ཆག༌ལས༌གུན༌ 4 - New Testament in Ladakhi Langage

حضرت پطرؔس تانگ حضرت یُوؔحنّا ٰ ژوکسپے لدُونلا کھیرس۔

¹ حضرت پطرؔس تانگ یوحنّانی میمانگسلا لابجا سالین یود زانے اِمام گُون، بیت المقدِس ثونگکھانّی ماگسپون تانگ صدُوقی پاگون تیرو یونگس۔

² تے اُسکیونگونلا ثو یونگستے یودپین۔چیازیرنا رسُول گُونی میتشوگسلا حضرت عیسیٰ سی گیُودتے شیکھانگون سونتیا لانّگا زادچیسّی لابجا سالّادپین۔

³ کھونگونی حضرت پطرؔس تانگ حضرت یُوؔحنّا ٰ زومستے ستینگماجاگ تشوگپا تسونکھانّگا کاگچوگس، چیازیرنا مونڈیگ سونگ تشارتے یودپین۔

⁴ اِین نانگ کھونگی چھوس تشورکھان مانگپوے حضرت عیسیٰ مسیح یکا ایمان کھیونگس، ایمان چانگونّی ٹانگسکا ستونگ رثنا زامشیگ یودپین، کابوے نانّگا بومو تانگ ٹھوگوگون ماتھیا اینوگ۔

⁵ تینے ستینگماجاگا یولّی سپونبوگون، اُسکیونگون تانگ شریعتی عالِم گون یروشالیمّا دزوم۔

⁶ اِمامِ اعظمی حنّا، کائفاس، اِمام چھینموے نین۔ حضرت یُوؔحنّا ٰ، اسکندریہ تانگ جانگون تیٹھوا یودپین۔

⁷ کھونگونی حضرت پطرؔس تانگ حضرت یُوؔحنّا ٰ ژوکسپے لدُونلا بودتے ٹیس، ” کھیرانگونّی سوی وانگی نانّگا یا سوی مینگ کھورتے تے لاسگون چوستے این؟“

⁸ تینے ہلژخمہ رُوح بوے گنگستے حضرت پطرؔس سی لانتانگس، میگونّی مالِک تانگ اُسکیونگ گُون،

⁹ نگاجے کھونگسکھانّی می پھانچوگستے لاس زانگپو چوچیسپوے، دیرینگ نگاجا ٹیوا ٹیادا؟ کھو کازوگی گیال، گیوسچھا میراگا ؟

¹⁰ ای بُو کھیوجا تانگ بنی اِسرائیل پا تشانگمے شیسگوس، حضرت عیسیٰ مسیحاناصرة پا کھیوجے کیانگشینگیکا کیانگس اِین نانگ خُدے کھونگ شیکھانگونّی ٹونے سونتیا لانّگا زادسکھانّی ستوبسچان مِنتخسی نانّگا ای میبو پھانتے کھیوجے لدُونلا لانگستے اینوگ۔

¹¹ کھونگی سکورلا شوقبُو بوے نانّگا مولتے اینوگ، کا ردوابو کھانگپا سیگکھانگونّی پھانمیتھوگس تھیس، تینّا ردوابو کھانگپے ٹُوردوابو گیور کا بو تشانگمیسانگ کھاگچان ردوابو اینوگ۔

¹² حضرت عیسیٰ مسیحاماستوگس جان سوجیگ گیُودتے نگاتانّگا تھارپا میتھوب، دُنیا گانگپوے نانّگا جان سوجیگّا خُدے تے مینگبو سالّا مازادس، کا بو گیُودتے نگاتانگونلا تھارپا تھوبین۔

¹³ تینے کھونگونی حضرت پطرؔس تانگ حضرت یُوؔحنّا ٰ ماسیلکھان، کھاسپا می مان اِین نانگ ما سپوسپا نیامپو گواہ تانگچیس تھونگتے ہالاس، یانگ کھونگ نیسکو حضرت عیسیٰ سی ٹوپا اینکھانبو ہاگو۔

¹⁴ کھونگونی پھانچوگکھانّی میبو کھونگ نیامپو لانگستے یودپا، کھونگونلا حضرت پطرؔس تانگ یوحنّانی گیابگالّا چانگ زیر مانیان۔

¹⁵ تیبویپھیا کھونگ نیسکو یہُودی پے تشوگسدونے پھیلوگا پھینگس، یانگ کھونگونی ٹابس چوستے چیگ تانگ چیگّا ٹیس،

¹⁶ ”نگاتانگونّی ای می نییسکوا چی چوین؟ تے ستاسپو ماچونگ نگاتانگی زیر مینیان چیازیرنا کھونگونی معجزہ ستانکھانبو یروشالیم پا تشانگمالا گیُوس اینوگ۔

¹⁷ اِین نانگ حضرت عیسیٰ سی سکورلا لونبو میمانگسّی نانّگا تارُوانگ می گیاسچیسّی پھیا نگاتانگی کھونگ نییسکوا تانیپھارلا حضرت عیسیٰ سی مینگ کھورتے چھوسشاد میچھوگ زیرتے کاتانگین۔“

¹⁸ تینے کھونگ نیسکو نانّگا بودتے حضرت عیسیٰ سی سکورلا سوانگ سپیرا یا چھوسشاد میچھوگ زیرتے کا تانگس۔

