ཆག༌ལས༌གུན༌ 8 - New Testament in Ladakhi Langage

¹ یانگ حضرت ستِفنُس سادچیسّی نانّگا ساؤل لیانگ چھوگسّکیور چوستے اینوگ۔ تینّا جاگنے پھارلا یروشالیمّی نانّگا یودکھانّی عبادت خانہ لا ثانٹے ناگس ستانچیس گوزوگ، تیبوے جاستے رسُول گُون ماستوگ جان ایمان چان تشانگما یہُودیہ تانگ سامریہ یولجونگس گانگپوے نانّگا بیتے شورگوس۔

یروشالیمّی عبادت خانہ لا ناگس ستانس۔

² خُدے سچودلامیکا ڈولکھان کھاچیگی حضرت ستِفنُسی جنازہ بو کھیرتے قبرستانی نانّگا بورس، یانگ کھونگی پھیا ردوگپو ثانٹے چوس۔

³ اِین نانگ ساؤلی، عبادت خانہ ٹھیسّتور چوسچیس گوزوگ، کھانگپا ریریے نانّگا سونگتے کھوے ایمان چانّی بُوژا تانگ بومو تشانگما ٹودتے کھیرتے تسونلا کاگّادپین۔

فِلپُسی سامریہ نانّگا گاموےناتسُول شادس۔

⁴ ایمان چان شورکھانّی میگون کارُو لیبنانگ گاموےناتسُول شادین سونگ۔

⁵ فِلپُس سامریہ گیالسا لیبّاچیگ، کھوے خُدے لدامّا زادکھانّی مسیح سکورلا شادس۔

⁶ فِلپُسی سپیراگون تشورتے یانگ کھوے معجزہ گون تھونگپا، میگونّی کھوے سپیراگون ما نانگستاگ تانگستے نیانّادپین۔

⁷ سپیرنا می مانگپوجیگی نانگنے ردودگون پھینگسپا تیگون کُوچو تانگین بینگتے سونگ، یانگ کھونگسکھان تانگ جاو مانگپو گیال۔

⁸ تیبوے جاستے تے گیالسے میگون مانگپو تھاد۔

شمعُوؔن جادُو چوکھان۔

⁹ توس بانچیگی سنگونلا شمعُوؔن زیرکھانّی میجیگی کھورانگی جادُو چوچیسّی کھیود گیُودتے سامریہ یول میتشانگما ہالاس چوگستے کھوے کھورانگ ما می ٹاگپوجیگ این زیرّادپین۔

¹⁰ تے یولّی می کھاگچان تانگ نیامشونگ تشانگمے، کھوے زیرکھانگونلا سنانّگا ماثانٹے تانگستے کھونگونی زیرّادپین، ”ای می بوے نانّگا خُدے کھیود چھینمو دوگ۔“

¹¹ توسبانشیگنے پھارلا کھوے جادُو چوچیس گیُودتے میتشانگما ہالاس چوگسپا میگونّی کھوے سپیراگونلا گیالّا چوستے نیانّادپین۔

¹² اِین نانگ فِلپُسی خُدے گیالثید تانگ حضرت عیسیٰ مسیح سکورلا گاموےناتسُول پو شادس، یانگ میگونّی ایمان چوستے غوتا لینس، بُوژا تانگ بومو نیسکوے۔

¹³ جادُو چوکھان شمعُوؔن یانگ ایمان چوستے غوتا لینس۔ فِلپُس کارُو چھانانگ کھو ستینگرانگنے سونگ یانگ معجزہ تانگ ستاگس گُون تھونگتے کھو ہانڈانگ سونگ۔

¹⁴ تینے یروشالیمّی نانّگا رسُول گُونلا سامریہ پاگونّی خُدے کیکا ایمان کھیونگستوگ زیرتے تشورپا، کھونگونی حضرت پطرؔس تانگ حضرت یُوؔحنّا ٰ نیسکو تے یولّا کالس۔

¹⁵ حضرت پطرؔس تانگ حضرت یُوؔحنّا ٰ تیرو لیبّاچیگ، سامریہ پا ایمان چانگونلا ہلژخمہ رُوح بابسشیسّی پھیا دُعا جوا زادس،

¹⁶ چیازیرنا کھونگونلا حضرت عیسیٰ مسیح مِنتخسی نانّگا غوتا تھوبنانگ تارُونگ تشوگپا سوجیگیکانگ ہلژخمہ رُوح مابابسّا اینپین۔

¹⁷ تینے کھونگ نیسکوے کھونگّونّیکا لاگپا بورّا زادّاچیگ، کھونگ تشانگمیکا ہلژخمہ رُوح بابس۔

¹⁸ رسُول گُونی چھاگ بورچیسپوے ہلژخمہ رُوح تھوبّا تھونّگاچیگ، شمعُوؔن ی کھونگ نیسکوے لدُونلا پینے پھولتے زیرس

¹⁹ ”نگے لاگپا بورکھانگونلانگ ہلژخمہ رُوح تھوبچیسّی کھیود پو نگا سالّا زاد۔“

²⁰ اِین نانگ حضرت پطرؔس سی کھوا مولس، ” کھیرانگی پینے تانگستے خُدے کھیود پو نیونیانّانوگ سامپا کھیرانگ تانگ کھیرانگی پینے نیسکو میدکھان سونگشیگ۔

