُس سی گیالسے نانّگا یودکھان خُدے می ہلژخمہ گون تانگ ایمان چان حضرت عیسیٰ مسیح گیابنے ڈولکھانگونلا ڈِیاد۔

² نگاتانگی خُدے یاب تانگ حضرت عیسیٰ مسیح شزدے تانگ جیدے کھیوجاگونلا سالشیگ۔

رُوحانی برکت گون۔

³ نگاتانگی حضرت عیسیٰ مسیح یاب، خُدا ستودپا پھولشیگ۔ کھونگی مسیحا گیُودتے نگاتانگونلا نامکھے رُوحانی برکت تشانگما سالّا زادتے اینوگ۔

⁴ مسیحا گیُودتے خُدے سکوندونلا ہلژخمہ تانگ سکیونمید زادچیسّی پھیا دُنیا مالدانی سانگ سنگونلا کھونگی نگاتانّگا چیسپا زادتے لدامّا زادس۔

⁵ خُدے کھونگرانگی تھوگّونگس تانگ تھادپو نانگجین، حضرت عیسیٰ مسیحاگیُودتے نگاتانگون کھونگی سوسبو لینّا زادچیسلا سنگونّے پارلا تھاگچادّا زادس۔

⁶ تیبویپھیا کھونگی کھونگرانگی بُوژا چیسپا گیُودتے، نگاتانگونلا رین میدپا سالکھانّی تے سپالچانّی شزدے بوا ستودپا پھولین۔

⁷ خُدے نی شزدے بانگدزود این پاسانگ، کھونگرانگی بُوژے ٹھاق گیُودتے، نگاتانگونلا رانگوانگ نیوا زادتے نگاتانگی دِیگپاگونلا مُعافی سالّا زادس۔

⁸ کھونگی شزدے ماتشاد شیسرابس تانگ ہاگوانگ نگاتانگونّیکا سنینگ پھیستے لوگّا زادس۔

⁹ خُدے مسیحا گیُودتے ڈوبچوگّا زادچیسّی سانگوے تھابسپو، نگاتانگونلا سنگون چوگّا زادس، تے تھابسپوے کھونگی تھوگّونگس زانگپو ڈانڈا ڈوب۔

¹⁰ تے تھابسپو نی، لدامّا زادکھانّی توسپو لیبّاچیگ، کھونگی نامکھا تانگ دُنیائی نانّگا سروک یودکھان تشانگما کوگستے، مسیح وانگی یوگا بورّا زادِین۔

¹¹ خُدے مسیحا گیُودتے نگاتانگون لدامّا زادتے نگاتانگونلا نامکھے نانّگا نورسکالگون تھوبستے اینوگ، چیازیرنا کھونگی سنگونّے پھارلا کھونگی تھوگّونگس نانگجین چیتشانگما ڈانڈا ڈوبچوگچیسلا تھابس زادتے اینپین۔

¹² خُدے دودپابو نی، نگاجا یہُودی پا مسیح کا ایمان چوکھان ٹانگپو میگونّی، کھونّگا سپال تانگ ستودپا کھیونگچیسپو اینپین۔

¹³ یانگ کھیوجا یہُودی مانکھان گونّیانگ تھارپا تھوبچیسّی لدینبے گاموےناتسُول تشورتے، مسیح کا ایمان چوس پاسانگ، خُدے کھیوجاگونّیکا کھونگرانگی تھیتسیبو سالس، کا بو کھونگی وعدہ زادکھانّی ہلژخمہ رُوح اینوگ۔

¹⁴ ہلژخمہ رُوح بو نی، خُدے نگاتانّگا نامکھے نورسکال سالّا زادچیس تانگ نگاتانگون نیوا زادتے، کھونگرانگی میگون گیورچوگّا زادچیسّی، کھونگی کھاچھادپو اینوگ۔ کھونگرانّگا سپال تانگ ستودپا تھوبچیسّی پھیا، خُدے تیبو چوا زادس۔

شُکر تانگ دُعا۔

¹⁵ کھیوجاگونّی حضرت عیسیٰ مسیح یکا ایمان کھیونگچیس تانگ خُدے می ہلژخمہ تشانگمالا چیسپا چوروگ زیرتے نگا تشورپانے پھارلا،

¹⁶ نگے دُعا گونّی نانّگا کھیوجاگون ایدتو چوین توسگیون کھیوجاگونّی پھیا خُدا شُکر جُواد۔

¹⁷ خُدے، نگاتانگی حضرت عیسیٰ مسیح شان چانّی یابّا، کھیوجاگونلا کھونگ مانّگا گیالّا شیشیسّی پھیا، کھونگی کھیوجاگونلا رُوح بوے شیسرابس سالچیس، یانگ کھونگرانگ کھیوجاگونلا سنگون چوگّا زادچیسلا، نگے توسگیون جوا پھولّاد۔

¹⁸ خُدے رینچان تانگ سپالچان نورسکال اینکھانّی، ہلژخمہ می بودّا زادکھانگونلا، کھونگی سالکھانّی ریوا ہاگوچیسّی پھیا، کھیوجاگونّی رُوح بو اودّی گانگ چوگّا زادچیسلا نگے دُعا پھولّاد۔

¹⁹ یانگ نگاتانگ ایمان چانگونّی خُدے معجزہ شیدپوے نگاتانگونّی نانّگا چھاگلاس زادچیسپو گیُوس چھاتھوبچیسّی پھیانگ نگے دُعا جُواد۔ تینّا ہالاسّی شیدپوے،

²⁰ مسیحا شیکھانگونّی ٹونے سونتیا لانّگا زادتے، نامکھے نانّگا خُدے چھاگ یاسپے ٹھیسّیکا ژوگشوگّا زادس۔

²¹ ایتوس ماتشاد یونگچیسچانّی توسپوے نانّگانگ، مسیح وانگ نی نامکھا تانگ سیکا یودکھانّی مالِک، وانگثولپا، وانگچھا یودکھان تانگ، اُسکیونگ گُونی سانگ تھوشوگپو اینوگ۔

²² عبادت خانہے پھانتھوگسّی پھیا خُدے چیتشانگما مسیح جابسّی یوگا سالتے، کھونگ چیتشانگمیکا گاُسکیونگ ا سکوا زادس۔

²³ عبادت خانہ نی، مسیح سکوزوگس اینوگ، یانگ کھونگ تیبوے نانّگا ناستے عبادت خانہ پو گانگپو زادس۔ کھونگی کارونگسا چیتشانگمے نانّگا کھونگرانگ سکانّگا زادس۔