¹⁹ اِین نانگ حضرت پطرؔس تانگ یوحنّانی کھونگونلا مولس، ”کھیوجے چی سامّاراگ، خُدے سکوندونلا کا بو ٹانگپو اینوگ، کھونگی کا کھانیانچیسپو اینّوگا یا کھیوجے؟

²⁰ نگاجے تھونگکھان تانگ تشورکھانگون میگونلا ماشادّادوگ نیانچیس مید۔“

²¹ تے چونگکھانبو تھونگتے می تشانگمے خُدا ستودپا پھولپا، میگونّی ہیلینگس ماپھینّگا یہُودی پے ژوکسپے کھونگ نییسکوا چھادپا کازوگشیگ چادچیسپو تھاگچاد مانیان۔ تینّابویپھیا کھونگونی سپانگپودتے کھونگ نیسکو پھودتانگس۔

²² معجزہ زادتے پھانچوگکھانّی میبوا لو ژیبچو سانگ مانّگا چھادپین۔

ایمان چانگونّی سپوسپے پھیا دُعا۔

²³ کھونگ نیسکو پھودتے ستینگنے جان ایمان چان فونو گونّی ٹوا سونگ یانگ اِمام کُنی چھونمو تانگ اُسکیونگ گُونی زیرکھان تشانگما کھونگونلا شادس۔

²⁴ کھونگونی تیبو تشورّاچیگ تشانگمے سکاد چھینموے نانّگا خُدا دُعا جوس، ”کیے مسیح، نیرانگ ای نامکھا، دُنیا، گیاتشو تانگ تیگونّی نانّگا یودکھان تشانگما زادتے این۔

²⁵ ہلژخمہ رُوح گیُودتے نیرانگی یوگپو نگاجے اتا اپو گیالپو داؤد ّی ژالنے مولس، ’گیالکھاگگونلا ثو ثانٹے چیا یونّگانوگ۔ میگونّی گومیچھودچیسّی جوسنگان چیا لدینّگانوگ۔

²⁶ خُدے تانگ کھونگی لدامّا زادکھانّی مسیح گیابگالّا، دُنیائی گیالپوگون رماگی پھیا ڈالڈیگ دوگ، یانگ وانگثولپاگون دزومستے دوگ۔‘

²⁷ تانتانلا ای گیالسے نانّگا گیالپو ہیرودِیس تانگ رومی کالون پنطیُس پیلاطُس، یہُودی مانکھان گُون تانگ بنی اِسرائیل پاگون نیامپو دزومستے نیرانگ ای لدامّا زادکھان ہلژخمہ جابستوگپا حضرت عیسیٰ سی گیابگالّا جوسنگان لدینگس۔

²⁸ کھونگونی مسیحا چوسکھانبو نی نیرانگی وانگ تانگ تھوگّونگس نانگجین سنگونلا تھاگچادّا زادتے اینپین۔

²⁹ تا کیے مسیح، کھونگونی لدامجاگ تانگسکھانبو سانّا زادتے نگاجا نیرانگ ای یوگپوگونلا نیرانگی ہلژخمہ کا ہامپا نیامپو شادچیسّی شید سال۔

³⁰ نیرانگی چھاگ کیانّگا زادتے گیالچوگچیس، نیرانگی ہلژخمہ جابستوگپا حضرت عیسیٰ سی تشان وانگچانّی نانّگا معجزہ ستاگس تانگ معجزہ چوا زاد۔“

³¹ دُعا چو تشارّاچیگ کھونگون دزومستے یودکھانّی نانگبو سکولّا زادس۔ تشانگما ہلژخمہ رُوح بوے گنگستے خُدے حُکم ہامپا نیامپو شادس۔

ایمان چانگونّی نورگون گوستے تانگس۔

³² ایمان چان تشانگما سنینگ سیمس تھونتے سوجیگیانگ رانگی نوربو نگارانگی این مازیرّا چیتشانگما جانماگون نیامپو گوادپین۔

³³ رسُول گُونی ستوبس چھینمو نیامپو حضرت عیسیٰ مسیح شیکھانگونّی ٹونے سونتیا جانگسکھانبوے گواہ تانگس یانگ تشانگمیکا شزدے چھینمو بابس۔

³⁴ کھونگونی ٹونے گھوسدومچان سوانگ میدپین، چیازیرنا جینگ یا کھانگپا یودکھانگونّی تیگون تسونگستے

³⁵ رسُول گُونی جابسّی لدُونلا تے پینیگون پھولّادپین۔ تینے کھونگونی گھوسدوم نانگجین تیبو تشانگمالا گوستے سالّادپین۔

³⁶ نور تسونگکھانگونّی نانگنے کُپُرؔس سی یولنے بنی اِسرائیل میریگس لاوی پا حضرت یُوسفؔ زیرکھانجیگ کابوا رسُول گُونی برنباس مینّگا تاگس (تیبوے تونبو ”سیمسّتوبستانگکھانّیبو“ زیرتے اینوگ)۔

³⁷ کھوے رانگی جینگبو تسونگس یانگ پینیبو کھیونگستے رسُول گُونی جابسّی لدُونلا پھولس۔