²¹ کھیرانگی سنینگ خُدے سکوندونلا ٹانگپو میدچیسپوے کھیورانّگا نگاجا نیامپو ای لاس چوچیسّی نانّگا چانگ کھاگ میدپا اینوگ۔

²² کھیرانگی نانّگا نگانسیمس سکییکھانبوے پھیا گیودپا چوستے مسیحا دُعا جوس۔ چی گیُوس کھونگی کھیرانگی تے سیمسنگان سامکھانبوا مُعافی سالثیدین۔

²³ نگا تھونگچیسلا کھیرانگی سنینگ تشیگری گنگستے کھیرانگ دِیگپے زومستے بورتے دوگ۔“

²⁴ تینے شمعُوؔن ی زیرس، ”نیرانگی مولکھانگون نگیکا میبابسشیسّی پھیا جوجو مسیحا دُعا جوا زاد۔“

²⁵ حضرت پطرؔس تانگ یوحنّانی مسیح کا شادّا زادچیس تانگ گواہ سالتے ستینگنے یروشالیمّا لوگستے سکیود زانے سامریہ گامیول مانگپوجیگی نانّگانگ گاموےناتسُول شادّا زادس۔

فِلپُس تانگ ایتھوپیپا تھوگ۔

²⁶ مسیح فرشتاجیگی فِلپُسب لا مولس، تا لو چھوگسلا یروشالیم نے گازا چھوگسلا چھاکھانّی تھانگلامبویکا سونگ۔

²⁷ تینے کھو سونگ یانگ لامّا کھوا ایتھوپیپا میجیگ تھوگ، کا بو ایتھوپیپے ما وانگچان گیالمو کانداکی زیرکھانبوے بانگدزودّی لونپو اینپین۔ کھو یروشالیمّی بیت المقدِس لا چولّا سونگتے

²⁸ شینگستے نانّگا جونتے رانگیولّا لوگستے چھا زانے پیغمبر حضرت یسعیاہ شوقبُو سیلّادپین۔

²⁹ تینے ہلژخمہ رُوح بوے فِلپُسب لا مولس، ”تا شینگستے نیموا سونگ۔“

³⁰ فِلپُس گیُوگستے شینگستے نیموا سونگ، یانگ شینگستیکا جونتے یودکھانبوے پیغمبر حضرت یسعیاہ شوقبُو سیلین یودکھانبو تشور۔ فِلپُسی کھوا ٹیس، ”نیرانگ ای سیلین یودکھانّی تونبو نیرانّگا ہاگوا؟“

³¹ تے می بوے لانتانگس، ”ہاگوچوگکھان میدپا، نگا کازوگی ہاگو تھوبین“، یانگ فِلپُسب لا کھو نیامپو شینگستے نانّگا ژونّالا زیرس۔

³² کھوے سیلاین یودکھانّی ہلژخمہ شوقبُو بو نی، ”کھونگ لُوگ تسوگسلا سادّالا کھیرس، یانگ کازوگ لُوگ رانگی بال ڈاگکھانّی لدُونلا کھاروگستے دوگّاد، تینّا تسوگسلا کھونگ یانگ رانگی جال ماپھیس۔

³³ ٹھیلبا چوینّانگ کھونّگا ٹانگپو شاگس ماچوس۔ کھونگی اولاد ی سکورلا سوینگ شاد مینیان، دُنیائی کانے کھونگی میتشے چھونگونلا کوگستے کھیرس۔“

³⁴ لونپوبوے فِلپُسب لا زیرس، ”پیغمبری ای تشیگسپو کھونگرانگی سکورلا ڈِیازادتے اینّوگا یا جانماجیگی سکورلا، شزدے زادتے نگا ہاگوچوگازاد۔“

³⁵ تینے فِلپُسی شوقبُو بوے تینّا تشیگسپونے گوزوگستے کھوا حضرت عیسیٰ سی سکورلا گاموےناتسُول شادّا زادس۔

³⁶ کھونگون لامنے چھا زانے چھو یودسے ناسّاجیگّا لیبپا، لونپوے زیرس، ”زیگسّانگ ایکا چھو دوگ، تا چیا نگے غوتا میلین۔“

³⁸ کھوے شینگستابو گھوگ زیرتے کا تانگس، فِلپُس تانگ لونپو نیسکو چھوی نانّگا ژوگس، یانگ فِلپُسی کھوا غوتا تانگس۔

³⁹ کھونگون چھونے پھیلوگا بینّگاچیگ، خُدے رُوح بوے فِلپُس کھوے دونّے کھیرّا زادپا لونپوے کھونگ یانگ مانے ماتھونگ، یانگ خُدا ستودپا پھولین کھورانگی یولّا لوگستے سانگ۔

⁴⁰ فِلپُسی کھورانگ ازوتوس گیالسا لیبتے تھونگ، یانگ قَیصرؔیہ لیب لیب تشوگپا کھونگ چھاکھانّی ڈونگکھیر تشانگمے نانّگا گاموےناتسُول شادین سونگ۔