ཆག༌ལས༌གུན༌ 27 - New Testament in Ladakhi Langage

حضرت پولُس رومّا کھیرس۔

¹ نگاجا گُون ٹُھوزینگی نانّگا اٹلی یولّا کالچیس تھاگچادّاچیگ، کالونّی حضرت پولُس تانگ جان تسونپا کھاچیگ ماگیے سپونبو یولیوس زیرکھانّی لاگا ستادس، کھو رومی گیالپوے میگسالّی ماگمیی نانگنے اینپین۔

² نگاجا گُون اڈامیدیمنے لیبکھانّی ٹُھوزینگجیگّا ژونتے سونگپین، کا بو آسیہ یولجونگسّی تشوے تھاما یودکھانّی ناسّاگون گیُودتے چھاچیس اینپین، یانگ مکدنیہ یولجونگسّی تھسلُنیکے گیالسانے اینکھانّی ارِسترخُس نگاجا نیامپو یودپین۔

³ ستینگماجاگپو صیدا گیالسا لیبّاچیگ، گھوسدومگون تھوبچیسّی پھیا یولیوسّی شزدے چوستے حضرت پولُس لا کھونگی دزاوگون نیامپو تھوگچیسلا گونگسپا تانگس۔

⁴ تیکانے نگاجا گُون ٹُھوزینگا جونس یانگ لونگسپو نگاجا چھین یودسے گولوگپوا یونگسپا، نگاجا لونگسپو میدسا کُپُرؔس تشولینگ، یوما چھوگسلا بورتے سونگپین۔

⁵ تینے نگاجا گُون کِلِکیہ تانگ پمفیلیہ نیموا یودکھانّی گیاتشو گیُودتے لیگیا یولجونگسّی میرا گیالسا بابسپین۔

⁶ تیرو ماگیے سپونبوا اسکندریہ گیالسانے اینکھانّی ٹُھوزینگ، اٹلی یولّا چھاکھانجیگ تھوبپا نگاجا گُون تیبوے نانّگا سکیونس۔

⁷ نگاجا یودکھانّی ٹُھوزینگ، جاگ مانگپو کولیا مانے ثول مانیان، یانگ کاگسپو نیامپو نگاجا کنیدوس گیالسا لیب۔ لونگراگ یودچیسپوے، نگاجا چھین یودکھانّی لامیکا چھا مانیانپا، نگاجا گُون سالمونے چھوگسنے لونگسپو گھاگچیسلا کریتے تشولینگ یاسپا چھوگسلا بورتے سونگپین۔

⁸ یانگ گیاتشوے تھاما تھامانے ما کاگسپو نیامپو نگاجا گُون جیگسپا مید زیرکھانّی ناسّا لیب، کا بو لاسیا گیالسے نیموا یودپین۔

⁹ تیرو لیبچیسلا ما جاگ مانگپو گور، یانگ نامزا سوگپو لوسشیسّی توسپو لیبپا گیاتشوے نانّگا ٹُھوزینگ ثولچیسپو ما جیگسپاچان گیورّادپین۔ حضرت پولُسی کھونگونلا کھادا سالین مولس،

¹⁰ ” فونو گون نگے سامبے نانّگا نگاتانگونّی سفر پو ما جیگسنانگچان گیورچیسدوگ سامّاراگ، نور تانگ ٹُھوزینگی کودکھا ماتشاد نگاتانگونّی ثوگّانگ سکیالچیسّی جیگسپا دوگ۔“

¹¹ اِین نانگ ماگیے سپونبوے، حضرت پولُسی مولکھانّی سانگ ٹُھوزینگ ثولکھانّی سپونبو تانگ ٹُھوزینگی داگپوے زیرکھانبوا نیانچیس سامباچان تشور۔

¹² تے ناسّابو گُونلا دوگچیسّی پھیا گیالّا مانپا، می مانگچھیابوے پھونیگسّی گیالسا لیبچیسّی ریوا بورتے چھاچیسلا تھاگچادس۔ پھونیگس کریتے تشولینگی ٹُھوزینگ بورسے ناسّا، کا بو لونوب تانگ چانگنوب چیگپونے گیاتشوے چھوگسلا بیتے یودچیسپوے لونگسپو ثانٹے یونّگا میدپین۔

گیاتشوے نانّگا لونگراگ تانگ چھولباگ۔

¹³ لو چھوگسنے لونگسپو جامپو یونگچیس گوزوگ چھاچیگ، ٹُھوزینگ ثولکھانگونّی پھونیگسلا کھامزانگ لیبچیس سونگ سامستے کھونگونی ٹُھوزینگبو ٹولتے کریتے تھامانے ثولتے کھیرس۔

¹⁴ بینگتے توس مانگپوجیگ ماچھا کریتے چھوگسنے لونگراگ ٹاگپو یونگس، کابوا چانگشارّی لونگسپو زیرّادپین۔

¹⁵ لونگراگ ٹاگپوے جاستے ٹُھوزینگبو پھونیگسّی چھوگسلا کھیر مانیانپا، کھونگونی ٹُھوزینگبو لونگسپوے کھیرس ا چھوگسلا پھودتانگس۔

¹⁶ کودا تشولینگی لونگسپو میدسا چھوگسنے نگاجا گُون چھا زانے، سروک سکیوبّی ٹُھوزینگ چھونگونبو نگاجا ما کاگسپو نیامپو سکیوبنیانتے ٹُھوزینگ چھینمویکا ستاگس۔

¹⁷ تینے ٹُھوزینگ چھینموبو چھاگچیسنے سکیوبچیسلا کھونگونی ستاگنے یوگ تشوگپا تھاگپا نیامپو لدامس، یانگ ٹُھوزینگبو سیرتیسّی ناسّے کھورلا پیمے نانّگا نیرچیسّی جیگسپا یودپا کھونگونی ٹُھوزینگ کولیا ڈولچوگکھانّی یولابو چھوی نانّگا پھابس، یانگ لونگسپوے ٹُھوزینگبو ثولتے کھیرس۔

¹⁸ لونگراگ تانگ چھولباگ ثانٹے ٹُھوزینگبوا پھوگسپا، ستینگماجاگپو ٹُھوزینگ یانگمو چوچیسلا کھونگونی تینانّگا یودکھانّی چالاگّون چھوی نانّگا پھانگچیس گوزوگس۔

¹⁹ جاگ سومپے جاگّا ٹُھوزینگ ثولکھانگونّی ٹُھوزینگی لاگچھا تشانگمانگ پھانگس۔

²⁰ گیاتشوے نانّگا لونگراگ تانگ چھولباگ ماچادّا جاگ مانگپو نییما یا سکارما ماتھونگ پاسانگ، نگاجا تھارچیسّی ریوا مالوس۔

²¹ میگونّی زان مازا جاگ مانگپو سونگپا، حضرت پولُس کھونگونی ٹوا لانگستے مولس، ” فونو گون، کالتیس کھیوجاگونّی نگے زیرکھانبوا نیانتے کریتے نے ما بینگپینّا ایتسوگسّی نودسکیال تانگ کودکھا سونگتے میدڈو۔

²² اِین نانگ نگے کھیوجاگونلا تارُوانگ ریوا ستانپو بورچیسلا زیرّاد، چیازیرنا کھیوجے ٹونے سوانگ میشی، ٹُھوزینگ چیگپو ٹھیسّتور چھین۔

²³ نگے جابستوگ جوکھان خُدے حُکم بوے نگا این، کھونگی فرشتا، تانگ ژانلا نگا یودسا سکیودتے

²⁴ مولس، لے پولُس جیگس ماجیگس، کھیرانگ رومی گیالپوے لدُونلا شاگس چادّی پھیا تانتان لیبین، یانگ لتوس خُدے کھیرانگ نیامپو ٹُھوزینگی نانّگا یودکھان تشانگماں سکیوبین۔

²⁵ تینے ٹوپاگون ریوا تھونپو بور، نگے ایمان چواد خُدے مولکھانبو ڈانڈا ڈوبین۔

²⁶ اِین نانگ نگاتانگی ٹُھوزینگ تشولینگ جیگی نیموا تانتان کھادین۔“

ٹُھوزینگ چھاگس۔

²⁷ تشان 14 جاگّا نگاجا گُون اڈییا گیاتشوے چھوگسلا لونگسپوے ریلتے کھیر زانے تشانپھید زودچیگّا ٹُھوزینگ ثولکھانگونّی ساکیادّی نیموا لیبتیراگ زیرین تشور۔

²⁸ تینے کھونگونی چھو تسامشیگ کونڈو دوگ تابسپا، میٹار 37 بینگ، یانگ تساپیگجیگ ستینگنے تابسپا، تشادپو میٹار 28 بینگ۔

²⁹ ٹُھوزینگبو ڈاگّا پھوگچیسّی جیگسپے نانّگا کھونگونی ٹُھوزینگ گھاگچیسّی پھیا ٹُھوزینگی جوگنے لچینتے لچاگس تاگسکھانّی تھاگپا ژی چھوی نانّگا پھابس، یانگ ناملانگشیسّی پھیا دُعا جوس۔

³⁰ تینے ٹُھوزینگ ثولکھانگونّی ٹُھوزینگی گونّے لچینتے لچاگس تاگسکھانّی تھاگپا پھابسزون تانگستے شورچیسّی پھیا ٹُھوزینگ چھونگونبو پھابس۔

³¹ حضرت پولُسی ماگیے سپونبو تانگ ماگمی گُونلا مولس، ”کالتیس ای میگون ٹُھوزینگی نانّگا مادوگنا کھیوجے سروک میتھار۔“

³² تینے ماگمیگونّی ٹُھوزینگ چھونگون چینگستے یودکھانّی تھاگپا چادتے گیاتشوے نانّگا بودچوگس۔

³³ ناملانگسّاچیگ حضرت پولُسی میگونلا کھارجی زاچوگچیسلا سونڈوس چوین مولس، کھیوجے جاگ چوبژینے پھارلا جیگسپا تانگ تھےژومسّی نانّگا کھارجیا لاگپا ماسیس۔

³⁴ جوجو نگے کھیوجاگونلا سونتیا لوسشیسّی پھیا کھارجی زاچیسلا جُووا پھولّاد۔ کھیوجا چیگیانگ گوی ثانیاگ چیگ می ستور۔

³⁵ تیبو مولتے ستینگنے کھونگی تاگیجیگ لینتے کھونگ تشانگمے لدُونلا خُدا شُکر پھولتے چاگستے زوس۔

³⁶ تینے تشانگمالا ہامپا سکیستے زان زوس۔

³⁷ ٹُھوزینگی نانّگا یودکھانگونّی ٹانگسکا 276 یودپین۔

³⁸ کھونگون زان زوستے ڈانگسّاچیگ، ٹُھوزینگ یانگمو چھاچیسّی پھیا کھونگونی ٹُھوزینگی نانّگا یودکھانّی ٹوناس تشانگما چھوی نانّگا پھانگس۔

³⁹ ناملانگسّاچیگ گیاتشوے تھامے ساکیادجیگ تھونگ، اِین نانگ کاناسّا این نُگو ماشیس۔ کالتیس نیانّا ٹُھوزینگ تے ساکیادّی نییموے پیمے نانّگا کھادچوگچیسلا کھونگونی تھاگچادس۔

⁴⁰ کھونگونی لچینتے لچاگس تاگسکھانّی تھاگپاگون چادتے گیاتشوے نانّگا پھانگس، تینّا توسلا ٹُھوزینگ کیوگچیسّی شینّگا لدامسکھانّی تھاگپاگون ٹولس، تینے ٹُھوزینگی دونّی یولابو ستاگس تے لونگسپوا ٹُھوزینگبو تھاما چھوگسلا کھیرچوگس۔

⁴¹ اِین نانگ سامکھانّی سانگ سنگونلا ٹُھوزینگی دُونبو پیمے نانّگا کھاد، یانگ گیابّو چھولباگ شیدچانّی جاستے چھاگچیس گوزوگ۔

⁴² تسونپاگون چھوا سکیالتے شورتے میچھاچیسّی پھیا ماگمیگونّی کھونگون سادچیسّی تھابسلدینّگادپین۔

⁴³ اِین نانگ ماگیے سپونبوا حضرت پولُس سکیوبچیسّی دودپا یودپا، کھونگونلا تے تھابسلدینگس نانگجین چو ماچوگس۔ کھوے کا تانگس، گوما سکیالنیانکھانگون ساکیادّیکا چھاچیسلا چھوی نانّگا چھوم،

⁴⁴ یانگ لوسکھانگونّی سپانگلیب تانگ ٹُھوزینگ چھاگکھانّی شینگّونّی روگس لینس۔ تیزوگ چوس پاسانگ تشانگما سا سکامپویکا کھامزانگ بینگنیان۔