کولوسیپا 3 - New Testament in Ladakhi Langageمیتشے ژانگماجیگ پھود۔ 1 تا خُدے کھیوجاگون مسیحا نیامپو میتشے سوماجیگی نانّگا لانّگا زاد پاسانگ، کھیوجے نامکھے نانّگا یودکھانگونّی دودپا بورشیگ کارُو مسیحا، خُدے چھاگ یاسپے ٹھیسّیکا جُوگستے یود۔ 2 دُنیائی نانّگا یودکھانگونّی سکورلا سامبا ماتانّگا، نامکھے نانّگا یودکھانگونّی سکورلا سامبا تونگشیگ۔ 3 چیازیرنا کھیوجاگون سنگونمے دِیگپاچان میتشے پھودچیسّی نانّگا شیتے خُدے نانّگا کھیوجے لدینبے میتشیبو مسیحا نیامپو واستے یود۔ 4 کھیوجاگونلا میتشے سوما سالکھانّی مسیحا لوگستے سکیودّاچیگ، کھیوجاگونّانگ شان ّی نانّگا کھونگ نیامپو سنگوناین۔ 5 تیبویپھیا کھیوجاگونّی دِیگپے دودپاگون میدکھان چوشیگ۔ سپیرنا نگانپے لوسڈیل، زوگسّی تھوگنے ٹھیلمیدّی لاس، نگانپے لوسڈیلّی دودپا، دودپا نگانپا، نابسیمس (نابسیمسچانگونّی دُنیائی نورلا چھاگشیسپو سکونڈا چولکھان ژوگس اینوگ)۔ 6 تینّاگونّی جاستے کھا مینیانکھانگونّیکا خُدے تھوگسثو بابسشیس اینوگ۔ 7 توسشیگّا کھیوجاگونّانگ تینّا تسوگسّی نگانپے لامیکا ڈولّادپین، 8 اِین نانگ تا ثو یونگچیس، ٹھاقلونگ، نگانسیمس، جانمے سچودپے سکورلا نگانپا زیرچیس تانگ کھانگانپا تشانگما پھانگوس۔ 9 چیگ تانگ چیگّا زون ماتانگشیگ، چیازیرنا کھیوجے سنگونمے سامتشول تانگ لاس نگانپاگون پھانگستے این۔ 10 کھیوجارانگّونلا سچودپا سومے کوسلاگ سکونشیگ، یانگ کھیوجا زادکھانّی خُدے شیشیسّی نانّگا لدانین سونگتے کھیوجے سچودپا کھونگی ژوگس گیورچوگشیگ۔ 11 تے میتشے سومابوے نانّگا کھیوجاگون یہُودی پا یا یہُودی مانکھان، لقپہ ہلژخمہ چوکھان یا ماچوکھان، ژانیولّی می، سچودلام میدکھانّی می، تشیوگ یا رانگوانگچان اینچیسپو کھاگچان مانوگ، اِین نانگ تشانگمیسانگ کھاگچانبو نی مسیحا اینوگ، یانگ کھونگ نگاتانگ تشانگمے نانّگا جوگسانوگ۔ 12 کھیوجاگون خُدے لدامسکھانّی ہلژخمہ تانگ چیسپاگون این پاسانگ، رانگدانگرانّگا سنینگرجے، ژانسیم، پاسمو، نیامشونگ تانگ زودپے کوسگون سکونشیگ۔ 13 کھیوجا جانمے گیابگالّا زیرگیو یودنا، زودپا چوستے تیگونلا مُعافی تونگشیگ۔ مسیح کھیوجاگونلا مُعافی سالکھان تسوگسلا کھیوجاگونّیانگ چیگ تانگ چیگّا مُعافی تونگشیگ۔ 14 تشانگمیسانگ کھاگچان نی، کھیوجے کھیوجارانّگا چامسپے کوسپو سکونشیگ، کابوے نگاتانگون دزومسپو تھونڈیلّی نانّگا بورّانوگ۔ 15 یانگ کھیوجاگون زوگس چیگی یانلاگ تسوگسلا جیدے نانّگا دوگّالا بودّا زاد پاسانگ، مسیح ژیدیا کھیوجے سنینگّونّی نانّگا وانگثول چوگشیگ۔ توسگیون خُدا شُکر ژوشیگ۔ 16 مسیح ستوبسچان لونگون کھیوجاگونّی سنینگ تانگ سیمسّی نانّگا ناسچوگشیگ۔ خُدے سالکھانّی شیسرابس تشانگما نیامپو کھیوجاگونّی چیگ تانگ چیگّا لابجا تانگ کھادا تونگشیگ۔ خُدا ستودکھہ ، زبُور تانگ رُوحانی لو گُون پھول زانے، سنینگنے شُکر جوشیگ۔ 17 یانگ کھیوجے چی جیگ زیرّاد یا چواد، یاب خُدا شُکر چوین تیبو حضرت عیسیٰ مسیح وانگی نانّگا چوشیگ۔ نانگتشانگسگونّی پھیا لابجا۔ 18 ناماگون، کھیوجارانگی ماگپاگونّی وانگی یوگا دوگشیگ، چیازیرنا مسیح لوبٹوگس اینچیسپوے تیتسوگس چوگوشیس اینوگ۔ 19 ماگپاگون، رانگی ناما یاشا چوسشیگ، یانگ کھونگونلا ناگس ماستانشیگ۔ 20 ٹھوگوگون، پھامے زیرکھان تشانگما کھانیونشیگ، تیبوا مسیح تھوگستھادّانوگ۔ 21 اباگون رانگی ٹھوگوا مانگستیانگ لدامستے مابورشیگ، تیزوگ چونا کھونگونی سپوسپا چھاگّانوگ۔ 22 یوگپوگون، کھیوجے دُنیائی سپونبوگونّی زیرکھان تشانگما کھانیونشیگ۔ کھیوجاگونّی کھونگی ستودپا تھوبچیس یا کھونگونی ستا زانے چیگپو مانپا، مسیحا کُوسپا چوچیس تانگ سیمس زانگپو یودچیسپوے تیبو چوشیگ۔ 23 چی لاشیگ چوادنانگ، سنینگ تھاگپانے چوسشیگ۔ می مانپا، مسیح پھیا چوستے این سومشیگ۔ 24 مسیح شزدے ّی تشولّا نورسکال سالچیسپو ایدتو چوشیگ، چیازیرنا کھیوجے جابستوگ جوکھانّی لدینبے سپونبو نی مسیحا جُوگستے اینوگ۔ 25 کالتیس کھیرانگونّی نگانپا چونا، نگانپا چوکھانّی لانبوا چھادپا پھوگین، چیازیرنا خُدے سوانگ چھوگریس چوا زادّا مانوگ۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation