ཆག༌ལས༌གུན༌ 25 - New Testament in Ladakhi Langageحضرت پولُس فیستُس یودسا کھیونگس۔ 1 قَیصرؔیہ گیالسا کالون فیستُس لیبتے جاگ سومی ستینگنے کھو یروشالیمّا سونگ۔ 2 تیرو اِمام کُنی چھونمو گون تانگ یہُودی پے اُسکیونگون کھوا تُھوگا یونگستے، حضرت پولُسی گیابگالّا اُسکیونگون کالس۔ 3 حضرت پولُس لا شاگسپو یروشالیمّا چوچیسّی پھیا، کھونگ تیرو کالچیسلا کا تانگستے کاٹین چوچیسلا کھونگونی فیستُس لا جُووا پھولس (کھونگونی حملہ چوستے حضرت پولُس لامبارلا سادچیسّی جوسنگان لدینگس)۔ 4 اِین نانگ فیستُسی لانتانگس، ”حضرت پولُس قَیصرؔیہ نانّگا بورتے یود، نگا تیرو گیوگسپا لوگستے چھاچیس این۔ 5 کھیوجے اُسکیونگ کھاچیگ نگا نیامپو لامچوگ، کالتیس کھوے نورٹھول چوستے یودنا تینّارو کھوے گیابگالّا سکیون رجود چوس۔“ 6 یروشالیمّی نانّگا کھونگون نیامپو جاگ گیاد یا رچُو دُوگستے ستینگنےفیستُس قَیصرؔیہ لوگستے سونگ۔ لیبستے ستینگماجاگپو شریعت تی کورسیکا دُوگستے کھوے حضرت پولُس کھیونگچیسلا کا تانگس۔ 7 حضرت پولُس کھیونّگاچیگ، یروشالیم نے یونگسکھانّی یہُودی پاگون کھونّگا کیر سکورتے دُوگستے نیادگال ثانٹے مانگپو کالس، اِین نانگ چیگّانگ لدینبا اینکھانبو تانتان چو مانیان۔ 8 تینے حضرت پولُسی کھونگرانگ نونگسمید اینکھان ستانتے جوس، ”نگے یہُودی پے شریعت یا بیت المقدِس یا رومی گیالپوے گیابگالّا مانکھان چانگ ماچوسپین۔“ 9 اِین نانگ فیستُسی یہُودی پاگونلا کاٹین ستانچیسّی دودپا چوستے کھوے حضرت پولُس لا زیرس، ” کھیرانگ یروشالیمّی نانّگا نگے لدُونلا ای شاگسپوا ٹھیمسچادچیسلا چھا تھادّا راگا؟“ 10 اِین نانگ حضرت پولُسی مولس، ”نگا رومی گیالپوے کھاگکھورپے ٹھیمسکھونّگا این، نگے شاگسّی ٹھیمسچاد اینّارو چھاگوس۔ نگے یہُودی پاگونّی گیابگالّا سکیون چانگ ماچوسکھانبو نیرانّگا گیالّا چوستے گیوس اینّوگ۔ 11 کالتیس نگا گالتے شیچیسّی چھادپا پھوگنانگ، نگا شیچیسّی پھیا جیگسّا میراگ۔ اِین نانگ کالتیس ای یہُودی پاگونّی نگیکا نیادگال کالکھانگون لدینبا مابینگنا تینے نگا ای میگونّی لاگا ستادچیسّی وانگ سوجیگّانگ مید۔ نگے رومی گیالپوا ای شاگسّی ٹھیمسچاد زادچیسلا جُووا پھولّاد۔“ 12 فیستُسی کھورانگی کھاسپا کھادا تانگکھانگون نیامپو ٹابس چوستے زیرس، ” کھیرانگی رومی گیالپوا جُووا پھولپا، رومی گیالپویکا کالین۔“ فیستُس تانگ گیالپو اگرِپّا۔ 13 جاگ کھاچیگی ستینگنے گیالپو اگرِپّا تانگ کھوے سترِنگمو برنیکے قَیصرؔیہ فیستُس لا گاسوس چوستے کُوسپا ستانّالا یونگس۔ 14 کھونگون جاگبانشیگ تیرو دوگسپا، فیستُسی حضرت پولُسی شاگسپوے سکورلا گیالپوا شادس، ”یرو فیلِکسّی تسونلا کاگسکھانّی میجیگ دوگ۔ 15 نگا یروشالیمّا یود زانے، اِمام کُنی چھونمو گون تانگ یہُودی پے اُسکیونگونی ای می بوے گیابگالّا سکیون کالتے کھوا شیچیسّی چھادپا تانگچیسلا نگا زیرّاراگ۔ 16 نگے کھونگونلا رومپے شریعت نانگجین، نامتشوگپا میجیگّا کھوا سکیون کالکھانگونّی لدُونلا کھورانگ سکیوبچیسلا سکابس ماتانّگا سوجیگی لاگا چھادپا چادچیسلا ستادچھوگّا مانوگ زیرپین۔“ 17 ”کھونگون یرو لیبّاچیگ، نگے گور ماچوگّا تھوریزوگپو کھو ٹھیمسچادّالا کھیونگچیسّی کا تانگسپین۔ 18 شیچیسّی چھادپا پھوگچیسّی اوسپا کھونگونی کالکھانّی نیادگالگون میدوگپین کازوگ نگے سامتے یودپین۔ 19 کھونگونی دزینگموبو کھونگرانگونّی شریعتی لابجا کھاچیگیکا کھامیچھامسچیس تانگ شیکھانّی می حضرت عیسیٰ سی زیرکھانبوے سکورلا اینوگ، کا بو حضرت پولُسی سونپو این زیردوگ۔ 20 یتسوگسّی ناسلوگی سارچود تانگچیس نگا ہاماگوپا، نگے کھوا کھیرانگ یروشالیمّا تے شاگسپوا ٹھیمسچاد چوگچیسلا چھالا تھادّا راگا زیرتے ٹیسپین۔ 21 اِین نانگ حضرت پولُسی رومی گیالپوا تے شاگسپو تھاگچادچوگچیسّی پھیا جُووا پھولس، تیبویپھیا نگے کھو رومی گیالپویکا کالچیسّی ڈالڈیگ چھاچھا تشوگپا یرو بورچیسلا کا تانگسپین۔“ 22 تینے گیالپو اگرِپّے فیستُس لا زیرس، ”نگا تے سپیراگون تینّا می بوے کھانیانگ تشورنیین راگ۔“ فیستُسی زیرس، ”نیرانگی کھوا تھورے نیانتھوبین۔“ 23 ستینگماجاگپو گیالپو اگرِپّا تانگ برنیکے ما ستابس چھینمو نیامپو تے ڈونگکھیرّی می سیواچان تانگ ماگمی سپونبو چھینموگون ٹھیدتے تشوگسکھانگی نانّگا یونگس۔ فیستُسی کا تانگسپا حضرت پولُس تشوگسکھانگی نانّگا کھیونگس۔ 24 فیستُسی زیرس، ”گیالپو اگرِپّا تانگ ایکا نگاجا نیامپو یودکھانّی میمانگس، ای میبوا ستوس، کھوے گیابگالّا یہُودی پا تشانگمے یروشالیمّی نانّگا ماتشاد یروانگ کُوچو تانگین، ای میبوا شیچیسّی چھادپا تانگچیسلا نگا زیرس۔ 25 اِین نانگ نگا گیوسّونگ، کھوے شیگوشیسّی چھادپا پھوگچیسّی لاس چانگ ماچوستوگ۔ کھوے رومی گیالپوا کھوے شاگسپوا تھاگچادچیسّی جُووا پھولپا نگے کھو رومی گیالپویکا کالچیس تھاگچادپین۔“ 26 ”اینّانگ رومی گیالپوا کھوے گیابگالّا تانتان چانگ ڈِیچیس مید پاسانگ، نگے کھو کھیوجا تشانگما تانگ میگسال چوستے گیالپو اگرِپّے سکوندونلا کھیونگستے این۔ یانگ نگاتانگی کھوا سارچود تانگستے ستینگنے نگا کھوے شاگسّی سکورلا سپیراریگ رومی گیالپوا ڈیچیسلا تھوبین۔ 27 چیازیرنا تسونپاجیگی اُسکیونگون لاگمو ماشادّا رومی گیالپویکا کالچیسپو اوسپا مانوگ سامّاراگ۔“ |
Ladakhi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation