ཆག༌ལས༌གུན༌ 26 - New Testament in Ladakhi Langage

اگرِپّے لدُونلا حضرت پولُسی شاگس۔

¹ تینے گیالپو اگرِپّے حضرت پولُس لا زیرس، ”نگے کھیورانّگا کھیرانگ نونگسمید اینکھانّی سکور شادچیسّی سکابس تانّگاد۔“ حضرت پولُسی لاگپا نیامپو شُکر ستاگس چوین مولس،

² ”گیالپو اگرِپّا، دیرینگ نیرانگی سکوندونلا یہُودی پاگونّی کالکھانّی نیادگال تشانگمے گیابگالّا نگارانگ نونگسمید اینکھانبو شادنیانپا، نگا ما سودیچان تشورّاراگ۔

³ چیازیرنا نیرانّگا یہُودی پاگونّی لام لوگثول تانگ ماڈیگکھانّی لابجا تشانگمے سکورلا تھوگیوس اینوگ۔ جوجو نیرانگی نگے زیرچیسچانگونلا زودپا نیامپو نیانّا زاد۔“

⁴ ”نگارانگی یول ماتشاد یروشالیمّی نانّگانگ، نگے چھونگتوسنے پھارلا نگارانگی میتشے کازوگ تشولّا پھودکھانبو یہُودی پا تشانگما گیالّا چوستے گیوسیود۔

⁵ کھونگونی نگا توسیونرینگنے پارلا شیسشیسپے، کالتیس تھادّادنا، کھونگونی نگے نگاتانگی شریعتی تشانگمیسانگ ثانٹے شریعت ثونگکھانّی سدے، فریسی پے میتشے پھودکھانّی گواہ تانگ نیانچیس اینوگ۔

⁶ خُدے نگاتانگونّی اتا اپو گونلا زادکھانّی وعدے نانّگا نگا ریوا یودچیسپوے، دیرینگ نگا ایکا شاگس چوا کھیونگستے اینوگ۔

⁷ نگاتانگی میریگس چوگنییسپوے، تینّا وعدہ بو ڈانڈا ڈوبچیسّی ریوا بورتے تشانّیین، سنینگ تانگستے خُدا جابستوگ جوین اینوگ۔ کیے گیالپو، تینّا ریوا بورچیسّی پھیا نگا یہُودی پاگونّی نیادگال کالتے اینوگ۔

⁸ خُدے شیکھانگون سونتیا لانّگا زادنیانچیسپویکا کھیوجاگون یامتشان چیا چھاراگ؟“

⁹ ”سنگونلا نگیانگ خُدے تھوگستھادّانوگ سامستے ناصرة پا حضرت عیسیٰ سی ایمان چوکھانگونّی گیابگالّا چی چونیانّانگ چوسپین۔

¹⁰ یروشالیمّی نانّگا نگے تینّا ژوگس چوسپین، نگے اِمام کُنی چھونمو گونی کانے وانگچھا لینتے ایمان چان مانگپو تسونلا کاگسپین، یانگ ثوگی چھادپا پھوگکھانگونّی تھاگچادبوے نانّگا نگیانگ چھوگسّکیور چوسپین۔

¹¹ نگا یہُودی پے مجلِس ریرے نانّگا سونگتے کھونگونلا چھادپا چادتے تتلوکچوچوگچیسّی سونڈوس چوادپین۔ کھونگونی گیابگالّا ثو ثانٹے تانگ ناپھراد یودچیسپوے، نگا یول تھاگرینگّونلانگ سونگتے کھونگونلا ناگس ثانٹے ستانپین۔“

¹² ”لانچیگ اِمام کُنی چھونمو گونی کانے وانگچھا کھورتے نگا تینّا لاسپوے پھیا دمِشق چھوگسلا چھادپین،

¹³ لامّا یود زانے نیینگّونگجیگّا، کیے گیالپو، نگا نامکھانے نییمے اودّی سانگ مانّگا لدانگشان ودشیگ بابسین تھونگ، کا بو نگاتانگ نگے ٹوپاگونلا کھورتے دُوگس۔

¹⁴ نگاجا تشانگما سیکا گیل، یانگ نگے سونگسکادچیگ تشور، کابوے نگا عِبرانی سکادّی نانّگا مولّاراگ، ’ساؤل لے ساؤل، کھیرانگی نگا چیا ناگھسباردو ستانّاد۔ نگے دودپے گیابگالّا نولچیسپو نی کھیرانگی کھیورانّگا نودسکیالتے اینوگ‘۔“

¹⁵ ”تینے نگے، ’مسیح نیرانگ سو این‘ جوسپین۔“ ”مسیح لانسالس، ’نگا کھیرانگی ناگھسباردو ستانکھان، حضرت عیسیٰ سی این۔

¹⁶ تا رانگی کانگپیکا لونگس۔ کھیرانگ نگا جابستوگ جوچیس تانگ گواہ تانگچیسلا سکوچیسّی پھیا نگا کھیورانّگا سنگونتے این۔ کھیرانگی داگسا تھونگکھان یانگ یونگچیسّی توسّی نانّگا نگے کھیورانّگا ستانچیسچانگون دُنیائی می گونلا شود۔

^17-18 نگے کھیرانگ کھیرانگی میگون تانگ یہُودی مانکھان گُونی کانے توسگیون سکیوبین۔ کھونگون مونڈیگنے اودّی نانّگا یونگچیس تانگ شیطانی وانگنے پھینگستے خُدے چھوگسلا ٹھیدچیسّی پھیا نگے کھیرانگ کھونگونی میگ پھیچیسلا کھونگونی ٹوا کالّاد۔ تینے کھونگونلا دِیگپاگونّے مُعافی یانگ نگیکا ایمانی جاستے ژانگما گیورکھانگونّی ٹوا ناسّا تھوبین‘۔“

¹⁹ ”تینّابویپھیا، کیے گیالپو اگرِپّا، نامکھانے چونگکھانّی ژالزیگسّی نانّگا مولکھانگون نگے کھانیانپین۔

²⁰ گوما نگے دمِشق، تینے یروشالیم تانگ یہُودیہ گانگپوے نانّگا یودکھانگونلا، تیستینگنے یہُودی مانکھان گُونلا، رانگی سدیگپیکا گیودپا چوستے خُدے چھوگسلا سیمس گیورگوس زیرتے چھوسشادپین، یانگ گیودپا چوکھانبو لاگلین گیُودتے ستانچیسلا زیرپین۔

²¹ تے گیونتشانبوے پھیا یہُودی پاگونّی نگا بیت المقدِس سی نانّگا زومستے سادچیسّی سونڈوس چوس۔

²² اِین نانگ خُدے نگا دیرینگ تشوگپا سکیوبّا زاد پاسانگ، ایکا لانگستے نیامشونگ تانگ کھاگچان تشانگمے لدُونلا نگے گواہ تانّگاد۔ نگے حضرت مُوسیٰؔ تانگ جان پیغمبر گونّی شریعت گُون مولکھانبوے سانگ تھیباجیگ چانگ مازیرپین،

²³ تیبو نی خُدے لدامّا زادکھانّی مسیحا ردوگنگال تھونگچیس یانگ شیکھانگونّی ٹونے گومارانگ سونتیا ژانگسکھانبو اینوگ۔ تینّا لونبو یہُودی پا تانگ یہُودی مانکھان گُونلا تھارپا تھوبچیسّی اوت پو این۔“

²⁴ ہونمیدلا فیستُسی کُوچو تانگستے زیرس، ”حضرت پولُس کھیرانگ چھالچھول سونگتے اینوگ، لوبجونگ مانگپو چوچیسپوے کھیرانگ سنیوچوگستے اینوگ۔“

²⁵ حضرت پولُسی لانسالس، ”سیواچان فیستُس نگا سنیوستے مان۔ نگے زیرکھانگون ٹانگپو این چھالچھول مان۔

²⁶ گیالپوا ایگونّی سکورلا تھوگیوس یودپا نگے کھونّگا چیتشانگما شادنانگ ڈیگستے اینوگ۔ تے ناسّکابس تشانگمے سکورلا کھونّگا گیوسیودچیسپو نگا تانتان راگ چیازیرنا تیگون سانگوے نانّگا ماچوا اینوگ۔

²⁷ اگرِپّا گیالپو نیرانگی پیغمبر گونّی مولکھانگونلا ایمان ّادّا؟ نگا گیوسیود نیرانگی ایمان چوانوگ۔“

²⁸ گیالپو اگرِپّے حضرت پولُس لا زیرس، ”چی کھیرانگی اِیزوگ توس نیونجیگی نانّگا نگا مسیح کا ایمان چوچوگنیانین سامّاراگا؟“

²⁹ حضرت پولُسی مولس، ”توس تھون گُون یودڈو یا رینگمو، نگے خُدا دُعا جُواد، نیرانگ چیگپو مانپا ایکا دزومستے نگے سپیرا نیانکھان تشانگمانگ، نگا ژوگس گیورشیگ، اِین نانگ تسونپا مانکھان۔“

³⁰ تینے گیالپو لانگس یانگ کھو نیامپو کالون، برنیکے تانگ جانما تشانگما لانگستے سونگ۔

³¹ چھین یود زانے کھونگونی چیگ تانگ چیگّا زیرس، تسونلا بورچیس یا ثوگی چھادپا تانگّوشیسّی لاسشیگ ای می بوے چانگ ماچوستوگ۔

³² گیالپو اگرِپّے فیستُس لا زیرس، ”کالتیس ای می بوے رومی گیالپوا کھوے شاگسپوا ٹھیمسچاد چوچیسلا جُووا ماپھولپینّا، کھو پھودنانگ ڈیگچیس دوگ۔“