کولوسیپا 2 - New Testament in Ladakhi Langage1 کھیوجا، لودیکیہ پے عبادت خانہے نانگا نگا ماتھوگکھانّی ایمان چان تشانگما ایمانی نانّگا لدانچیسّی پھیا نگے تشیرکھا چوین ثانٹے لاس چوکھانبو کھیوجا ہاگو چوگنیینراگ۔ 2 نگے کھونگونلا سپوسپا سکییچوگچیس تانگ چیسپے نانّگا تھونڈیل چھاچیسّی دودپا چواد۔ کھونگونلا خُدے سانگوے نانّگا بورّا زادکھانّی تھابس، کا بو مسیحا کھونگرانگ این، تیبو ہاگوچیسّی نانّگا لوکھیل گانگپو یونگّوشیسّی نگے دودپا راگ۔ 3 مسیح نانّگا خُدے شیسرابس تانگ یونتانّی ستیر تشانگما واستے یودتے اینوگ۔ 4 سوجیگیانگ کھاسپے سپیراگون تانگستے کھیوجا گوبسکور مینیانچیسّی پھیا نگے تیگون کھیوجا شادّاد۔ 5 زوگسّی تھوگنے نگا کھیوجاگون نیامپو میدنانگ، رُوحانی تھوگنے نگا کھیوجا نیامپو این۔ یانگ کھیوجاگون تھونتے مسیح ایمانی نانّگا ستانپو دُوگستے یودکھانبو تشورتے نگا تھادپو سونگ۔ مسیح نانّگا میتشے تشانگریگسشیگ۔ 6 تینّابویپھیا کھیوجاگونّی حضرت عیسیٰ مسیح کھیوجارانگی مسیح اینکھانبو ایمان چوا تسوگسلا تارُوانگ کھونگی نانّگا دوگشیگ۔ 7 کھیوجاگونّی مسیح نانّگا پاٹاگ کیانگستے یارگیاس چوین، ایمان بو ستانپو چوشیگ کازوگی کھیوجاگونلا لابستے اینپین۔ تینے کھیوجاگونّی توسگیون خُدا شُکر جوین۔ 8 سوجیگیانگ کھیوجاگونلا تونتاگ میدکھان تانگ زُوسما لابجاگون گیُودتے، گوبسکور میچوگچیسلا شانگ چوشیگ، تے لابجاگون مسیح مانپا، میی لوگثول تانگ دُنیائی نگانپا رُوحانی وانگّونّے یونگستے اینوگ۔ 9 گوبسکور میچوگچیسپو تانتان چوشیگ، چیازیرنا مسیح سکوزوگسّی نانّگا خُدے گانگپو ناستے اینوگ۔ 10 کھیوجاگون مسیحا نیامپو چیگڈیل چھاچیسپوے کھیوجے نانّگا یانگ چانگ گھوسدوم لوسّا مانوگ۔ کھونگ نی وانگ یودکھان تانگ وانگثولپا تشانگمیسانگ چھیشوگپو جُوگستے اینوگ۔ 11 کھیوجے، مسیح نانّگا ایمان چواچیگ، کھیوجاگونّی سیمسلا لقپہ ہلژخمہ چوا زادتے اینوگ، تے لقپہ ہلژخمہ بو میی لاگپانے ماچوا، مسیحا کھونگرانگی زادتے کھیوجے نانّگا یودکھانّی دِیگپاچان دودپے وانگبو چادّا زادس۔ 12 کھیوجے غوتا لینّاچیگ، کھیوجاگون شیتے مسیحا نیامپو سوبستے این۔ یانگ کھونگ نیامپو سونپوانگ لانگستے اینوگ، چیازیرنا کھیوجاگونّی مسیحا شیکھانّی ٹونے سونتیا لانّگا زادکھانّی خُدے، تے کھیود پوے نانّگا ایمان چوستے اینوگ۔ 13 دِیگپا تانگ دِیگپے دودپاگونّی کانے میتھارچیسپوے جاستے، رُوحانی تھوگنے کھیوجاگون شیتے اینپین۔ تینیانگ خُدے نگاتانگی دِیگپا تشانگما مُعافی سالّا زادتے، مسیحا نیامپو کھیوجاگون سونتیا لانّگا زادس۔ 14 خُدے نگاتانگی گیابگالّا گواہ تانگکھانّی دِیگپے تھوگون شیگستے، مسیح کیانگشینگیکا زیرو گیابستے میدکھان چوا زادس۔ 15 تیزوگ زادتے خُدے وانگ تانگ وانگثولکھانّی نگانپا سیمسنید تشانگمے وانگبو میدکھان چوا زادس۔ مسیحا کیانگشینگیکا ڈونگستے سونتیا ژانگسچیس گیُودتے، سروک یودکھان تشانگمے لدُونلا تیگونلا ٹھیلچوگّا زادتے گیالکھا نینّا زادس۔ 16 تینّابویپھیا کھیوجاگونّی چیریگ زاد یا تھونّگاد، شریعتی یا نامگانگی توسچھین تسیچیس، شابّادّی جاگّون میثونگچیسلا سکیون پھینگکھانگونلا سنانّگا ماتانگشیگ۔ 17 تے شریعت تشانگما سکیودچیسچانّی نگوسمابوے ٹیبکیاگ اینپین، تا مسیحا نی تینّا نگوسمابو این۔ 18 پاسمو ستانزون یانگ فرشتا چولچیسّی نانّگا ما تھادپو چوکھانگونلا، کھیوجاگون خُدے لدینبے لامنے تھاگرینّگا کھیر ماچوگشیگ۔ خُدے کھونّگا نییلام گیُودتے تیگونّی سکورلا شادّا زادس زیرّانوگ۔ اِین نانگ کھونگی دِیگپاچان سامباگونّی کھونگون پھوسوچان گیور چوگستے اینوگ۔ 19 تیگونّی ڈیلبو مسیحا نیامپو چھادتے اینوگ، کا بو کھونگونی او این۔ یانگ مسیح زوگس گانگپو (یانگنا عبادت خانہ پو) شا تانگ گیوسپا گُونی نیامپو زومستے بورّا زادتے خُدے تھوگّونگس نانگجینلا لدان چوگّا زادّانوگ۔ 20 کھیوجاگون مسیحا نیامپو شیچیسپوے، کھونگی دُنیائی نگانپا رُوحانی وانگثولپاگونّی یوگنے کھیوجا تھار چوگّا زادس، تینے چیا کھیوجے تارُوانگ دُنیائی ٹھیمسگونّی کھانیانّاد؟ 21 سپیرنا لاگپا ماکھورشیگ، مانیانگشیگ، یانگ لاگپا ماتھوگشیگ زیرّانوگ۔ 22 تے تشیرکاگون کولتے ستینگنے میدکھان چھاچیسپو خُدے تھابسلدینّگا زادس، چیازیرنا تیگون میی لابجا تانگ کا تانگکھانگون مانے یانگ چانگ مانوگ۔ 23 میگونلا تے شریعت پو شیسرابسچان تھونّگانوگ چیازیرنا تے شریعت دیکا کھونگونلا چیتشانگمیسانگ تیبو کھاگچان سامچیس، پاسمو چوستے ہلژخمہ تھونگچوگچیس، تانگ رانگی زوگسپوا ناگس ستانچیس گُون لابّانوگ۔ اِین نانگ لدینبا کھونگونلا رانگرانگی دودپا نگانپاگونلا پھامکالچیسّی نانّگا تے ٹھیمسگونّی روگس چوا مانوگ۔ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation